رواية موضوع عائلي الجزء الثاني 2 الفصل السادس عشر 16 - بقلم رحاب القاضي
موضوع_عائلي
"الجميله والشعر الابيض"
_الحلقه الـ 16
ـــــــــــــــــــــــــــــــ
_ كيف اصف لك شعوري وانا اخبرك بأني اخافك واخاف الابتعاد عنكَ؟
_في بيت يوسف..
كان قاعد مدايق جداً وهو مستني بطه ترجع من عند مامتها، ورجعت فعلا بعد شويه ولما دخلت قالتله..
بطه
كويس انك جيت، اشتريت وانا جايه ايسكريم حلو اووي..
وحطت شنطتها علي التربيزه وقعدت جنبيه وقالت
مالك يا حمبوزو قالب وشك ليه؟..
يوسف بصلها بحده وقال
هو انا مش قولت مش هتعملي العمليه، روحتي ليه للدكتوره من ورايا وبتعملي في التحاليل عشان تعمليها؟..
بطه بقلق
انا كنت اا..
مسكها من دراعها جامد وقال بعصبيه
كنتي ايه وزفت ايه، قولتلك مش عايز زفت عيال انا عايزك انتي...
بطه بحزن
وانا عايزه ابقي ام يا يوسف...
يوسف بحده
ربنا ما كتبلناش نبقي اب وام خلاص نرضي بقضاء ربنا..
بطه بجديه
بس في طريقه اهي عشان نبقي ايوه صعبه شويه بس في امل، يل يوسف انا تعبت من كل مره اشوف واحده من صحابي معاها بيبي واتنين وانا اللي متجوزه قبلهم قاعده كده، تعبت من نظرات الشفقه اللي في عيونهم وهما بيتكلمو علي ولادهم قدامي وتعبت من اللي بيخافو يتكلمو قدامي لاحسدهم..
يوسف بضيق
ما تصاحبيش حد انا هبقالك كل حاجه ومش عايز حاجه في الدنيا كلها والله غير انك تكوني معايا وتبقي كويسه..
بطه ابتسمت وقالت
وانا عايزه ابقي ام وعايزه اسعدك وحاسه اني هعمل العمليه وهتنجح وهنبقي احلي ام واب، وحماتي هترجع تحبني زي زمان ومش هيبقي في مشاكل تاني..
يوسف بحزن
بس اا..
قاطعته وقالت
لا بس ولا حاجه انت بس ادعيلي العمليه تنجح وتكون جنبي وانا هكون مبسوطه ومرتاحه...
يوسف بضيق
ماشي يا بطه بس لو الدكتوره قالت في اي وقت ان في خطر كبير مش هنعملها..
بطه
تمام يا باشا، شوفت اهو الايسكريم كان هيسيح هروح احطه في التلاجه وهغير هدومي واجي احضرتك العشا..
_ كانت بتتعامل قدامه عادي وهي مبسوطه، بس اول ما دخلت اوضتها اتملت عيونها دموع وبصت لصورتهم مع بعص اللي علي الحيطه وقالت..
بطه بخوف
انا بعمل كده عشانك، لو العمليه نجحت هنكمل مع بعض ولو ما نجحتش انا هسيبك وهسيب الدنيا كلها عشان انت تكمل حياتك بطريقه احسن من غيري يا يوسف..
ـــــــ # بقلم_الكاتبه_الكاتبه_رحاب_القاضي ـــــــ
_ في بيت جميله..
كانت قاعده هي وايتن وشهد اللي بتحكيلهم اللي حصل في اول يوم شغل ليها..
ايتن
طيب والله الولد ده جميل اوي حسااه كده شبه بتوع تركيا..
شهد
هو شكله حلو ومتواضع جدا بس عنده سيكا غرور كده..
جميله
هو عنده كام سنه يا شهد؟..
شهد
تقريباً كده عنده 30 سنه او اقل كمان واللي عرغته ان الشركه دي كلها عملتها مامته وهو بقي ورثها وكده..
جميله
اصغر منك يا خساره..
شهد
بالله يا شيخه اطلعي بره المسلسلات الكوري اللي في دماغك دي..
ايتن بخبث
بس يا جميله دي كانت متجوزه واحد قمر اكيد بعد منه مش هتبص لواحد بتوكه..
شهد بسخريه
ولا هبص لغيره اصلا الرجاله دي كلها صنف واطي اصلا معادا اخويا وولادي..
ايتن
ومروان كمان ما فيش زيه...
جميله بهيام
اقولكم حاجه طلعتو ولا نزلتو عمركم ما هتقابلو في حياتكم حد زي عموري..
ايتن
هو جاي امتي لماما صح؟..
قامت جميله بسرعه وقالت
ايوه صح هو زمانه جااي انا لازم اقول لماما..
شهد
انتي لسه ما قولتيلهاش انتي غبيه يا جميله؟..
ايتن
وما تقولهاش اصلا لان ماما ممكن ترفض تقابله فأحنا نحطها تحت الامر الواقع..
شهد
وربنا انا لو عندي ربع دماغك دي كان زماني ممشيه يونس علي عجين ما يلخبطوش...
وقامت وقالت
علي العموم انا همشي بقي لان يونس زمانه جايب الولاد وجاي...
ايتن
انا هاجي معاكي عايزه اشوفه والنبي..
شهد
يعني هتشوفي الامله يعني، بس تعالي معايا..
_ ومشيت شهد ومعاها ايتن، وبعد شويه تحت البيت وقف عمار بعربيته في نفس الوقت اللي كان يونس جايب ولاده، ويونس قاله..
يونس
يا محاسن الصدف خير؟..
عمار بهدوء
جاي لقرايبي هنا، عامل ايه يا يزن..
يزن بهدوء
كويس..
يوسف
وانا اسمي يوسف يا عموري..
بصله عمار بتعجب ويونس سأله
انت تعرفه منين يالا؟..
يوسف غمز لعمار وقاله
مش انت جوز جميله هي ورتني صورتك قبل كده..
عمار ضحك بهدوء وقعد قدامه وقاله
وقالتلك ايه تاني بقي جميله؟..
يوسف بصوت واطي
بتجيب صورتك وتقول يخربيت حلاوة امك يا عموري..
ضحك عمار بصوت عالي ويونس ابتسم وقال
هو ايه الحوار انتو تعرفو بعض منين؟..
وقف عمار ورد عليه
واضح كده ان قرايبك وقرايبي اللي هنا علي معرفه كبيره ببعض.
شال يونس يزن ومسك ايد يوسف وقاله
مش بقولك يا محاسن الصدف،طيب يلا بينا نطلع...
_ وفي بيت جميله كان عمار قااعد في الصاله بتاعت بيتهم وراحتله جميله وقعدت جنبيه وقالت..
جميله
ما اكلتش الكيكه يعني؟..
عمار
هي دي كيكه انا ابقي ما اتربتش لو قولتلك ادخلي المطبخ تاني..
جميله بحزن
يعني وحشه ده انا فضلت اليوم كله اعمل فيها ده انا خلصت اللبن والبيض لماما..
عمار بغيظ
ما هو انتي ازاي تحطي لبن وبرتقان في كيكه واحده؟..
جميله ضربته علي كتفه وقالت بحده
شالله عنك ما اكلت، هخليها لمروان اخلي ايتن تديهاله..
عمار
مروان ابني لا انا مش مستغني عن الواد انتي ترميها للقطط لا وحرام والله القطط تاكلها كمان..
جميله بسخريه
ايه خفة الدم والروقان ده، ياريت ما يبقاش مع ماما دلوقتي مذ ناقصين....
عمار
هي فينها صح انا بقالي شويه قاعد هنا؟..
جميله
بتصلي العشا جوه وجايه، بس انت ناوي تقولها ايه؟
عمار بهدوء
هخطبك منها..
جميله بقلق
ولو رفضت.. بص انت ممكن تقولها ان اا..
قاطعها وقال بهدوء
ما تخافيش وسيبي الموضوع عليا، وغصب عن امك هتجوزك وبرضاها كمان..
جميله ضيقت عينيها وقالت
يبقي هتهددها انا عارفه عشان انت غني وكده، هتهدد ماما لااا انا ما اسمحلكش انك تعمل في امي زي اللي بيحصل في امهات البطلات اللي في الرويات..
