رواية حبيبي المدير الفصل الثالث 3 - بقلم شيماء صبحي
كانت أحلام بتتمشي في القسم وهيا بتبص لكل ركن فيه لحدما وصلت لصوت الغرفه اللي خارج منها الدوشه الكبيره فبصت علي اسم المكتب ولقت مكتوب عليه الرائد (وائل نصار) فقربت اكتر من الباب علشان تسمع ايه كل الدوشه دي ولاكنها فجأه سمعت صوت رجولي جاي من وراها بيقول:بتعملي ايه عندك؟
وقفت مكانها بخضه ولفت جسمها بالراحة وأول ما عينيها جت في عين الشخص دا قالت :حضرت الظابط؟
العسكري رفع حاجبه باستغراب وقال:مين حضرت الظابط دا!
رفعت احلام ايديها وشاورت علي مكتب الظابط اللي سابها ومشي وقالت: حضرت الظابط اللي في المكتب اللي في اخر الممر أنا بدور عليه؟
اتفاجئ العسكري من كلامها وقال بضيق: حضرت الظابط دا طلع مأموريه في إسكندرية ومش هيجي غير بكرة بالليل.
احلام اتصدمت من كلامه وقالت:يعني ايه ؟
يعني انا هفضل هنا لحدما هوا يرجع بالسلامة !
العسكري وقف في مكانه وقال:انتي جايه في ايه يا استاذه علشان اقولك علي الحل ؟
احلام لفت وشها بضيق من الجملة وقالت:انا مش جايه في حاجه حضرت الظابط هو اللي جابني هنا ..
العسكري هز راسه ليها وقال:طيب استني بقا هنا لحدما الرائد وائل يفضي وهدخلك ليه؟
احلام بلعت ريقها وهزت راسها بالموافقه وبصت للعسكري بتعب وقالت:طيب هو مفيش كرسي اقعد عليه او اي حاجه طيب ؟
العسكري بص حواليه وملقاش غير الكرسي بتاعه فبصلها بصه طويله وبعدها هز راسه وهوا بيشيل الكرسي وبيقربه منها وبيقول:اقعدي هنا..
هزت راسها وقعدت ودقايق وبدات ناس تقرب منهم ومن الواضح كده انهم اهالي الشباب اللي موجودين في مكتب الظابط؟
العسكري قال بتساؤل:مين حضراتكم!
اتكلم راجل كبير وقال:انا سليم النجار والد دليلة جالي بلاغ من شويه ان بنتي هنا؟
العسكري بصله بضيق وقال:ثواني يا حج هبلغ حضرت الظابط بوجودك!
الراجل رجع خطوتين لورا بتعب واول ما احلام لاحظت انه تعبان وقفت وقربت منه وقالت:ممكن حضرتك ترتاح علي الكرسي هنا لحدما يرجع العسكري'
الراجل هز راسه بالموافقه وبصلها وقال:انا متشكر جدا يا بنتي معلش هتعبك معايا!
احلام ابتسمت ابتسامه بسيطة ورجعت خطوه لورا وسمحتله يقعد وبعد دقايق خرج العسكري ومعاه البنت اللي كان حمزه وچو بيتخانقوا علشانها واول ما شافها والدها قام بتعب وقال:ايه اللي حصل يا دليلة يا بنتي انتي كويسه؟
البنت بصت لوالدها بغضب وقالت: بابي لو سمحت متقوليش دليلة انا اسمي ديدي ؟
والدها اتحرج من اسلوبها معاه قدام الناس ولاكنه قرب منها ومسك وشها بحنيه وقال:ازاي حصل كل دا انتي مش قايلالي انك عند ورد صاحبتك!
