رواية تربية حواري الفصل السابع والخمسون 57 - بقلم ولاء حامد

 رواية تربية حواري الفصل السابع والخمسون 57 - بقلم ولاء حامد 

تربية حواري

البارت السابع والخمسون

وطلع تاني ولبس وجهز واتحرك هو وأهله على المول وجاب علبة شيكولاته فخمه وغاليه واتفق على بوكيه ورد يستلمه بكره الضهر ودخلوا كافيه هو اهله يرتاحوا شويه ويشربوا حاجه يونس قالهم عنده مكالمه هايطمن على الشغل وفعلا اتصل بمازن واطمن ان الشغل تمام وهو بيكلمه اتحرك وبيتمشي لحد ما خلص ولفت تاني علشان يرجع لفت انتباهه محل فساتين سواريه تحفه اتحرك زي الإنسان الآلي ودخل المحل وبداء يتفرج على الموديلات ولفت انتباهه فستان ازرق تحفه مطعم بفوص سيلفر وبحزام كحلي تحفه فيه توكه على شكل طاووس مبهم التفاصيل وكمام طويله جدا اتلفت للبت اللي شغاله في المحل 

يونس بهدوء: لو سمحتي عايز الفستان داه

البنت وهي بتبص بإنبهار عليه وعلى اختياره: اهنيك على ذوق حضرتك الفستان داه من كولكشن السنه الجديده 

يونس: تمام عايزه 

البنت بعمليه: تمام يا فندم 

واتحرك يونس عند الكاشير ودفع تمن الفستان اللي بالرغم من غلو تمنه الا ان فرحته بيه كان مش سامعه الدنيا وهو بتخيل حور فيه واخد الفستان في جراب وطلع لفت شويه ودخل محل طرح واختار طرحه سيلفر تحفه ماشيه مع الفستان 

ودخل محل احذيه وهو محتار قدام مليون اختيار وكلهم أجمل من بعض وبعد وقت محسش بيه احتار ما بين اتنين واحد اسود بشريط ستان سيمبل وفيه فصوص سيلفر وواحد فضي وفيه شريط ستان ولكن ملفوف على معصم الرجل ونازل منه دلايات شبه الخلخال وفضل في حيرته كتير واخيرا قرر ياخد الاتنين وحاسب عليهم وطلع من غير ما حد ياخد باله وحطهم في شنطه العربيه ورجع لأهله 

شهيره بسخط: ايه يا يونس كل داه بتتكلم في التليفون بقالك ساعه ونص واحنا هنا ملطوعين 

يونس بإبتسامه: معلش يا ماما حقك عليا 

شهيره: كنت فين كل داه 

يونس بحرج: لا عادي كنت بتكلم في التليفون وبعدين اتمشيت شويه

احمد بص لابنه بنص عين: طيب وسكت ما اتكلمش

يونس بمراوغه: طيب يلا نمشي ولا إيه 

احمد: تمام يلا

واتحركوا وقبل ما يطلعوا 

شهيره بقولك ايه يا احمد انا هاروح اشوف المحل بتاع المجوهرات جاب الطقم بتاعي ولا لسه

احمد : تمام يلا هنروح معاكي ودخل المحل ويونس منتظر أمه ولما طال كلامهم طلع بره ووقف ولفت نظره دبل شيك جدا معروضه في الباترينه ووقع اختياره على دبله عريضه بفصوص شكلها يخطف العين ولف بنظره على التوينزات المعروضه اختار توينز تحفه 

وانتظر لما أمه خلصت 

يونس: خلاص خلصتي 

شهيره: اه تمام ودفعت الحساب يلا بقى لحسن انتا فرهدتنا

يونس طول مفاتيح العربيه من جيبه واداها لابوه: بابا حضرتك انتظرني مع ماما في العربيه وانا دقيقه وراجع شوفت بدله حلو هاروح اسأل عليها وجاي 