عمار بنفاذ صبر
روحي اندهي امك واخلصي يا بت الهبله..
طلعت فريده من اوضتها وقالت
اهلا وسهلا يا ابو مروان منورنا..
عمار وقف وسلم عليها وقال
منور بصحابه يا مدام فريده..
فريده بجمود
اتفضل اقعد..
_ قعد عمار وفريده قعدت قدامه وجات جميله تقعد جنبيها بس فريده قالتلها بجمود..
فريده
ادخلي اوضتك يا جميله..
بصلها عمار بهدوء وجميله قالت بأحراج
ما تهزريش يا ماما مش وقته..
فريده بحده
قولت علي اوضتك وما تخرجيش منها يلا..
_ اتنهدت جميله بضيق ودخلت اوضتها وراحت وقفت ورا الباب...
فريده
خير ان شاء الله يا ابو مروان جميله قالتلي انك عايزني؟..
عمار بهدوء وثبات
خير ان شاء الله، انا يشرفني اطلب من حضرتك ايد جميله..
وكمل كلامه بنبره واثقه
وبطلبها منك عشان تبقي مراتي لاخر عمري..
فريده بجديه
ليه عايز تتجوز بنتي بالذات، ليه عايز تتجوز جميله اللي هي نص عمرك؟..
عمار ابتسم بهدوء وقالها
يا مدام فريده جميله الفرق بيني وبينها 12 سنه بس، وجميله مش عيله صغيره دي انسه كبيره ولو مشكلتك اني كبير شويه فأنتي اللي يهمك جميله وهي راضيه بيا..
فريده
برضو ما رديتش عليا، ليه جميله اللي انت عايز تتجوزها؟..
عمار بثبات
عشان بحبها..
فريده
ولو بطلت تحبها هتسيبها، انا عارفه بنتي طيبه وبتصدق اي حد وو..
قاطعها عمار وقال بجديه
انا مش بكدب عليها ولو كانت في نيتي حاجه تاني ما كنتش هاجي واقعد مع حضرتك دلوقتي، وجميله بنتك وحضرتك تعرفيها اكتر مني واكيد تعرفي ان اللي يعرفها بجد ويحبها ما يعرفش ينسي حبها ولا حتي يبطل يحبها..
فريده بضيق
بص بقي انا هتكلم معاك علي انك اخويا الصغير، انت من لما دخلت البيت وانا متعمده اقولك يا ابو مروان وقدامها، انت عندك ولد طول جميله ويمكن كمان دماغه اكبر منها، انت راجل سنك كبير وعندك خبره كبيره في الدنيا وبنتي مش قدك ولا انا هكون مطمنه عليها وهي معاك، بس عشان ما تقولش اني برفض وخلاص احنا برضو لينا راجل تقدر تروح لعمها وتتكلمو رجاله مع بعض ونفكر في الموضوع ونرد عليك، تعرف طريق عمها ولا اديك العنوان..
اتصدمت جميله من كلام مامتها وقالت وهي واقفه ورا باب اوضتها..
جميله
ايه اللي بتقوليه ده يا ماما عمي ايه وزفت ايه هو حد لعبلها في الاعدادات الوليه دي...
عمار بهدوء
تمام يا مدام فريده بكره هكون عنده واللي تطلبيه انا تحت امرك فيه..
وقف وقال وهو بيقفل جاكيت بدلته بكل ثقه
انا تحت امرك في اي حاجه تطلبيها الا اني اسيب جميله يا حماتي، بعد اذنك..
_قال كلامه ومشي وجميله طلعت وهي مدايقه جداً وقالت بعصبيه لمامتها..
جميله
ايه اللي انتي بتعمليه ده يا ماما؟..
فريده بحده
انتي اللي ايه اللي جيباه ده شوفتي قلة ذوقه وكأن كلامي معاه مالوش لازمه..
جميله بغضب
ممكن افهم ايه دخل احمد العدوي في الموضوع..
فريده
احمد العدوي ده يبقي عمك يا جميله، وفيها ايه لما يقف جنبينا..
جميله
ده لو كان بيحبنا يا ماما، انما اللي بتقولي عليه عمي ده سرق حقنا وبيبيع ويشتري فينا علي مزاجه ، هو برضو اللي كل شهر بيجي يتصدق علينا بحقنا يا ماما وانتي اللي سمحاله يعمل كده، انا ما كنتش عايزه عمار يتكلم معاه ولا يعرفه اصلا...
فريده بحده
اسكتي يا جميله انتي مش فاهمه حاجه، عمك هيسأل عليه كويس ونعرف اللي احنا مش عارفينه..
جميله بدموع
هيبوظلي كل حاجه، هو مش بيعمل حاجه غير انه يبوظلنا حياتنا يا ماما، انا مين اللي دمرلي حلمي وخلاني ادخل كليه مش عايزاها مش هو، مين اللي طلعنا من بيتنا وقعد هو فيه وجابنا هنا في الشقه دي، وفي الاخر برضو رايحه تسلميله حياتي عشان يخربها تاني تاني يا ماما تاني والله حرتم عليكي...
فريده
عمك مالوش علاقه بأننا نقعد هنا، هو ليه نص البيت هناك وانا ما كانش ينفع اقعدك انتي واختك مع ابنه افهمي...
جميله بدموع
انا مش هخلي عمار يروحله، عشان خاطري اديه فرصه انا بحبه وافقي يا ماما من غير المرمطه دي..
فريده بحده
انتي خايفه من ايه مش عامله نفسك واثقه فيه؟..
جميله بغيظ
طيب يا فريده والله العظيم لو عمار طلع زعيم عصابه هتجوزو برضو بس..
قالت كلامها ودخلت اوضتها وفريده قالت
يالا ياا بت الجزمه، قال والتاني يقولي يا حماتي ده ايه الغلب ده..
ــــــــ # بقلم_الكاتبه_رحاب_القاضي ــــــــ
_ وعند شهد كانت قاعده مع يونس وولادهم اللي صممو انه يدخل ويقعد معاهم...
يونس بخبث
ولادك هما اللي دخلوني ما تقلبيش وشك عليا كده..
شهد بجمود
لا عادي..
يزن
ماما طنط دارين بتسلم عليكي..
شهد بصت ليونس وقالت
مين دارين دي؟..
يونس بخبث
موظفه عندي بس بنت اموره اووي كنت عازمها علي العشا في البيت هي ويوسف وشافت الولاد وحبوها جداً..
شهد بهدوء
ايوه تقريباً اعرفها شعرها قصير شويه مش كده..
يونس بفضول
ايوه انتي تعرفيها منين؟.
ابتسمت بسخريه وقالتله
كانت في صوره ليك وانت بتتعشي معاها ولا نسيت، لا وشوفتك معاها بعد ما اطلقنا اكتر من مره..
يونس بقلق
علي فكره والله العظيم هي موظفه عندي وبس وانا بعتبرها زي ا..
قاطعته شهد وقالت ببرود
ما يهمنيش يا يونس انا بسأل عادي يعني انما انت حر اعمل اللي عايزه..
يونس بحده
يعني بطلتي تغيري عليا،ولو قولتي ايوه تبقي كدابه...
شهد ضحكت وقالت بهدوء
ولو قولت لا هبقي كدابه برضو، عادي يا يونس كبر دماغك من اللي انت بتفكر فيه ده..
يونس وقف وقال
لا مش هكبر دماغي، ولو هكبرها في اي حاجه عندك انتي هصغرها اووي..
وقفت قدامه وقالت
نورتنا ياريت بعد كده تبعتهم مع السواق..
يونس غمزلها وقال
ولما ابعتهم مع السواق اشوفك ازاي..
_اتوترت من كلامه وزاد توترها اضعاف لما قرب منها وقال بصوت واطي...
يونس
مش كفايه اني كل يوم ما بعرفش انام وانتي بعيد عن حضني كمان مستكتره عليا اشوفك ده انتي بقيتي بخيله اوي..
_ بعدت عنه شهد شويه وهي بتحاول ما تبينش تأثر كلامه عليها، وجه يوسف ابنها وقف جنبيها وقال بفضول..
يوسف
هو قال ايه يا ماما؟..
