رواية حبيبي المدير الفصل الثلاثون 30 - بقلم شيماء صبحي
في بدايه يوم جديد صحي ماهر قبل احلام وبص عليها لقاها ماسكه فيه جامد كأنه هيهرب منها فابتسم علي شكلها وقبلها علي جبينها بحب وفضل يتأملها لثواني وبعدها بدأ يسحب نفسه من تحت إيديها بهدوء علشان ميصحهاش وبالفعل قدر ماهر يقوم من جمبها واتجه لغرفة ملابسه وجهز هدومه اللي هيروح بيها الشغل وبعدها خرج ودخل للحمام ياخد شاور وفي الخارج كانت احلام مبتسمه لانها بتحلم بيه والظاهر كده انها بتحلم بذكرى حلوه ليهم ..
خرج ماهر من الحمام بعد دقايق وكان لابس روب ،اتجه لغرفة الملابس علشان يجهز وبعد مرور ربع ساعه كان انتهي وخرج وقرب تاني منها يطمن عليها ولما لقاها لسا نايمه طبع قبله اخيره علي جبينها وبعدها خرج من الأوضة..
وفي شركة ياسر كان وصل وهوا مقرر يبعت رساله لاحلام يبلغها فيها ترجع شغلها يا اما هياخد ضدها اجراء وبالفعل بعتلها رساله هددها فيها وبعتلها صورة للعقد ..
وفي المستشفي كان حمزه نايم نوم عميق ومرسي نايم علي الكنبه وبيصدر اصوات وهو نايم!
كان ماهر مقرر يروح لحمزه الاول قبل ما يروح الشركه واول ما وصل المستشفي وطلع علشان يشوفه وفتح الباب اتصدم من الأصوات اللي خارجه منهم وهما نايمين فقفل الباب بسرعه وقرر يروح للشركه بدون اي صدمات تانيه علي الصبح..
وكان منعم وصل المستشفي لان ماهر ساق بداله فاول ما وصل وشاف ماهر خارج سلم عليه وبلغه بأخر معلومات جمعها عن ياسر وعن أسرته ..وعرف ماهر ان والدة ياسر بتلعب قمار وخسرت نص ثروتها فيه وان دي اكتر حاجه مضايقه ياسر لانها بدأت تاخد من فلوسه ..
حرك ماهر راسه بدهشه وقال:ودي بتلعب مع مين!
منعم :مجموعه رجال اعمال من الواضح كده انهم اصحاب من زمان!
ماهر بابتسامه:برافوا يا منعم ..دي معلومات كويسه جدا وهتنفعني ..بس اللي اسمه ياسر دا لازم يقع واكيد وراه مصايب كبيره مخفيه ..كمل كلامه وهم بيتجه للعربيه:واكيد هنعرفها قريب اوي..
منعم فتحله الباب بسرعه وقال:ان شاء الله يا فندم.
اتحركوا بالعربيه في اتجاه الشركة وفي الوقت دا كان شوقي في طريقه لشغله وقبل ما يدخل الشركة جاله اتصال من ياسر ..
اتوتر شوقي وقرر ميردش عليه ولاكن في اخر لحظة تراجع وفتح المكالمة..علشان ميتشكش فيه؟
ياسر قال بضيق:اخيرا سمعت صوتك حمد الله علي سلامتك يا شوقي، مختفي ليه.
شوقي بتردد:بحاول اختفي عن الانظار يباشا بعد اللي حصل!
ياسر قال بسخريه:طيب يا حدق كفايه اختفاء لحد كده وقولي اخبار الشركة عندك ايه .
شوقي اتوتر وقال:لحد دلوقت مفيش جديد يا فندم وانا لسا مدخلتش مكتبي وسمعت حاجه اصل الباشا لسا مرجعش من وقت الحادث..
ياسر :طيب بلغني علي طول باي جديد يحصل وعارف لو خبيت عليا حاجة انا هعمل فيك ايه!
شوقي بتردد:لا مش هخبي يباشا انا مش بتاع الحركات دي!
ياسر اتنهد وقال:اما اشوف يا شوقي يلا سلام.. ياسر قال كلامه وقفل المكالمة في وش شوقي واللي كان حاسس بقلبه هيقف من الخوف والتوتر اللي بق عايش فيه..
