رواية تربية حواري الفصل التاسع والخمسون 59 - بقلم ولاء حامد

 رواية تربية حواري الفصل التاسع والخمسون 59 - بقلم ولاء حامد 

تربية حواري

البارت التاسع والخمسون

أصبح الجو مشحون ما بين غضب حور وغضب عاصم 

وترقب الباقي 

والكل منتظر اللي جاي 

سكوت رهيب والكل خايف يفتح بقه تتقلب الدنيا اللي اتقلبت في لحظه نظره يونس لابوه بغضب ونظره شهيره لعاصم بلوم 

ونظره حور بكبرياء وراس مرفوعه

ونظره عابد بفخر ببنت اخوه ممزوجه بالقلق

ونظره راشد وقطب بترقب

ونظره ياسر ليونس بمعنى هاتعمل ايه

واخيرا نظره هدي بوجع من نظره الناس لبنتها

كان أول من قطع الصمت احمد بعد جدال لنفسه دام للحظات: طبعا يا بنتي حقك ودي مصالح ناس هو اخويا بس بيسأل فيما بعد علشان ميحصلش خلاف واكيد طبعا داه قرار يرجع ليكي هو كان الغرض من السؤال فيما بعد علشان شقتك هاتكون في الفيوم نفسها وانك تنزلي البلد كل يوم هايكون أمر مجهد عليكي مش اكتر 

حور بهدوء مميت: الشغل مفيهوش إجهاد ولما اقصر في بيتي وقتها يحق لجوزي وجوزي بس انه يناقشني ويتكلم معايا وانا لو حسيت للحظه ان شغلي هايقصر على بيتي في الف طريقه وطريقه امشي الشغل بدون وجودي انا مش صغيره ثانيا انا كده كده هابقى انزل اشقر على امي والمسافة بين الفيوم والبلد كلها ربع ساعه وفي الأساس انا معايا عربيتي والطريق بين بيتي والورشه واتعمدت تقول الورشه وهي بتبص بفخر وعين قويه على عاصم تلت ساعه يعني في الطبيعي لو جيت من الفيوم نص ساعه من طريق الموقف المباشر

شهيره بتبرير: طبعا يا بنتي داه حقك ومحدش يقدر يعترض هو بس بيسأل فيما بعد مش في الوقت الحالي يعني لو جه الوقت اللي وصل للمواجهه وزي ما سبق يونس وقال إن الزياره دي هانتفق على كل حاجه ونحط كل النقط على الحروف والباقي يمشي بالتليفون

حور بنفس الهدوء: هاكرر ردي لو وحطوا تحت لو دي مليون خط لو شغلي قصر على بيتي فبيتي ليه الأولويه عندي وشغلي اعرف امشيه ازاي حتى في غيابي

ياسر بقلق: خلاص يا حور احنا اقتنعنا مش مستدعيه الحده دي كلها 

حور بصتله بنظره هو عارفها كويس اوي: انا مش حاده خالص وبتكلم بهدوء الفرق اني لا بعرف الون ولا اصطنع واظن انتا عارف من قبل وفاه ابويا من وانا عيله بضفاير وانا بروح معاه الورشه ومن لما مات من سنين وانا ماسكه الشغل كله ومفيش مخلوق خلقه ربنا يقدر يمس طرفي بكلمه لاني في الشغل عارفه بتعامل ازاي وكيف 

يونس كل داه بيبص بترقب وخايف لأول مره يتكلم 

عابد: طبعا يا بنتي بنت ابوكي والبشمهندس عامر الف رحمه ونور تنزل عليه رباكي وشربك من طبعه واللي خلف مماتش

حور بهدوء: داه كلام مفروغ منه ودلوقتي احب اسمع رآي البشمهندس يونس على الكلام اللي اتقال إيه ورده إيه 

يونس اخد نفس طويل وكتمه للحظات وخرجه في صوره تنهيده: سبق وقولتلكم اني متقبلك بكل ظروفك وحياتك وأما عارف وقابل وواثق تمام اليقين ان لو شغلك أثر على حياتك وبيتك هاتحطي الاولويه لبيتك يبقى يا جماعه بلاش نستبق الأحداث في الموضوع داه بالذات لانه بعد احترامي للجميع يخصني انا وحور بس 

الكل هز رأسه من سكات

يونس كمل : طيب كده يا جماعه نكمل الاتفاقات دلوقتي باقي الفرح وكتب الكتاب والفرح بتفاصيله

عابد بتروي : احنا دلوقتي في شهر 2 الشقه هتاخد وقت قد إيه 

يونس: لو عملنها بهدوء تاخد شهر ونص شهرين 

راشد بص لاخته: وانتي يا ام حور الفرش واللي عليكم ياخد وقت قد إيه 

هدي بتفكير: والله منا عارفه بس على حسب يعني اصل الفرش والجهاز غلبه عايز اللف والروحه والجايه هنا وهناك عشان نشوف الأحسن فين 

راشد: لا يا ام حور لازم تحطي وقت حتى لو بالوايم كده

حور بحسم: متشغلوش بالكم الفرش هاييجي من المحلات بتاعتي

عابد وراشد وقطب وهدي الكل بص عليها بعدم فهم 

هدي بإستفسار: يا بنتي انتي محلك بتاع عربيات ماله ومال الفرش

حور سندي ضهرها وبست لأمها: مش داه شغلي بس يا ام حور انا شريكة الحاج راضي النص بالنص

عابد بذهول: راضي مين وهز رأسه وكأنه بينفضها قصد راضي الفايد بتاعنا اللي من قيمه كام شهر بلع السوق مره واحده 

حور بهزه رأس: اه هو

عابد: وانتي تفهمي في شغله ايه اصلا

حور بتهكم بس اتمالكت نفسها: شغل الحاج راضي انا اللي ممشياه وانا اللي جيباه وانا اللي متفقه على كل كبيره وصغيره فيه وانا اللي خليته بعد ربنا من مجرد تاجر أدوات كبريائيه ومنزليه لأكبر مورد للمحافظة كلها والمحافظات اللي حوالينا متنساش يا عمي اني بنت ابويا يعني عارفه السوق ودواخله زي كف أيدي والشغل لاهو عيب ولا هو حرام 

