رواية موضوع عائلي الجزء الثاني 2 الفصل الثاني والعشرون 22 - بقلم رحاب القاضي

 رواية موضوع عائلي الجزء الثاني 2 الفصل الثاني والعشرون 22 - بقلم رحاب القاضي

موضوع عائلي

"الجميله والشعر الابيض" 

_الحلقه الـ 22

ـــــــــــــــــــــــــــــــــــ

_نعم أنا مشتاق لكِ وكثيراً.. ولكن أمامك ستكون أشواقي بارده من أجل كبريائي يا حبيبتي🙂

يونس بجمود

مش هي.. 

شهد بدموع

وانا عبيطه بقي ومش هصدق ان دي مش اللي سيبتني عشانها.. 

يونس بحده

انا عمري ما سيبتك يا شهد عشان حد،ولا عمري هسيبك دي مش ال... 

ـ سكت بضيق وهو مش عارف يصف مايا قدامها بأيه، فقالت هي بعصبيه.. 

شهد 

سكت ليه ما تكمل شوف هتكدب عليا بأيه بس انا مش هسمعلك تاني... 

جات تمشي بس هو مسك ايدها وقال

هي يعني الوحيده اللي اسمها مايا، والله دي السكرتيره الجديده اللي اشتغلت عندي يا شهد.. 

شهد بحزن

مش مصدقاااك.. 

اتنهد بضيق وقال

هكلمها قدامك اهو يا ستي.. 

_ ومسك موبيله وكلم فعلا مايا اللي كانت بترد عليه، وردت هي عليه بسرعه وقالت...

مايا

صباح الخير يا يونس بيه.. 

يونس بجديه

صباح النور... 

مايا

كنت بسأل حضرتك هو انت جاي النهارده ولا لا، عشان في اجتماع مع المهندسين عشان الفرع الجديد.. 

يونس بهدوء

لا خلاص جاي اجليه بس نص ساعه لحد ما اجي.. 

مايا 

تحت امر حضرتك.. 

_ قفل معاها وحط الموبيل قدامها علي السرير وقال بسخريه.. 

يونس

الموبيل عندك اهوو لو عايزه تتاكدي من حاجه تانيه براحتك.. 

شهد بضيق

ما هو يعني مش من قلة الاسماء تشغل عندك واحده علي نفس اسم اللي خونتني معاها يا يونس.. 

يونس بحده

هو احنا لحد امتي هنفضل حاطين ام الموضوع ده بينا... 

شهد 

هو مين اللي عمل الموضوع ده اصلا؟.. 

يونس بنبره عاليه

وخلصنا خلااص واديني بتزفت ارضيكي واعوضك علي قد ما اقدر، ولو هتغيري ما عنديش مشكله انما تفضلي طول الوقت بتشكي فيا لا يا شهد.. 

شهد 

وطي صوتك يا يونس ما تنساش ان مرات ابوك هنا وانا مش عايزه حد يتكلم عليا بسببك.. 

يونس بحزن

كفايه يا شهد انا لو لسه بفكر في غيرك ما كنتش رجعتك ليه تاني... 

شهد بضيق

انا رايحه اشوف الولاد، وقبل ما تروح شغلك وصلني المستشفي.. 

يونس

رايحه لبطه؟.. 

شهد 

بطه هتخرج النهارده هبقي اروحلها البيت، انا رايحه لمامت جميله عشان تعبانه شويه.. 

يونس

حاضر بس اجهزي بسرعه عشان مستعجل.. 

شهد 

طيب.. 

_ وفعلا وصلها بعد شويه المستشفي اللي فيها ام جميله وجات تنزل بس هو مسك ايدها وقال بهدوء... 

يونس 

حقك عليا يا شهد انا اسف.. 

شهد بدموع

خلاص حصل خير. 

يونس بهدوء

انتي معاكي حق انا اللي غلطت في الاول وكل اللي بتعمليه انتي دلوقتي ده حقك وانا غصب عني لازم اتحمل، بس وحياة ولادي وغلاوتك عندي انا عمري ما هفكر في واحده غيرك تاني ولا هقصر معاكي ومع الولاد في حاجه.. 

ابتسمت بهدوء وردت عليه وقالت

خلاص يا يونس والله هحاول ابطل ادايقك انا كمان.. 

يونس بخبث

انتي براحتك يا ستي اعملي اللي عايزااه وانا عشان طيب وغلبان هتحمل.. 

شهد بسخريه

حوش حوش طيب جنحاتك طرفت عيني، مش معني اني بتعامل بهدوء وكده اني هعديلك اي حاجه ده انا اا.. 

يونس بغيظ

خلاص يا شهد ما. حدش يعرف يهزر معاكي. انزلي روحي لصحبتك والسواق هيجي ياخدك.. 

شهد 

هطلب اوبر عشان هروح الشغل.. 

يونس

يا بنتي مش قولتي ان ماما هناء ومحمد جايين مين هيستقبلهم.. 

شهد 

وانا دلوقتي لازم اروح الشغل اعمل ايه يعنى.. 

يونس بضيق

بس بيتك محتاجلك اكتر يا شهد.. 

شهد 

برضو بتدور علي اي حاجه تتخانق بيها وفي الاخر انا النكديه.. 

يونس بضيق

هو انا لما اطلب منك تقومي بواجبك بكون بتخانق معاكي، علي العموم اعملي اللي يريحك يا شهد.. 

شهد بحده 

وانا مش هيريحني غير شغلي يا يونس اوعي تأذيني فيه او تخليني اسيبه انا ما صدقت لقيت نفسي.. 

يونس بضيق

طيب انزلي بقي عشان مش فاضي.. 

قربت منه بهدوء وباسته من خده وقالت

طيب هتوحشني علي فكره.. 

ابتسم بهدوء ورد. عليها

وانتي كمان يا حبيبتي هتوحشيني،وتخلي بالك من نفسك ووقت ما اكلمك قبل ما اسمع الجرس اسمع صوتك مفهوم... 

شهد بهدوء

مفهوم.... 

_ ونزلت من العربيه وطلعت عند جميله، واول ما طلعت فوق لقيتها قااعده بره اوضة مامتها وشكلها مدايق اوي.. 

شهد 

مالك يا جميله في ايه؟.. 

قامت جميله وحضنتها بدموع وقالت

انا مني لله انا ديما كده بندم علي الحاجه لما تروح وبكتشف اني غبيه اووي في كل حاجه بختارها حتي ماما دلوقتي اا.. 

قاطعتها شهد بحزن

لا حول ولا قوة الا بالله ربنا يرحمها يا جميله ويصبركم... 

جميله 

يرحم مين يا وليه انتي ماما زي الفل جوه، بس عمار سابني.. 

شهد 

هو مش انتي اللي سبتيه هو حد. لعب في الاعدادات بتاعتك يا بت.. 

جميله 

هفهمك انا بعد اللي حصل هسيب حسين وهو موافق فبعد كل اللي عكيته مع عمار انا فكرته هيقدرني وهيكون جنبي وهنرجع بس قالي انا مش بمسك في حد باعني.. 