وصلت عربية ماهر ونزل منها وكان شوقي لسا واقف وجسمه اتنفض فجأة لما لقي ايد ماهر بتتحط عليه وبيقول :صباح الخير يا شوقي مالك مش علي بعضك ليه!
شوقي بصله وقال بتوتر:مفيش يا باشا ..اصل ياسر بيه اتصل وعايز يعرف اخبار عن الشركة!
ضغط ماهرعلي اسنانه بغيظ وقال:طيب وانت قولتله ايه!
شوقي:قولتله مفيش جديد وان حضرتك لسا مرجعتش الشركة'
حرك ماهر راسه وقال:طيب انا هبعتلك تقوله ايه في رساله بس تبلغه بالموضوع في اخر اليوم ،شغل مخك ومتبقاش غبي؟
شوقي حرك راسه بالموافقه وماهر عدي من جمبه ودخل وشوقي لما انتبه لنفسه دخل وراه للشركة!
_________في بيت حنين"
صحيت حنين عشان تستعد لمدرستها وبالفعل قامت وغيرت هدومها واستعدت للخروج وقبل ما تمشي فتحت حنين شنطتها تبص علي الفلوس اللي معاها ولما لقت ان فلوسها خلصت بصت لوالدتها اللي نايمه وتعبانه بحزن .
فاتنهدت حنين بتعب من حالهم وقالت بهمس:هروح مشي النهارده بق مش مشكلة!
قالت كلامها وخرجت ووقتها لقت اصحابها واقفين مستنينها برا!
حنين قالت بتوتر:صباح الخير!
اصحابها:صباح النور يا حنين يلا علشان منتاخرش..قالوا كلامهم وهما بيسحبوها من ايديها وبيتحركوا ووقتها حنين حست انها عايزه تعيط من الخجل ..
وصلوا البنات للموقف علشان يركبوا مواصله وقالت واحده من أصحابها:انا عليا ادفع دلوقت وحنين تدفع واحنا مروحين؟
قالت كلامها وضحكت وكل البنات ضحكوا علي كلامها وحركوا راسهم بالموافقه ..
حنين ركبت معاهم والبنت بالفعل دفعتلهم ووقتها حنين كانت بتفكر وسرحانه هتجيب فلوس ازاي علشان تدفعلهم الحساب وهما مروحين '
وفي المدرسه بتاعت حنين كان مستنيها قدام البوابه الشاب اللي معجب بيها فاول ما شافها جايه مع اصحابها عدل هدومه بتوتر واول مشافها قال:حنين ممكن كلمة لو سمحتي؟
حنين بصتله بخجل واصحابها حركوا راسهم بالموافقه وسابوها ومشيوا وهيا قربت منه وهيا بتمسك في شنطتها بتوتر!
الشاب كان اسمه سليم وكان سليم شاب غني ولاكن اختار يدرس هنا في المدرسة دي علشان مرتاح فيها ..
حنين بصتله باستغراب لانه كان بيبصلها وساكت فقالت:خير يا سليم في حاجة ولا ايه!
سليم بتوتر حرك راسه وطلع من ورا ضهره شنطة هدايا وقال:ممكن تقبلي الهدية البسيطة دي مني!
حنين اتضايقت وحركت راسها وقالت برفض.
كام مرة قولتلك اني مش فاضيه للارتباط دا وبركز بس في الدراسه!
سليم بخجل منها:انا اسف يا حنين لو كنت ضايقتك بس انا عارف ان النهارده عيد ميلادك وحبيت اقولك كل سنه وانتي طيبه وجبتلك الهديه دي!
حنين بصت للهديه وقالت بتوتر:وانت طيب ك ،معلش يا سليم انا اسفه مش هقدر اقبل الهديه منك لاني مش متعوده اخد حاجه من حد!
سليم باعتراض:بس دي هديه!
حنين بصت للهديه وهيا مستغربه حجمها فقالت بضيق:حتي ولو يا سليم مقدرش اخدها!
سليم بصلها بفقدان امل ومسك الهديه وقال:خلاص متخديهاش وارميها اتفضلي..قال كلامه وهو بيحط الهديه في ايديها بسرعه وبيمشي !
حنين بصتله بصدمه وهوا طلع للمبني وسابها واقفه مكانها وماسكه الهديه في ايديها ..
حنين قررت تشوف ايه الهديه دي قبل ما ترميها واول مشافت محتواها اتصدمت لان سليم كان جايب علبه شوكلاتة غاليه ولاففها بخيط احمر وعليهم فلوس ملفوفه علي شكل ورد !
