رواية حبيبي المدير الفصل الثامن عشر 18 - بقلم شيماء صبحي

 رواية حبيبي المدير الفصل الثامن عشر 18 - بقلم شيماء صبحي 

مروه بتساؤل:طيب وماهر تفتكري انه لما يشوفك داخله مع مديرك الحفله هيعمل ايه ..؟

احلام اتوترت لسماعها اللي هيحصل وحركت راسها بالرفض وقالت:مش عارفه ممكن يعمل ايه خصوصا اني كدبت عليه وقولتله اني لسا في شركة البدر ؟ 

مروه بقلق:متروحيش وخلاص يا احلام انتي في غنى عن مشاكل كتيرة ممكن تحصل هناك وانتي مش عارفه مصدرها؟

احلام حركت راسها بالرفض وقالت:لا يا مروه لازم اروح انا مش جبانه للدرجادي وبعدين ايه اللي هيزعل ماهر لما يعرف اني شغاله  في شركة منافس ليه .. هو انا كنت اعرف اني هقابله تاني وان كل دا هيحصل ..

مروه قالت بتساؤل:يعني هتعملي ايه!

احلام بجديه:انا هروح واللي يحصل

يحصل لاني بجد تعبت من التفكير في الموضوع دا ولحد دلوقت موصلتش لحل غير اني اروح!

مروه بصت لاحلام وقالت:انتي متاكده؟

احلام حركت راسها وهيا حاسه بالخوف :متاكده؟

 انتبهت مروه لصوت الدكتور اللي بينده عليها. وقفت احلام وهيا بتقول:خلاص انا هروجع البيت ارتاح وابق اكلمك في التيلفون!

مروه اجابتها بالموافقه وسلمت عليها وحضنتها وقالت وهيا بطبطب علي ضهرها:خلي بالك علي نفسك يا قلبي..

ابتسمت احلام واجباتها بحب:حاضر يا حبيبتي وانتي كمان خلي بالك علي نفسك..

ابتسمتلها مروه وحركت راسها بالموافقه وبعدها احلام خرجت من العياده..

وفي قسم الحسابات في شركة الصياد”كان حمزه شغال علي الملفات وبينقلها علي اللاب توب وهو شغال بص علي ياسمين اللي كانت مركزه في اللاب توب وكان شكلها جميل وهيا بتعدل شعرها لورا ودنها وهوا كان بيبص عليها و مبهور بجمالها..

 اخدت ياسيمن بالها من نظراته ليها وهو نزل عينيه بسرعه وكمل شغل ..رفعت ياسمين حاجبها بضيق لانها مش مرتحاله وفي الحقيقه ياسيمن متعرفش ان حمزه ابن اخت ماهر !

حمزه رفع عينيه تاني علشان  يشوفها والمره دي تقابلت عيونهم فمثل حمزه انه لسا متضايق منها وبصلها بغيظ وبعدها قفل اللاب توب وخرج من المكتب واتجه لمكتب ماهر..

ياسمين بصت عليه وهو خارج بضيق وقربت من واحده من اللي في القسم وقالت:مين دا وايه العفرته اللي هوا فيها دي..

البنت بصت لياسمين وقالت بجديه:خفي اللعب معاه شويه يا ياسيمين دا مش شاب عادي دا يبق ابن اخت مستر ماهر صاحب الشركه!

اتصدمت ياسيمن اول ما سمعت كلام البنت وقالت:ولما هوا ابن اخت مستر ماهر بيعمل ايه هنا؟

البنت ابتسمت وقالت:الظاهر كده ان مستر ماهر بيعاقبة لانه زي منتي شايفه كده شقي ومش بتاع شغل!

ياسمين بصلتها وبلعت ريقها وقالت بتوتر:تفتكري ممكن يقول لمستر ماهر علي اللي عملته معاه من شويه!

البنت ضحكت وقالت :لا متخافيش مستر ماهر هو اللي طلب مننا نعامله عادي بس انا اتفجأت من رد فعلك يا ياسيمن هو عمل ايه علشان تكلميه كده !

ياسيمن اتوترت وقالت:نظراته ليا  مش حلوه وانتي عارفه اني بتوتر اصلا لما شاب بيقرب مني وخصوصا يعني..