كتمت شهد ضحكتها وقالت

معاه حق بصراحه يا جميله لان كلنا قولنالك اللي عملتيه في حقه غلط.. 

_في الوقت ده طلع من اوضة فريده مروان ومعاه عمار اللي بص لجميله وقال بجديه.. 

عمار

مروان هيفضل معاكم لحد ما مامتك تطلع ولو احتاجتو اي حاجه انا موجود. يا انسه جميله.. 

بصله مروان بعدم فهم وقال

نعمم انسه ايه؟؟... 

عمار بجمود

زي ما سمعت وتعالي معايا عايزك.. 

قبل ما يمشي جميله قالتله بهدوء

ما لوش داعي تتعب نفسك يا عمار بيه...

رد عليها بنفس جموده

لا تعب ولا حاجه يا انسه جميله احنا بقينا نسايب وابني متجوز اختك، بعد اذنكم.. 

_ ومشي هو ومروان وفضلت شهد. تضحك علي شكل جميله اللي كانت متدايقه جداً من طريقته.. 

شهد 

بس بجد قمر اووي يخربيته.. 

جميله بغيظ 

والله هكلم جوزك واقوله، قال انسه جميله قال.. 

شهد 

هههههه حقه يا جميله وبعدين الوقت بينسي وهيسامحك لانه بيحبك يا غبيه... 

جميله بضيق

الله واعلم بقي تعالي ادخلي.. 

شهد

هو انتي ايه اللي كان مقعدك هنا اصلاً.. 

جميله

كرامتي.. 

شهد

مين يا اختي؟.. 

جميله

ما تركزيش معايا دلوقتي وادخلي وانتي ساكته.. 

_ وعند عمار تحت قبل ما يركب عربيته اللي كان بيسوقها السواق، وقف وقال لمروان بجديه... 

عمار

خليك معاهم وانا دفعت حساب المستشفي تقول ان انت اللي دفعته.. 

مروان

ما انا كده كده معاهم وهفضل معاهم لحد ما طنط فريده تخرج من هنا، بس انت يعني الست اعتذرتلك ودلوقتي جميله هتطلق ف... 

قاطعه عمار بجمود وقال

ماليش دعوه بحد وانت تخليك معاهم عشان ايتن، انت دلوقتي الراجل الوحيد اللي معاهم، فتبقي راجل بجد وما تقللش معاهم في اي موقف وقبل ما يحتجولك يلقوك مفهوم.. 

مروان 

حاضر طيب والشغل؟.. 

عمار وهو بيركب العربيه

النهارده اجازه بس بكره من النجمه تكون في الشركه.. 

مروان بجديه

ان شاء الله بس جميله يعني.... 

عمار بحده 

مروان طلع نفسك بره الموضوع ده.. 

_ وركب العربيه بتاعته ومشي من قدام المستشفي.. ومروان قال لنفسه بسخريه.. 

مروان

انتي اللي جيبتيه لنفسك يا جميله.. 

ــــــــــ بقلم_الكاتبه_رحاب_القاضي ــــــــ

_ وفي بيت يوسف.. 

كانت بطه نايمه في اوضتها وهي بتكلم يونس في الموبيل وبتقوله.. 

بطه 

اعمل اللي بقولك عليه يا يونس لو ليا غلاوه عندك... 

يونس

والله انتي بتحطيني وبتحطي نفسك في موقف وحش اووي يا بطه، طلاق ايه اللي عايزه تطلقيه ده وعايزاني انا كمان اللي اكلم يوسف.. 

بطه بدموع

ما انا لو قولتله مش هيسمع مني، لو سمحت يا يونس انا مش هقدر اكمل معاه وانا سبب في انه يتحرم من حاجه هو مالوش ذنب فيها.. 

يونس 

يعني انتي اللي ليكي ذنب فيها انتو عملتو اللي عليكم واللي حصل ده بتاع ربنا... 

بطه بتعب

عشان خاطري يا يونس انا مش قادره اتكلم، بس اسمع كلامي وخلاص.. 

يونس بحزن

حاضر يا بطه هكلمه، هقفل دلوقتي عشان الشغل وهبقي اجيلك بالليل... 

بطه 

ماشي مع السلامه.. 

_ قفلت معاه وغمضت عيونها بحزن وهي بتلمس الدبله بتاعتها اللي مكتوب عليها اسم يوسف وفضلت ساكته لا بتعيط ولا متكلمه لحد ما دخل عندها يوسف وقال. 

يوسف

انتي صاحيه يا حبيبتي والله فاكر انك نايمه.. 

بطه 

هنام اهوو.. 

يوسف

لما انا جيت هتنامي.. 

بطه بحزن

تعبانه بجد يا يوسف وهنام... 

يوسف 

ماشي وانا كمان هغير هدومي وجاي انام.. 

بطه 

انت مش هتروح الشغل، لو سمحت ما تربطش نفسك بيا وشوف اللي وراك.. 

يوسف

ما نمتش طول الليل ومش هقدر اروح الشغل النهارده.. 

بطه 

اللي يريحك.. 

قعد يوسف جنبيها وقال

هو انا زعلتك في حاجه، بتتعاملي معايا كده ليه يا بطه؟.. 

ردت عليه بدموع وقالت

لو سمحت انا عايزه انام ومش قادره اتكلم في حاجه، ولو انت مش جايلك نوم وطالبه معاك كلام اطلع بره.. 

يوسف 

ماشي.. 

_ برغم عصبيته من طريقتها الناشفه معاه الا انه قرر يسكت رفقاً بحالتها عشان ما تتعبش اكتر... 

ــــــــــ بقلم_الكاتبه_رحاب_القاضي ــــــــ

_ وفي المستشفي... 

بعد ما مشيت شهد من عند فريده فضلت هي وبنااها بس قاعدين لوحدهم... 

ايتن

فيها الخير شهد والله بنت جدعه اووي... 

فريده بجمود

جميله تعالي جنبي هنا.... 

_راحت جميله وقعدت جنبيها فحضنتها فريده وقالت بدموع وحزن.. 

فريده 

حقك عليا انا كنت غلطانه.. 

جميله ردت عليها بسرعه وقالت

لا لا ما تقوليش كده يا ماما هو انتي يعني كنتي تعرفي حاجه.. 

فريده 

من زمان وانا بسمع كلام احمد وباجي عليكي، حرمتك من مدرستك زمان وصحابك لما هو قال تسيبي الخاص وتدخلي حكومي، وحرمتك برضو من الكليه اللي نفسك فيها، حتي الجواز انا سمعت كلامه ورضيت بوجعك عشانه.. 

تابعت كلامها ببكاء

ابوكم قبل ما يموت في المستشفي قالي احمد ده مش اخويا وبس ده ابني كمان هو اكتر حد هيخاف علي البنات ووصاني اني اسمع كلامه واخليه يبقي هو الواصي عليكم، كان لاعبها صح احمد وعامل حساب كل حاجه... 

ايتن بحزن

بس المفروض يا ماما كنتي تشوفي مصلحتنا وراحتنا قبل ما تنفذي وصية بابا، كنتي تحكمي عقلك انا حتي لما كنت باجي اشتكيلك منه كنتي ما بتسمعيش مني.. 