اتوترت حنين وهيا بتبص للفلوس فقررت تاخد منهم ورقه واحده وكانت ٢٠٠جنيه لانها محتجاها وبعدها ترميها .
وكان وقتها شايفها من بعيد سليم ومستغرب هيا ليه بتعمل كده رغم انه عارف انها فقيرة ومحتاجه لكل قرش .
قربت حنين من باسكت الزباله وقبل ما ترمي الهديه سحبت الفلوس وكرمشتها في ايديها بسرعه ومشيت واول ما لاحظت ان محدش شايفها حطت الفلوس في جيبها بسرعه وجريت علي فصلها.
وسليم كان واقف مصدوم لما لقاها رمت الهديه بتاعته فعلا فقرب من الباسكت يتأكد ولما شافها مرميه فعلا زعل وقرر يمشي ويرجع فصله:.
وعند احلام اول ما صحيت افتكرت اللي حصل بينها وبين ماهر وخجلت جداا لانها مكنتش متوقعه انه هيكون صاحي وبيضحك عليها..
تيلفونها اصدر صوت بيدل علي استلامه لرساله فقررت تفتحها واما لقتها من ياسر قلبها اتقبض..
قررت احلام تفتح الرساله وتشوفه عاوز ايه واول مشافت صورة العقد وقرأت الكلام اللي ياسر كاتبه اتفاجأت لانها كانت ناسيه موضوع العقد دا..
فكرت احلام انها ترد عليه ولاكن قررت تتواصل مع ماهر وتبلغه لانه هيلاقيلها حل أفضل..لانها عارفه ان ياسر هو اللي عمل حادثة حمزه وماهر اكيد مش طايقه و لان قلبها بيكأدلها احساسها ..قررت احلام متعرضش ماهر لموقف سخيف بسببها تاني وتسيبه هوا يحل الموضوع دا بنفسه.
فبعتتله احلام رساله وبلغته فيها كل اللي ياسر بعتهولها وكتبتله في الرساله انها مردتش تتصرف من دماغها وتبلغه علشان ميزعلش منها..
ولما ماهر وصله رسالتها وقرأها ابتسم بفرحه لانها بدأت تعتمد عليه ولما شاف صورة العقد وكلامه اللي احلامه صورته ليه اتضايق من ياسر وبلغها انه هيحل الموضوع وانها اطمن متشتلش هم حاجه!
احلام شكرته وبعتتله قلب بيدل علي امتنانها ليه وهو ابتسم ..
فقامت احلام علشان تجهز نفسها علشان تروح لحمزه وتقعد معاه وهيا بتجهز كان ماهر بيجي علي بالها كتير فابتسمت لانها بدات تحبه اكتر وقررت انها هتبلغه انها موافقه يكملوا جوازهم وتبعد عن فكرة الخطوبه اللي اقترحتها .
وعند ماهر كان بيقرأ كلام ياسر والعقد بضيق منه فقرر يروحله الشركه وينهي معاه الموضوع وديًا وبالفعل جهز ماهر وخرج من شركته وبلغ منعم انه هيروح لشركه ياسر!
منعم قال بقلق:هو حصل حاجه يا فندم ولا ايه!
ابتسم ماهر وحرك راسه بالرفض:متقلقش يا منعم انا بس هخلص معاه حوار ودي ملوش علاقه بموضوعنا التاني !
حرك منعم راسه بتفهم واتحرك بالعربيه واتجهوا لشركة ياسر؟
"وفي المدرسه "
كانت حنين قاعده سرحانه وبتفكر في الهديه اللي رمتها في الزباله وفي المبلغ الكبير اللي فيها..
افتكرت حالهم وانهم حاليا في أشد احتياجهم للفلوس فأخد قرار انها تنزل وتاخد الفلوس اللي رمتها قبل ما كل الطلاب ياخدوا بالهم فقررت تستغل انهم لسا الصبح وتنزل تجيبهم من غير ما حد يشوفها ؟
حنين قالت وهيا بتستأذن المدرس:لو سمحت يا مستر محتاجه اروح للحمام!
كل الطلاب انتبهوا ليها وكانت حنين معروفه في وسط الطلاب انها بنت شاطرة وذكيه ولان المدرس بيحبها وافق انها تنزل برغم ان خروج اي حد في اول حصه ممنوع..