ياسر بتهرب: طيب يا جماعه كده الفرش كمان اتحل اهو يبقى كده باقي تحددوا ميعاد الفرح

يونس بص لابوه وأمه: ايه الميعاد المناسب معاكم علشان شغلكم وعلشان بناء عليه اظبط شغلي لاني هحتاج من الشغل اجازه طويله 

احمد بص لشهيره: ممكن يكون في اجازه اخر السنه يعني على شهر سبعه اظن يكون مناسب للكل 

هدي بصت لبنتها: ايه رائيك في الوقت داه يا ضنايا

جور : مفيش مشكله مناسب وكمان نقدر نجهز براحتنا واظبط الشغل الفتره دي عشان تجهيزات الشقه والفرح

يونس: يبقى على بركة الله انهارده نريح في بيتنا اللي هنا أو شقتي وبكره ننزل ننقي الشبكه ويوم الجمعه اللي جايه نعمل الخطوبه هنا في البيت 

عابد بموافقه: يبقى على بركة الله

هدي اخيرا قدر تاخد نفس ورقعت الزغروده اللي سمعت الحاره كلها مره ورا مره ورا مره لحد ما نفسها اتقطع 

ياسر بضحك: براحه على نفسك يا ام حور لسه عايزينك

هدي بفرحه: داه سوم المني يا ابني عقبالك لما ربنا يرزقك ببنت الحلال وبردوا انا اللي ازعردلك

خلصت الاتفاقات والكل استأذن وانسحب يروح بيته وحور وأمها قاعدين مكانهم نزل الناس والباب خبط وكان فضول الجيران اللي جايين يسألوا عن الزعاريد اللي ماليه المكان نازله ترف عليهم 

حور انسحبت على اوضتها وسابت أمها تحل المعضله دي

هدي بفرحه عقبال عندكم: حور اتقرت فاتحتها والخطوبه الجمعه الجايه عقابا عندكم يا حبايب

الكل هنى وبارك وسط مليون سؤال وسؤال ملقوش ليهم اجابه تريحهم عند حد وهدي اللي كانت بتجاوب بالقطارة 

*********************

رجع يونس وأهله بيت عمه والكل دخل وقعد واستقر

ويونس لحظات واستأذن منهم يروح مشوار مهم يطمن على الشغل وسابهم ومشي

عاصم بشرود ساكت 

احمد لاحظ ان اخوه قاعد ساكت وسرحان 

احمد بإستغراب: مالك يا عاصم بقالك كتير قاعد ساكت مش عوايدك

عاصم بشرود: البت دي تخوف اوي يا أحمد البت شوكتها جامده

احمد بإستغراب: ليه بتقول كده مع انك اللي قايلي انها بميت راجل عاصم بتبرير: انا عارف وسأل بنفسي بس كلامها عن شغلها مش قصدي شغل ابوها انا قصدي شغلها اللي فرقعته في وشنا زي القنبله انتا عارف مين الحاج راضي الفايد داه في أقل من كام شهر بقى من وحوش السوق وليه بدل المحل عشره وبدل المخزن ميه بدل ما كان حته تاجر بقى أكبر مستورد هنا في البلد وبيورد لأكبر محلات سواء في البلد او المحافظه كلها وكمان كذا محافظه قريبه منا الراجل داه عنده فلوس لا تأكلها نار ولا حطب ومعنى ان عروسة إبنك شريكته ان البت دي كمان زيه ومتأخذنيش الست لما بتملك قرش قلبها بيقوي ودي قلبها قوي اوي أوي البت بتتكلم بجبروت يخوف بتتكلم بثقه زي أجدع راجل انا مستغرب البت جمال يحل من على حبل المشنقه بس اللي زي دي الواحد محتاج يعيد حسباته الف مره الجمال مع الذكاء والمال لما يجتمعو في ست يخوفو والبت دي من النوع اللي يخوف على قد ما هي بنت بلد على قد ماهي دماغ يتعملها الف حساب وحساب 

احمد بتنهيده: قصدك إيه الكلام مبقاش يفيد خصوصا بعد ما اتفقنا وقرينا الفاتحه وبردوا ابني مش قليل ولا دلدول عشان مراته تمشيه وراها او تمشي كلمتها عليه داه راجل وعصبه ناشف وبروا ليه وجهة نظر فيها وانا محستش منها او من أهلها بتقصير او جبروت يقلق او يخوف بالعكس كل كلامهم بالعرف والأصول وداه اكتر شيئ يطمني واللي خلاني متحمس اكتر ان ليها عزوه وأهل ورجاله وقت الملزمه نقدر نقعد ونتكلم معاهم 

عاصم بتوضيح: انا فاهم كل كلامك وكنت حاضره بس انتا مخدتش بالك ان البت باين عليها اوي ليها كلمه وكلمه مسموعه داه الكل كليله قبل ما ينطق بكلمه كان بيبص وبعد ما يخلص كان يرجعوا يبصو ليها اذا كان الكلام جه على هواها ولا لاء

احمد بحكمه: وداه ان اثبت حاجه يثبت ان عقلها كبير وان الكل عارف رجاحة عقلها 

عاصم بقلق : اتمني كلامك يكون صح ويكون نظرتي غلط لاني انا كراجل اتهزيت من البت 

احمد بإبتسامة تقدير : عارف ومقدر بس متقلقش يونس مش ضعيف ولا شخص سلبي لان زي ما انتا سألت انا كمان سألت عن خطيبها الاولاني والفرق بين الاثنين زي السما والأرض الواد كان ابن أمه وشخصيه ضعيفه ومهزوز واللي زي حور فرسه حرنانه واللي يروضها ويلجمها خيال ثابت على أرضه لا ضعيف ولا مهزوز عشان كده الاتنين منفعوش بعض لو كانت جوازتهم كملت كانت هي هاتكون راجل البيت وهو الست او بالمعنى الأصح مجرد تابع ليها واللي زي دي متربيه على الراجل الحر الراجل الصح ابوها كان كده كان راجل قلبا وقالبا

عاصم بتنهيده: يا احمد افهمني انا مش بعيب فيها حاشا لله انا معايا ولايا انا بتكلم عن قوتها جبروتها ثقتها بنفسها فلوسها كل دي حاجات خلت قلبي يتوغوش