البنت بلعت ريقها بتوتر وقالت:ايوا انا كنت عند ورد بس وهيا بتوصلني حصل كل دا؟
العسكري كان مصدوم من كلام البنت وكذبها علي والدها فبص لوالدها لقاه راجل غلبان فقرب منه الورقه اللي في ايديه وقال مقاطعاً لكلامهم :اتفضل امضي هنا يحج ربنا يهدي اولادنا جميعا؟
والد دليلة اخد الورقه ومضي عليها وبعدها بص للعسكري وقال:متشكر يابني؟
العسكري هز راسه وقال:تقدر تاخد بنتك وتمشي يا حج وبعد كده متخليهاش تفضل برا البيت لوقت متاخر تاني؟
البنت بصت للعسكري بغيظ وبعدها مسكت ايد والدها ومشيت وبعدها دخلوا بقيت الاهالي لمكتب الظابط واخدوا اولادهم ومفضلش غير حمزه وچو؟
الظابط بص لحمزه وقال:عدي ساعه ومحدش جه ياخدك ايه مش عاوزينك ولا ايه؟
حمزه بص للظابط بضيق وقال:لا يا فندم ممكن يكون مشغول بس هو زمانه جاي!
چو بص لحمزه بسخريه وقال: اكيد هيجي منت نن عينه برضوا يا قلب خالو؟
حمزه اتعصب من كلام چو وكان هيقرب منه ولاكن الظابط قال بصوت عالي:اييييه عاوزين تدخلوا الزنزانه ولا ايه مش مكفيكم اللي انتوا عاملينه في بعض!
چو بص لحمزه وابتسم بسخريه وبعدها بص للظابط وقال:لا متشكرين يا حضرت الظابط مكتبك انظف .
العسكري خبط علي الباب وقال:والد يوسف علام برا يا فندم؟
الظابط هز راسه بالموافقه وقال:خليه يتفضل؟
چو بص لحمزه وقال:مع السلامه يا زومه وابق سلملي علي ولي امرك ماهر بيه!
حمزه ضغط علي ايديه بضيق وبص علي والد چو واللي كان بيعتذر للظابط علي اللي حصل من ابنه ووعده انه هيعاقبه واخده ومشي؟
وخارج المكتب احلام كانت قاعده وسرحانه لحدما فاقت علي صوت خطوات لشخص بيقف قدام العسكري وبيقول بجديه:حضرت الظابط موجود؟
العسكري بصله بانتباه وقال:ايوا موجود مين حضرتك؟
ماهر بجديه:ماهر الصياد؟
احلام اول ما سمعت الاسم رفعت عينيها بسرعه وبصت للشخص اللي واقف قدامها وهيا مش مصدقه عينيها (كان لابس بدله رسميه ومصفف شعره لورا وكانت ملامحة حاده جدا ولاكنه وسيم اوي) حست احلام بنبض قلبها بيزيد بطريقه غريبه وكانت مش قادره تسيطر علي نبظات قلبها فـنزلت عينيها بسرعه وهيا مش قادره تصدق ان دا يبق ماهر الصياد صديق طفولتها ؟
العسكري عدل هدومه وقال بفرحه:حضرتك ماهر الصياد صاحب شركة الصياد للحديد والصلب ؟
ماهر هز راسه وقال:ايوا ممكن ادخل ولا هتسألني أسأله تانيه؟
العسكري هز راسه بتوتر وقال:لا ثواني يباشا هبلغ حضرت الظابط بوجودك.'
ماهر هز راسه وحط ايديه الاتنين في جيبه و العسكري قال كلامه ودخل للمكتب بسرعه.
أحلام كانت لسا باصه في الارض فقررت انها ترفع عينيها وتبصله مره تانيه ولاكنها اتصدمت لما لقته بيبص عليها فاتوترت اكتر من الاول وغمضت عينيها بتمالك لحدما سمعت صوت العسكري بيقوله:اتفضل يا فندم؟
دخل ماهر للمكتب واول ما عينيه جت في عين حمزه بصله بغضب ولاكن لما بص للظابط لقاه واقف وبيرحب بيه بابتسامه كبيره؟
ماهر قال بثقه: انا ماهر الصياد خال حمزه الشناوي والواصي عليه؟
الظابط قال بفرحه:دا شرف كبير جدا يا فندم اني اقابل حضرتك رغم اني كنت اتمني الظروف تجمعنا في وضع احسن من كده بكتير !