احمد بخبث: طيب ما نيجي معاك نشوفها يمكن تعجبنا ونقولك رآينا بالمره 

يوس بحرج: انا لسه هاشوفها وكمان البدله في الدور التالت وماما تعبانه معايا بقالها فتره يلا يا بابا بقى

احمد بإبتسامه: ماشي وسابه وطلع

يونس اتنهد ورجع المحل بخطوات سريعه اشبه بالجري

ووقف قدام المحل واخد نفسه واتمالك اعصابه ودخل:لو سمحت في دبله وتوينز في الباترينه كنت عايزهم 

صاحب المحل: تمام مفيش مشكله ممكن حضرتك تطلع وتحاولي عليهم

يونس بهزه راس بالموافقه وطلع وشاور عليهم 

صاحب المحل طلعهم :هما دول 

يونس: اه هما حسابهم كام من فضلك

صاحب المحل وزنهم وبلغه بالسعر :يونس اوكي عايزهم وطلع الفيزا ودفع تمنهم

صاحب المحل: اكتب الفاتوره بإسم مين يا فندم

يونس بإبتسامه: حور يونس اللباد 

صاحب المحل:يب حضرتك المقاس مظبوط ولا لاء علشان لو كده نقدر نجيب لحضرتك المقاس المظبوط: يونس بص على الدبله وبصلها بتمعن وهز رأسه: لا تمام 

صاحب المحل كتب الفاتوره وعطاهم ليونس بالفاتوره:الف مبروك يا فندم

يونس بإحراج: الله يبارك فيك شكرا وطلع بره المحل وقلبه طاير ووقف لحظات هايقول لأمه ايه لو شافت الكيس معاه لحظات وطلع العلبه حطها في جيب البليز ورمي الكيس في الباسكيت ورجع لأهله وكأن شيئ لم يكن

مر الوقت والكل مترقب ومنتظر على أحر من الجمر

هدي عملت حمله تنضيف شامله للبيت ومقعدتش دقيقه وحور بتساعدها وعقلها شارد وقلبها مشغول وهدي حاسه بيها وسيباها علشان تحسم الجدل اللي فيه 

*************************

جبل في المستشفي مع ابوه واخته ورامي اللي مفارقهومش لحظه الا لما بيروح البيت يغير ويرجع ويروح الشغل ويرجع 

همام بوجع:لو سمحت يا ابني نقدر ناخدها أمته 

الدكتور بتفهم: تقدر تخرج اخر الاسبوع بس يفضل تتابع مع دكتور نفسي لان حالتها النفسيه تحت الصفر وممكن تتدخل في مشاكل احنا في غنى عنها

همام :ماشي يا إبني 

رامي بجديه: طيب يا دكتور ممكن حضرتك ترشحلنا دكتوره كويسه لان اظن بعد الحادثه ممكن يكون عندها رهبه من التعامل مع الرجاله في الفتره اللي جايه 

الدكتور بتفهم: عندك حق في وجهة نظرك انا هتشزف مين أفضل دكتوره متخصصه في المجال داه وابلغكم بيها

رامي: مفيش مشكله منتظرين حضرتك

اتحرك الدكتور وسابهم كل واحد شارد في حال غير الحال

*******************

مر الليل وكان أطول ليل يمر على يونس اللي نايم على سريره بيتقلب وكأنه بيتقلب على الجمر واخر ما تعب طلع البلكونه وبص للسما شاف القمر بدر النجوم حواليه مكمله جماله شاف وشها في القمر ابتسم وغمض عنيه واتمني بكره ييجي بسرعه

وحور متختلفش عنه طول الليل عقلها مشغول وكل ما تتعب من التفكير تطلع البلكونه وبص للقمر والنجوم

وبرغم بعد المسافات الا إنها وفقت القلوب والعقول في نفس اللحظه

واخيراااااا وبعد طول انتظار طلعت شمس النهار وقفلت معاها سواد الليل ويونس نزل وكله لهفه على تحت لابوه وأمه اللي كانوا قاعدين يفطروا 