فريده بضيق

كنت غلطانه وبعترف بكده وانتي كمان يا ايتن غلطتي لما روحتي واتجوزتي من ورايا ولما خبيتي عليا ان عمك هو اللي حرمنا من ابوكي وسيبتيه يتمتع بفلوسه كمان ويتحكم فينا.  

ايتن بسخريه

وانا كنت هحكيلك ازاي وانا شيفاكي بتصدقيه هو وبتخليه يمشي كلامه علينا حتي لو غلط، وجوازي من مروان مش غلط يا ماما اولا لان انا ما اتجوزتش اي حد وخلاص ولا حد وحش مروان احسن واحد شوفته في حياتي، وثانياً لانه قد ثقتي فيه وجوازنا مجرد كلام علي ورق عشان كان يقدر هو وباباه يساعدوني.. 

جميله 

خلاص يا ماما بقي كلنا غلطنا واللي حصل حصل، خلينا بقي نكمل حياتنا من غير ما نفتكر اي حاجه من اللي عدت.. 

_دخل في الوقت ده مروان عندهم بعد ما خبط علي الباب وقال بهدوء.. 

مروان 

يلا يا جماعه الدكتور قال نمشي.. 

فريده بهدوء

مش عايزين نتعبك معانا يا مروان تقدر تمشي والبنات معاية اهم.. 

مروان

لا تعب ولا حاجه يا طنط فريده ده الواجب، المهم انا بعد ما هوصلكم هاخد ايتن عشان هنشوف التنسيق وهنقدم لجامعة ايه وكده.. 

فريده بضيق

اهي عندك هو حد بيعرف يمشي كلامه عليها.. 

ايتن بغيظ

ما فيش فايده يا ماما تفكيرك عمره ما هيتغير.. 

فريده بحده 

ماله تفكيري يا مقصوفة الرقبه انتي هااا. 

جميله بقلق

خلاص بقي يا ماما احنا في المستشفي مش في البيت عشان اللي بتعملوه ده، تعالو نروح البيت وهناك براحتنا.. 

فريده بجديه 

تخلصو التنسيق يا مروان وترجعها علي البيت عندي لحد ما نشوف موضوعكم هيرسي علي ايه.. 

مروان بهدوء وثقه 

علي كل خير ان شاء الله يا طنط.. 

ــــــــــ بقلم_الكاتبه_رحاب_القاضي ــــــــ

_ وفي شركة زيد.. 

كان واقف زيد ومعاه شهد وماجي وفي الوقت دت موبيل شهد رن برقم يونس.. 

شهد 

بعد اذنكم هرد علي الفون وجايه دقيقه واحده.. 

زيد بضيق

بسرعه يا مدام شهد احنا مش فاضين.. 

شهد 

حاضر.. 

_ وراحت شهد علي جنب وردت علي يونس وقالت بصوت واطي.. 

شهد 

ايوه يا يونس خير؟.. 

يونس

بتعملي ايه؟ 

شهد 

هكون بعمل ايه يعني بشتغل وانت لسه مكلمني من نص ساعه وقولتلك برضو اني بشتغل.. 

يونس

في ايه يا بت انتي ما تتكلمي كويس واتعدلي بدل ما اعدلك.. 

شهد بنفاذ صبر

طيب ممكن تقفل دلوقتي عشان بجد مش فاضيه،ولو كلمتني مش هعرف ارد والله غير لما اخلص شغل... 

يونس بحده

طيب خليني ارن وما ترديش يا شهد عشان اجي اجيبك من شعرك... 

شهد بغيظ 

اقفل يا عملي الاسود اقفل.. 

_ وقفلت الفون وراحت وقفت جنب زيد اللي قالها بهدوء.. 

زيد

في حاجه ولا ايه؟.. 

ردت عليه بتوتر

ها لا ده الولاد بس بيكلموني عادي.. 

زيد 

اوكي بصي بقي يا مدام شهد انتي هتبقي المسؤله قدامي عن التصميمات دي وماجي معاكي هتساعدك... 

ماجي بغيظ

يا زيد بيه انا اللي ليا الاولاويه اني ابقي بعدك في العرض ده، شاهي لسه جديده و.. 

قاطعها زيد بجديه وقال

انا اللي اقرر يا ماجي وانا شايف ان مدام شهد شغلها احسن بكتير منك وانا اقتنعت بموهبتها اكتر من اقتناعي بخبرتك وانتي هتكوني معاها وتسمعي كلامها مفهوم.. 

ماجي بضيق

مفهوم... 

وبص لشهد وقال

دي مسؤليه كبيره ويا اما هتكبري وهتوصلي لحته حلوه في شغلك يا مش هتبقي ولا اي حاجه فخلي بالك وركزي في كل حاجه كويس.. 

شهد 

ان شاء الله.. 

_وسابهم زيد ومشي وكل واحده فيهم راحت شغلها وكانت ماجي بتبص لشهد بغيظ وحقد، وفي مكتب زيد كان قاعد مع مامته اللي قالتله بخبث.. 

ليلي

هي دي شاهي اللي قولتلي عليها قبل كده، شكلها جميل تبان اصغر منك مع انها اكبر.. 

زيد بهدوء

ومتجوزه ومعاها ولدين يا ماما انا قولتلك قبل كده بس شكلك نسيتي.. 

ليلي

للاسف هي عجبتني بصراحه وشكلها كمان طموحه.. 

زيد بضيق

ماما ارجوكي نقفل الموضوع ده، انا اللي بيني وبينها شغل وبس ولو كان في حاجه جوايا اول ما عرفت ان في راجل تاني في حياتها انا نسيتها خالص.. 

ليلي

اوكي خلاص ما تكبرش الموضوع انا بتكلم عادي، المهم العرض فاضله اقل من اسبوعين احنا لازم ناخد المركز الاول.. 

زيد بثقه 

ان شاء الله يا ماما زي كل سنه هنبقي الاول.. 

ــــــــــ بقلم_الكاتبه_رحاب_القاضي ــــــــ

_وبالليل في الاسكندريه... 

دخل زكريا بيته البسيط اللي هناك ولقي ابوه بيتفرج علي التلفزيون وجهاد نايمه جنبيه علي الكنبه... 

زكريا 

بتعملوو ايه؟.. 

المنشاوي

زي ما انت شايف كانت بتتفرج معايا علي التلفزيون ونامت علي نفسها، وبعدين يا بجم جايب البت هنا ما كنت اخدتها الاوتيل بتاعنا... 

زكريا بجمود

قصدك بتاع ابنك مش بتاعي يا منشاوي.. 

المنشاوي بجمود

ما علينا المهم شايف مراتك وهي نايمه حلوه ازاي ومش اي حلاوه فيها كمية براءه ايه ده، ازاي بس حد يفكر يأذي بنت زي دي... 

_ تنهد زكريا بضيق وهو عارف ان ابوه يقصده هو بكلامه ويقصد اللي عملو فيها...