ماهر هز راسه بهدوء والظابط بص لحمزه وقال:مش كنت تعرفني يا حمزه يا حبيبي ان ماهر بيه يبق خالك؟
حمزه رفع حاجبه للظابط بغيظ ورجع بص لماهر علشان يخلصوا من الموضوع لانه زهق من وجوده القسم وعاوز يمشي!
ماهر بص للظابط وقال بتساؤل:اقدر اخد حمزه وامشي ولا في اجراءات لازم اعملها؟
الظابط ابتسم وقال:اجراءات ايه بس يباشا دا احنا تحت امرك تحب حضرتك تشرب حاجه عندنا هنا كل حاجه .
ماهر هز راسه بالرفض وقال :متشكر ليك يا حضرت الظابط انا للاسف مستعجل بس لو حضرتك حابب تشرب حاجه معايا تقدر تزورني في مكتبي في اي وقت؟
الظابط هز راسه بفرحه وقال:دا شرف كبير جدا ليا يا فندم والله .
ماهر هز راسه والظابط مسك ورقه وقربها منه وقال:اتفضل حضرتك بس امضي هنا وتقدر تاخد الاستاذ حمزه بالسلامه ؟
ماهر بص لحمزه بتحذير وبعدها مسك القلم ومضي علي الورقه وبص للظابط وقال:شكرا جدا يا حضرت الظابط تعبتك معايا؟
الظابط ضحك وقال:ولا تعب ولا حاجه يا باشا احنا تحت الخدمه في اي وقت؟
ماهر هز راسه ووقف ومد ايديه وسلم علي الظابط وعدل بدلته وبص لحمزه وشاورله يتحرك قدامه !
الظابط وقف وقال باحترام:اتفضل يا ماهر باشا اتفضل يا حمزه باشا نورتوا المكتب .
خرج حمزه الاول ووراه ماهر وبعدهم خرج الظابط واتحرك ماهر وحمزه وقبل ما يمشوا الظابط قال بفرحه :نورت القسم يا ماهر باشا؟
ماهر بصله بصه سريعه وهز راسه ومشي؟
الظابط مكنش مصدق انه اتكلم مع ماهر الصياد شخصيا لانه دايما بيسمع عنه ولاكن عمره مشافه فلف بجسمه علشان يدخل لمكتبه ولاكن انتبه للبنت اللي قاعده علي الكرسي وباصه في الارض وساكته؟
قال بتساؤل :مين حضرتك يا انسه ؟
احلام انتبهت لصوته فرفعت عينيها ليه ولما اتاكدت ان ماهر مشي وقفت وقالت:انا احلام بلعت ريقها وكملت كلامها وقالت: أحلام محمد السباعي؟
العسكري بص للظابط وقال:دي كانت مع حضرت الظابط تامر بس هو طلع مؤموريه وسابها قاعده في المكتب فانا قولتلها تستني هنا لحدما حضرتك تفضى وبعدين ادخلهالك؟
الظابط هز راسه وقال:طيب اتفضلي معايا يا انسه خلينا نتكلم عندي في المكتب.
احلام هزت راسها وابتسمت ليه ودخلت مكتبه وبعدها العسكري قفل عليهم الباب.
كان ماهر وقف اول ما سمعها وهيا بتقول إسمها للظابط فاستغرب حمزه وسأله :وقفت ليه يا خالي في حاجه ولا ايه؟
كان ماهر بيفكر في الأسم لانه بالنسباله مألوف جدا فبص وراه لقي ان البنت اختفت فبص لحمزه وقال:مفيش حاجه اتحرك قدامي؟
حمزه هز راسه بضيق واتحركوا الاتنين لخارج القسم وركبوا في عربية ماهر ودقايق وكانوا اتحركوا وكانوا في طريقهم لقصر الصياد!
_______
في مكتب الظابط كان فاتح تيلفونه وبيبص فيه وبيقول: انا ازاي ما اخدتش باللي من الرساله بتاعت تامر.