احمد: اقعد افطر لسه بدري ميعادنا المغرب هاااااا المغرب مش 7 الصبح 

يونس بعيون مبرقه: في ايه يا بابا انا اتكلمت 

احمد بسخريه: لا ابدا سلامتك بس عنيك فضحاك 

يونس قعد بقله حيله وبياكل بغيظ ولقي شطه في الأكل سرح بعقله وافتكر حور لما اكلته من الشارع اكل حراق والابتسامه فضل توسع وتوسع لحد ما بينت صفين اسنانه

شهيره بتبص لجوزها بإستغراب والاثنين بيبصوا لبعض ويرجعوا يبصوا ليونس اللي حس ان في حاجه غريبه فهز رأسه يطرد الأفكار اللي بتجيله في غير وقتها واتكلم بإحراج: في ايه يا جماعه ماكلم بتبصولي ليه كده وكأني جاي من كوكب تاني

احمد تمالك نفسه: لا ابدا اصل في واحد بياكل وهو سرحان لدرجه انه بقى بيضحك مع نفسه وكأنه عقله طار

يونس بحرج: لا ابدا يا بابا دانا افتكرت حاجه في الشغل

احمد بغمزه عين: في الشغل بردوا طيب وهو الشغل بيضحك كده ابقى خدني معاك علشان اضحك شويتين

يونس: آآآآآآه انتا هتتسلا عليا اقوم انا بقى الحمد لله شبعت يادوب اللحق احلق واجهز نفسي

شهيره: يونس مالك يا حبيبي الساعه سبعه ونص حلاق مين اللي فاتح دلوقتي بص اطلع نام ساعتين لان شكلك مرهق وانا على الضهر كده هاصحيك 

يونس بحرج: معلش مخدتش بالي من الوقت وهرب من قدامهم قبل ما ابوه يستلمه تاني

طلع يونس واحمد انفجر من الضحك

شهيره: في ايه يا احمد هي عدوى 

احمد وهو بيحاول يتمالك نفسه اصل ابنك بقى غرقان لشوشته وسرح وابتسم: يااااه فكرني بزمان وبص لمراته بعيون بتلمع بالعشق فاكره زمان كنت زيه كده ملهوف وعقلي متبرجل 

شهيره وهي بتسند على السفره بدراعها وبصتله بعيون بتحكي عن عشق ملك قلبها وعقلها وروحها: ابنك طالعلك يا احمد في العشق مجنون بس يارب يكون اختار صح لان احيانا القلب بيعمي العين 

احمد مسك ايديها:اطمني وطمني قلبك انا قولتهالك إمبارح البنت بنت أصول دي اللي تنفع إبنك ابنك دماغه زيي عايز اللي تفهمه وتدعمه مش واحده من جواها فاضي وباصه للكلام الفاضي واحده تفهم الحياه الزوجيه مش واحده واقفه ترقص على النت وتعرى جسمها واحده تخاف ربنا يا شهيره بالرغم من إننا بقالنا سنين متجوزين بس في كل ازمه مرت عليا كنتي سندي وضهري وعزوتي الزمن مبقاش هو الزمن الناس اتغيرت والمحترمين بقوا عمله نادره تلاقي اللي لابسه طرحه ومطلعه نص شعرها طيب محجبه الحمد لله طيب الشويه دول مقتنعوش وتلاقي اللي واقفه ترقص في الأفراح من غير خشا ولا حيا انا بشوف بنات عندي في الكليه استغفر الله جايين كباريه مش جامعه ابنك عايز واحده نضيفه ونقيه ومتخافيش انا سألت اكتر من خمسين واحد والكل اجمع انها فعلا بنت أصول متتخيرش عنك بصى لنفسك بالرغم من إننا عايشين في القاهره من سنين الا انك زي ما انتي متأثرتيش بالتلوث المحيط بيكي لسه لبسك محتشم وحجابك محترم جمعتي بين الرقي والشياكه والاحتشام لا في يوم شوفت لبسك مبتذل ولا في يوم شوفت عامله خريطه على وشك زي غيرك لانه اصل يقين نابع من جواكي مهما عدا الزمن مستحيل يتغير 