المنشاوي

تعرف ياما كنت بقول لامك تخلف تاني بعدك وكان نفسي اووي تبقي عندي بنت ووالله كنت بتمناها تبقي زي جهاد كده بس كانت تقولي كفايه عليا عمار وزكريا لما يكبرو، بس اتعوضت دلوقتي اهوو وانا بحس البنت دي بنتي واتعودت علي وجودها اووي، اوعي بقي انت تخليها تمشي وتسيبنا.. 

زكريا ابتسم بهدوء ورد عليه وقال

لا اطمن انا عمري ما هسيبها يا منشاوي.. 

قام المنشاوي وهو ساند علي عكازه وقال

مش بالكلام لازم تخليها تطمن انها هتكمل معاك من غير ما تخاف، وايااك تتغابي وتغصبها علي حاجه عشان ما تكرهكش زي زمان... 

زكريا

انت رايح فين طيب؟.. 

المنشاوي

داخل اخد الدوا وانام، لو عايز تاكل في اكل في المطبخ هي عملته واكلنا احنا وشالتلك منابك... 

_ قال كلامه ودخل اوضته وقام زكريا هو كمان وقعد مكان المنشاوي جنب جهاد، ابتسم بهدوء لهدؤها وهي نايمه.. 

_وصحيت هي اول ما حست بأيده علي شعرها، بصتله بتوتر وقامت بسرعه وقالت.. 

جهاد 

انت جيت امتي؟.. 

زكريا 

من شويه قوليلي ايه رئيك في البيت هنا؟.. 

جهاد 

كويس.. 

قعد. جنبيها وقال

بس كده؟.. 

جهاد بتوتر

اا انا عملت مكرونه وبانيه جوه لو عايز تاكل يعني.. 

زكريا

لا مش جعان تيجي نخرج؟.. 

جهاد 

دلوقتي؟!.. 

زكريا

الساعه لسه تسعه تعالي بس في مكان حلو اووي علي البحر هتحبيه اووي.. 

جهاد بقلق

لا انا مش بحب البحر اصلا.. 

زكريا بجديه

ممكن ما تخافيش مني انا مش هأذيكي يا جهاد.. 

ردت عليه بهدوء

انا ما بخافش من حد علي فكره.. 

مسك ايدها وقال

طيب تعالي يلا.. 

جهاد 

ثواني طيب اغير هدومي والبس حجابي.. 

زكريا

مالوش لزوم المكان هناك ما حدش بيروحه.. 

جهاد 

لا ما انت ما بتعرفش انا كنت بقول زيك كده وخصوصا لما اقرر انزل اجيب حاجه بسرعه من تحت والبس الاسدال والشبشب وفجأه الاقي امة لا اله الا الله في الشارع.. 

ضحك زكريا بهدوء وقال

طيب ادخلي غيري هدومك وانا مستنيكي في العربيه.. 

ــــــــــ بقلم_الكاتبه_رحاب_القاضي ــــــــ

_وفي بيت يونس كان قاعد هو وشهد مع هناء ومحمد ومراته اللي شايله ولد صغير وعظيمه قاعده هي كمان وبتبص هي وهناء لبعض بعصبيه.. 

يونس

منورينا والله يا جماعه.. 

هناء بسخريه

منور بصحابه يا روح امك.. 

قامت اميره مرات محمد وقالت

طيب معلش يا جماعه انا همشي عشان اروح اسلم علي زهره اختي واقعد معاها شويه.. 

شهد 

طيب ما خليكي النهارده معانا هنا وبكره نبقي نروح هناك انا وانتي.. 

هناء 

لا خليها تروح يا شهد هي اصلا جايه عشان تشوف اختها.. 

اميره بهدوء

هبقي استناكي هناك يا شهد بكره.. 

وتابعت بصوت واطي

وبعدين انا عايزه اهرب من الحرب اللي هتقوم بين هناء وعظيمه دلوقتي.. 

شهد 

وهتسبيني لوحدي بينهم.. 

اميره بهدوء

نصيبك بقي.. 

وبصت لمحمد وقالت

قوم يا شيخ محمد عشان توصلني.. 

محمد

السواق بره يا اميره هيوصلك.. 

هناء بغضب

قوم يا ابن الجزمه مع مراتك.. 

قام محمد وقال

هو انا قولت غير اني هوصلها يا ماما ليه التهزئ بس.. 

ضحك يونس وقال

ههههه ايه شيخ محمد فين الهيبه.. 

محمد بهدوء

هوصلها واجيلك وابقي اقولك راحت فين الهيبه.. 

طلع محمد مع مراته وهناء قالت لعظيمه

وبنتك عامله يا عظيمه خفت ولا لسه؟.. 

عظيمه ببرود 

مدام عامله فيها صاجبة واجب وبتسألي هزي طولك وروحي شوفيها عامله ايه... 

هناء بخبث

اروح يا حبيبتي ما اروحش ليه هو انا مكسحه وماشيه بعكاز وفي ايدي كيس علاج اد كده، لااا ده انا لسه بصحتي وفي عز شبابي.. 

عظيمه بغيظ

باين يا اختي من الشعر الابيض اللي طالع من الطرحه.. 

هناء بثقه 

دي الموضه يا حبيبتي عاملاه زي البت اللي اسمها كيم كرتشان دي.. 

_ ضحك يونس اووي عليهم وكمان شهد اللي قالت بهدوء... 

شهد 

صلو علي النبي يا جماعه الموضوع مش مستاهل.. 

يونس

انا بقول اجيب بطه تقعد معانا هنا كام يوم تغير جو وسطينا.. 

عظيمه 

مش وقته يا ابني لما تبقي الدنيا تخف هنا البت فيها اللي مكفيها.. 

هناء

هو انت ما تعرفش يا يونس محمد اخوك. ناوي يشتري بيت جنبك هنا وهنقعد فيه اصله هبشتغل في برنامج جديد وساب القديم.. 

يونس ابتسم وقال

بجد طيب كويس وانا هلاقيله بيت حلو هنا وقريب مني كمان.. 

_في الوقت ده رن موبيل شهد بوصول رساله، فمسكت الموبيل بسرعه وفتحت الوتساب وكانت رساله من زيد بيسألها علي الشغل... 

يونس

عايز ايه؟.. 

شهد 

بيسأل علي الشغل خلاص فاضل ايام علي العرض.. 

اتنهد بضيق وقالها

عايز شاي.. 

شهد 

حاضر هخلي الشغاله تعملك.. 

يونس بجمود

وانا طلبت منك انتي مش من الشغاله.. 

ومسك الموبيل من ايدها وقفله وقال

يلا قاعده مستنيه ايه واعمليلنا كلنا شاي بالمره.. 

شهد بضيق

طيب هات ارد عليه غلط بعت الرساله  وشوفتها واسيبه متعلق كده.. 

يونس بجمود

ابقي ردي عليه بكره في الشغل وقوليلو انك مش بتحبي تتكلمي علي الوتس ولا الموبيل اصل عشان لو حصل غير كده هكسره علي دماغ امك.. 

شهد بغيظ 

ماشي يا يونس مااشي.. 

_ قامت دخلت المطبخ وعملت الشاي وبعدين اخدت موبيلها وطلعت اوضتها، وراح يونس وراها وقالها بهدوء.. 