احلام كانت مركزه معاه فقالت بانتباه:رسالة ايه يا فندم؟
الظابط بصلها وقال: الرائد تامر بعتلي رساله اني ابلغك تمشي واسلمك عربيتك ف معلشي يا انسه انا كنت مشغول زي ما انتي شايفه وما اخدتش بالي خالص؟
احلام بصتله بفرحه وقالت: حضرتك بتقول اني همشي؟
الظابط بصلها وقال:ايوا تقدري تيجي معايا اسلمك عربيتك من المخزن؟
احلام هزت راسها وخرجت معاه من القسم واتجهوا الاتنين لمكان كبير مليان بالعربيات ومعظم اللي فيه عربيات متهالكة من الواضح انها موجوده من سنين؟
الظابط بص للعربيات اللي موجوده جديده وقال وهو بيشاور علي عربيه سوداء :دي عربيتك يا انسه؟
احلام بصت للعربيه وهزت راسها بالرفض فهز راسه وشاورلها علي عربيه تانيه وقال:يبق دي؟
احلام هزت راسها بالرفض فابتسم وهو بيشاور علي عربيه حديثه وقال:تبق دي؟
احلام هزت راسها بالرفض وابتدت هيا تدور بعينيها لحدما شافت عربيتها كانت ورا عربيه ضخمه ولصغر حجمها مكنتش باينه ،
رفعت ايديها وهيا بتشاور علي عربيتها بفرحه وقالت :عربيتي؟
الظابط بص عليها ولقاها بتقرب من عربيه بعيده فبص علي العربيه وضم حاجبه باستغراب لأنها كانت عربيه موديل قدييم جدا وصغيره يدوب تكفي فردين وشكلها ميطمنش اللي يركب فيها،
قرب الظابط منها وقال:طيب يا انسه بما انك لقيتي عربيتك تقدري تاخديها وتروحي لبيتك لان الوقت اتاخر!
احلام هزت راسها بابتسامه ولاكن لما افتكرت الغرامه اللي هتدفعها ضمت حاجبها بحزن وقالت:طيب والغرامه اللي هدفعها؟
الظابط ضم حاجبه وقال باستغراب:غرامة ايه يا انسه.
احلام:ال٢٠ الف اللي كنت هدفعهم غرامه علشان كنت هخبط العسكري في الكمين؟
ضحك الظابط وقال:الظاهر ان تامر باشا كان بيهزر معاكي بس لو في غرامه فعلا هتدفعيها فهيا مبلغ بسيط لانك مسببتيش اي آذي لحد ، بس مش مشكله كلنا اخوات يعني ومحلوله المهم دلوقت خلي بالك من نفسك وانتبهي وانتي سايقه؟
احلام اتصدمت من كلامه وهوا سابها وخرج وشاورلها تخرج بسرعه علشان هيقفلوا الباب
فركبت عربيتها بسرعه وساقتها لحدما خرجت من المخزن .
الظابط ركب عربيته وشاورلها تمشي وبعدها اتحرك من قدامها فهزت راسها بالموافقه وشغلت عربيتها وخرجت من المكان كله واتجهت لبيتها.!
___________
في قصر الصياد.
وصل ماهر وحمزه واول ما دخلوا من البوابه خرج حمزه بسرعه من العربيه واتجه لداخل القصر وطلع لاوضته ولاكن قبل ما يقفل الباب كانت ايد ماهر بتمنعه.
حمزه قال بضيق:انا تعبان ومحتاج ارتاح خلينا نأخل كلامنا لبكره؟
دفعه ماهر للداخل وقرب منه وقال:انت عارف اللي انت عملته النهارده ده عقابه ايه؟
حمزه هز راسه وقال:انا اسف يا ماهر بس انا مكنتش غلطان دا هو چو ابن ال** اللي جر شكلي الأول.
ماهر قرب من حمزه ومسكه من هدومه وقال:انا حظرتك قبل كده يا حمزه تاخد بالك من تصرفاتك متنساش ان اسمك مربوط باسمي دلوقت وانا ليا سمعتي ومش كل شويه هاجي اخدك من قسم مختلف .