ابتسمت حنين وخرجت من الفصل بتوتر ونزلت للحوش وهيا بتبق حواليها بخوف لحد يشوفها..
فقربت حنين بتوتر من باسكت الزباله وقررت تقرب منه بحجه انها هترمي فيه زباله معاها في ايديها واول ما قربت علشان تاخد الفلوس لقت الفراش بيقرب منها وبيقول:بتعملي ايه هنا!
اتوترت حنين وجسمها اتفض ولاكنها اخدت الفلوس بسرعه وقالت:انا برمي زباله معايا هو في مشكله ولا ايه!
الفراش برفض:لا مفيش اتفضلي اطلعي بق علشان المدير جاي يلف علي الفصول وعاوزين الحوش فاضي!
حركت حنين راسها بالموافقه واتحركت بسرعه وطلعت علي فصلها..
وهيا قاعده بدات تبص للفلوس اللي مكرمشاها في ايديها بخجل من نفسها ..
افتكرت حنين حال والدتها وانها مش هتقدر تروح شغلها لانها تعبانه ولان عليهم ديون للجيران مكنش ينفع ياخدوا منهم حاجه تاني ..
حطت حنين الفلوس في شنطتها بسرعه ووقتها شافتها البنت اللي بتتنمر عليها بسبب ان امها بتعطف عليهم!
حنين عدلت نفسها وبصت للمدرس علشان تشوفه بيشرح ايه ووقتها البنت اللي بتتنمر عليها قدرت تفهم ان حنين اكيد سارقه الفلوس دي لانها فقيره ومستحيل يكون معاها مبلغ كبير زي دا؟
وقبل ما الحصه الاولي تخلص وقفت بنت من اللي في الفصل وهيا بتقول بحزن :مستر انا ضاع مني ٢٠٠ ومش لاقياهم؟
المستر بص لباقي البنات والشباب اللي في الفصل وقال: معلش دوروا جمبكوا علي فلوس زميلتكم!
الكل بدأ يدور جمبه وملاقوش حاجه فبصت البنت المتنمره لحنين وقالت :الفلوس مع حنين يا مستر ..انا شوفتها بتخبيهم في شنطتها!
حنين قلبها وقف بصدمه لما سمعت كلام جنة زميلتها فبصتلها وقالت :فلوس ايه دي فلوسي انا ما اخدتش من حد حاجه؟
المدرس قرر يدافع عن حنين لانه عارف انها بنت محترمه ومستحيل تعمل كده فالبنت المتنمره كانت مصره ان حنين معاها فلوس زميلتهم فوقفت وقالت بتحدي:لو مش مصدقني يا مستر شوف شنطتها ؟
البنت اللي ضاعت منها الفلوس بصت لحنين بضيق وقالت:اه يا حراميه انا اصلا كنت عارفه انك حاطه عينيكي عليها .
حنين قالت بصدمه:والله ما اخدت منك حاجه وبعدين انا هعرف ازاي انك معاكي فلوس!
البنت بصت للمدرس وقالت:لو سمحت يا مستر شوف شنطتها لاني متاكده انها معاها!
حنين بصت لزمايلها بدموع ولقت ان بقيت زمايلها التانين باصين عليها وكانها حراميه فعلا.
المدرس قرب من حنين وقال:وريني شنطتك يا حنين!
حنين بدموع:صدقني يا مستر والله ما اخدت منها حاجه !
المدرس أصر انه يشوف شنطتها علشان يحل المشكله وحنين ادتهاله واول ما فتح المدرس الشنطه لقي فيها فلوي متكرمشه بطريقه غريبه فمسكها وفتحها لقاها ٢٠٠ جنيه فعلا فقال بصدمه:دي ايه يا حنين!
حنين بدموع:دي ٢٠٠ جنيه!
المدرس:منا شايفها انا قصدي بتعمل ايه في شنطتك!
حنين ببكاء:ماما ادتهالي علشان اجيبلها علاج!
المدرس بص للبنت اللي ضاعت منها الفلوس وقال:الفلوس بتاعتك كانت متجمده ولا فكه!
البنت باصرار:متجمده يا مستر!
المستر بص لحنين بحزن ورجع قرب من البنت وادالهارالفلوس وقال:هي دي بتاعتك!