ضحك يونس بهدوء وقالها
ابقي ردي علي ابنك...
وقرب من يزن وباسه في خده وقاله
هاجيلك بكره بعد المدرسه زي ما اتفقنا وهنقضي اليوم كله سوا..
يزن ابتسم وقال
ماشي هه هستناك..
قام وقال لشهد
انا جددتلكم اشتراك النادي وقت ما تحبي تاخدي الولاد هناك كلميني وانا هبعتلك السواق..
شهد بتوتر
حاضر..
_ ضحك بخبث وسابها ومشي وطلعت ايتن من المطبخ هي وزهره وكانو بيضحكو عليها وايتن قالت..
ايتن
لا وايه يا طنط زهره تتكلم قدامي اقول خلاص البت مستحيل تكون لسه بتحبه وهي واقعه..
زهره بخبث
انتي ما تعرفيش حاجه ده انا اشهد علي بلاوي حصلت زمان، وهي لو قالت للدنيا كلها انها مش بتحبه كدابه دي عمرها ما تحب غيره..
شهد بتوتر واحراج
علي فكره عادي هو بس اللي وترني بس يعني..
يوسف
طيب هو بابا قالك ايه انا عايز اعرف..
شهد شالته وقالت
اللي قاله بقي انت حاشر مناخير امك ليه دي في كل حاجه، تعالي اغسل سنانك عشان تنام، وانت كمان يا حبيب بابا قووم..
ايتن
طلعيهم علي العيال طلعيهم، هروح انا اشوف جميله وماما حصل ايه معاهم..
شهد وهي داخله الحمام
وانا هنيم القرود دول واجيلكم...
ـــــــــ # بقلم_الكاتبه_رحاب_القاضي ـــــــــ
_ في بيت المنشاوي.
دخل زكريا البيت وكان الوقت متأخر شويه، قعد علي الكنبه اللي في الصاله وحط شنطه كبيره فيها هدوم جهاد جنبيه، وبص للاوضه اللي فيها جهاد واتنهد بضيق وزادت نظراته غضب، وفي الوقت ده رن موبيله برقم عزيز..
رد وقال بجمود
خير؟..
عزيز
ايه اللي حصل ده، الكلام اللي وصلي صح انت ما عرفتش تنفذ اللي اطلب منك يا زكريا..
_ غمض عيونه بغضب من نفسه لما افتكر انه وقف قدام الراجل اللي المفروض كان يقتله، بس حصل نفس اللي حصل لما كان هيقتل ابن الصحفي ما قدرش...
عزيز
ما ترد عليا انت غورت فين؟..
زكريا بجمود
صوتك ما يعلااش، اديني يومين وهنفذ..
عزيز
مش حلو الكلام يا زكريا، وغيرك هينفذ وترجع الفلوس اللي اخدتها وارتاحلك شويه يا ابن المنشاوي سكل كده ايدك تقلت علي الشغلانه..
_ خلص كلامه وقفل في وش زكريا اللي رمي موبيله علي الترابيزه، وفي الوقت ده كان المنشاوي واقف ورا باب اوضته وابتسم برضا وطلع راح قعد جنبيه وقال....
المنشاوي
ايه اللي جابك مش قولت هتقعد في الشقه التانيه، ولا مش قادر تبعد عنها..
بصله زكريا بدموع متحجره وقال
انت عارف كويس انا اتجوزتها ليه، زي ما انت عارف برضو ان عمري ما هرجع زي الاول.
المنشاوي بجديه
هترجع عشان انت يا زكريا متسرع وعصبي بس قلبك طيب، الشيطان ما اتملكش منك لسه فيك خير والدليل مراتك اللي جوه دي وابنك اللي هيجي كمان كام شهر ده، واخوك اللي لسه بخير، انت لو كنت وحش كنت اذيته..
زكريا بسخريه
انا اللي فاشل انا اللي عمري ما هكون عمار المنشاوي، بس هو شايف الموضوع عادي وبيلوم عليا في زعلي، بس هو ما حطش نفسه مكاني كلامه دمرني كلامه خلاني ابقي مجرم اعمل اي حاجه عشان تبقي معايا فلوس زيه واقدر اخليه يبقي اقل مني، بس مهما كانت معايا فلوس انا ما عنديش دماغه...
المنشاوي بضيق
انت ما عاقبتش غير نفسك رميت نفسك للغلط والحرام، بس قدامك الفرصه ترجع زي الاول، ما ترجعش مع عمار خليك لوحدك وو..
ضحك بسخريه وقال
السكه اللي انا مشيت فيها يا منشاوي مالهاش اخر وما ينفعش ارجع منها، بس انا عارف نهايتي فيها ايه كويس..
زكريا بدموع نزلت فعلا
انا كنت عايزها تنزله عشان ما اضعفش، من لما عرفت بوجوده وانا مش عارف مالي انا بقيت بخاف من كل حاجه بعملها عشانه هو،برغم اني عارف اني هتحرم منه بسرعه ومش هلحق افرح بيه..
قام المنشاوي وقال
انت ما تعلمش الغيب عشان تقول كده، بس جهاد عرفت ترجعك بسرعه وهترجع زي الاول، ربنا باب توبته مفتوح ديماً..
زكريا بحده
قولتلك ما ينفعش وانا مش هبطل يا منشاوي..
المنشاوي ببرود
صحي مراتك من لما جات نايمه بس ده طبيعي من الحمل، بس خليها تاكل وبعدين تنام تاني عشان ابنك....
زكريا بضيق
ماليش دعوه شالله عنها ما طفحت انا ماشي اصلا....
المنشازي وقف عند باب اوضته وبصله وقال
يا واد خلي عندك دم، ولا عايزني اروح انا اصحيها اختشي وصحيها تاكل وروح مكان ما تروح..
_ قال كلامه ودخل اوضته وقفل الباب وقعد علي السرير بتاعه ومسك الصوره اللي كانت جنب سريره بتاعت مراته التانيه ام زكريا وقال بدموع وحزن..
المنشاوي
زكريا هيرجع يا حبيبتي ما تخافيش انا حاسس انها هتقدر ترجع ابني زي الاول تاني...
_ وعند جهاد كانت نايمه في اوضة زكريا وهي حاضنه المخده وشكلها هادي جداً وبرئ للغايه، اول ما هو فتح الباب وكانت ملامحه غاضبه وشافها، اتغيرت ملامحه للهدوء وابتسم بشرود وافتكر مامته بالفستان اللي هي لابساه، وقفل الباب بهدوء وقرب منها وقعد جنبيها علي السرير، وبكل هدوء شال شعرها اللي كان علي وشها...
_ واول ما ايده لمست وشها فتحت عينيها بهدوء وهو اتنهد بهدوء وقال..
زكريا
عينيكي تسحر علي فكره ♥
_ قامت بسرعه مفزوعه وهي لسه حاضنه المخده وبتبصله بخوف من وجوده معاها في مكان لوحدهم، وزاد خوفها اكتر لما زعق فيها وقال....
زكريا بحده
في ايه هو انا هاكلك كل ما تشوفيني تعملي كده؟..
جهاد قامت بسرعه وقفت وقالتله بدموع
انت قولت مش هتيجي هنا؟..
_بصلها من فوق لتحت بأعجاب والفستان بلونه الاصفر اللي مبين لون بشرتها الابيض اوي، واتكئ بضهره علي السرير وقال..
زكريا بخبث
وانتي صدقتيني، انا براحتي يا جهاد اكون في المكان اللي انا عايزه وقت ما احب..
جهاد بغيظ
ماشي براحتك فعلا وانا همشي، وهروح اقعد في بيت طنط نورا لوحدي، اطلع بره عشان اغير هدومي..
زكريا ببرود
لا..
ادايقت من رده وهو ابتسم وقال
اقعدي عايز اتكلم معاكي..
جهاد بعند ونفس بروده
لا..
_ ضحك زكريا اووي وبصوت عالي، وقام وقف قدامها وقال وهو مبتسم بقوه..
زكريا
بصي يا جهاد انتي دلوقتي مراتي لحد ما الموضوع يخلص تسمعي كلامي وتقولي حاضر ونعم وبس..
جهاد بتوتر من قربه
علي ايه بقي حددلي..