حمزه لف وشه بضيق ورجع بصله وقال:انت ليه مش عايز تصدقني؟
ماهر سابه وقال بتحذير: انت اللي اخترت انك تشتغل معايا يبق تعيش وتتعامل بالطريقه اللي اقولك عليها .
حمزه بص لماهر بضيق وقال:بس انا معملتش حاجه قولتلك هو اللي بدأ جر شكل… .
ماهر قاطع كلامه وقال:انت بق شايف ان الموضوع سهل ؟…..انت مش واخد بالك يا استاذ انك نضجت يعني مش عايز اسمع كلام العيال دا تاني ..،…انا قولت ممنوع تروح المكان دا وتبعد عن العيال دي يبق كلامي يتسمع ولاكن انت مبتحرمش مش عاوز تكبر ابداا ؟
حمزه ضرب الحيطة بغضب وقال:كفاية ضغط عليا بق يا ماهر وبعدين انا مش ألة علشان تتحكم فيا بالشكل دا انا بني ادم يعني بغلط وبضعف هو انت ايه مبتغلطش ابدا؟
ماهر بصله بلوم وقال:لا مبغلطش يا حمزه علشان انا بحسب كل خطوه ١٠٠ مره قبل ما اخطيها بس لو انت شايفني بغلط فغلطتي الوحيده هيا انت يا حمزه كنت غلط لما وافقت اجيبك هنا معايا علشان انت مكانك مش هنا انت مكانك معاهم علشان انت شبههم يا حمزه؟
حمزه سكت وهوا شايف ماهر بيضغط علي ايديه علشان يتمالك اعصابه فهز راسه وقال:خلاص يا ماهر انا اسف وبعدين انا برضوا دمي حامي مبعرفش اسكت علي اي اهانه تتوجهلي فكفاية اوي لحد كده النهارده؟
ماهر قرب منه وقال: اسمعني كويس يا ابن اختي دا هيكون اخدر تحذير ليك ولو عملت اي حاجه تانيه متعجبنيش اعتبر نفسك بره ومش بره هنا بس لا بره من مصر خالص انت فاهم؟
حمزه بصله بصدمه وماهر خرج وسابه وهوا قرب من الباب وقفله بغضب وقرب تاني من الحيطة وخبط عليها بقوه وقال بغضب:مش همشي يا ماهر،… دموعه نزلت وكمل كلامه بزعل وقال: انا هفضل هنا ومهما تحاول تثير غضبي برضوا مش همشي انت فاهم..
وقف حمزه ضرب في الحيطه لما ايديه جابت د*م فبص لنفسه في المرايه بغضب وقال: انا مش همشي وهفضل هنا وانا مش شبههم انا زيك انا نضيف يا خالي انا مش شبههم !
خلص كلامه وقرب من السرير رمي جسمه بتعب وبص للسقف وقال: مش هسيبك لوحدك يا ماهر؟
__________
في غرفة ماهر كان بيدخن سيجارته بكل غضب بسبب استهتار حمزه دايما ووضع نفسه في مشاكل وهو عارف ومتاكد ان لولا وجوده كان زمان حمزه دلوقت في السجن مع البلطجية والمجرمين وهو مش شبههم فحاول يهدي من اعصابه علشان ميتعبش اكتر لحدما فجاه جت في دماغه احلام وهيا بتقول اسمها للظابط وقد ايه كان واضح ان اسمها مش غريب عليه فردده في دماغه لحدما فجاه افتكر صاحبة نفس الاسم فقال بتساؤل:معقول تكون هيا؟
يتبع بقلمي شيماء صبحي
تفتكروا بق كده أحلام وماهر هيتقابلوا تاني ولا ايه🤔❤️ لو لقييت تفاعل يرضيني هنزلكم بارت هديه يلا عاوزه اشوف التفااعل يا حلويين 🌺
•تابع الفصل التالي "رواية حبيبي المدير" اضغط على اسم الرواية
تعليقات
إرسال تعليق