شهيره بعيون بتلمع ووش احمر من الكسوف زي البنت البكر تبتت في ايدين جوزها: عندك حق واهو يا عم كلها كام ساعه ونشوف الاميره اللي خطفت قلب ابنك ولو كان خير ربنا يجعلها من نصيبه ولو كانت شر ربنا يبعدها عنه 

احمد بتأكيد: ايوه كده ادعيله ابنك مبقاش الطفل الصغير ابنك بقى راجل ليه حق اتخاذ القرار وعلينا النصحيه قبلها وعمل بها تمام مقلبهاش وكمل في طريقه يبقى اختياره وقراره ويتحمل تبعيات القرار بنفسه

شهيره: عندك حق بس غصب عني انا ام وقلب الأم دايما بيخاف وبيعمل الف حساب وانا معنديش غيره ومعرفتش حتى اخلف غيره وغمضت عنيها ونزلت دمعه بألم

احمد وهو بيمسح دموعها بطراطيف صوابعه بحنان: هووووش داه أمر الله ملناش في اعتراض وربنا كرمنا ومعانا يونس وبكره يتجوز ويخلف ويملا البيت اللي حصل قضاء ربنا والحمد لله إننا طلعنا كويسين 

شهيره بدموع بتزيد هزت رأسها: لا يا احمد مش كويسين انا فقدت حملي قبل ما احس بيه وشيلت الرحم في الحادثه دي يعني جزء كبير من حياتي راح مني فيها 

احمد ضمها في حضنه: وربنا رزقنا بيونس ولا نسيتي انه اول فرحتنا اللي راح داه عند ربنا خلينا في اللي في ايدنا ابنك عريس وبكره يكبرك يا تيتا 

شهيره بضحك رغم دموعها: عندك حق انا بس صعبان عليا ان يونس عاش حياته لوحده من غير اخ او اخت وانا فشلت اني اجيبه 

احمد بإبتسامه حنونه: بس نجحتي وخلفنا يونس بصي لنص الكوبايه المليان بصي للي في ايدك مش اللي فقدتيه علشان تحمدي ربنا 

شهيره: عندك حق الحمد لله على كل حال 

********************

حور فاقت وهي متوتره وإحساس غريب متملك منها قلق وحيره وتوتر وطول الوقت قافله عليها اوضتها ومعتزله مع نفسها 

حور بشرود: وبعدين يا حور في الحيره دي وبعدهالك يا بنت عامر جازفتي ووافقتي من غير ما تحسبيها طول عمرك ممشيه حياتك بالورقه والقلم والمره دي لغيتي عقلك وفكرتي بقلبك وسيبتي غيرك يقرر عنك 

غمضت عنيها بوجع مش يمكن لان قرار غيري جه على هوايا وقامت بصت على صوره ابوها اللي موجوده على الحيطه ياريتك كنت موجود الوحيد اللي كان ليك نظره في الناس قولي دلني وخد بإيدي زي ما طول عمرك كنت بتاخد بإيدي محستش إلا وهي بتسحب عبايه سوده وطرحه وطلعت من غير ما حد يحس بيها وراحت على الترب وكلت جيران ميه ودخلت لأبوها وقعدت قدام قبره وعنيها على الباب زي ما يكون شيفاه وبتكلمه 

حور بتنهيده: يا تريى انا كنت صح ولا غلط يا حاج جيت وسلمتني ليه في الحلم يا ترى انا كنت صح ولا عقلي الباطن اللي عايزه كده وصورلي كده قولي ياأبا أوافق عليه واكمل