زكريا بهدوء
يعني لو عايزه تروحي مكان اعرف، هتخرجي لوحدك اعرف الاول ولو قولتلك لا يبقي لا، مش بحب الزن ومش بحب ان كلامي ما يتسمعش مفهوم..
جهاد رجعت لورا كام خطوه بسرعه وقالت
انا متجوزاك عشان البيبي يتكتب بأسمك وبس انما تتعامل معايا كده فأنت مالكش حق اصلا انك تتأمر فيا.
زكريا بجديه
اخواتك مش هيسيبوكي وانا اللي بقوله لمصلحتك او لمصلحة ابني او بنتي، هو بنت ولا ولد؟..
جهاد بهدوء
مش عارفه ومش عارفه برضو امتي هعرف هو ولد ولا بنت، هبقي اسأل الدكتور...
زكريا بجديه
طيب تسمعي الكلام عشان انا كمان اعملك اللي عايزااه، جيبتلك هدومك بره كلها..
جهاد بتوتر
ازاي يعني انت ازاي دخلت هناك وازاي تشوف هدومي اصلا؟..
زكريا حاول يكتم ابتسامته وقال
المفتاح كان مع عماد وهو معايا دلوقتي، واكيد ما كنتش هبعت حد غريب يجيب حاجتك..
جهاد وشها قلب احمر وقالت
كنت انا هروح علي العموم خلاص اتفضل امشي..
زكريا بجديه
طيب ابقي اتعشي التلاجه بيكون فيها اكل ديما ولو عايزه حاجه غير اللي فيها المطعم عندك تحت كلميهم يعملولك اللي نفسك فيه هو مفتوح علي طول.
_ قال كلامه وكان هيمشي، بس وقف لما هي نندهت عليه بصوتها الرقيق وقالت..
جهاد
زكريا... لو سمحت استني..
بدأ قلبه يدق بطريقه غريبه وبصلها وقال
نعم؟..
جهاد بأحراج
ممكن طلب وو والله يعني مش هطلب منك حاجه تاني خالص..
زكريا بهدوء
عايزه ايه؟..
_مسكت موبيلها اللي كان علي السرير ومدته ليه وقالت ببراءه..
جهاد
ممكن تدخلي باسورد الواي فاي؟..
ابتسم بهدوء علي طريقتها وقال
سته تلاته اربعه سبعه واحد مرتين، وطلبك مش محتاج الكسوف ده كله انا كنت هفهم حاجه تاني ، سلام..
_ قال كلامه ومشي وهي تلقائياً ابتسمت علي كلامه معاها، وسمعت باب الشقه اتفتح واتقفل فطلعت بره اوضتها واكلت وبعدين فضلت تقلب في موبيلها لحد ما نامت..
_نعم نامت بأمان حُرمت منه منذ وفاة والدها،امان شعرت به في منزل وفراش من كانت تخشي الوقوف امامه او رؤيته
ــــــــــ # بقلم_الكاتبه_رحاب_القاضي ـــــــــ
_وتاني يوم الصبح في بيت صبري....
صحيت شهد من نومها علي صوت موبيلها اللي بيرن، مسكته عشان ترد وقامت قعدت لما لقيت اللي بيكلمها يونس...
ردت عليه وقالت
ايه يا يونس في ايه علي الصبح..
يونس
اطلعي افتحي انا عند الباب..
_قامت شهد من جنب ولادها بهدوء وقالت بقلق.
شهد
انت بتعمل ايه عندنا دلوقتي، في ايه يا يونس؟..
يونس
افتحي وهتعرفي..
_ كانت الساعه خمسه ونص الصبح، لبست شهد حجابها علي بجامتها الطويله وراحت فتحت الباب وكان يونس فعلا واقف وفي ايده شنطه كبيره ولما شافها ابتسم وقال..
يونس
صباح الفل..
شهد بحده
والله يعني مصحيني من احلي نومه عشان تقولي كده، ده انا فكرت في مصيبه..
يونس
يا ستي الولاد كانو عايزين فطار مخصوص وطلبوه مني فقولت اجيبه ليهم.
شهد بضيق
كنت تبعته مع اي عامل...
يونس
انا بتلكك عشان اشوفك عندك مشكله؟..
حاولت كتم ابتسامتها وكان رد فعلها انها قفلت الباب في وشه جامد وقالت..
شهد
نورت يا يونس...
يونس ضحك وقال بخبث
بنورك يا حبيبتي...
شهد بحده وهي ورا الباب
انا مش حبيبت حد، وامشي لو سمحت..
يونس بهدوء
حاضر همشي بس انا وراكي وراكي يا شهد لحد ما نرجع وكله هيخلص وقتها...
شهد بسخريه
بتحلم يا ابن الصاوي...
يونس
واحلامي بتحقق يا شهد وانتي عارفه كده كويس، هبعتلك السواق يوديكي النادي انتي والولاد اخر اليوم تكوني رجعتي من شغلك ياللي قادره علي التحدي والمواجهه...
شهد ببرود
ميرسي واتفضل امشي عشان وقفتك كده غلط..
_ اتنهد بضيق ونزل تحت واول ما طلع عربيته، وكلم يوسف وقاله..
يونس
ايوه يا يوسف بص عربية دارين بايظه وعايزاني اروح اخدها في طريقي وانا ماليش مزاج...
_يوسف بصوت واطي وهو بيلبس هدومه عشان بطه نايمه..
يوسف
وانا مالي انا، انت عارف اني مش بطيق الكائن اللي اسمه دارين ده مش بنتفق..
يونس بحده
هو انا بقولك روح اتجوزها، معلش يا يوسف عشان خاطر اخوك..
يوسف
ماشي اقفل بقي احسن بطه تصحي..
يونس بغيظ
ما تنشف كده يااه ما تتنيل تصحي تفطرك بدل الدلع ده..
يوسف بحده
انت مالك انت انا بحب ادلع مراتي خليك في حالك سلام...
_ قفل معاه وخلص لبسه وقرب من بطه اللي كانت نايمه وباس علي راسها بهدوء وطلع وقفل الباب بهدوء عشان ما تصحاش ونزل اخد عربيته وراح لبيت دارين اللي كانت قاعده جوه عربيتها ولما شافت يوسف اتنهدت بضيق، وراحت ركبت جنبيه وقالت..
دارين
سوري هتعبك..
يوسف بضيق
ايوه هتتعبيني كنتي طلبتي اوبر..
وساق العربيه وهي قالت بغيظ
اوكي رجعني وانا هطلب اوبر واصلا انا كلمت يونس ما كلمتكش انت..
يوسف بسخريه
اممم ما انا عارف بس هو ما كانش فاضي كان عند شهد بيصبح عليها وبيحاول يصالحها، يا خساره كدبتي علي الفاضي هي عربيتك بايظه بجد ولا دي كدبه؟..
دارين بدموع
كدبه يا يوسف اسكت بقي..
يوسف بجديه
وزي كل مره هقولك يا بنت الناس انتي اللي بتعمليه ده غلط، يونس مش هيشوفك لانه بيحب مراته وبيعشقها...
دارين بحده
هي طليقته علي فكره، وممكن تخليك في حالك لو سمحت...
يوسف بحده
انا غلطان سفي في الخازوق براحتك....
وبص للشباك وقال بصوت عالي
الحقي الحقي يا دارين..
دارين بقلق
ايه في ايه؟..
يوسف بخبث
كرامتك طايره هناك اهي، ههههههه..
دارين بعصبيه
اقف ونزلني يلااا..
يوسف
خلاص بهزر معاكي والله..
زعقت فيه وقالت
بقولك اقف نزلني يلاااااااا..
_وقف يوسف وهي نزلت وقالت وهي بتقفل الباب بغضب وعصبيه...
دارين
رخم ومستفز والله..
يوسف طلع راسه من الشباك وقال
اهو انتي علي فكره..
_ قال كلامه وساق عربيته ومشي من قدامها والشارع كان هادي جداً، وفي ناس بتعدي بتبصلها وبتبص للبسها القصير بنظرات مش كويسه، وهي خافت جداً وكانت هتعيط بس هديت لما رجع يوسف بعربيته وقالها..