يونس

كل ده عشان ما خلتكيش تردي عليه؟.. 

شهد 

لا عشان انت بتحرجني قدام الناس يا يونس، يقول عليا ايه دلوقتي غير اني قليلة ذوق.. 

يونس بحده

هو اللي قليل الذوق يكلمك ليه في وقت زي ده.. 

شهد بعصبيه

هو مكلمني عشان ايه يعني ما عشان الشغل.. 

يونس

وطي صوت اهلك ده وخلصنا خلاص وكلامي يتسمع قال يكلمك علي الوتس وبعد كده يرن عليكي والكلام يجيب بعضه وتبقي حوارات شيفاني بقرون عشان اسكت.. 

شهد بغيظ

ماشي يا يونس تصبح علي خير، وروح شوف العيال قبل ما تنام انا تعبانه.. 

قعد جنبيها وهي نايمه وقال

راحو ينامو عند جدتهم هناء اطمني عليهم، وما تتقمصيش كده.. 

شهد بحزن

مالكش دعوه.. 

يونس 

يا بت يا عبيطه انا بغير عليكي ومش عايز حد يشوفك ولا يكلمك اصلا.. 

شهد بحده 

دي مش غيره دي قلة ثقه.. 

قرب منها وقال

والله العظيم بثق فيكي يا شهد بس صعب عليا اللي انتي بتعمليه ده وخصوصا مع الواد الطري اللي عامل فيها مدير عليكي ده.. 

شهد 

والله العظيم يا يونس هو محترم جداً ومش بيتخطي حدوده معايا، وبعدين مش من قلة البنات هيبص لواحده متجوزه، واللي حصل قبل كده والله سوء تفاهم.. 

يونس بنبره غاضبه

بس حصل يا شهد وبالعافيه بحاول اعديه، ولو عليا ترجعي تقعدي في البيت تهتمي بيا وبعيالك وبس، بس والله سايبك تعملي اللي عايزاه ومش عايز ازعلك.. 

شهد بعصبيه

لا بقولك ايه انا كله الا شغلي انت فاهم ولا لا، وهكمل في شغلي يا يونس وهنجح وانت اخرك تقف وتسقفلي وهتشوف.. 

يونس بغيظ

ولا هروح ولا عايز اشوف حاجه اصلا، واسقف لمين لخياطه.. 

شهد 

والله لو انا خياطه تبقي انت ميكانيكي.. 

يونس بثقه

انا تاجر سيارات يا حبيبتي ومن اشهر رجال الاعمال في مصر... 

شهد 

وانا هبقي من اشهر مصممين الازيااء في مصر، ايوه مش واخده شهاده عاليه بس عندي موهبه كبيره.. 

قربها ليه وقال بخبث

فين دي مش واخد بالي.. 

شهد بكسوف

اهو انت كده تعصبني وفي الاخر تقلب الموضوغ هزار.. 

يونس بابتسامه هادئه 

هو في احلي من الهزار طيب؟ 

ــــــــــ بقلم_الكاتبه_رحاب_القاضي ــــــــ

_ في الاسكندريه كان زكريا سايق العربيه وجهاد جنبيه بتبص للشوارع من الشباك... 

زكريا

هو انتي اول مره تيجي اسكندريه؟.. 

ردت عليه بهدوء

لا كنت باجي انا وبابا وماما كتير هنا، وكانت بتبقي احلي اجازه.. 

زكريا بجديه

هو انا مقدر حبك لابوكي وفاهم حاجه زي دي كويس، بس ابوكي ما كانش راجل كويس عشان هو بجد ظلم اخواتك.. 

جهاد بدموع

للاسف هو فعلا ظلمهم بس هو عرف غلطه ورجعلهم ومجدي كان بيشتغل معاه وبابا اداله كل حاجه، بس عماد وشيماء هما اللي كانو بيرفضو يشوفوه اصلا.. 

زكريا بنبره حزينه

من العشم بتبقي صعبه اووي لما نتعشم في حد. بزيااده ويخزلنا، بيبقي صعب نسامح بعدها.. 

ردت عليه بهدوء وقالت

بس في حاجه اسمها العفو عند المقدره، يعني لو اللي زعلك ده رجع وهو ندمان وانت في ايدك تسامحه سامحه.. 

زكريا بجمود

الدنيا مش بالبساطه دي، هو انتي ممكن تسامحي اخواتك ممكن تسامحي عماد؟.. 

جهاد بضيق

مش عارفه بس اللي خلاني اسامحك واعيش معاك انت وباباك الفتره دي كلها ممكن يخليني مع الوقت اسامح عماد لو اتغير وبقي بني ادم كويس.. 

بصلها زكريا وابتسم وقال

هو انتي سامحتيني يا جهاد؟.. 

_سكتت جهاد وما ردتش عله وهو وقف بعربيته قدام مكان هادي علي البحر قريب من الشاليه بتاعه، ونزل من العربيه وفتح الباب لجهاد اللي بصتله بقلق وقالت.. 

جهاد 

انت هتغرقني في المايه مش كده، دي خطتك عشان تخلص مني.. 

زكريا بنفاذ صبر

ولا كأني سمعت حاجه، انزلي يا جهاد يلا... 

جهاد بخوف

طيب انت جايبني هنا ليه؟.. 

زكريا 

انا غلطان اني بطلب منك حاجه، وانتي ما بتجيش غير بالعافيه... 

_ قرب منها وكان لسه هيشيلها بس هي قالت بسرعه وهي كاتمه ضحكتها.. 

جهاد 

خلاص خلاص هنزل والله اهوو.. 

_ نزلت جهاد من العربيه وهو مسك ايدها وفضل ماشي جنبيها وهي كانت مستغربه تصرفاته معاها وفجأه وقف قدامها وطلع السلسله بتاعتها اللي نسيتها عنده يوم ما رحتله شقته،واول ما شافتها هي ابتسمت وقالت بدموع... 

جهاد 

ايه ده انت جيبتها منين انا فكرتها ضاعت مني.. 

زكريا بهدوء مسك ايدها بالسلسله وقال

انا بحبك يا جهاد.. 

_اتصدمت من كلامه وسحبت ايدها من ايده وما كانتش عارفه ترد عليه وهو حضن وشها بين ايديه بكل هدوء وتابع كلامه... 

زكريا

من لما ظهرتي في حياتي وكل حاجه بقت بتتغير للاحسن، مهما حاولت ابعد كنتي من غير اي مجهود بتقربيني منك، لو قبل ما اشوفك كان حد. جه وقالي ان في بنت ما كملتش العشرين سنه هتوقعك الوقعه دي وتخليك تجنن بيها وما تفكرش غير فيها كنت هضربه بالنار واقول ده بيتريق وبيسف عليا.. 

جهاد بتوتر ردت عليه وقالت

انت فجاتني ووترتني علي فكره، وو وانت لو بتقول كده عشان خلاص بقيت لوحدي وصعبانه عليك.. 