وقبل ما تكمل كلامها سمعت الأذان بيقول الله أكبر

ابتسمت ووشها نور وهزت رأسها برضا: عرفت يا حاج يبقى خير طول عمرك تقول لو احترتي وجيتي تسألي والاذان اذن يبقى بشره خير يبقى خير صح هو خير يا حاج ادعيلي انتا في دار الحق بس روحك حواليا وحاسس بيا وباللي جوايا ادعيلي يا أبا يكون الجبره بعد الكسره اللي قطمتني

********************

ياسر قبل ما يرجع البيت عدى على بيت عمه يطمن لو عايزين حاجه 

ياسر حط صباعه على الجرس زي عادته 

وهدي من جوه بزعيق : يووووه اصطبر ياللي على الباب مش قاعده مقطوعه ورا الباب 

فتحت الباب ولقيته في وشها: مش هاتبطل العاده المأندله دي يا ابن عابد 

ياسر بترقصه حواجب: ربنا ما يقطعلي عاده المهم قولت اعدي اشوف لو لازمكم حاجه قبل الجماعه ما ييجوا

هدي: ربنا يخليك يا حبيبي حسك في الدنيا 

ياسر بصوت واطي: اومال حور فين

هدي: في اوضتها من عشيه وهي ساكه الباب على روحها قولت اسيبها تهري وتنكت مع روحها لجل ما ترتاح وتطيب خاطر روحها بروحها 

ياسر: طيب ناديلي عليها عايزها في كلمتين 

هدي هزت رأسها ووسعتله الطريق: ماشي خش وانا هاندملك عليها 

دخل ياسر وقعد على الكنبه في الصاله وهدي خبطت على الباب: يا حور بت يا حور اطلعي ابن عمك عايزك في كلمتين 

هدي خبطت تاني وتالت ومحدش رد فتحت الباب ودخلت مالقيتش حد في الأوضه طلعت جري

يالهووووووي الحقني يا ياسر حور مش في البيت 

ياسر بخضه: يعني ايه هاتكون راحت فين داه الضهر ادن والورشه انهارده اجازه يعني هاتكون راحت فين 

هدي بخوف: علمي علمك وطلعت أمته انا كنت كل شويه ادخل اشق عليها وكانت جوه 

ياسر:طيب اطمني تلاقيها هنا ولا هنا انا هارن عليها 

هدي بخوف: استرها معانا يارب

ياسر طلع تليفونه وطلع رقم حور بسرعه ورن عليها 

هدي بتركز سمعها طلعت تجري على اوضه حور جابت التليفون وطلعت جري وهي بتنهج من الخوف يالهوووي الحقني يا ياسر تليفون البت جوه

ياسر بقلق: يعني ايه الكلام داه

هدي اترمت على الكنبه: هي ليها معني تاني البت طفشت فضلنا نزن على دماغها عشان توافق لحد ما طلعت من خلق الله لارض الله ودموعها نزلت بحرقه استرها معانا يارب ردهالي سالمه غانمه يارب دانا ماليش في الدنيا غيرها يارب متوجع قلبي عليها ولا تحرقني وتكويني بنار فراقها يارب

ياسر بهذيان: والناس اللي جايه دي هانقولهم إيه 

هدي بحرقه ونحيب: قطعوا وقطعت سيرتهم انا في بنتي ضنايا اللي معرفش جرالها إيه ولا صابها أيه 

ياسر بمحاوله لتمالك اعصابه: طيب اهدي يا مرات عم وان شاء الله هنلاقيها هاتكون راحت فين بس 

وغمض عينه وهو كازز على اسنانه بعصبيه: روحتي فين بس يا حور ليه تحطينا في الموقف داه بس

هدي بنحيب : يابنتي يا ضنايا ياترى صابك ايه

ياسر باصص على مرات عمه بقله حيله وعقله مش ساعفه يفكر من عياط هدي وكلامها اللي يقطع القلب 