احمد بتوضيح: يا عاصم دي واحده في السوق ومش محتاج اعرفك يعني ايه سوق يعني اللي بيغفل لحظه بيتاكل علشان كده هي قويه لان زي ما سبق وقولت انها صاحبه مال ومال كتير والمال عايز حسيب ورقيب عليه لان المال السيب يعلم السرقه فهمت قصدي بالعكس انا كراجل انبهرت بيها كمظهر وجوهر لان بالرغم من كل كلامك داه الا انك غفلت عن تفصيله صغيره لكن حاسمه

عاصم بصله وشاورله بعنيه بمعنى ايه هي

احمد بتكمله: انها بالرغم من شغلها جبروتها قوتها الا إنها محافظه على دينها على قيمها البنت بالرغم من كل المغريات اللي حواليها الا إنها متمسكه بالحجاب بطريقه محترمه بالعكس اللي زي دي الفلوس كتفها زي قلتها معاها لأنها اتربت على الحرام قبل العيب فهمت قصدي

عاصم بشرود هز راسه: ربنا يكتب اللي فيه الصالح 

وينور بصرنا وبصيرتنا

احمد بتامين: اللهم آمين

*********************** 

مر اليوم مرور الكرام وصبح نور يوم جديد حور راحت شغلها تطمن عليه وتشوف العمال اللي بقالهم كام يوم مشفوش وشها واطمنت وسابت مسؤليه الشغل على سبارس كالعاده في الأيام اللي فاتت ورجعت البيت تاني مر الوقت ودخلت حور تجهز نفسها وعلى اذان العصر الكل اتجمع وراحوا اختاروا الشبكه مع بعض 

حور اختارت شبكه سيمبل بسيطه بمشاركة يونس اللي كان عمال يشاكسها كل شويه وهدي ضافت هديتها والكل اتصدم من الكم

يونس بعدم رضى: ليه كل داه يا طنط

هدي بتبرير: دي هديه ابوها الله يرحمه وأمها الدهب داه كان عاينه علشان يهاديها بيه يوم فرحها

يونس بقدير: تمام بس يوم الفرح عروستي هاتلبس اللي دفعت تمنه أما اللي حضرتك جيبه يتشال لو هي عايزه قد اللي حضرتك جيبتيه الطاق طاقين اجيبه بس من مالي مع احترامي لكل الموجودين طبعا انا احب الحاجه اللي تخص مراتي تكون من مالي وتعبي وشقايا داه بعد اذنكم طبعا

هدي بصت لبنتها وسكتت 

ودفع يونس تمن الشبكه واتحركوا في طريق البيت

أصرت هدي على دخوله هو وأهله وقدمت واجب الضيافه اللي كانت مجهزاها من الصبح

شهيره: مبروك يا حور 

حور بإبتسامه: الله يبارك في حضرتك 

شهيره بتذكر: كده احنا جبنا الشبكه والمفروض نرجع انهارده بالليل القاهره علشان الشغل وهانيجي يوم الخميس آخر النهار كده فاضل الفستان والشوز والحجاب والاكسيسوريز بتاعته وحجز الكوافير 

حور بحيره: مش عارفه ممكن انهارده او بكره كده اخر النهار انزل اتفرج في المحلات على المعروض 

هدي بتأييد: خدي اصحابك ولقوا شويه او اقولك روحي المحل اللي جبنه من النوبه اللي فاتت كان فيه حبة فساتين حلوووه وشكلهم يخطف العين 

حور كشت وشها برفض: لاء اشوف الأول بره وكمان المحل ده الفساتين اللي فيه اغلبها منفوش انا عايزه حاجه سيمبل هاديه لان الخطوبه هاتكون هنا في البيت

شهيره: فعلا مش محتاجه فستان ضخم محتاجه فستان صك سيمبل

حور: على العموم لسه معانا وقت 

كل داه بيتم ويونس قاعد مبتسم ومداش اي ردة فعل

شهيره وهي بتزغده في جمبه بدراعها: متشاركنا يا يونس بدل سكاتك علشان الوقت ميضعش على الفاضي 

يونس بإبتسامه: زي ما حور قالت لسه معانا وقت وهي تشوف بكره ولا بعده 

شهيره بهزه راس برفض: هو داه اللي ربنا قدرك عليه بدل ما تقول نشوف محلات في القاهره او نجيب موديلات من محلات كويسه لان حور ماشاء الله قمر محتاجه حاجه كده شيك تليق بيها

حور ابتسمت براحه لحماتها المستقبليه 

يونس بهدوء وبرود: متقلقيش يا ست الكل اكيد حور هاتلبس اللي يليق بيها ويزيد جمالها وبص لحور بحب مع ان جمالها مفيش حاجه تساويه ولا تزيده داه هي اللي بتزيد جمال اللبس مش العكس يا ست الكل 

حور بخجل فطري وشها احمر وزادها جمال وعنيها زاغت في كل مكان

مر الوقت والكل استأذن ينصرف 

قبل ما يخرج حور نادت عليه :يونس

يونس اتلفت ليها بعنين بتطلع قلوب : قلب يونس

حور بصتله بصدمه من جرئته اتمالكت نفسها شويه وحاولت تصبغ صوتها بجديه: احم هي الخطوبه يوم الجمعه ان شاء الله انا هاعين الدبله والمحبس وتبقى والدتك تلبسهوملي يوم الخطوبه 

يونس بصلها بزغره: لاء طبعا الدبله هاتفضل في ايدك ويوم الجمعه مجرد إشهار وتكمله للصوره الاجتماعيه اوعي دبلتي تتشال من ايدك لحد اخر نفس في عمري انا اختارتها بقلبي مش بعيني يلا اسيبك دلوقتي وبكره هاعدي عليكي في الورشه غمزلها بعينه وستبها ومشي

حور دخلت وهي حاسه انها بترتعش من كميه المشاعر اللي اترمت في وشها مره واحده 

قعدت على الكنبه شارده وساكته

******************

مر اليوم ورجع احمد وشهيره القاهره لشغلهم وصلهم يونس لان الكل جه معاه في عربيته ورجع تاني على الفيوم صد رد 