قاطعها وقال بجديه

اللي بقوله ده مالوش علاقه بموت نورا خالص، هي الله يرحمها ولو كانت عايشه انا كنت هقول نفس الكلام وما كنتش هسيبك تبعدي عني لحظه.. 

جهاد بدموع

بس انت وانا اتقابلنا في صدفه كلها غلط ووحشه انا مش هعرف اتخطي ده.. 

زكريا بتصميم 

لا هتعرفي مهما كانت بدايتنا قاسيه وصعبه بس كويس اننا اتقابلنا انا من غيرك كان زماني ماشي في طريق كله ضلمه وما كنتش هفوق ابدا، وانتي كانو اخواتك الله واعلم عملو ايه فيكي... 

جهاد بدموع

انت عايز ايه مني دلوقتي؟.. 

زكريا

عايزك معايا علي طول ونربي ابننا سوا، نبقي متجوزين علي طول وبحق وحقيقي وانا مستعد اعملك كل اللي انتي عايزااه هتدخلك الجامعه وكمان هخليكي تشتغلي ووعد اني هخليكي اسعد واحده في الدنيا.. 

جهاد بقلق

لو قولتلك لا مش هقدر ومش جاهزه هتعمل ايه؟.. 

_وقبل ما يرد. عليها جه فجأه اكتر من تلات عربيات لونهم اسود وحاوطوهم من كل ناحيه ونزل منهم رجاله مسلحين وواحد. منهم فتح الباب لعزيز اللي نزل من العربيه وبص لزكريا وجهاد بسخريه وقاال.. 

عزيز

سوري يا قطاقيط بوظت عليكم اللحظه الرومانسيه دي.. 

مسكت هي في زكريا بخوف وقالت

هو ايه اللي بيحصل ده يا عزيز في ايه؟.. 

_مسك ايدها بقوه وخلاها وقفت وراه ورد علي عزيز بغضب وقال.... 

زكريا

وبعد النمره بتاعتك دي عايز ايه يا عزيز؟.. 

عزيز بخبث

هو انا مش قولتلك وحذرتك يا زيكو ان اللعب مع اللي فوق اخرته وحشه وبتزعل اووي، طيب بلاش دي  انت قولت للقطه انت شغال ايه قبل ما تتجوزها اصل شكلها بيقول انها ما تعرفش حاجه.. 

زكريا بحده 

عزيز خد رجالتك وامشي وانا هجيلك ووقتها نتكلم راجل لراجل.. 

عزيز بغضب

كان في وخلص يا زكريا انت لازم تيجي معانا دلوقتي اصلهم طلبوك حي او ميت وانا عليا انفذ يا حبيبي، والقطه دي هتروح لاخوها ما تقلقش عليها.. 

زكريا بعدم فهم 

اخوها مين؟... 

_نزل في الوقت ده من العربيه مجدي وقال بخبث

انا يا ابن المنشاوي جاي اخد اختي اللي غلطت معاك وشيلتنا العار وهربيها من اول وجديد.. 

_مسكت فيه اكتر بخوف وحس هو بانتفاضت جسمها ودموعها اللي نزلت علي وشها برعب اول ما شافت مجدي، وهو ندم ندم عمره في اللحظه دي انه ما جابش سلاحه معاه... 

عزيز بجمود

يلا عشان ما نتأخرش علي اللي ورانا يا زكريا ادي البنت لاخوها وتعالي معانا.. 

جهاد ببكاء وخوف 

لا يا زكريا اوعي تسيبني... 

مسك ايدها بهدوء وقال لعزيز

انا هروح وهعملك كل اللي عايزه انت واللي معاك بس تخلي الواد ده يمشي ومراتي تبقي في امان.. 

ضحك عزيز وقال

هههههه هو احنا جايين ناخد اذنك يا ابن المنشاوي لا احنا جايين ننفذ غصب عنك.. 

_وشاور لرجالته اللي راحو ومسكو زكريا وهو مشي معاهم وهو ساكت لانه عارف انه مهما عمل دلوقتي هينفذو اللي هما عايزينه، وكانا عيونه علي جهاد اللي واقفه بتعيط وخايفه وقرب منها مجدي ووقف قدامها وابتسم بحقد وفجأه ضربها بالقلم خلاها وقعت علي الارض.. 

_ في اللحظه دي اتخلي زكريا عن هدوءه وزق الاتنين اللي ماسكينه وقرب من مجدي وضربه في وشه جامد وكمل ما يكمل عليه هجمو عليه وفضلو يضربو فيه جامد ومعاهم مجدي اللي طلع كل غضبه عليه وعزيز واقف بيتفرج عليهم ببرود شديد.. 

جهاد ببكاء وخوف حقيقي عليه 

سيبوه حرام عليكم سيبوه.... 

_ قرب منها مجدي ومسكها من دراعها جامد وقال بغضب وحقد.. 

مجدي

انتي لسه شوفتي حاجه وىحمة اني لكل لحظة وجع شوفتها في حياتي هطلعها عليكي يا جهاد.. 

جهاد ببكاء

طيب قولهم يبسبوه هو مالوش ذنب انا السبب في كل حاجه ابوس ايدك يا مجدي.. 

_ ما سمعش منها واخدها غصب عنها لعربيته ومشي وفي الوقت ده شاور عزيز لرجالته يسيبو زكريا بعد ما كان خالص شبه فاقد للوعي وبيتألم بشكل كبير وبص لعربية مجدي وهي ماشيه ودموعه نزلت بخوف شديد عليها... 

"كنت لا اكره الموت ولكن اصبحت الان اخشاه لاجلك يا صغيرتي😔" 

ــــــــــ # بقلم_الكاتبه_رحاب_القاضي ــــــــ

_وفي بيت جميله.. 

كانت ايتن قاعده مع جميله في اوضتها وبتفرجها علي الحاجات اللي جابهالها مروان... 

جميله

حلوين اووي يا ايتن حافظي عليهم بقي.. 

ايتن بحماس

هشيلهم لحد ما اتجوز واحطهم في بيتنا انا وهو.. 

جميله

هو انتو هتطلقو صح ولا ناوين تعملو ايه؟.. 

ايتن 

مش عارفه بس مروان رافض موضوع اننا نطلق ونرجع نتجوز والجو ده وقال هيكلم باباه وماما ويقنعهم، الاهم بقي احنا هنعمل ايه بقينا اصحاب املاك وعندنا شركه ومصنع كبار وفلوس كتير.. 

جميله بسخريه

مش عارفه احنا كنا سيبنا عمك يضحك علينا اسهل دي طلعت ليله كبيره.. 

ضحكت ايتن وقالت

هههههه لو بجد انتي لازم تتصرفي اومال مين اللي هيمسك ده كله وحسين هيساعدك.. 

جميله

هو انت ما قولتلكيش مش حسين بعد ما طلقني امبارح ودعني وسافر بره مصر.. 

ايتن بقلق

يا نهار اسود واحنا هنعمل ايه، انا لسه ما اعرفش حاجه في الشركات والشغل ده وماما علي الله حكايتها وانتي اا.. 

جميله بثقه 

انا ايه لااا استوب انا هبقي قدها وقدود.. 

ايتن بقلق

ربنا يستر... 