قطع وصلت العياط حور وهي بتدخل من الباب وبصت على أمها اللي عنيها مورمه من العياط وجريت عليها بلهفه وضمتها في حضنها: مالك يا أما في إيه بتعيطي ليه ايه اللي جرا هدي حست بحضن بنتها وتبتت فيها ودموعها ذادت اوووي 

حور كشت حواجبها وبصت لياسر اللي واقف في موقف لا يحسد عليه ومش عارف يتكلم كلمتين على بعض

هدي بشحتفه وشهقه من العياط: يقطع الجواز وسنينه تغور كل حاجه الا انتي يا ضي عيني اوعي توجعي قلبي عليكي تاني يا بت فاهمه

حور خمنت من كلام أمها ان يونس رجع في كلامه 

حست بوجع في قلبها بس اتمالكت نفسها بكبرياء وراس مرفوعه: وايه يعني يا هدي مايروح مطرح ما يروح انا مكنتش قاتله روحي هلى الجواز اصلا ولولا كلامك انتي وياسر مكنتش فكرت أوافق اصلا والحمد لله انها جت منهم واهو لا اتكب زيت ولا اتبعطر دقيق

ياسر بصلها بصدمه: قصدك إيه ياحور

حور ببرود جليدي مميت: ولا حاجه قصدي انهم اعتذروا يبقى الله يسلهلم وانا مش قاتله نفسي عليه ولا انيش مقطعه شراييني عليهم يعني

ياسر بعدم فهم: هو يونس قالك انه اعتذر

حور هزت رأسها بنفي: لاء

ياسر بحده: اومال الكلام الخايب اللي بتقوليه داه جايباه منين 

حور برفعه حاجب: من منظركم وكلام امي اومال اللي عامل فيها كده ايه غير حوار سخام البرك اللي بليت ني بيه ليل ونهار لما بقى عامل زي فروض الصلاه عليا

ياسر اخد نفس وطلعت بعصبيه: ياشيخه الله يقطع دي قرابه أمك مقطعه روحها عليكي يا اختي لما ملقيناكيش في البيت يا اختي وقالت انك طفشتي بسبب الذن على نفوخ اهلك 

حور حست بإحساس غريب وكأن في حاجه بتتحرك في بطنها مش فاهمه سببها ولكن كالعاده مبينتش حاجه خالص وكأن شيئ لم يكن من الأساس 

حور اكتفت برد بارد: اممم طيب يأنسوا وينورو

ياسر بعصبيه: ثم خدي هنا كنتي فين وسايبه المحروق على دماغ ابوه التليفون بتاعك هنا

حور اخدت نفس وبصتله بوء: كنت في الترب 

هدي بشهقه بالرغم من عياطها: يالهوووي في الترب الساعادي دي الترب مفيهاش صريخ ابن يومين 

حور بشرود: كانت مفتوحه شكلهم بيدفنوا حد حسيت اني محتاجه ابويا في اليوم داه محستش إلا وانا بسحب العبايه والطرحه ورجليا وخداني على هناك 

ياسر بتقدير للموقف: ها وارتاحي دلوقتي

حور بهزه راس: تقدر تقول كده 

ياسر: ماشي بس ابقى خدي تليفونك معاكي مهو مش بسلك مش هاتعرفي تشيليه في ناس وراكي قلبهم بياكلهم عليكي 

حور بهزه رأس: ماشي مخدتش بالي منه

ياسر اخد نفسه وهز رأسه: ماشي هاسيبكم دلوقتي عشان اخلص اللي ورايا واللحق الميعاد ولو عوزتوا حاجه رنولي مسافه السكه واكون هنا

سابها ومشي 

وهدي بصت لبنتها بدموع: روحتي الترب ليه يا حور ريحي قلبي يا بنتي انا مبقتش حمل الوجع داه كله يا ضنايا

حور بنظرة امل : صدقيني يا أما والله حسيت ان دماغي هاتشت مني طول الليل بتقلب على جمر من نار 