يوسف بهدوء
اركبي يا دارين الله يهديكي وانا مش هتكلم خالص..
_ راحت ركبت جنبيه وهي مدايقه ودموعها ماليه عيونها، وهو ساق العربيه في طريقه للشركه وما اتكلمش معاها خالص..
ـــــــــ # بقلم_الكاتبه_رحاب_القاضي ــــــــ
_ بعد شويه في شركة احمد العدوي عم جميله..
دخل عمار هناك بكل هيبه وثقه وكالعاده لفت الانظار ليه، وقرب منه موظف من هناك وقال..
الموظف
اهلا وسهلا بحضرتك يا عمار بيه، نورت الشركه..
عمار بهدوء
اهلا ممكن اعرف مكتب احمد بيه فين؟..
الموظف
طبعاً طبعاً اتفضل حضرتك معايا وانا هوصلك بنفسي..
_مشي معاه عمار وكانت الشركه دور ارضي وفيها سلم صغير بيوصل لمكتب احمد العدوي، واول ما وصل عمار طلب من السكرتيره تبلغ احمد بوجوده..،ودخلت فعلا السكرتيره مكتب احمد وطلعت بعد اقل من دقيقه وقالتله يدخل..
_ دخل عمار بهدوء مكتب احمد اللي وقف هو وحسين يرحبو بيه وما كانوش يعرفو سبب زيارته ليهم، وقعدو هما التلاته وفضلو يتعرفو ويتكلمو عن الشغل شويه لحد ما عمار قال...
عمار
ما حدش يعني سألني انا جاي ليه؟..
احمد
مكانك يا عمار بيه وتنور في اي وقت..
عمار بهدوء
تسلم يا احمد بيه، بس هي مدام فريده ما قالتش لحضرتك اني جاي عشان جميله..
بص حسين وباباه لبعض وحسين قال بعصبيه
وانت تعرف بقي جميله بنت عمي منين؟..
_ بصله عمار بهدوء علي عكس الغضب اللي كان جواه وحسين بيتكلم عنها وكأنها تخصه اكتر منه،..
احمد بجمود
حسين روح انت شوف شغلك يلا..
حسين بضيق
بس يا بابا ااا..
احمد بحده
اسمع الكلام يا ولد يلااا..
طلع حسين واحمد قال لعمار بأبتسامه واسعه
انا فريده مرات اخويا الغالي قالتلي ان في عريس جاي لجميله وجاي يتقدم النهارده هنا، بس ما كنتش اتوقع ابداً انه حضرتك..
عمار بهدوء
حصل خير انا جيت بعد ما مدام فريده طلبت مني..
احمد بهدوء
وانا يشرفني طبعا انك تناسب من عيلتنا يا عمار بيه، بس هو يعني انت وجميله تعرفو بعض منين؟..
عمار بثبات
يعني كنا علي معرفه بسيطه انا وابني بيها وبمامتها وايتن، وانا حبيت ادخل البيت من بابه، والشرف ليا طبعا انها تكون ليا..
احمد
تمام يا عمار بيه انا هتكلم مع جميله بنت اخويا وفريده وهبلغك ردنا..
عمار ابتسم وقال
تمام وانا مستعد لكل اللي يطلبوه ان شاء الله..
_ قال كلامه ووقف وسلم علي احمد ومشي، واحمد ملامحه اتحولت للغضب وبص لصورة اخوه اللي علي الحيطه وقال بشر.
احمد
يرضيك كده يا اخويا. اللي عملته السنين اللي عدت ده كله، جايه بنتك الهبله وفاكره انها هتخربلي كل حاجه، بس علي مين ان ما خليتها تبقي خدامه تحت رجلي هي ومراتك وبنتك التانيه ما ابقاش انة احمد العدوي.
دخل حسين وقال
هو الراجل ده كان عايزك بخصوص جميله في ايه؟..
احمد بسخريه
راجل غني زيه بنت عمك احلوت في غينه اكمنها صغيره وحلوه وجاي قال ايه عايز يتجوزها بس انا رفضت طبعا،روح انت بس بيت عمك واقعد مع فريده وقولها اللي هقوله ليك بالحرف الواحد..
حسن بحزن
ماشي بس جميله مسيتحيل تتجوز الراجل ده..
احمد بخبث
طبعا مش هتتجوزو بنات اخويا لازم يفضلو تحت طوعي طول عمرهم..
ــــــــ # بقلم_الكاتبه_رحاب_القاضي ــــــــ
_في بيت المنشاوي....
كان المنشاوي قاعد في الصاله وبيكلم مروان وبيقولو...
المنشاوي
تسمع اللي اقولك عليه يا مروان ابوك اتحمل عشانك كتير وتعب عليك اكتر وما يستاهلش منك اللي انت بتعمله ده..
مروان
علي فكره يا جدو ده واجبو انه يعمل كده، ومش من حقه يجبرني علي حاجه..
المنشاوي
طيب بصراحه عمك هو اللي قالك تعامل ابوك كده، زكريا بيمكس في ابوك قدامك..
مروان بحده
يا جدو هو ايه دخل عمي زكريا في الموضوع، ليه ديماً بتظلموه علي فكره هو عمره ما اتدخل بعلاقتي بأبويا وديماً مخليني بعيد عنه ومعاملته ليا عمرها ما اتغيرت..
المنشاوي بجمود
عمك مش مظلوم يا مروان عمك هو اللي ظالم نفسه، ابوك مش وحش عشان تعامله كده ولا تشيله الذنب كله.
مروان بضيق
انا مش حابب اشتغل معاه ومش حابب تحكماته فيا ما هو كان ديماً سايبني براحتي..
المنشاوي
طيب خلي بالك انت بس من مذاكرتك وانا هبقي اتكلم معاه، بس انا معاه في انك تحلق شعرك اللي مخليك شبه القنفد ده..
ضحك مروان وقاله
هههههه مقبوله منك يا شنو، المهم مش هتقولي بقي ايه سبب ان عمي يتجوز بسرعه..
المنشاوي
ما انا قولتلك البنت ابوها مات من قريب وقريبتها في المستشفي، وعمك مش بتاع افراح اصلا..
مروان
طيب قولي هي حلوه، هي احلي ولا دارين؟..
المنشاوي
امك احلي يا ابن سميره اقفل وروح ذاكر يا ولد. يلا..
_قفل معاه المنشاور وهو بيضحك علي مشاغبة حفيده معاه، وطلعت جهاد من اوضتها وكانت لابسه بجامه طويله وعامله شعرها علي شكل ضفيره علي كتفها زي عادتها وقالت بهدوء..
جهاد
صباح الخير..
ابتسم المنشاوي وقالها
صباح النور يا بنتي، انا مجهزلك الفطار في المطبخ عشان ما تتعبيش..
جهاد
ليه بس تعبت نفسك انا كنت والله هعمل لحضرتك فطار بس راحت عليا نومه..
المنشاوي
لا ما تشغليش بالك انا بصحي الفجر اصلي وبعدين بجهز الفطار، اغلب الوقت زكريا مش بيكون موجود وانا بعمل كل حاجه لنفسي....
جهاد بهدوء
طيب لو مش هيدايق حضرتك انا اا.
قاطعها المنشاوي وقال بحده
في ايه يا بت انتي عماله تقولي حضرتك حضرتك، هو انتي ما تعرفيش ان ابو جوزك يبقي في مقام ابوكي مش هجبرك تقوليلي يا بابا بس ممكن تقوليلي عمو، مع انك لو قولتي بابا هكون مبسوط..
ضحكت جهاد بهدوء وقالتله
حاضر يا بابا، انا كنت عايزه اجهز الغدا انا النهارده ممكن؟..
المنشاوي
النهارده لا افطري واجهزي هننزل المطعم عشان اعرفهم علي مرات ابني وبدل ما تفضلي قااعده في البيت هخليكي تنزلي معايا المطعم كل يوم..
جهاد فرحت وقالت
بجد شكراً جداً لحضرتك..
المنشاوي بضيق
هتقولي تاني حضرتك.
جهاد بسرعه
قصدي بابا والله، هروح افطر بقي..
_ وكانت لسه هتدخل المطبخ بس رجعت وقالتله بهدوء.