رجع بمزاج رايق لأول مره قلب مطمن ومرتاح البال

وبداء يتابع شغله براحه من خلال الفون باقي اليوم 

حور كانت طول الوقت بتفكر في المشاعر اللي هاجمتها مره واحده 

ومر اليوم بسلام على الكل نفوس راضيه ومرتاحه ومطمنه 

**********************

في نفس اليوم عند همام في المستشفي سمح الدكتور لجميله بالخروج مع التأكيد على المتابعه مع دكتور أمراض نفسيه وعصبيه 

خرج همام مكسور الخاطر وكأن هموم الجبال اتحكت فوق كتافه حنت ضهره طلع شايل بنته بين ايديه ودموعه بتلمع في عنيه ورامي جمبه بيزق جبل على الكرسي المتحرك حطهم في العربيه وساق رامي لحد ما وصلو البيت والكل دخل واستأذن رامي يروح بيته

همام بعد ما اطمن على بنته طلع الصاله وطلع رقم الدكتوره اللي رشحهاله الدكتور في المستشفي رن وانتظر لحظات: الو سلام عليكم دكتوره هيام معايا

دكتوره هيام: وعليكم السلام ورحمة الله وبركاته ايوه انا مين حضرتك 

همام :انا جاي لحضرتك من طرف دكتور.... اللي في مستشفى...... 

هيام :اهلا وسهلا اؤمر حضرتك 

همام: الله يعزك انا بنتي من فتره اتعرضت لحادثه أثرت عليها والدكتور نصحني انها تتابع مع دكتور نفسي ورشحك لينا

هيام بتركيز: تمام ممكن اخد فكره عن طبيعه الحداثه اللي حصلت 

همام بتأكيد: اه طبعا وحكالها كل حاجه حصلت وتفاصيل الحادثه

دكتوره هيام بتفهم: تمام حضرتك انا هاجيلها بكره ان شاء اللهولانها غالبا في الوقت الحالي عندها رهبه من الاختلاط بالناس وصدمه من الموقف هي محتاجه انها تطمن محتاجه ثقتها بنفسها ترجع من تاني محتاجه دعم محتاجه تتقبل الصدمه وتتعايش معاها وعلشان تخرج منها بدون تراكمات جواها 

همام بتوهان: انا مش فاهم اوي طيب حدديلي المفروض اعمل ايه 

دكتور هيام بتوضيح: هو المفروض دلوقتي عندها خوف من الناس ومن الخروج علشان كده انا هابداء معاها الجلسات من البيت اول فتره لحد ما تقدر تتقبل الواقع وتقدر تخرج طبعا في أول خروج ليها هايكون صعب انها تقدر تخرج لوحدها فحضرتك او حد يكون مقرب منها هايكون مرافق ليها وبعدها الباقي هاييجي تباعا

همام: ماشي طيب هو حضرتك هاتجيلها أمته البت عندها امتحانات وباقي عليها كام شهر

دكتور هيام بتفهم: انا هاجيلها بكره ان شاء الله بس لو مقدرتش تخرج من الحاله دي قبل الامتحانات بوقت كافي يبقى للأسف هاتضطر تأجل السنه وعلى العموم مش هانسبق الأحداث لما احي بكره واشوف نتيجه كلامي معاها هاتوصل لفين ونحدد خطه العلاج

همام: ماشي يا بنتي تشكري

قفل المكالمه وادي همومه زادت فوق كتافه هم جديد

من نحيه اللي جرا لبنته ومن نحيه ابنه اللي راقد مكسر ومن نحيه محله اللي خرب وحياته اللي بتتدمر واحده واحده وكله من ورا راس ثريا الكل بيدفع تمن اغلاطها وهو كمان كان شريك فيها من سكاته على كل عمايلها وعو بيعمل نفسه مشافش عشان المركب تمشي

تنهيده وجع طلعت من جوفها: ااااااااه يا ابن ابو جبل آآآآآآه يا مصعب كسرت الرجال اااااه

يارب هون اللي جاي يارب

**********************

مر اليوم بخيره وشره وتاني يوم حور راحت شغلها تباشره وتقف على ايد العمال 

وفي عز اندماجها قطعها صوت بقى بيخلي القلب ضرباتها تسمع في الجسم كله ومخلي القلب عايز يطلع من الفقص الصدري اللي محبوس فيه 

رفعت رأسها لقيت يونس واقف بإبتسامه تخطف القلب قبل العين 

حور بإبتسامه بسيط: ازيك يا بشمهندس

يونس بعبوس طفولي: في واحده تقول لزوجها المستقبلي وخطيبها الحالي بشمهندس لا أنا كده اعمل قعدت عرب بقى واجيب ناس تشهد 

حور بعنين مبرقه من جراءه يونس هزت رأسها طيب اتفضل نطلع المكتب 

طلعت حور ووراها يونس فتحت المكتب ودخلت وهو دخل وراها وحط اللي كان شايله جمله ومخدتش لالها منه وكان عباره عن كيس هدايه كبيييييير جدا جدا 

يونس قعد وملاحظ عين حور اللي هاتطلع على الكيس 

انتحنح: احم احم بصي هو انا طبعا عارف ان الوقت ضيق والفستان محتاج بال رايق وان ضيق الوقت ممكن يخليكي تختاري اي فستان والسلام وانا طبعا ميرضنيش انك تلبسي الا اللي يليق بيكي فأنا لما كنت في القاهره شوفت هناك فستان بصراحه عجبني جدا وجبته واتمني انه يعجبك وتلبسيه 

حور بذهول ساكته تماما على غير العاده 

يونس شال الشنطه وحطها على المكتب قدامها: بصي اتمني متفتحيهاش الا في البيت تمام

حور هزت رأسها من سكات

يونس بحرج من سكات حور: طيب استأذن انا عشان لسه هاعدي على الموقع اشوف الشغل فيه مشي كام خطوه لحد الباب واتلفت تاني افتحيه في البيت ها هاسيبك بقى عشان شكلك مصدوم 

سابها وهو ماشي بيضحك 

حور فضلت قاعده على المكتب وشها احمر زي الجمر تبص على الكيس مره والباب مره 

فضلت على وضعها وقت كبييير لحد ما اخيرا فاقت من الصدمه وشالت الكيس ونزلت حطته في كنبه العربيه من ورا ورجعت الورشه تكمل شغلها بس بقلب وعقل مش معاها 