هدي شهقت: يالهوي الشر بره وبعيد

حور :من غير خوف يا أما اللي حصلي مهواش هين عشان اتعامل وكأنه محصلش عشان كده عقلي كان هيشت لقتني زي عادتي بجري على ابويا زي زمان 

هدي بوجع: بس ابوكي في قبره مبقاش على وش الدنيا يا بنت بطني

حور بإبتسامه: صدقيني يا أما حتى وهو عضمتين في قبره قدر يحسم الحيره دي وكأنه قاعد قدامي وكأنه بيطبطب على قلبي وهارف عقلي طريقه منين وخد بإيدي ليه

هدي بحيره: طيب ورسيتي على ايه يا بنت بطني 

حور بإبتسامه صافيه: هاسمع نصيحه ابويا واخد بيها يا أما واريح قلبك وعقلك بس بالله عليكي سيبيني احدد اللي جاي محدش يفرض عليا حاجه 

هدي بقلق: شكلك ناويه على حاجه

حور :متقلقيش كل خير علشان تكون النقط على الحروف من أولها والغلط ميتعادش تاني

هدي وهي بتقوم: طيب يلا ادخلي استحمي وانفضي تراب التُرب داه من على جتتك وافدي جسمك شويه عشان الدمويه ترد في وشك اللي بقى مخطوف زي قشره اللمونه

حور براحه نفسيه: عندك حق مع اني كنت عايزه أقف اساعدك 

هدي: ريحي جتتك شويه وانا لما اجاي لعمايل الأكل هاصحيكي عشان لما اقوم داه عمايل اديكي يبقى بحق وحقيقي ويعرفوا انك ست ليت شاطره لو لفوا البلد على كعوب رجليهم حافيين ميلاقوش ضوفرك يعرفوا انهم خدوا بت بنت ناس وست بين وبنت بلد وجدعه

حور :ايه يا أما حيلك حيلك حيلك ليه واخدين بنت الرباع

هدي بشهقه: لا يا عنيا واخدين بنت عامر النصراوي وكملت بفخر وراس مرفوع كبير حاره المغربي كان متعلم ومتنور وعقله يوزن بلد كان ونعم الرجال وزين الرجال كان راجل ليه شنه ورنه عمره ما استعر من أصله ولا من شغله كان راجل على حق

حور بتنهيده: يا أما ابويا الله يرحمه لا غبار عليه انا بتكلم على نفسي عماله تنفخي فيا زي البلكونه ولو صدقت كلامك هافرقع في وش خلق الله وانتي ادري الناس باللي بيا يعني المفروض احمد ربنا وابوس أيدي وش وضهر

هدي قامت بعصبيه وشدتها من هدومها: اسمعي يا بنت بطني البوقين دول عشان معدتش اعيدهم تاني اللي حصلك لا أهو كان بكيفك ولا بخوطرك وانتي كنتي مكتوبه على زمة راجل داه اولكشي يعني لا عملتي حاجه عيب ولا غلط ولا حتى حرام 

ورفعت وش بنتها بإيديها وبصت في عنيها بجبروت لأول مره تشوفه في عنين أمها: اوعي سامعه اوعي في يوم تقلي من روحك وتشوفي نفسك قليله اللي يقل من روحه الناس تعيش وتموت تقل منه ومها كبر يفضل في نظرهم قليل والغالي يفضل طول عمره الناس تبيع اللي وراها واللي قدامها عشان تشتريه وانتي كبيره وعاليه وغاليه اوشمي الكلمتين دول في دماغك وعلى راي المثل من غَلا غلي ومحد قدر عليه ومن رخص رِخص وما لقي مين يشتريه 