وتابعت بتفكير

عمو عمار يساعدك وبالطريقه دي تقربو من بعض تاني وترجعو.. 

جميله بحزن

لا يا ايتن اوعي تعملي حاجه زي كده، انا مش هرمي نفسي عليه.. 

ايتن

بلاش تكابري يا جميله حطي نفسك مكانه هو حقه يعمل كده... 

جميله 

وانا ما سبتوش برضايا وانا تعبت اكتر منه من ناحيه كانت ماما وعمك وحسين ومن ناحيه تانيه هو.. 

ايتن بهدوء

طيب حاولي تكلميه ما فيهاش تنازل ولا حاجه، بس هو زعلان وانتي كمان احرجتيه لما ماما كانت تعبانه فمش غلط لو اعتذرتي وبعدين تخيلي كده عمو عمار يروح يحب واحده تانيه ويتجوز.. 

جميله بضيق

ايوه صح افتكرت كارما هو كلم قدامي لنت صوته مسرسع اسمها كارما تسألي مروان مين دي وابوه يعرفها منين.. 

ايتن 

حاضر بس حاولي تصلحي الدنيا معاه قبل ما تخسريه يا جميله... 

دخلت عندهم فريده وقالت

تعالو نفطر سوا انا طلبتلنا فطار من بره.. 

ايتن

ماما هو احنا مش المفروض نرجع بيتنا خلاص.. 

فريده 

حاضر هكلم خالكم يجي ونخليه يساعدنا شويه ويكون معاكي يا جميله في الشركه.. 

جميله 

الحمد لله اتحلت اهي.. 

فريده بحده 

ايتن ابقي كلمي مروان وقوليلو يجيلي بالليل عايزه اتكلم معاه.. 

ايتن 

حاضر يا ماما، وبالمناسبه انا قدمت علي هندسه وهختار نفس المجال بتاع بابا اله يرحمه.. 

جميله بحماس

حلو اووي تبقي انتي فاهمه نظام الشغل وانا هبقي ماسكه الاداره والحسابات والجو ده.. 

ابتسمت فريده بهدوء وقالت

هتبقو اشطر بنات في جيلكم كله انا متعشمه في ربنا خير... 

ـــــــــــــــــــــ

_ وفي بيت عمار.. 

كان قاعد بيفطر هو ومروان اللي قاله.. 

مروان 

كنت عايز اكلمك في موضوع مهم. 

عمار ساب موبيله من ايده وقاله

خير في ايه؟.. 

مروان 

انا مش هطلق ايتن.. 

عمار

تمام وايه تاني؟. 

مروان بجديه

ما هو بالعقل يا بابا ازاي اطلقها سنتين تلاته وارجع اتجوزها تاني.. 

عمار

وبرضو ما ينفعش تفضل متجوزها كده ومعلقها جنبك.. 

مروان

طيب وفيها ايه لو اتجوزتها بجد وقعدنا هنا ولما اتخرج انا وهي نكون مع بعض برضو واكيد هنكون مظبطين حياتنا اكتر.. 

عمار

الكلام ساهل يا مروان بس الفعل صعب، انت ازاي هتقدر توفق بين الجامعه والشغل زكمان هيبقالك بيت وحياه تانيه مش ساهله.. 

مروان 

الموضوع بسيط طول ما انا مع البنت اللي بحبها.. 

عمار

طيب انت دلوقتي بتشتغل لا، هل عندك بيت بعيد  عني لا، وفوق كل ده انت لسه قدامك مرحله كبيره في التعليم.. 

مروان بضيق

وانا مش هطلق ايتن يا بابا.. 

عمار 

طيب نشوف والدتها الاول عايزه ايه وبعدين نتكلم.. 

مروان 

ما هي لو قالتلي اطلقها انا مش هوافق اعمل كده.. 

عمار بجديه 

لا تسمع كلامها وتطلقها لانك ما اتجوزتهاش برضا امها يا فالح ودي مش اصول.. 

ـ قبل ما يرد. عليه مروان دخل الحارس بتاع عمار وقال بجمود... 

الحارس

بعد اذنك يا عمار بيه.. 

عمار 

في ايه؟.. 

الحارس

في واحد بره شكله مش تمام وبيقول انه عايزك في موضوع مهم بخصوص زكريا بيه اخو حضرتك.. 

عمار بهدوء

طيب دخله بسرعه.. 

طلع الحارس ومروان قال

جدو قالي انهم في اسكندريه مش هنا.. 

عمار بقلق

اما نشوف مصيبة ايه جايبهالنا عمك المره دي.. 

دخل رضا في الوقت ده وقال لعمار بخوف 

الحق اخوك يا عمار.. 

قام عمار بسرعه من مكانه وقال بخوف

ماله زكريا في ايه اتكلم؟.. 

ــــــــــ # بقلم_الكاتبه_رحاب_القاضي ــــــــ. 

_في شركة يونس الصاوي.. 

كان واقف وبيكلم شهد في الموبيل وهو متعصب جداً وقالها.. 

يونس

ردي عليا كويس يا بت انتي موبيلك كان متنيل مقفول ليه؟.. 

شهد 

والله ما كنت قفلاه دي الشبكه.. 

يونس بحده 

يبقي ترجعي البيت ولما الشبكه تتعدل ارجعي يا حلوه شغلك.. 

شهد بغيظ 

هو ايه اللي انت بتقوله ده وبعدين ما انا اهو كلمتك لما عرفت اكلمك.. 

يونس بحده 

هي كلمه يا شهد لو كلمتك وموبيلك كان مقفول او ما ردتيش عليا هاجي اخدك وما فيش طلوع بره البيت تاني.. 

_قال كلامه وما سمعش ردها وقفل الفون في وشها، وراح قعد قدام يوسف اللي كان متعصب جداً وقاله.. 

يونس

والله النسوان دول دماغهم بايظه اهي عندك شهد مطلعه عيني... 

يوسف بجمود

هي بطه قالتلك امتي انها عايزه تطلق؟.. 

يونس

امبارح بس انا مش بقولك عشان مقتنع بكلامها لا انا بقولك عشان تعرف تهديها وتفهمها انك مش عايز عيال والكلام ده.. 

يوسف بجديه

ومين قالك اني مش عايز عيال... 

يونس

قصدك ايه؟.. 

يوسف

بطه مش هتسكت ولا هتتهد غير لما انا ابقي اب وفي نفس الوقت ما اكونش متجوز.. 

يونس بصله بعدم فهم وقال

ولاااا فهمني انت عايز تعمل ايه عشان دماغي هتروح في حته وحشه مش لايقه عليك.. 

يوسف

بص انا هتجوز اخلف واطلق وبكدا بطه هتكون مش حاسه بالذنب او اني ظالم نفسي بعيشتي معاها.. 

يونس بسخريه

امم تقوم عشان ما تظلمش نفسك تتجوز واحده تظلمها، انت عبيط دماغك دي فيها حاجه ولا بقيت تضرب من ورايا.. 

يوسف بجديه

انا ما بهزرش يا يونس انا فعلا هتجوز ومش هظلم حد. لان اللي هتجوزها عارفه اني بحب مراتي وعارفه انا متجوزها ليه وهي كمان هتتجوزني لنفس السبب؟. 