يونس وصل الشغل والضحكه مرسومه على وشه من الودن للودن 

مازن بفرحه: ايوه يا عم الله يسهله مين قدك 

يونس بهزه راس: مفيش فايده فيك يا عم ادعي تكمل على خير 

مازن بفضول: اش اش داه في جديد وانا معرفش يلا ياض قر واعترف بسرعه ايه اللي حصل في الكام يوم اللي فاتوا من وقت ما سافرت لأهلك في القاهره

يونس بإبتسامه: يووووه دانتا فاتك كتييير 

مازن بفضول عارم شد يونس من ياقه التيشيرت من ورا : ياض اخلص بقى بطل غلاسه

يونس وهو بيشاور التيشيرت منه: ياض اتهد واقعد وانا هاحكيلك 

مازن بسرعه قعد: وادي قعده اخلص بقى متبقاش رخم

يونس بترقصه حواجب رفع الدبله قدام عينه

مازن بصدمه: يا واطي لا ادانتا اوطي خلق الله ياض بقى ابقى ماشي معاك الحوار من أوله ولما تخطب ترميني ولا كأنك تعرفني

يونس بضحك: يا غبي اسمع احنا روحنا اتفقنا وقرينا الفاتحه وانا حبيت اعمل بقى الواد الفتك فطلعت الدبله من جيبي واصريت

مازن بذهول: يخربيتك عملت كده بجد

يونس بهزه راس: اه

مازن بصدمه وفضول قاتل: وهي وأهلها عملوا ايه لما عملت كده 

يونس بإبتسامه: ولا حاجه اتصدموا شويه ومشي الموضوع ونزلنا جبنا إمبارح الشبكه ويوم الجمعه اللي جايه خطوبه وشعر سبعه هانعمل الفرح 

مازن: يخربيتك دانتا فاجر ياض

يونس بفخر: نحن أفعال لا كلام

مازن بتريقه: أفعال دانتا مسيبتش حاجه معملتهاش بلفت الناس ولفيتهم وحطيتهم في جيبك الصغير لا برنس يا ابني على العموم الف مليون مبروك يا معلم 

روحت حور وهي هاتموت وتشوف الكيس فيه إيه وكل شويه تطلع من الورشه تبص عليه في العربيه وترجع تدخل تاني مقدرتش تقاوم فضولها كتير لاهر اليوم سابت الشغل قبل ميعاده بساعتين وسابت المفاتيح لسبارس يقفل الورشه ورجعت البيت بسرعه دخلت وهي شايله الكيس في حضنها ومتبته عليه

هدي بخضه: بسم الله إيه اللي جابك بدري مش بعاده يعني 

حور : مفيش مكانش فيه شغل كتير انهارده فجيت بدري 

هدي خدت بالها من الكيس: وايه اللي شيلاه على قلبك زي العيل اللي أمه متبته عليه في المولد الا يضيع منها داه 

حور برفعه كتاف: علمي علمك

هدي بتغمضة نص عين: يا اختي داه ازاي داه يعني اومال شيلاه وجيباه ومش عارفه فيه ايه تيجي ازاي

حور قعدت على الكنبه وحطت الكيس جمبها وسندته بإيديها: والله زي ما بقولك كده لسه معرفش فيه ايه يونس جابهولي الورشه وجه وقالي مفتحوش الا لما اروح

هدي بسخريه: قولتيلي يعني مش مفيش شغل كنت قاعده على نار لا على حمري ولا جمري عشان تشوفي الكيس فيه ايه طيب يلا اختي افتحي الكيس نشوف فيه ايه 

حور بسرعه ولهفه فتحت الكيس طلعت منه كيس كبير مقفول وعلبتين وكيس تاني مقفول

فتحت الكيس وشهقت من الصدمه وبصت لأمها بعنين مبرقه اللي وضعها مختلفشي عنها 

هدي بعنين مبرقه: يا ماشاء الله يا ماشاء الله ايه الحلاوه والجمال داه يا بت داه زي اللي بيلبسوه الجماعه بتاع التلفزيون يا بت

حور حطت الفستان على الكنبه بحرص شديد وفتحت اول علبه لقيت شوز روعه يخطف العين وفتحت التانيه كان شور مقارب في الشكل مع اختلاف اللون وبعض تفاصيل التصميم سابت العلب وفتحت الكيس الصغير لقيت فيه طرح مناسبه للفستان 

حور قعدت مذهوله وباصه لأمها وعنيها مبترمش

هدي قاعده باصه على الحاجات وضحكه هبله مرسومه على وشها ومش مستوعبه

هدي قدرت تتمالك اعصابها: بقولك ايه يا بت ادخلي وريني كده الفستان الحلو داه عليكي 

حور فاقت شويه من صدمتها: ايه

هدي :كتك اوا فوقي يا بت مالك عامله زي اللي جاها دروال 

حور بتوهان: والله منا عارفه يا أما هو اللي بيحصل داه بحق وحقيقي ولا شغل سيما مهو مش معقول داه حقيقي

هدي بحنان امومي: يا بت يا عبيطه داع عوض ربنا مفيش احسن منه داه الجبر بعد الصبر ودعوه ليكي في كل رفعة اذان وكل ركعه وكل كسره صيام 

دي دعوه ابوكي وهو في السما يا بت 

حور بهدوء على غير العاده: خايفه يا أما افرح افوق على كابوس زي النوبه اللي فاتت 

هدي بشهقه: فشر وايش جاب لجاب با بت طب دكها كان ابن أمه وماشي من تخت مقاسها يمين يمين شمال شمال انما داه اسم النبي حارسه وصاينه حاجه تشرح القلب وتطلع من القلب الحزين شوكه راجل بحق تصدقي يا بت والله في حبه ليكي شوفت حب ابوكي الله يرحمه ليا نفس البصه ونفس القوه اللي كان بيدافع بيها عني طمني قلبك وبالك يابنتي 

حور هزت رأسها: انا هاسيبها على الله يا أما 

هدي بلهفه: طيب يلا قومي قومي خلينا نشوف الفستان الحو داه عليكي ونشوفه ليكون عايز يتظبط