البنت بصت للفلوس بتفحص ولانها مش عارفه شكلها قالت :ايوا يا مستر ..قالت كلامها وبصت لحنين اللي بتبكي وقالت:كنت متاكده انك اللي اخدتيها ؟
المدرس بص لحنين وقال:بعد ما الحصه التانيه تخلص عاوزك تروحي لغرفة المدير!
حركت حنين راسها بحزن وقعدت مكانها بكسرة والبنت اللي ضاعت منها الفلوس قعدت وهيا بتتكلم مع زميلتها اللي جمبها وبيغلطوا في حنين؟
واما حنين مكنتش مستوعبه اللي حصل معاها فحست انها مش طايقه المدرسه وقررت تمشي ولاكن منعها سليم واللي وقف قدامها فجأة وقال:انا مصدقك يا حنين ارجوكي استني شويه وهيا هتلاقي فلوسها ووقتها صدقيني هخليها تعتذر منك عصب عنها !
حنين بصتله بدموع لانه لولا هديته مكانش هيحصلها الموقف دا ولاكنها برضوا محدش غصبها تاخدهم فحركت راسها بحزن وقعدت وسليم قرب من البنت اللي اسمها جنه وقال:انتي متاكده ان حنين اخدت الفلوس منها!
جنة بصتله بتوتر وقالت:ايوا شوفتها بتخبيها في شنطتها!
سليم بضيق:يعني مشوفتيهاش وهيا بتاخدها يبق انتي كده كدابه..
جنة بصدمه لانه بيدافع عن حنين برغم انها مش من مستواه فقالت بضيق:ملكش دعوه يا سليم وانا متاكده انها اخدتها وبعدين انا مش كدابه
سليم سابها وهوا متضايق من كدبها ورجع قعد في مكانه لما المدرسه التانيه دخلت عليهم..
________________
في شركة ديسكاشيال!
وصل ماهر للشركه واول ما قرب من مكتب الاستقبال البنت بصتله بصدمه من وجوده وقالت :هو مش حضرتك ماهر الصياد!
ماهر حرك راسه بالايجاب وهيا قالت بصدمه:حضرتك عاوز مين!
ماهر بجديه:مدير الشركة دي!
الموظفه:حضرتك تقصد مستر ياسر غنيم!
ماهر شتمه في سره وضعط علي اعصابه وقال:ايوا!بلغيه اني عاوز اقابله!
البنت حركت راسها بالموافقه واتصلت بمكتب ياسر بسرعه وبلغت السكرتيره بتاعته ان ماهر الصياد موجود وعاوز يقابله!
قامت السكرتيره بسرعه ودخلت لمكتب ياسر واول ما بلغته ان ماهر الصياد موجود تحت:ياسر وقف بدهشه وقال:دا ايه اللي جايبه هنا دا!
السكرتيره بتساؤل:هوا مش دا يا فندم صاحب مجموعة الصياد جروب!
ياسر حرك راسه وقال:ايوا هوا بلغيه يدخل !
السكرتيره حركت راسها بالموافقه وخرجت بلغت الموظفه تبلغه يجي لمكتب مستر ياسر وقفلت المكالمه!
ماهر قال :خير يارب يكون فاضي!
الموظفه حركت راسها وقالت:مستر ياسر مستني حضرتك في مكتبه اتفضل معايا يافندم'
الموظفه مشيت وهوا وراها وركبوا الاسانسير مع بعض لحدما وصلوا لمكتب ياسر ..
السكرتيره والموظفه كانوا بيبصوله بدهشه لان ماهر بيمتلك وسامه وكاريزما عاليه بتجذب اي حد ليه..
دخل ماهر لمكتب ياسر واول مشافه قاعد علي مكتبه وعامل انه ما اخدش باله من وجوده ماهر قال بصوته القوي والواضح:ازيك يا ياسر ؟
ياسر بصله باتباه ووقف وقال وهو بيمد ايديه:اهلا اهلا ماهر الصياد بنفسه جاي هنا في شركتي!
ماهر بص لايديه وتجاهله وقعد وحط رجل فوق الاخري وقال:خليني ادخل في الموضوع علي طول لان انا مش بطيقك وانت عارف كده!
ياسر بصله بصدمه من جرأته وقال:ولما انت مش بطيقني جاي هنا ليه!
ماهر ابتسم بسخريه وطلع تيلفونه من جيبه وفتح اسكرين لتهديده لزوجته وقال:جاي اخلص الموضوع دا!