البنت بصتلها وابتسمت وقالت:خصوصا ايه يا ياسيمن؟

ياسيمن ضربتها بخفه وقالت:خصوصا لو كان شاب حلو ارتحتي كده!

البنت ضحكت وهيا بتقول:الظاهر انه مش بس اللي واقع من اول نظرة  دانتي واقعه خالص..

ياسمين حركت راسها بالرفض:لا انتي فهمتي ايه يا نجوى دانا بوصفلك  شكله بس ولاكن دا مش من نوعي المفضل خالص ..

زميلتها ضمت عينيها بشك وياسمين ضربتها بخفه وقالت:لا بق يا نجوى متبصليش كده والله ما عجبني خالص دا حتي لما بشوفه بتعصب..

ضحكت نجوى وقالت:مهيا دي بدايه قصة حبكم يا هبلة ..

ياسمين بصتلها بخجل وقالت:حبنا ايه بس انتي كمان دا احنا مكملناش ساعتين ومش طايقين بعض..

حمزه رجع المكتب تاني وكان علي ملامح وشه الضيق فبصتله نجوى وهمست لياسمين:اهو رجع..

اتوترت ياسيمن وبصت عليه وقالت:انا فكرت انه مشي وكنت ارتحت..

ضحكت نجوى وشاورتلها علي ملفات عندها وقالت:طيب يا حبيبتي خدي الملفات دي وسجليها علي الايميل وروحي بق كملي شغلك علشان باين كده اننا هنترفد مع بعض!

ياسمين اخدت الملفات بسرعه من قدام نجوى ورجعت تاني لمكتبها وهيا بتعدي من جمب حمزه كان فيه ملف منها هيقع وبسبب انها كانت بتلحقه وقف حمزه فجاه وخبطها جامد وقبل ما ياسمين تقع لحقها حمزه ومسكها من وسطها جامد وهو بيبصلها بخضه وبيقول:مش تحاسبي؟

انتبهت ياسمين لصوته ونزلت ايديه بسرعه بعدما عدلت هدومها وقالت:انا برضوا اللي احاسب المفروض تبص حواليك قبل ما تقوم فجأة؟

حمزه بصلها بغيظ وقال:بقولك ايه انا مش عاوز دوشه اتفضلي اقعدي علي مكتبك ومش عايز اسمع صوتك!

ياسمين بصتله بجديه وهوا كان بيتكلم بصرامه حركت راسها وقعدت علي مكتبها تاني وهيا متفجأة من طريقته في الكلام!

اشتغل حمزه بضيق وبدا يكمل شغله وبعدما خلص اول ملفين وقف وهو بيقول بصوت عالي:يوووه بق دا ملل انا مش طايق القرف دا؟

اتخضت ياسمين من صوته ورفعت عينيها تشوفه لقته مغمض عينيه وضاغط علي اعصابه ووشه احمر بسبب الغضب.. نزلت عينيها من عليه وكملت شغلها وهيا بتحاول تتجاهل النظر فيه وهوا اخد نفسه من جديد  بهدوء ورجع تاني كمل شغله..

___________

في قصر الصياد..

كان ماهر قاعد في غرفة مكتبه وماسك في ايديه صورة احلام اللي اخدها من الصندوق ..كان بيلمس الصوره وهوا مبتسم وكان بيفتكر ذكري بينه وبين احلام في  اول يوم ليه في المدرسه الابتدائية لما اتنقل لمدرستهم بسبب انه اتنقل جديد لمنطقة احلام ومدرسته هتكون بعيده وبما ان والده اتنقل للمدرسه حول ماهر معاه وعلشان ماهر ميكونش وحيد والده طلب من احلام تهتم بيه لحدما يتعود علي المكان..

وهما كانوا في طريقهم للمدرسة كانت احلام ماشيه جامبه وماسكه في ايديه وبتقول:انا ماشيه جمبك بهدوء اهو عارف لو روحت قولت لبابا اني بسيبك وامشي مع زمايلي وتعيطله انا فعلا مش همشي جمبك تاني واضرب دماغك في اي حيطه بقه؟

ماهر كان بيبصلها وساكت وهيا حركت ايديها ولمست وشه وقالت:ساكت ليه رد عليا؟

ماهر كان بيبص عليها وسرحان ولاكن هيا كانت بتعامله بعشوائية وبتقول:لو مردتش عليا هروح امشي مع اصحابي البنات وهسيبك لواحدك!