حور قامت ودخلت اوضتها لبست الفستان ووقفت تبص على نفسها قدام المرايا وطلعت بيه

هدي بشهقه: بسم الله الله اكبر حصوه في عين اللي شافك ومصلاش ع النبي 

حور بإبتسامه صافيه: عليه الصلاه والسلام يعني حلو عليا يا أما 

هدي بعنين بتلمع بالدموع: مرسوم عليكي زي الكحكه يا بت كأنه معمول مخصوص ليكي تصدقي يابت والنبي الجدع داه طلع عنده نظر 

حور :طيب يلا نشيله بقى عشان ميتبهدلش

شالت الفستان وشالت كل حاجته معاه وطول اليوم الإبتسامه مرسومه على وشها

**********************

وصلت الدكتور هيام عند جميله حسب الميعاد ورحب بيها همام ودخلت اوضه جميله لجلسه امتدت لأكبر من ساعتين ونص كان همام بيغلي على مراجل من نار 

وجبل لا يقل عن ابوه ورامي اللي أصبح ملازمهم

طلعت الدكتوره بعد ماكان الصبر كل وشرب منهم على الآخر 

همام بلهفه: طمنيني يا بنتي الله يطمن قلبك

دكتوره هيام: متقلقش يا حاج بنتك مش هتحتاج وقت طويل بس كل اللي محتاجه الفتره دي دعك نفسي يزود ثقتها بنفسها ويخليها تتجاوز المحنه دي

جبل: طيب نعمل ايه يا دكتوره

الدكتوره هيام بعمليه: اول هام تتعاملوا معاها بهدوء وصبر ولما تنهار سيبوها تخرج اللي جواها لحد ما ترتاح تاني هام حاولو محدش يجيب سيره الحادثه قدامها علشان تقدر تنساها وتتجاوزها تالت هام ابوها مساحتها متكونوش طول الوقت مربطينها من الخوف علشان تقدر تتحرك بحريه وترجع تثق في نفسها وفي الناس 

جبل بتفهم: حاضر يا دكتوره

مشيت هيام والكل بيفكر ازاي يبداء معاها 

******************************

مرت الأيام والكل بيستعد بأقصى ما فيه علشان الفرحه الكبيره حور اللي أصبحت عاده كل يوم تطلع الفستان تبص عليه قبل ما تنام وتاخده في حضنها وترجعه مكانه تاني

وهدي االي شنت حملة تنضيف مكثفه على البيت كله 

ويونس اللي بيعد الساعات علشان تكون حور ملكه قلبا وقالبا

وجبل وهمام اللي أصبح شغلهم الشاغل هو جميله والمتابعه اللي بقى مستمره مع الدكتوره 

************************

واخيرا وصلنا لليوم الموعود 

حور منامتش وطول الليل بتفكر والنوم مجافيها 

هدي صحيت من النجمه وبدئت تجهز أكل وعزومه تليق بأهل العريس وجالها حريم أخواتها يساعدوها 

وباب البيت اللي أصبح مفتوح زي باب القسم متقفلش وكل شويه واحده من الجيران تيجي تهني وتزغرد وتبارك وتمشي 

وحور اللي اصحابها كلهم اتجمعوا عندها من بعد صلاه الجمعه 

وشغلوا اغاني على صب كبير أصبح مسمع الحاره كلها

شذا بتافافه: يا بنتي الله يهدك داه شكل عروسه 

حور بملل: شذا حلي عن سمايا 

شذا: يا آخرة صبري ابوس ايدك ورجلك خلينا نروح لأي كوافير اللي يشوفك يقول مغصوبه وليهم الحق

حور بنفخه: يا بنتي مش عايزه اغنيها

هدير بتعقل : ليه لاء يا حور دي خطوبتك يعني المفروض تكوني نجمه الليله 

حور :مش عارفه مش عايزه 

نرمين بهدوء: طيب بصي بلاش تروحي احنا نجيب البت نوفا تعملك حاجه سيمبل كده ها ايه رائيك 

حور :مش عارفه

شذا: سيبك منها وهاتي الرقم نكلمها

نرمين فعلا اتصلت بنوفا واتفقت معاها على بعد العصر تيجي تظبط العروسه 

ومر الوقت والكل بيتحهز ويجهز وبعد صلاه العصر جات نوفا حسب الإتفاق 

دلتها هدي على اوضه حور وسط زغاريد من كل الموجودين 

نوفا بإبتسامه: مين فيكم بقى العروسه

هدير ونرمين وشذا وياره وهويدا على حور

نوفا بضحك: كان ممكن واحده بس تشاور طيب يلا يا عروسه عشان نبدا

حور بحده: بصي حواجبي مبعملش شغل مونه محاره مش عايزه 

نوفا بضحك: متأكدين ان دي العروسه 

شذا بتريقه: كان على عيني اقولك لاء بس للأسف اه هي 

نوفا: طيب بصي مش هانعمل حواجبك بس هانعمل ديما شيبينج للبشره علشان الشعر الرايش ميبهدلش الدنيا تمام وهنعمل شويه ماسكات بسيطه وميك اب سيمبل وانتي ماشاء الله بشرتك صافيه ونضره

حور بهزه راس: تمام 

وبدئت نوفا رحلت تزيين حور لحد ما خلصت 

نوفا :طيب ممكن بقى تلبسي الفستان علشان بناء على لونه نقرر لون الميك اب 

شذا: يالهوووي الفستان داه محدش منا فكر فيه ولا انتي يا موكوسه نزلتي وجبتي حاجه 

حور بإحراج: لاء الفستان موجود

الكل بصلها بمعنى ازاي وأمته 

حور قضت على كل التساؤلات وقامت فتحت الدولاب وطلعت الفستان بكيسه 

نوفا:طيب إيه مش هاتدخلي تلبسيه

شذا: لاء اشوفه الأول 

نرمين وهي بتزغذها في جمبها: إلهي كلها دقيقتين وتشوفيه عليها خلي اليوم يعدي على خير حور اصلا شايطه اول مره اشوفها كده 

سكتت شذا وهي متضايقه زي العيال اللي مخاصمين بعض

دخلت حور ودقايق وطلعت وهي بتفرك ايديها في بعض

شذا بصفير عالي: اشطا عليكي يا زميلي ايه يابت الجمال داه 

نوفا: بسم الله ما شاء الله اول مره أشوف فستان بالجمال داه بجد طيب هاتلبسي حجاب ولا هاتعملي شعرك