جهاد
ممكن طيب تكلمه وتقوله اني هنزل وكمان تقولو اني هروح لطنط نورا المستشفي.
المنشاوي
مالها نورا حصلها ايه؟..
اتوترت جهاد وقالتله
تعبت شويه ومحجوزه هناك..
المنشاوي
لا الف سلامه عليها والله لو اقدر اروحلها كنت روحت معاكي بس انا بنزل المطعم تحت بتعب، وبصراحه انا بطلع بره البيت بتعب اصلا..
جهاد
الف سلامه علي حضر..
المنشاوي بتحذير
اممممم..
جهاد. ضحكت اووي وقالتله
هههههه قصدي الف سلامه عليك يا بابا، ممكن بقي تكلمه..
حطلها الموبيل علي الترابيزه وقال
خدي الموبيل اهو وكلميه وانتي بتفطري عشان ما نتأخرش علي المطعم..
جهاد بتوتر
لا هيكون افضل لو انت كلمته..
المنشاوي
هو انا وسيط بينكم ولا ايه، كلميه يلا وبعدين هو انتي مش معاكي رقمه..
جهاد بضيق
لا مش معايا ومش عايزاه..
_واخدت الموبيل من علي الترابيزه ودخلت المطبخ و وابتسمت لما شافت الفطار اللي كان متجهز بطريقه حلوه، وفتحت الموبيل اللي كان بدون رمز ودورت علي اسم زكريا واتصلت بيه..
_وفي نفس الوقت في شقة زكريا، كان نايم علي سريره وجنبيه بنت بتلبس في الجزمه بتاعتها ولما موبيله رن قالتله...
_زكريا موبيلك بيرن..
زكريا بنوم
مين؟..
_المنشاوي...
زكريا
طيب ردي قوليلو نايم ولما يصحي يبقي يكلمك...
ردت البنت وقالت
الوو..
_بصت جهاد للموبيل وبعدين رجعته علي ودنها وقالت بتعجب..
جهاد
هو مش ده رقم زكريا؟..
_ايوه رقمه، بس هو نايم دلوقتي..
جهاد بضيق
طيب معلش صحيه قوليلو جهاد عايزااك..
بصت البنت لزكريا وقالت
زكريا دي واحده وبتقولك عايزاك اسمها جهاد..
_فتح عيونه بسرعه وقام اخد منها الموبيل ورد علي جهاد وقال بهدوء...
زكريا
معاكي.. خير؟
جهاد بجمود
باباك قالي انزل معاه المطعم وانا وافقت، وهروح لطنط نورا المستشفي اديني قولتلك اهو.
زكريا بهدوء
خليكي في المطعم وهاجي اوديكي المستشفي.
جهاد وهي بتاكل.
هروح لوحدي...
زكريا بعدم فهم
ايه بتقولي ايه...
جهاد بلعت الاكل وقالت
بقولك هروح لوحدي عادي.
زكريا بنبره شبه حاده
قولت هجيلك اوديكي ساعه وهكون عندك...
_ قال كلامه وقفل في وشها وهي حطت الفون جنبيها وقالت وهي مدايقه..
جهاد
بني ادم مش محترم اصلا، وبيقفل في وشي كمان والله انا لولا ظروفي دي انا ما كنتش هبص في وشك..
ـــــــ # بقلم_الكاتبه_رحاب_القاضي ــــــــ
_ وبالليل في النادي..
كانت شهد قاعده مع يونس وولادهم بيلعبو بعيد عنهم، وهو قال بخبث..
يونس
مش عارف ليه حاسس انك مدايقه اني جيت؟..
شهد بضيق
لا اتأكد من احساسك لاني فعلا مدايقه انك جيت ولو كنت اعرف انك هتبقي هنا كنت بعت الولاد لوحدهم..
يونس بجديه
لا تعالي علي نفسك واتعودي علي وجودي ديما، وما فيش يوم هيعدي يا شهد غير لما هشوفك فيه واحتمال يكون اكتر من مره لحد ما نرجع..
شهد بضيق
مش هرجع يا يونس مش هرجعلك افهم بقي..
ادايق يونس وقالها بغضب
وبعدين يعني ما خلاص يا شهد انا وعدتك اني هتغير ومن غير ما نرجع اصلا انا بعملك كل اللي عايزااه، عايزه ايه تاني.
شهد بجمود
مش عايزااك..
يونس بعصبيه
انا عشان حبيتك زمان اتقبلت فكرة اني اتجوزك وانتي مش بنت وعديتها، انتي بقي اا.
شهد بدموع
ايااااك تقارن يا يونس انا ما ضربتكش علي ايدك وقولتلك وافق ولو ما كنتش هتقبلني ما كنتش هلوم عليك، دي حاجه كانت غصب عني حاجه حصلت من غير رضايا ودمرتني، انما انت روحتلها برضاك قبلت تكون مع غيري برضااك....
نزلت دموعها وقالت
عارف لو كانت لسه في حاجه كويسه بينا باللي انت قولته دلوقتي وانك تدوس علي اكتر حاجه وجعتني في حياتي، انت كده نهيتها يا يونس.
قامت وقفت وقالت
يا تمشي انت يا امشي انا دلوقتي حالاً..
يونس بندم
والله ما كانش قصدي انا اا.
شهد بحده
كفايه مش عايزه اسمع منك حاجه....
_ قالت كلامها وسابته ومشيت وهو فضل قااعد يلعن نفسه علي اللي قاله ليها وانه بوظ الموضوع بينهم اكتر، واخد ولاده وراح بيته وكانت هناء نايمه فأخدهم معاه اوضته ونام جنبيهم.
"ولكن كيف يأتي النوم والقلب والعقل يفقدان هويتهم"
ــــــــ # بقلم_الكاتبه_رحاب_القاضي ــــــــ
_وفي السنتر اللي فيه ايتن ومروان...
كانت واقفه مع صحباتها وقالتلها واحده منهم.
مرام
هو مروان فين مش هيجي السنتر النهارده..
ايتن
مش عارفه والله..
بسنت بشماته
هو انتو متخانقين ولا ايه؟..
ايتن بضيق
وانتو مالكم يعمي شاغلين بالكم ليه..
مرام بحزن
انا مش قصدي حاجن يا ايتن انا بسأل عادي..
ايتن بخبث
انا ما اقصدكيش انتي يا مرام..
بسنت بغيظ
انا داخله جوه يلا يا مرام..
ايتن
ادخلي معاها يا مرام وهويلها وانتي داخلها عشان الدخان اللي طلع منها ده، وانا هجيب المذكره بتاعتي وجايه...
_ قالت كلامها وسابتهم ومشيت، وراحت تجيب الورق الخاص بالماده بتاعتها بس وقفها صوت ايهاب "الولد اللي اتخانق مع مروان قبل كدا وقال"..
ايهاب
ايتن استني..
بصتله ايتن وقالت بضيق
خير؟..
مدلها ايهاب التوكه بتاعت شعرها وقال
بالراحة طيب، خدي وقعت منك..
_جات تاخدها منه بس هو حطهالها في شعرها وقال بهدوء....
ايهاب
شكلها حلو عليكي..
_اتعصبت من حركته وقبل ما ترد عليه، جه مروان ووقف قدامها ورد عليه بغضب وقال..
مروان
بس هتبقي عليك احلي..
_ وشال التوكه من شعر ايتن ورماها علي الارض وايهاب فضل يضحك وقال..
ايهاب
ههههه معلش انا برضو مش هزعل منك ما انت معذور برضو..
_كان لسه مروان هيتخانق معاه بس ايتن مسكت ايده وقالت بخوف..
ايتن
عشان خاطري يا مروان سيبك منه، وانت لو سمحت خليك في حالك ولا تكلمني ولا تكلمه...
_ سابهم ايهاب ومشي، ومروان بصلها بعصبيه وقال....
مروان
ايه اللي كان موقفك معاه؟..
ايتن
زي ما انت شوفت يا مروان هكون واقفه معاه ليه يعني.
مروان بحده
انتي مستفزه علي فكره وانا غلطان اني جيت...
وسابها ومشي وهي راحت وراه وقالت
استني يا مروان دي حصه مهمه، وبعدين هو انت جاي السنتر عشاني انا..