ماهر ضغط علي ايديها  جامد بسرعه وحرك راسه بالرفض وقال بتوتر:لا خليكي معايا ..واوعدك مش هقوله حاجه !

احلام ابتسمت وحركت راسها بالموافقه وقالت:ماشي بس انا عاوزه اكل حاجه حلوه معاك فلوس..؟

حرك ماهر راسه بالموافقه وطلع المحفظة الصغيرة بتاعته من جيبه وهيا اخدتها منه بسرعه وقالت:ابوك ادالك كام النهارده !

ماهر كان بيبصلها وساكت وهيا اخدت الفلوس كلها من محفظته ورجعتهاله تاني وبعدها قالت وهيا بتشاور علي سوبر ماركت :تعالي نشتري حلويات!

ماهر حرك راسه وابتسم وهيا مسكت  ايديه وسحبته وراها وهيا بتقرب من السوبر ماركت وبدات تجيب لنفسها كل اللي هيا عاوزاه!

ماهر كان بيتفرج عليها وهيا بتصرف فلوسه بحزن وهيا كانت بتوريله الحجات قبل ما تشتريها وهو كان بيحرك راسه بالموافقه بخوف منها وبعدما خلصت احلام من شراء كل اللي عاوزاه رجعت مسكت في ايديه وقالت وهيا بتحط المصاصة في بوقها:حلوه اوي المصاصة دي تاخدلك واحده!

ماهر حرك راسه برفض وقال:لا انا كبرت علي اكلها وبعدين انتي جبتي لنفسك كل الحلويات دي طيب وانا هجيب لنفسي ايه!

طلعت احلام من شنطتها كيس اكلها وادتهوله وقالت:النهارده معايا ساندوتشات مربي تين وانا مش بحبها خدها انت !

ماهر حرك راسه بالرفض وقال:بس انا مش بحب المربي بتوجعلي اسناني؟

احلام قربت الكيس اللي فيه الساندوتشات من شنطة ماهر وقالت:حرام تقول علي حاجه مش بحبها دي نعمة ربنا .. ماهر بصلها بصدمه وهيا قالت :بص انا هحطلك الكيس اهو في الشنطه لازم تخلص كل الساندوتشات وبعدها ترجعلي الكيس تاني اتفقنا!

ماهر حرك راسه بزعل وهيا بصت علي زمايلها وقالت:انا هروح لزمايلي علشان الطابور هيبدأ يلا بق اشوفك في الفسحة؟

ماهر كان عاوز يقولها متسبهوش لانه خايف يكون لواحده ولاكنها كانت جريت بسرعه ومهتمتش ليه..

________

ذكري تانيه في اول سنه في المرحلة الاعدادية.

ماهر اصبح ليه شخصيه ومن معاشرته لاحلام قدر ياخد نفس طبعها و شخصيتها وبدأ ماهرهوا اللي ياخد فلوسها وهيا كانت بتوافق لانها بدات تحبه .

ماهر قال هو بيبص لزميله:امشي انت علشان احلام جايه ولو شافتك جامبي هتضايق لانها مش بتحبك!

زميله قال بصدمه:يعني ايه هتمشي معاها وتسيبني هيارخلاص كبرت سيبك منها !

ماهر حرك راسه  بالرفض  وقال: لا انا مينفعش اسيبها تمشي لواحدهاظ انت مش شايف الصبيان ازاي فكل حته وهيا بنت!

زميله بصله وضحك وقال:انت بتحميها من دلوقت مش دي اللي لسا حرجاك امبارح!

ماهر كاهر ماهتمش لكلام زميله وبص علي بيت احلام واستاها تخرح واول ما شافها وهيا عاملة تسريحة في شعرها وبتبص عليه وبتضحك ابتسم بتلقائية وقرب منها وقال:اخدتي مصروف كام النهاردة!