حور بنفي سريع: لاء طبعا هالبس حجاب وبلاش شعري يبان وبلاش طرحه اسبانش 

نوفا بضحك: هانعمل لفه تركي شيك تمام كده خليكي ريلاكس واهدي 

قعدت على الكرسي ونوفا عملتلها مكياج سيمبل بسيط لعنيها اللي برز جمالها بالكحل الأسود مع لونها الأخضر المخلوط بالازرق ورموشها الطويله اللي زادتها جمال مع المسكرا وروج رسم شفايفها بدقه وشلون يكون يكون بلون الشفايف الوردي الفااااااااتح اوووي

ولفت لها الحجاب بالطريقه التركي الشيك واكتمل جمال القمر 

نوفا :كده بقيتي جاهزه يا عروسه ناقص بس الشوز

حور بكسوف وتردد: هو في اتنين وانا مش عارفه اختار بينهم بصراحه 

نوفا: طيب وريهوملي والانسب هاقولك

حور بسرعه طلعت العلبتين وفتحتهم

نوفا بإبتسامه:لاء واضح ان العريس عاشق ولهان

حور بخدود حمرا: اشمعني

نوفا بمكر: اصل زوقه عالي اوي الصراحه الشغل داه كولكشن جديد السنادي وغالبا في القاهره مش هنا 

حور بتهرب: مهو ممكن يكون زوقي

نوفا بخبث: لو زوقك كنتي استقريتي على واحد بس انما انك محتاره يبقى في طرف تاني اللي اختار وحط التحديد عليكي 

حور :طيب ممكن نشوف انهو واحد مناسب 

نوفا: الأسود هايدي اضائه حلوه لرجلك وكمان ممكن نحط مناكير ازرق غامق او لامع هايبقى تحفه الأبيض هايكون مناسب مع فستان الفرح شيليه للفرح وغمزتلها بعنيها 

حور بنفي: لاء مبحبوش 

نوفا:طيب هاحطلك منكير إسلامي بيتشال بسهوله 

حور بإستسلام :ماشي 

وفعلا بعد ربع ساعه كانت حور جاهزه واصحابها طمأن انسحبوا واحده ورا التانيه للحمام يغيروا بالتدريج واكتفوا بلمسة بسيطه تكاد لا تذكر من المكياج مع لفه حجاب انيقه زادتهم جمال فوق الجمال 

يونس اتصل على حور بعد ما خلصت

يونس بحب: انهارده هاعلنك ملكه متوجه على عرش قلبي

حور بخجل: طيب انا هاقفل علشان مشغوله

يونس بتذكر: حور احنا نسينا نحجز كوافير والوقت مش هايسعفنا داه خلاص المغرب قرب يأذن

حور بإبتسامه:لاء منا خلصت البنات جابوا كوافيره البيت

يونس بحرج: تمام طيب ممكن اكلمها

حور بعبوس: ليه

يونس بضحك: هاقولك لما اجي 

حور بحده مدت ايديها بالتليفون لنوفا: احم العريس عايز يكلمك

نوفا اخدت التليفون وبعدت كام خطوه : ايوه

يونس بجديه: لو سمحتي متاخديش منها فلوس وانا هابعت حد يحاسبك ولو عندك حساب كاش على الموبايل مليهوني وانا هابعتلك الفلوس عليه حالا

نوفا بتفهم: اه عندي حساب كاش اكتب عندك وملته الرقم والحساب 

يونس :تمام ثواني ضغط يونس على بعض الأرقام 

اتاكدي من تليفونك

نوفا طلعت التليفون من جيب البنطلون وبصت فيه : بس كده كتير واكتر من الحساب بمراحل

يونس بفرحه: مش كتير على العروسه ثم يا ستي اعتبري الباقي فرحة العريس بالعروسه 

رجعت نوفا ورجعت التليفون لحور تاني اللي اخظته وفصلت المكالمه وقعدت تنتظر 

خلصت نوفا ولكن كل المكياج الأدوات 

حور :كده حسابك كام

نوفا بضحك: الحساب وصل

حور بعدم فهم: أمته انا مفتكرش ان حد منا لسه دفع حاجه 

نوفا: العريس دفع يلا سلام يا عروسه وربنا يتمم بخير

مشيت نوفا وقعدت حور مذهوله من تصرفات يونس اللي كل يوم بتزيد عن اللي قبلها 

مر الوقت ووصل العريس وأهله وحور جوه اوضتها قاعده تفرك بخوف وقلق غير طبيعي 

شذا بخنقه: يابت اتهدي الله يقطعك خيليتيني قاعده تفركي شويه زي اللي قاعده على سِل وتلفي حوالين روحك شويه لما عنيا زغللت بالبربرق اللي لابساه داه

قبل ما ترد سمعت هيصه وزغاريد كتيره عليت اوووووي وترحاب جامد عرفت ان العريس وأهله وصلوا 

دقايق مرت دقايق على يونس وحور كانت أطول من سنين وبعدها قعد يونس واستقر هو وأهله 

دخلت هدي واللي كانت لابسه قفطان مغربي شيفون لونه اسود مطعم بشغل دهبي شيك جدا وحجاب زادها جمال فوق الجمال ورقي 

هدى بلهفه: بت يا حور يلا يا بت العريس وأهله وصلوا 

طلعت حور وهي حاسه انها بترتعش وحواليها أصحابها متجمعين زي الملكه وسط الوصيفات 

خطفت عنين الكل من جمالها وحجابها اللي منور وشها اتحركت بخطوات بطيئه جدا وكأنها لسه طفل بيتعلم المشي من اول وجديد حاسس انه هايقع في اي لحظه 

مازن بصدمه من جمالها اللي كان مستخبي ورا عفريته الشغل والشخط والنطر هز رأسه يفوق نفسه وميل على يونس: يا ابن المحظوظة بقى هي دي البت اللي كان ناقصها شنب وتبقى راجل رسمي لا شهدتلك حظك حظ عوالم اوعدنا يارب بص لقي يونس بيبصله بغضب خود عينه بسرعه وأول ما حركها جات على شذا ابتسم بهدوء وفضلت عينه متبعاها من بعيد لبعيد

يونس لاحظ خطوات حور البطيئه كل هو باقي المسافه في كام خطوه بسرعه ووقف جمبها وابتسامه اترسمت على وشه وحور مرفعتش عنيها من الأرض ووشها عباره عن كتله حمرا زادته جمال فوق الجمال