اوعي تتعاملي انك ناقصه او قليله اي بت وارد تتجوز وتتطلق وهي معاها اورطه عيال وانتي طلعتي من الجوازه دي خاليه وهو عارف يعني لا غشيناه ولا ضحكنا عليه عرف وقبل ووافق يبقى على بركه الله تتعاملي معاه ومع اتخن تخين بما يرضى الله اوعي في يوم تتكسري وتوطي راسك معاه او مع غيره وافتكري انك كنتي متجوزه واللي ييجي يتكلم نحط القسيمه في عينه نخزقها اوعي يابنت عامر تنخي اللي ينخ ويوطي الف من يركب على ضهره ويسوقه افتكري يا بت ان اللي خلف مماتش وانتي بعد ابوكي بقيتي حور القادره اللي لما يتنطق اسمها يتهزلها رجاله بشنبات اوعي تبقى وليه مكسوره الجناح فهمتي يا حور ولا نعيد تاني

حور بتفكير عميق من كلام أمها فوقها وطبطب على باقي جروحها وطيبها هزت رأسها بموافقه:فهمت يا أما فهمت متعتليش هم شكل انهارده يوم عوضي ابويا حطني على اول الطريق وانتي دلوقتي بتنفضي من على ضهري غبار الضعف يلا اسيبك بقى وادخل اريح جتتي شويه 

سابتها حور ودخلت نامت مرتاحه قريرت العين

مر الوقت وقامت حور وبدئت المعركه الطاحنه في تجهيز وليه تليق بعريس حور وبمقام بيت الحاج عامر النصراوي بيت الكرم اللي معروف للكبير قبل الصغير 

يونس بقى بيعد الوقت بالثانيه ومصدق الضهر اذن وطلع يجري على الحلاق وحلق وجهز نفسه بفرحه طفل مستني يوم العيد رجع البيت وكله لهفه وشوق وطلع جري على اوضته 

وابوه وأمه واقفين يضحكوا عليه وعلى برجلته وتسرعه

طلع واخد شاور بسرعه ولبس بنطلون جينز جراي فاتح وقميص ابيض وفاتح اول زرارين منه وعليه بليزر كحلي وشوز بني وحزام بني وكان عنوان للوسامه والرجولة سرح شعره وحط برفانه وحط الدبله والتوينز في جيبه ونزل وهو بيصفر ونادا بصوت عالي يا جماعه خلصوا الوقت مش معانا 

طلع ابوه واللي كان خلص لبس وكان لا يقل اناقه عن ابنه :خلاص يا عريس دقايق ونتحرك وكمل بخبث المهم يا برنس هانعدي نجيب الشيكولاته والورد من المول 

يونس بإبتسامه وغمزه عين : عيب عليك يا كبير عديت وجبتهم ومنتظرينا في العربيه المهم استعجل المدام لان بكده هانروح بعد يومين

طلعت شهيره وهي متشيكه ومثال للأناقه والشياكه والرقي كانت لابسه دريس اسود ساده وفيه حزام سلاسل دهبي من الوسط وعليه بليزر ابيض في وردات سوده كبيره وحجاب ابيض ملفوف بطريقه شيك : خلاص يا عريس جهزنا يلا علشان نتحرك ورجاء شخصي بلاش تهور في الطريق علشان نوصل بالسلامه 

يونس هز رأسه بسرعه: طيب يلا بقى الله يخليكم كفايه عطله

شهيره: يا حبيبي والله لسه بدري ميعادنا مع الناس بعد المغرب والعصر لسه مأذنش اصلا والطريق كله مسافه ساعه بالكتير ساعه ونص فأهدا كدا واركز 

يونس هز رأسه وطلع وسابهم وهما جم وراه ركبوا العربيه واتحركوا وطول الطريق اللي سايق قلب يونس مش ايديه 

يا تري اللي جاي ايه..؟

يا ترى أن الأوان للفرح ولا للقدر رآي تاني...؟يا تري ايه اللي جاي في حياه جميله وجبل....؟

وايه اللي مستخبي لسه لحور......؟

....يتبع

  •تابع الفصل التالي "رواية تربية حواري" اضغط على اسم الرواية