احلام بصت في شنطتها وقالت:مش كتير وبعدين بتسال ليه!

متنسوش متابعه صفحتي الكاتبة شيماء صبحي علشان يوصلكم كل ما هو جديد 

ماهر:عاوز اشتري كوره..لان  الكوره اللي بنلعب بيها باظت!

احلام حركت راسها بالموافقه وقالت:بس انا كده مش هيفضل معايا فلوس اشتري اكل !

ماهر طلع من شنطته علبه الاكل بتاعه وقال:خدي الاكل بتاعي ماما مجهزالي جبنه وانتي عارفه اني مش بحبها؟

احلام مسكت الاكل وبصت فيه وقالت:جبنه بس ..انا مش بحب الجبنه ؟

ماهر اخد علبه الاكل وحطها في شنطتها وقال:حرام تقولي علي نعمة ربنا مبحبهاش انا حطيتهم في الشنطه اهو وانتي كليها ورجعيلي العلبه تاني اتفقنل!

احلام بصت في وشه وابتسمت لان ماهر كان وسيم وهو صغير وكان اجمل ولد في اصحابه فحركت راسها بحب وقالت:حاضر بس انت هتستناني بعدما مخلص!

ماهر حرك راسه بالموافقه وقال:ايوا متقلقيش انا بنفذ كلام  عمي محمد وعلشان انتي بنت لازم اخد بالي منك!

احلام ابتسمت بالموافقه وقالت:ماشي يلا نمشي علشان اتاخرنا؟

ماهر حرك راسه بالموافقه وهيا جت تمسك ايديه بعدها وقال:امسكي في شنطتي علشان عيب تمسكي ايدي!

احلام بصتله بخجل وقالت:بس بابا قالي..؟

ماهر قاطع كلامها وهو بيقول:خلاص هاتي ايدك ..ابتسمت احلام لسماع كلامه ومسكت في ايديه بحب وهوا مشي وهوا مش منتبه لنظراتها؟

________

فاق ماهر علي ذكرياته وهو مبتسم وبيقول:كنتي شقيه يا احلام وانا كنت بحب شقاوتك ورغم غلاستك دايما معايا بس كنت بنت جدعة…و..بحبك!

خرج ماهر من غرفة مكتبه وقرر يروح للبيت ويفتحه ويشوف لو كل حاجه فيه زي ما هيا لسا ..

خرج من القصر وركب عربيته واتحرك بيها لمنطقة احلام .. 

وفي نفس الوقت كانت احلام وصلت لبيتها وطلعت شقتها علشان ترتاح وبما ان عندها النهارده اجازه قررت تستغل وجودها في البيت وتنظفه..

وصل ماهر للمنطقة بعد وقت مش كبير ووقف قدام بيتهم وهو بيبصله بحب كبير واضح في عينيه ..قرب من البوابه وفتحها واول ما دخل لقي المكان نظيف ..استغرب ماهر وبدا يبص في كل مكان وهو بيقول بصدمة..ازاي دا نظيف وهو مهجور من سنين ..

جه من وراه الاستاذ سلامه وهو بيخبطه علي كتفه وبيقول بابتسامه:اي رئيك مفجأة مش كده؟

ماهر لف بجسمه وبص للاستاذ سلامه وقال:هو حضرتك اللي نظفت البيت!

سلامه حرك راسه بالرفض وقال:لا مرتات ولادي هما اللي نظفوه؟

ماهر ضم حاجبه بتساؤل وقال:ازاي والمفتاح معايا..

طلع سلامه نسخه من المفتاح وقال:منا عارف بس انا برضوا معايا نسخه.. 

وقف ماهر وضم ايديه لصدره وقال:حضرتك كان معاك المفتاح من البدايه ورغم كده قولتلي انه مع احلام؟

ضحك سلامه وقال:كنت عايز اعرفكم علي بعض لاني عارف انك مكنتش هتروح وتسلم عليها .. 

حرك ماهر راسه وقال:يعني انا كل دا بتغفل وحضرتك بتضحك عليا.. 

ضحك سلامه وقرب من ايديه وحط المفتاح وقال:المهم طمني اي رئيك في احلام بعدما كبرت بقت قمر صح.. 