وقف ورد عليها وقال
ايوه كنت جاي عشانك وعشان وحشتيني يا غبيه...
ابتسمت ايتن وقالتله
طيب انا اسفه والله لو فكر يكلمني تاني ما اقولكش هعمل فيه ايه، بس تعالي نحضر الحصه والله مهمه جداً..
_ اتنهد مروان بضيق وراح معاها وحضرو الحصه بس كان طول الوقت هو وايهاب بيبصو لبعض بحقد وكره..
ـــــــــ # بقلم_الكاتبه_رحاب_القاضي ــــــــــ
_وقدام المستشفي بالليل....
طلعت جهاد بره المستشفي وركبت جنب زكريا في عربيته، وهو مشي علي طول من غير ما يقول حاجه، بس لاحظ انها قاعده مدايقه جداً..
زكريا
مالك؟..
جهاد بضيق
انا كنت عايزه اباات عندها، هي حالتها صعبه بجد وانا عايزه اكون جنبيها..
زكريا
مجدي اخوكي مش ساكت علي فكره، وانا عرفت انه اصلا ضحك عليكي انتي وعماد واخد ورثكم هو واختك..
بصتله بصدمه وقالت
انت عرفت منين، معقول يكون عمل كده؟..
زكريا بجديه
كلمت محامي شاطر هتعمليلو توكيل وهيرفع قضيه عليه وعلي المحامي بتاع ابوكي اللي كانت معاه الوصيه، بس مجدي اخوكي مش هيسكت وانا خايف عل...
سكت وبصلها بتوتر وقال
عشان ما يعملكيش حاجه هتكوني تحت عيني في كل وقت الفتره دي، وخصوصا وانتي بره بيت المنشاوي...
جهاد
اشمعنا يعني؟..
زكريا
عشان عمار المنشاوي اخويا ما حدش يقدر يقرب من ابوه وانتي هناك في امان انما بعيد عنه لازم اكون معاكي تمام.
جهاد بحزن
تمام..
سكتو شويه وهي سألته وقالت
هو انت شغال ايه؟..
بصلها بتوتر ورد عليها وقال؟؟..
_ تفتكرو ايه اللي هيقولو ليها زكريا؟
ــــــــــــــــــــــ
موضوع_عائلي
"الجميله والشعر الابيض"
_الحلقه الـ17
ـــــــــــــــــــــــــــــــ
التفاعل ياناس
موضوع_عائلي
"الجميله والشعر الابيض"
_الحلقه الـ17
ـــــــــــــــــــــــــــــــ
اخبرتكِ بأن غيرتي قاتله، فلماذا جعلتِ نفسك ضحيتها؟..
_من اول ما اشتغل زكريا في مجال الاجرام وهو ديماً بيقول لأي حد انه مجرم، كان عايز يفرض شخصيته وقوته قدام الناس عشان يكون اقوي من اخوه عمار اللي اهانه قدام الكل وقلل منه، وافتكر انه لما يبقي كده الناس هتنسي اللي حصل..
بس لما هي تلك الصغيره سألته هو شغال ايه اتوتر وخاف لاول مره انه يفتخر بأجرامه، هو شايفها ملاك برئ بتتحامي فيه، كان جزء كبير جواه مبسوط بأحساس انه مهم في حياتها..
كررت هي سؤالها تاني وقالت
زكريا انت شغال ايه؟..
_سكت وبص قدامه بجمود وما ردش عليها وهي وقالت بسخريه...
جهاد
بس عرفت انت عاطل وعايش علي فلوس باباك وبس.
بصلها بطرف عينه وقال
لا نبيهه ما شاء الله، ده احنا نخاف عليكي من الحسد..
جهاد بغيظ
ممكن ما تتريقش عليا، وبعدين ما انت اللي مش راضي ترد عليا...
رد علي سؤالها وقال
شغال اا في شركه..
جهاد بفضول
بتاعتك؟..
زكريا بضيق
لا مش بتاعتي...
جهاد
اااه بس انت شغال ايه في الشركه دي يخلي معاك الفلوس دي كلها؟..
زكريا بغضب وخوف انها تعرف شغله الحقيقي
ممكن تسكتي وبلاش الاهتمام الزياده ده، وما تنسيش انا متجوزك ليه..
اتملت عيونها دموع وقالت بأحراج
انا اسفه مش هسألك عن حاجه تاني..
_ ما ردش عليها واتحولت ملامحه للغضب، وبعد شويه وصلو تحت البيت وجات تنزل هي مسك ايدها بسرعه وقال..
زكريا
استني..
_سحبت ايدها منه وقفلت الباب اللي فتحته وفضلت ساكته، وهو قال بهدوء..
زكريا
المحامي اللي هخليه يمسك قضية ورثك مسافر هيرجع بعد اسبوعين تلاته..
جهاد بجمود
طيب حاجه تاني؟..
زكريا بهدوء
لا خلي بالك من ابني..
رفعت عيونها من علي ايدها وبصتله بهدوء وقالت
مش هتوصيني، بعد اذنك..
_ نزلت هي من العربيه وهو فضل باصص لمكانها وظهرت ابتسامه بسيطه علي وشه، واتنهد بهدوء وقال لنفسه..
زكريا
اظبط كده يا زكريا عادي عيون خضرا زي اي عيون عادي، مش ملكة جمال الكون هي يعني دي حتي عيله صغيره عاديه...
_ قال كلامه واخد عربيته ومشي، وهو بيحاول يبعدها عن تفكيره خالص...
ــــــــ بقلم_الكاتبه_رحاب_القاضي ــــــــ
_ وفي الوقت ده في بيت عايده..
كانت جميله قاعده هناك مع عمار وهي متوتره جداً، قرب منها عمار وقال بصوت واطي..
عمار
ما انتي بتتكسفي اهو زي البنات..
بصتله بغيظ وقالت
ليه هو انت كنت فاكر نفسك بس اللي زيهم..
عمار ابتسم بهدوء وقال
ما تزعليش بقي من رد فعلي لما اثبتلك العكس..
جميله بقلق
هي ساكته ليه كده من لما شافتني انا خايفه منها.
عمار بهدوء
لا عادي هي كده بتختبرك..
جميله
ايه الجو القديم ده، وبعدين تختبرني علي ايه اصلا انا مش خايفه منها علي فكره..
عمار بهدوء
وما تخافيش ابداً وانا جنبك..
ابتسمت جميله وطلعت عايده قالتلها
انتي هتعمليلي فيها ضيفه قومي اعملي السلطه..
جميله بصت لعمار اللي قالها
ما تخفيش قومي اسمعي كلامها..
_ قامت جميله ودخلت المطبخ وعايده قربت من عمار وقالتله...
عايده
هي حلوه شكلاً وباين عليها طيبه بس معصعصه كده واوزعه دي قد ركبتك يا ولا...
عمار بغيظ
عجبااني يا عايده وخفي علي البت بدل ما اخدها وامشي..
عايده
الله هو انا عملت حاجه، وبعدين اتقل شويه بدل ما انت مدلوق عليها اوي، انت نسيت نفسك انت تبقي مين ولا ايه؟..
عمار بهدوء
انا بنسي الدنيا كلها وانا معاها ومبسوط كده..
_ابتسمت عايده وقبل ما ترد عليه سمعو صوت حاجه بتتكسر في المطبخ، اتنهدت عايده بضيق وقالت..
عايده
يا خيبتها هاا يا خيبتها، هروح اشوف هببت ايه جوه..
_ وبعد شويه كانو قاعدين بيتعشو بس جميله ما كانتش بتاكل، فعايده سألتها وقالت..
عايده
هو انا اكلي مش عاجبك ولا ايه يا جميله؟..
جميله
لا طبعا اكل حضرتك حلو جداً، بس انا مش بحب الكوارع ولا المحشي فاكلي فيهم قليل..
عايده
اكمنك يا عيني شبه عصاية المقشه..
جميله بصوت واطي لعمار
قولها تسكت انا مش من النوع اللي بيكتم في نفسه انا ممكن انفجر فيها..
عمار بضيق
معلش عشان خاطري اتحمليها هي طيبه والله وما تقصدش..
عايده
وانتي بتعرفي تطبخي الحاجات دي يا جميله ولا لا؟..