يونس بجمود

مين دي اللي هتتجوزها وتعرفها منين؟.. 

يوسف بجديه

دارين.. 

يونس بصدمه

مين؟!... 

_رن موبيل يونس في الوقت ده برقم عمار المنشاوي، رد عليه وهو بيبص ليوسف بغضب وقاا.. 

يونس

ايوه يا عمار مع حضرتك.. 

عمار

تعالي يا يونس بسرعه عايز منك خدمه ضروري.. 

يونس 

تمام بس اجيلك فين؟.. 

عمار

تعالي بيتي انت عارف العنوان مش كده؟ 

يونس

ايوه جايلك حالاً اهو... 

قفل معاه وقال ليوسف

بطل عك يا يوسف بطه مش هترضي بحاجه زي دي ابداً.. 

يوسف

انت ما تعرفش مراتي اكتر مني... 

يونس

طيب براحتك بس ما تبقاش ترجع تندم، خليك هنا وانا هشوف عمار المنشاوي ده عايز ايه.. 

يوسف 

ماشي انا مش همشي غير بالليل.. 

_وفي بيت مجدي.. 

كان عماد قاعد في اوضه هناك وكان بيشم في المخدرا*ت اللي بيتعطاها ودخلت عنده في الوقت ده شيماء وهي ماسكه صنية الاكل واول ما شافته كده وقفت عند الباب مصدومه وهو بصلها بهدوء وقال بسخريه.. 

عماد 

مالك مستغربه كده ليه، يعني ما تعرفيش اني مدمن يا شيماء، ده حتي اخوكي رايح جاي يقول عليا شمام.. 

راحت شيماء قعدت جنبيه وقالت

انا اسفه يا عماد انا قصرت معاك كتير بس غصب عني وانت عارف اني كنت محتاجه لجوزي واهله عشان بنتي.. 

عماد بجمود

مجدي فين؟.. 

شيماء 

جايب جهاد وجاي وخلاض هناخد الفلوس كلها وانت هتفضل مع مجدي انا هخليه يدخلك مصحه تتعالج وكمان تشتغل معاه.. 

زعق فيها عماد وقال 

بفلوس اختك عايزين تحققو احلامكم علي حساب حقها هي.. 

شيماء

بطل بقي يا عماد ده حقنا احنا هي خدت من حقها كتير واحنا اتحرمنا من كل حاجه بسببها هي وامها.. 

_ في الوقت ده سمعو صوت عربية مجدي فقامت شيماء وبصت من فوق وقالت.. 

شيماء بحقد 

اهو وصل وجابها معاه.. 

_قام عماد ونزل بسرعه وكانت جهاد داخله البيت مع مجدي وهي بتعيط وخايفه جداً.. 

مجدي 

ينفع كده اللي عملتيه يا جهاد، ليه كده ما انا قولتلك ابعدي عننا وخليكي في حالك ليه رجعتي تاني وبتعملي نفس اللي امك عملته زمان.. 

وقف عماد قدامها بسرعه وقال

اوعي تعملها حاجه انت فاهم ولا لا.. 

مجدي

بس يا عماد عشان ما ازعلش منك.. 

شيماء

سيبه يربيها يا عماد، سيبه يرجعلنا حقنا.. 

مجدي 

انا مش هعملك حاجه لا انتي ولا اللي في بطنك بس تتنازلي عن كل حاجه.. 

جهاد بدموع وحده 

والله العظيم كنت ناويه اتنازلك عن كل حاجه، كنت بس هجيب شقه ليا ولابني وما كنتش هاخد منكم حاجه، بس بعد اللي عملتوه ده والله ما هتنازل مهما تعملو عشان انتو ما تستاهلوش غير كل حاجه وحشه... 

قرب منها مجدي بغضب بس عماد ذقه وقال

ابعد عنها يا مجدي والله ما هتلمسها ولا هتمد ايدك عليها قدامي.. 

مجدي بغضب

اوعي يا عماد عشان ما تبقاااش انت وهي.. 

عماد بحده 

لا هبقي انا ولا هي حرام عليك يا اخي سيبها في حالها.. 

_سحبه مجدي من هدومه ووقعه علي الارض وعماد وقع بسهوله بسبب جسمه الضعيف وصحته اللي كانت متدمره بسبب الحاجات اللي بياخدها، ومسك مجدي جهاد من شعرها وقال بعصبيه.. 

مجدي 

والله العظيم لدفعك تمن كل ده غالي اووي.. 

_ واخدها فوق في اوضه صغيره ومقفوله مفيهاش شبابيك ولا اي منفذ للهوا وقال بكل حقد.. 

مجدي 

خليكي هنا بقي يوم اتنين تلاته من غير اكل ولا وشرب ولا اي حاجه ولو ما سمعتيش كلامي ورحمة امي لاخليكي هنا لحد ما تعفني وتموتي.. 

دخل عماد وقال بعصبيه

مش هسيبك تعملها حاجه يا اخي حتي خلي عندك دم مش شايف انها حامل ومش هتتحمل القعده هنا.. 

ضربه مجدي في وشه جامد وقال

خلاص خليك يا حنين معاها وونسها.. 

_وسابهم وطلع وقفل الباب عليهم وكان متعصب جدا وقالتله شيماء بحده... 

شيماء

طلع عماد يا مجدي هو اتظلم زينا ومالوش ذنب.. 

زعق فيها مجدي وقال

اخرسي خالص يا شيماء انا مش ناقص.  

_ وبالليل في بيت فيروز.. 

الباب كان بيخبط واخوها كان قاعد قدام التلفزيون، طلعت هي من اوضتها وقالت.. 

فيروز

انت يعني اطرش يا فادي مش سامع الباب.. 

فادي

وانتي لازمتك ايه ما تفتحي.. 

_ سابته فيروز وراحت فتحت الباب واتفجأت بوجود عزالدين واتنين بنات شبهه اووي وواحد كمان شبهه بشكل كبير ومعاهم بنتين صغيرين وواحده شايله بيبي صغير علي ايدها.. 

فيروز

سلام قول من ربٍ رحيم انا كنت شاكه انك مش بني ادم انتو عفاريت صح ونسخه واحده.. 

عزالدين

انتي عبيطه اسكتي الله يكسفك دي لمياء ودي علياء اخواتي التوأم وده حسن اخويا ودي ليلي مراته ودول ريناد ورضوي بناته والنونو ده طارق ابنه وعنده سنه... 

"ابطال الجزء التالت دول من موضوع عائلي احفظوهم بقي" 

فيروز بعدم فهم 

نعم يعني خير؟.. 

عز الدين 

جيبتهم وجاي اخطبك ونقرا الفاتحه عشان تصدقي انه بجد، زغرتو يا بنات.. 

_ وبدأو اخواته فعلا يزغرتو وكانت فيروز مصدومه من اللي بيحصل و؟.... 

_تفتكرو هيحصل ايه؟...

  •تابع الفصل التالي "رواية موضوع عائلي" اضغط على اسم الرواية