ماهر اتوتر من كلامه وفك رابطة عنقه وقال:احلام ..ايوا جميله طبعا طول عمرها..

ضحك سلامه وهو بيضربه علي كتفه وبيقول:يا واد يا شقي انت .. 

ابتسم ماهر غصب عنه علي حركات الاستاذ سلامه فحرك راسه وهو بيقول:بس انا برضوا مش فاهم ليه عملت كدا؟

سلامه رجع خطوه لورا وقال:بق بذمتك مش فاهم ليه ..يابني دي واضحة زي الشمس عاوزك تشوفها وتخطبها انت ناسي زمان وحبكم لبعض.’

ماهر:لا انت فاهم غلط خالص يا استاذ سلامه انا واحلام كنا اصدقاء بس..

ضحك سلامه وقال:طيب كويس بس اديك قولتها زمان يعني دلوقت ممكن تبقوا حبايب!

ماهر سكت والاستاذ سلامه قال:انا جيت اديلك المفتاح بس انا عايزك تفكر في كلامي دي البنت دلوقت مش مخطوبه ودي فرصه مش موجوده كتير ..الحق نفسك وخدلك خطوه قبل ما غيرك يسبقك.. 

ماهر كان بيرفع ايديه علشان يوقف الاستاذ سلامه اللي قال كلامه وخرج ولاكن كان سلامه مردش عليه وسابه واقف مصدوم .. 

دخل ماهر وقفل البوابه وراه وفتح شقتهم اللي قضي فيها اجمل سنين عمره مع عيلته لما كانوا عيلة بسيطة واول ما فتح الباب لقي فرش بيتهم زي ماهوا متغيرش وكان نظيف فابتسم وهو بيقول بشكر:شكرا يا استاذ سلامه تسلم ايديهم!

دخل غرفة والده ووالدته ولقي السرير والدولاب وكل حاجه زي ماهيا ..ابتسم وخرج  وبعدها دخل اوضة اخته چيدا ولقاها وهيا علي نفس الحال فابتسم واول ما دخل اوضته لقاها وكأنه سابها من يومين بس.

.قرب من سريره ونام عليه وهو بيغمض عينيه براحه وبيقول بابتسامة:ياااه ؟

قام بعد دقايق وبص علي مكتبه الصغير ولقي عليه كتبه..استغرب ماهر ازاي كل حاجه فضلت زي ما هيا وازاي والده اقنعهم انه باع كل عفشهم والبيت ودلوقت محتفظ بيهم ورجع كل حاجه مكانها بالظبط..

افتكر ماهر يوم سفرهم لما ودع احلام وهيا كانت بتعيط وبتقول:هترجع امتي!

ماهر:هنزل زيارات لمصر بابا وعدني بكده وان شاء الله هبق اجي اشوفك!

احلام بدموع:هستناك يا ماهر وعلي فكره هتوحشني اوي!

ماهر بص لوالده ووالد احلام بحزن وبعد عنها لانه مكسوف يحضنها قدامهم فباباها حرك راسه وقال وهو بيقول:سلم عليها يا ماهر متقلقش!

ماهر قرب بسرعه من احلام وحضنها بحب وهوا بيقول:خلي بالك علي نفسك ومتخليش حد تاني يضحك عليكي ويأكلك السندوتشات اللي انتي مش بتحبيها؟

احلام بدموع:بس دي نعمة ربنا..قالوا الاتنين في صوت واحد:ومينفعش نقول عليها مبنحبهاش:.

ابتسم ماهر وهو بيمسحلها دموعها وبعدها بيمسح دموعه وبيقرب من والده وبيمسك ايديه وبيقول:يلا بينا يبابا!

والده سلم علي والد احلام وودعوا بعض وبعدها مسك ايد ماهر تاني ومشيوا وقبل ما يخرجوا من بيت احلام قالت احلام  بصوت عالي:متنساش وعدك ليا يا ماهر انك هتنزل مصر وتزورني..

ماهر ابتسم وحرك راسه بالموافقه وقال:متقلقيش انا عند وعدي ليكي..