ياسر بص للتيلفون ولما شاف اللي موجود فيه رجع بضهره علي الكرسي وقال بغرور:الموضوع دا خاص بيا واحلام ملكش تتدخل فيه!
خبط ماهر بايديه الاتنين علي مكتبه لدرجة ان ياسر اتفزع وبصله بانتباه…وماهر قال بضيق:احلام تبقي مراتي ودلوقت هيا سابت شغلها معاك فانا جاي علشان ننهي الموضوع بهدوء بدل ما انهيه بالقوه وانت هتكون خسران ؟
ياسر بصلة بتحدي وقال:انا مبتهددش علي فكره وبلاش الحركات دي علشان انا ممكن ابلغ الامن يطلعوك بره!
ماهر وقف وقرب منه وقال بتحذير:فين العقد يا ياسر؟
ياسر اتصدم وقال:انا قولتلك..ماهر قاطع كلامه وقال:ورحمة ابويا اللي ما بحلف بيه ابدا لو مطلعت العقد وقطعته قدامي هندمك ندم عمرك!
ياسر حرك راسه بالموافقه وماهر رجع قعد علي الكرسي وياسر طلع العقد واداه لماهر وقال:مراتك لازم تدفع ١٠٠ الف جنيه غرامه!
ماهر ابتسم بسخريه علي كلامه وقال:انت فاكرني هدفعلك حاجه ولاهخليها تدفعلك حاجه!
ياسر اتضايق وغمض عينيه وقال بغيظ منه:انت مش فقير ومبلغ زي دا مش هيقصر معاك!
ماهر قطع العقد ورماه علي مكتب ياسر وقال:الواضح انك مسمعتش انا قولتلك ايه ..
ماهر قال كلامه وخرج من المكتب ووقتها كانوا الموظفين واقفين وبيبصوا عليه بانبهار..
ابتسم ماهر وعدي من جمبهم والبنات اصدروا صوت بيدل علي اعجابهم بيه ولاكن مشيوا بسرعه لما شافوا ياسر خارج وبيبص عليهم بغضب !
خرج ماهر من الشركة وركب عربيته وهوا متضايق من ياسر وكان نفسه يضربه علي وشه ويكسرله دماغه ولاكنه كان ضاغط علي اعصابه غصب عنه علشان ميبوظش خطته؟
وفي المستشفي
وصلت احلام لغرفة حمزه وخبطت علي الباب ولاكنها سمعت صوت ضحك عالي خارج من الاوضه فقررت تخرج علي طول ووقتها شافت مرسي وحمزه قاعدين وبيضحكوا فابتسمت وهيا بتقول:صباح الخير!
حمزه انتبه ليها وقال:صباح النور اتفضلي يا احلام!
مرسي وقف علشان احلام تقعد مكانه ولاكن احلام رفضت وطلبت منه يقعد هوا وقربت من حمزه وقالت:عامل ايه النهاردة يا حمزه !
حمزه بابتسامه :الحمدلله يا احلام اقعدي ارتاحي!
احلام قعدت وحمزه بصلها وقال بتساؤل :هي حنين فين مجتش معاكي ليه!
احلام ضمت حاجبها باستغراب وقالت:وهيا حنين هتيجي معايا ليه !
حمزه:مش هتطمن عليا ولا ايه!
ابتسمت احلام علي كلامه وقالت:لا حنين جات امبارح تطمن عليك لانها كانت هنا في المستشفي علشان والدتها ولاكن هيا دلوقت رجعت بيتها ايه اللي هيجيبها وهيا اصلا مفيش علاقه تجمعها بيك!
حمزه بضيق من كلامها:متقلقيش قريب اوي هيبق في علاقه!
احلام بصتله بصدمة وقالت:علي فكرة حنين مش زي اي بنت انت قابلتها علي فكره ومش سهل انها تقع في حبك!
حمزه قال بدهشه وضيق :ليه هو انا وحش!
احلام قالت علشان تغيظه:مش وحش بس فاشل تفتكر لما حنين تعرف انك سايب كليتك و مقضيها لعب هترضي بيك!
حمزه :انا مش فاشل انا بشتغل وبعدين هيا مالها انا بروح الكليه ولا لأ ،مش كل اللي يهمها راجل يصرف عليها،
احلام ضحكت على كلامه وقالت:قصدك خالك اللي هيصرف عليها؟
حمزه باعتراض:لا علي فكره انا بشتغل في الشركة وسوف علي نفسي وهقدر أصرف عليها؟
كان حمزه بيقول كلامه بصوت عالي لأنه اتعصب من كلام احلام فهيا ضحكت وقالت:حنين الأولي علي مدرستها متوقعش انها تبصلك!