مشي جمب بعض لحد ما قعدوا على كرسيين جمب بعض في الصالون وبدئت الهيصه والفرح والزغاريد من حواليهم 

عادل وعلا بصو للعروسه بذهول 

ميلت علا على اخوها: يالهوووي هي دي بجد ولا بلاستيك بقى القمر دي عايشه في حاره داحنا على كده نعيش في بياره

عادل بحسره: ااااخ محظوظ ابن عمك طول عمره بيقع واقف مش ابوكيزاللي عايزني اجوز واحده الفرق بيني وبينها الشنب وعليا النعمه داه حتى شنبها أطول من شنبي 

علا بضحك: انتا جاي تبارك ولا تقر يخربيتك

عادل بدموع مزيفه: كنت جاي ابارك دلوقتي جاي اتحسر 

امتدت الخطوبه لساعات وانتهت بتلبيس ام العريس الشبكه لحور بناء على طلب يونس

واترفعت الزغاريد من كل مكان وسمعت الحاره من شرق

لغرب

*********************

جبل قاعد على كرسي في البلكونه وسامع صوت الاغاني ومش عارف جايه منين بس بيدندن معاها علشان ينسي همومه ولو للحظات

بس قطع اندماجه كلام الشباب اللي في الشارع

تحت بلكونته على طول وحس ان أنفاسه انسحبت من جسمه لما سمع الكلام 

احد شباب الحاره: والله مرزقه الاسطي حور وقعت واقفه اهو ربنا عوضها بعريس طول بعرض داه كل الحاره بتتكلم عنه حاجه كده زي بتوع التلفزيون 

شاب تاني: لا وربك والحق هي كمان في الجمال تحل من على حبل المشنقه 

فضل قاعد حاسس بالعجز ودموعه نزلت غصب عنه

دخل همام ومعاه رامي اللي أصبح شبه مقيم عندهم مايروح الا للشغل ويرجع عند همام ويفضل طول النهار 

ويمشي بالليل على النوم

همام بصوت عالي: يا جبل يا ابني 

جبل قاعد شارد ودموعه نازله ومش قادر حتى يرد

همام دخل: سا ابني عمال انادي عليك رامي عايز يمشي

جبل على نفس وضعه 

رامي قرب منه: يا إبني انا ماشي وبكره هاجيلك من النجمه

رفع جبل وشه وكان منظره يغني عن أي كلام

همام بخوف: مالك يا ابني في ايه دموعك دي ليه

جبل بصوت طلع مبحوح ومحمل بكل الوجع: كنت عارف ومقولتليش

همام بعدم فهم: عارف ايه في ايه يا ابني 

جبل بوجع: حور اتخطبت والهيصه دي بتاع خطوبتها 

همام بصدمه: إيه وكمل بتبرير والله يا ابني ما كنت اعرف ولو كنت اعرف كنت هاعمل ايه ربنا يسعدها 

رامي اتكلم بحسم: جبل انتا وحور موال وخلص سيبها تعيش حياتها ربنا رزقها باللي يعوض كسرتك فيها سيبها لحال سبيلها كفايه بقى انتا وأهلك واختك كمان اتعاقبتوا بذنبها سيبها وادعيلها ربنا يسعدها 

جبل بدموع: قلبي بيتحرق يا رامي محدش حاسس بيا مش هاتحمل والله ما هاتحمل قلبي هايقف

رامي قرب منه ومسكه من كتافه وهزه بعنف: اللي بيحب مبيأذيش وانتا مش بس اذيتها انتا دوست عليها لحد ما طلعت روحها هي امنتلك وانتا خنت هي وثقت وانتا غدرت احمد ربنا انها خلصت لحد كده فوق لنفسك واتجوز وعيش وابني اسره بس ياريت المره دي تختار صح وتقرر صح 

همام بتأييد: اسمع كلام صحبك عنده حق في كل كلمه كفايه اللي صابها من ورانا واللي صابنا من ذنبها كفايه شر لحد كده كفايه ندفع تمن شر ثريا يا ابني اللي فات مات وإبداء من جديد الحياه لا بتقف علىى عزيز ولا على غالي ولا حتى حد بيموت ورا حد ولا بيموت من الحب وابسط مثال قدامك انا اهو عشقت أمك عشق عباده بس في الاخر الحياه خلصت وكملت وعافرت وبعيش عشان اكمل رسالتي في حقك وحق اختك لحد ما اطمن عليك وعليها واوصلكم لبر الأمان بعيد عن شر أمك 

جبل هز رأسه بتعب: انا عايز انام

سنده همام ورامي ودخلوه سريره وسابوه لمحكمة ضميره كانت القاضي والجلاد 

مشي رامي وهمام دخل اطمن على بنته اللي يادوب بطلت صراخ كل ما حد يدخل عليها 

****************************

خلصت الخطوبه واغلب المدعوين مشي واللي اتبقى أهل العريس والعروسة وأصحاب حور وصاحب يونس هدي غرفت الأكل ليونس وحور في اوضه الصالون وسابت الباب مفتوح وحطت الأكل على السفره لأهل حور وأهل يونس وأصحابهم 

الكل بياكل بنفس مفتوحه واكترهم يونس خلص الوقت وروح كل واحد على بيته وغيرت حور هدومها ونامت قريرت العييييين وميقلش عنها فرحه يونس 

********************************

مرت الأيام ويونس بداء شغل في الشقه حسب الإتفاق وكل شويه يتصل بحور يسألها وشويه يروح ليها الورشه يشاكسها 

حور كانت فرحت الدنيا مش سيعاها وهي حاسه باهتمام يونس اللي أصبح محاوطها من كل جانب 

حور كالعاده كانت شغاله في الورشه لحد ما قطع فرحتها اللي حصل ورجعها الف خطوه لورا

ياترى ايه اللي حصل .....؟

يا ترى اللي جاي مخبي إيه....؟

ياترى فرحه حور ويونس هاتكمل على خير

ولا للقدر رآي تاني....؟

ياترى طبل هايسيب حور فعلا ولا في دماغه حاجه تاني....؟

يتبع....

  •تابع الفصل التالي "رواية تربية حواري" اضغط على اسم الرواية