اتضايق ماهر من نفسه لما افتكر وعده ليها وانه فضل مسافر دبي 13 سنه من غير ما ينزل يزورها فقال بضيق:مكنش ينفع توعدها وعد انت مش قده ؟

بعدما ماهر اتفرج علي البيت كله ابتسم برضا وبعدها خرج وقفل البوابه كويس ..صمع ماهر صوت دوشه جايه من بيت احلام فيبص علي بلكونتها وابتسم  ودقايق ولقاها طالعه من جوه وهيا شايله صندوق الغسيل وبتنشر هدومها ..ابتسم ماهر علي شكلها وقرر يمشي بسرعه علشان متنتبهش لوجوده …

____________

وبعد مرور يومين  بدون احداث شيقة جاء وقت الحفلة؟

كان ماهر بيستعد لانه هيتكرم  في الحفلة وقرر انه ياخد حمزه معاه وكان حمزه بيستعد ولابس بدلة لا تقل اناقة عن بدلة ماهر..

كان مصففين الشعر بيظبتوا شكل ماهر وحمزه في القصر وبعدما انتهوا خرج ماهر وحمزه وركبوا عربية فخمة من عربيات ماهر الخاصة بالمناسبات اللي زي دي..

 اتحركوا بالعربيه في اتجاه الحفله وكان السائق منعم!

متنسوش متابعه صفحتي الكاتبة شيماء صبحي علشان يوصلكم كل ما هو جديد !!

وفي فيلا ياسر غنيم ..كان لابس بدلة رسميه انيقه وواقف جانبه المساعد اللي شغال في شركة ماهر جسوس ..ياسر قال وهو بيبص لنفسه برضا: كده تمام ..صحيح انت وصلتلها الفستان!

المساعد:ايوا يا فندم وبعتلها بنت علشان الميكب!

حرك ياسر راسه  بالموافقة وقال:اول مره احس بحماس كبير كدا..

عدل المساعد لياقه قميصة وقال:انت هتعمل النهارده حدث عظيم يا فندم وبعدين انا واثق انها لما تشوفك بالاناقه دي ممكن تغير رأيها عن ماهر وتكمل معاك انت..؟

ضحك ياسر علي كلامه وهو بيقول:انا بق مش واثق يا فؤاد دانا متأكد.!

ضحك فؤاد وقال وهوا بيشاورله علي الباب:اتفضل يا فندم !

خرج ياسر من الفيلا وركب عربيته وكان السائق بتاعه المساعد واللي كان لابس ماسك علشان ماهر ميتعرفش عليه لو شافه.. بعد دقيقة اتحركوا بالعربيه وكانوا في طريقهم لبيت احلام علشان يروحوا للحفلة؟

وفي بيت احلام كانت مروه موجوده معاها وهيا بتبص عليها بعدما خلصت لبس الفستان والميكب وقالت برضا :بصراحه يا احلام شكلك يجنن اول مره اشوفك بالجمال دا!

ابتسمت احلام بخجل من كلام مروه وهيا بتبص لنفسها في المرايا وبتقول:كنت اتمني البس فستان زي دا في وقت وزمن غير دا ..بق حد يصدق ان بعد الاناقه دي كلها اني رايحه اغيظ واحد بوجودي!

ضمت مروه حاجبها بغيظ من ياسر وقالت:خلي بالك كويس يا احلام ولو في رقص بلاش ترقصي خليكي هادية احسن.. انتي بنت محترمه وانا مش محتاجه اعرفك الكلام دا؟

احلام حركت راسها بالموافقة وقالت بعدما سمعت صوت العربيه بتاع ياسر :شكلها عربية ياسر انا هنزل بق ومتنسيش يا مروه تقفلي الشقه كويس انا هسيبلك المفتاح دا وانا معايا نسخه تانيه!

مروه حركت راسها بالموافقه ونزلت احلام علي السلم بهدوء لحدما خرجت برا البيت وكان في استقبالها ياسر واللي اول مشافها اتصدم من جمالها فحس بقلبه بينبض ودا غير خطته خالص  فقال بدهشه:ايه الحلاوة دي كلها يا احلام!