حمزه بغيظ:احلاااام ؟
ابتسمت احلام وقالت:ايه !!!الحقيقة بتزعل ولا ايه!
حمره بص لمرسي وقال:انده للدكتور يكتبلي علي خروج؟
احلام بتساؤل:هتروح فين!
حمزه بغيظ:هروح أسالها !
احلام مسكت ايديه وقالت بضحكه:هتسالها فين بحالتك دي اقعد كدا وارتاح لحدما تكون بخير وبعدين اشمعنا هيا يعني؟
حمزه:مختلفه ..وبعدين استني كده اشمعنا خالي برضوا دنتوا مكملتوش اسبوع عارفين بعض حصل ايه علشان تتجوزوا بالسرعه دي؟
احلام ضحكت وقالت:اسبوع ايه يا غبي انت !
حمزه كان مركز معاها وهيا قالت:الظاهر كده اني هضطر احكيلك الماضي بتاعنا وانا مبحبش اقوله لحد!
حمزه بحماس:ها ماضي ايه؟
احلام ضحكت علي كلامه وحماسه الطفولي وبدات تحكيله عن ماضيها ما خاله وانهم كانوا اصحاب مقربين وكانوا اكتر من اخوات فحمزه قال:يعني كل السنين دي وخالي مخبي عليا القصه دي!
احلام بابتسامه:انا متوقعتش اني هقابله تاني بس كان حظي حلو!
حمزه بضيق:ايوا حبي انتي وهو وانا اقعد كده سنجل بائس ووحيد!
في الوقت اللي كانوا بيتكلموا فيه تيلفون احلام رن برقم غريب فاضطرت توقف كلامها مع حمزه وترد علي المكالمه واول ما سمعت صوت بكاء قالت بقلق:مين ..حنين!
حمزه اول ما سمع اسم حنين بص لاحلام بلهفه واللي كانت ضامة حاجبها برعل من كلامه فقالت :طيب انا هجيلك متقلقيش!
احلام قالت كلامها وقفلت المكالمه وبصت لحمزه علشان تبلغه انها هتمشي فلقته قام وقعد علي السرير وقال بقلق:مالها حنين!
احلام بصدمة من حالته:اي دا يا حمزه ارتاح مينفعش اللي انت عملوا دا!
حمزه:طيب هيا مالها وبتعيط ليه!
احلام :حصلت معاها مشكله في المدرسه فانا هروح احلها معاها لان مفيش حد معاها ؟
حمزه:طيب انا هاجي معاكي!
احلام برفض:لا تروح فين انت ترتاح خالص وانا هروحلها بسرعه وارجعلك تاني؟
قالت احلام كلامها وخرجت ولاكن حمزت منعها وقال:طيب بلغيني اللي هيحصل علي طول!
استغربت احلام قلقله عليها الشديد فحركت راسها بالموافقه وخرجت من الاوضة ولاكن حمزه مكانش قادر يتحمل انه قاعد وهيا بتعيط فبص لمرسي وقال:الدكتور قالك ايه!
مرسي:انا مروحتش اصلا يباشا!
حمره بضيق:روح يا مرسي بسرعه؟
اتحرك مرسي للخارج وحمزة رجع نام تاني علي السرير وكان حاسس بوجع شديد بسبب انه قام بسرعه وهو محتاج للراحه .
وفي الوقت دا كانت احلام سايقه عربيتها بسرعه علشان تروح لحنين واللي كانت واقفه قدام المدير واللي طلع الفلوس من شنطتها وهو بيقول بشك :يا تري كل دول بتوعك فعلا ولا سرقاهم من زمايلك!
بكت حنين اكتر وقالت:والله ما اخدت حاجة من حد صدقوني؟
المدير اتعصب عليها وكان هيمد ايديه عليها ولاكن احلام دخلت عليهم ومنعته بسوتها وقالت:نزل ايدك دي واحترم نفسك يا استاذ !يتبع بقلمي شيماء صبحي ❤️🔥
•تابع الفصل التالي "رواية حبيبي المدير" اضغط على اسم الرواية
تعليقات
إرسال تعليق