احلام ضمت حاجبها باستغراب من كلامه لانها متوقعتش انه يقولها حاجه زي دي ولاكنها اكتفت بانها تبتسم وتقول بخجل:شكرا لحضرتك!

ياسر فتحلها باب العربيه واول ما ركبت لف للجه التانيه وركب جمبها بسرعه وشاور للمساعد بتاعه يتحرك بالعربية.. 

وفي فندق خمس نجوم وبداخل صالة ضحمة خاصة باصحاب المنازل والسلطات العليا ..كانت مجهزة حفله تحت اداره مجموعة من اكبر المستسمرين في الوطن العربي كانت الحفلة لتوزيع جائزة لأفضل رجل اعمال للسنه وكانت الهدية ساعة من الألماظ صممت خصيصا لمن يفوز بذلك اللقلب..وكانت هذه هي الهدية الكبري والهدية الأوسط  كانت ساعة مصنوعة من الذهب الصافي وينال هذه الهديه من هوا اقل شهرة ونجاح من صاحب المركز الأول وكانت الهدية الصغري ساعة من الفضة وكانت مصممة بتصميم خاص ومن ينالها هوا الاقل نجاح وشهرة من المركزين!!

كان يوجد بداخل تلك الحفله اكبر رجال الاعمال واصغرهم في مصر والشرق الأوسط وكان جميع من في الحفله يعلمون من الفائزون بتلك الهدايا كان صاحب المركز الأول :رجل الاعمال الشهير ماهر الصياد ..وصاحب المركز الثاني رجل الاعمال :رحيم الشازلي وصاحب المركز الثالث رجل الاعمال :ياسر غنيم.

في مثل هذه الحفلات يعلمون ان الفائز بالمركز الاول بعد استلامه للجائزة يقوم بعرض احدي مشاريعه امام الموجودين وبعدها يتلقي الكثير من عروض العمل مع المستثمرين المتواجدين في المكان وكان المركز الثاني ياخد اقل منه عروض والمركز الاخير هو من يتلقي اقل عروض العمل..

بعد ان بدات الحفلة دخل ماهر الصياد وبجانبه حمزه وكانت جميع الانظار عليهما ..

بدا الجميع يهتف باسم ماهر وكان ماهر بيبتسم وينحني برأسه كاحترام وشكر..

وبعده وصل رجل الأعمال الثاني رحيم الشازلي وبجانبه زوجته وبعدهم وصل ياسر عنيم وبرفقته أحلام .. 

اول ما دخلوا كلهم الحفلة بدا ياسر يدور علي ماهر بعينيه واول مشافه قرر ياخد احلام ويقربوا من  طربيزه ماهر بحيث انه ينتبه انها موجوده مع ياسر..

واول ما عرض ياسر علي احلام وقال:تعالي نقف علي الطرابيزه التانيه علشان مش مرتاح هنا؟

حركت احلام راسها بالموافقه واتحركت معاه ووقفت جمبه علي طرابيزه كانت مقابله للطرابيزه اللي موجوده عليها ماهر وحمزه..

احلام كانت باصه في الارض وساكته وياسر قرر يقرب منها وهو بيصبلها من العصير اللي قدامهم وبيقول:اشربي يا احلام دا عصير متقلقيش..استغربت احلام قربه منها بالطريقه الجريئة دي ففهمت انه بيعمل كدا لان ماهر في المكان فحركت راسها وهيا بتبعد عنه بخطوه وبتقول:شكرا يا فندم..

مسكت احلام كاس العصير واول ما رفعت عينيها علشان تبص علي المكان جت عينيها في عين ماهر اللي واقف وهو باصص عليها ومصدوم من وجودها ..

 اخدت احلام نفس بتوتر  شديد وبدأ وشها يحمر وهيا بتبص لحمزه اللي انتبه ليها وقال بفرحه وهو بيشاور عليها بعشوائية :مش دي احلام يا خالي ؟ دي شكلها حلو اوي النهارده مكنتش متوقع انها جميله كدا؟

استغل ياسر انتباه ماهر ليهم فقرب من طرحة احلام ولمسها وهو بيقول:طرحتك مش مظبوته يا احلام خليني اعدلهالك!

احلام حطت ايديها علي طرحتها بسرعه وحركت راسها بالموافقه وقالت وهيا بتحاول تبعد ايديه عنها:انا هظبتها يا فندم؟

ياسر فضل يبص علي وشها بنظرات جريئه وكان ماهر مركز معاهم واول ما انتبه ان ياسر بيقرب من دراعها لف وشه بغضب وحمزه كان مستغرب من الشخص اللي احلام واقفه معاه وبسبب انه عارف ان احلام مستحيل تخلي حد يقرب منها كده اتضايق وبص لخاله وقال: هيا احلام ايه اللي جابها الحفله دي ومين دا يا خالي اللي واقفه معاه وبيقرب منها كده ؟

ماهر كان مكور ايديه بغضب شديد وبيحاول ياخد نفسه بصعوبه وبص لحمزه ومسكه من دراعه وقال بضيق :خلينا نقف علي طرابيره تانيه ملناش دعوه بيهم!

حرك حمزه راسه بالرفض وقال:بس..

ماهر ضغط علي سنانه وقال بتحذير:حمزه احنا في مكان عام وبلاش تعمل الحركات بتاعتك دي اتفضل امشي قدامي واسمع الكلام..

حمزه حرك راسه بالموافقه ومشي جمبه لحدما وقفوا علي طرابيزه تانيه بعيده عن ياسر واحلام ..

بدأ مؤسس الحفله انه يمسك المايك ويقول:اهلا بيكم في حفلتنا البسيطه ..الناس سقفوا وهو كمل كلامه وقال:بما انكم متعودين اننا بنعمل الحفله دي كل سنه يبق طبعا عارفين ايه الهدايه ..كانت الهدايا موجوده في بوكسات علي استدچ بسيط واول ما ذكر الشخص اللي ماسك المايه الهدايا..

اتفتحت الهدايا وظهرت الساعات ..

رجال الاعمال اللي في مكان بيكون غرضهم مش الهدايا ولاكن كل غرضهم هيا العروض اللي بتيجي لشركتهم بعدما يعرضوا مشروع ليهم ويعطولهم افكار المفروض انها مجانيه ؟

ياسر بص علي ماهر اللي مشي وابتسم واول ما الشخص قال:خلونا نبدأ الحفلة برقصه جميله وبعدها نبدأ نوزع الهدايا علي الفائزين؟

احلام اتوترت وهيا بتفرك في ايديها وياسر قرر يمدلها ايديه ويعزم عليها ترقص معاه..  بصت احلام لايديه اللي ممدودالها وافتكرت كلام مروه ليها وقررت تعتذر وهيا بتحرك راسها بالرفض وبتقول بهدوء :معلش يا مستر ياسر انا مليش في الرقص خالص..

ياسر بصلها وابتسم وبعدها وقف جمبها تاني وقال:اللي تحبيه يا احلام ..

اشتغلت اغنيه اجنبيه رومانسيه وبدا كل الكابل اللي في المكان يرقصوا ومكانش واقف في اماكنهم غير السناجل وياسر واحلام وحمزه وماهر اللي منزلش عينيه من علي احلام وكان قلبه مليان بالغيرة والغضب …وهو بيبصلها احلام انتبهت ليه وكانت زعلانه من نفسها ومش عارفه  ازاي هتفهمه ان كل دا غصب عنها ..

ماهر بعد عينيه عنها بضيق واو لما واحد من المستثمرين قرب منه ابتسم ماهر وهو بيتكلم معاه واحلام بعدت عينها عنه بحزن وبصت لياسر واللي كان بيمثل انه مش منتبه ليهم واتنهدت بضيق:يارب الحفله دي تخلص علي خير؟يتبع بقلمي شيماء صبحي..

تفتكروا ايه رد فعل ماهر بعدما شافها وياسر مقرب منها🤔🙃🙆‍♀️شكل الفصل الجاي هيبق في خناقه معتبره🥲😆 تفعالوا علي الفصل يا اهل الخيرر🙆‍♀️  واشوفكم في فصل جديد واحداث مختلفة 😘😍

  •تابع الفصل التالي "رواية حبيبي المدير" اضغط على اسم الرواية