جميله
لا انا مش بعرف اطبخ اصلا..
عايده بحده
لا والله اومال هتأكليه ايه بقي لما تتجوزو، لا انتي تفضي نفسك يومين في الاسبوع وتجيلي اعلمك...
جميله
لا انا مش بحب اعمل اكل علي فكره وخصوصا المحشي والكوارع مش بحبهم ومش بحب اعملهم..
عمار بقلق
خلاص يا عايده وكده كده في شغالين في البيت عندي وانا مش هخليها تتعب نفسها اصلا..
عايده بهدوء
برضو تجيلي اعلمها مش هنخسر حاجه، ولا انتي مش عايزه تبسطي جوزك يا جميله؟..
جميله بهدوء
حاضر بس هو انت يا عموري بيبسطك الاكل بس؟..
عمار بصلهم بتوتر وقال
لا ايوه يعني عادي يا جميله...
_ ورن في الوقت ده موبيل عمار برقم عم جميله، حط حتة لحمه قدامها في الطبق بتاعها وقالها بهدوء..
عمار
دي طعمها جميل عشان خاطري كليها ما ينفعش تقعدي من غير اكل، وانا هرد علي الموبيل وجاي..
_ ابتسمت جميله بهدوء وبرغم زعلها من كلام عايده الا ان اهتمامه بيها ووجوده ديما قادر يخفف عنها كل حاجه، وراح هو وقف في البلكونه ورد علي احمد وقاله..
عمار
ايوه مع حضرتك..
احمد
هعطل حضرتك عن حاجه يا عمار بيه..
عمار
لا لا ابداً انا اصلا في انتظار مكالمتك..
احمد
طيب انا كلمت فريده مرات اخويا واتفقنا اننا نقرر بعد امتحانات ايتن، يعني عشان حالياً كلنا بلا استثناه مشغولين معاها واكيد حضرتك فاهم يعني ايه ثانويه عامه..
عمار بضيق
تمام بس يعني لو في قبول ليه حتي ما تبقاش في قراية فاتحه..
احمد بهروب
اللي فيه الخير يقدمه ربنا يا عمار بيه بعد امتحانات ايتن..
عمار بضيق
ان شاء الله خير، مع السلامه..
_ قفل عمار معاه وكان مدايق جداً وقلقان من هروب احمد وتأجيل الموضوع، بص لجميله وهي قاعده بتاكل وبتتكلم مع عايده بهدوء وابتسم وقال بتنهيده طويله..
عمار
والله العظيم ما هسمح لحد يبعدك عني لحظه واحده يا جميله..
_ودخل قعد معاهم وشاركهم الكلام وخلص العشا واخدها عمار يرجعها البيت وقبل ما يوصلو البيت بشويه قالتله..
جميله
استني يا عمار هنزل هنا..
عمار
لا انا عايز اوصلك عند البيت معلش، وبعدين احنا راجعين بدري اهو ما اتاخرناش..
جميله بضيق
بصراحه كده انا ما قولتش لماما وقولتلها اني خارجه مع فيروز، لو كنت قولتلها اني هشوفك ما كانتش هتخليني اشوف الشارع تاني اصلا..
عمار بضيق
عمك كلمني واحنا عند عايده..
جميله بأهتمام
وقالك ايه رفض صح؟..
حاول يداري قلقه عشانها وقال بهدوء
لا قال بس ان ايتن بتمتحن وانتو مشغولين بيها ومش عارفين تفكرو، فبعد امتحانات ايتن هيرد عليا..
جميله بغيظ
ايتن ايه وامتحانات ايه، طيب والله اشك انه فاكر ايتن لسه في اعدادي مش ثانوي.
عمار
ممكن تكون مامتك هي اللي طلبت كده، علي العموم انا معاهم وما تكدبيش عليها تاني وانا وقت ما ابقي عايز اشوفك هشوفك قدامها..
جميله بقلق
لا لا كده هتكون في مشاكل يا عمار..
قرب منها وقال بهدوء
عموري مش عمار، عمار دي قدام الناس انما واحنا لوحدنا عموري وبس...
ابتسمت بكسوف وردت عليه وقالت بتوتر
طيب اا انا هنزل بقي عشان اتأخرت علي ماما...
_ قالت كلامها وجات تنزل بسرعه بس هو مسك ايدها وقالها بهدوء..
عمار
ما تزعليش من عايده هي طيبه جداً والله..
جميله بهدوء
لا عادي هي اتكلمت معايا لما كنا بنعمل الشاي واعتذرتلي وبعدها عصبتني تاني بس هتأقلم عليها ما تقلقش..
عمار ابتسم وقالها
ماشي يا جميله وخلي بالك من نفسك..
_ نزلت جميله من عربية عمار وراحت بيتهم، واول ما دخلت العماره مشي عمار ورجع بيته، واول ما دخل لقي مروان قاعد مستنيه وحلق شعره خالص...
_تجاهله عمار وطلع فوق ومروان راح ودخل وراه اوضته وقاله بحزن...
مروان
ما انا سمعت كلامك اهو يا بابا وعملتلك اللي عايزه ليه لسه زعلان مني..
عمار بحده
اطلع بره يا مروان..
مروان بهدوء
انا اسف انا غلطان وما كانش ينفع اقولك الكلام اللي قولته ولا حتي اتدخل في حاجه بينك وبين عمي..
عمار بجمود
روح شوف اللي وراك يا مروان يلاا،ويكون في علمك انا مش هدخلك تعليم خاص تاني...
مروان بصدمه
نعممم ازاي يعني احنا ما اتفقنااش علي كده..
عمار بحده
انا حر ومدام انا اللي معايا الفلوس يبقي انا اللي اقرر، وروح ذاكر ولو ما جيبتش مجموع كليه كويسه مش هخليك تكمل اصلا..
_ رجع مروان اتدايق تاني وسابه وطلع، وراح اوضته وكلم ايتن وقالها وهو متعصب..
مروان
شوفتي اهو اللي بتقوليلي اعمل اللي عايزه واعتذرله مش راضي يصرف عليا وعايز يدخلني جامعه حكومي..
ايتن بهدوء
طيب اهدي يا مروان وفيها ايه، انا نفسي قررت ادخل جامعه حكومي عشان ادخل الكليه اللي بحبها عشان عمي ما يتحكمش فيا..
مروان بدموع
وده مش عمي يا ايتن ده ابويا، بس انا بدأت اصدق فعلا انه ما بيحبش حد الا نفسه ومصلحته، انا لو كنت وافقت انزل اشتغل معاه ما كانش هيعمل فيا كده..
ايتن بضيق
علي فكره عمو عمار بيحبك جدا، واكيد بيعمل كده عشان مصلحتك يا مروان وبعدين خليك بعيد عن المشاكل اللي بينه وبين عمك وانزل اشتغل معاه..
مروان بعصبيه
دي كمان هتقولي انزل اشتغل، انا لسه بدرس وعايز اعيش سني مش عايز ابقي زيه واتسرع وو..
قاطعته ايتن وقالت
دقيقه بس زيه اللي هو ازاي، هو فيها ايه لو اشتغلت واتجوزنا وكملنا دراستنا مع بعض مش ده اللي كنا عايزينه ولا كنت ناوي تتجوزني ويفضل باباك يصرف علينا..
مروان بضيق
هو ايه اللي انتي بتقوليه ده، انا بتكلم في ايه وانتي بتتكلمي في ايه، اقفلي يا ايتن انا غلطان اني كلمتك..
_ خلص كلامه وقفل في وشها، وراح رمي كل كتبه علي الارض وقال لنفسه بعصبيه..
مروان
وانا مش هذاكرلك يا عمار يا منشاوي وغصب عنك هتعملي اللي انا عايزه..
ــــــــــ #بقلم_الكاتبه_رحاب_القاضي ــــــــ
_ وفي بيت صبري..
كانت شهد قاعده علي المكتب الصغير اللي جابته في اوضتها وكانت بتحاول ترسم حاجات زي اللي بيعملها زيد ومشهور بيها، وصحي يوسف ابنها وقعد علي السرير وقالها..
يوسف
ماما... ماما...
_كانت شهد سرحانه ومندمجه جداً في شغلها، فقام يوسف ووقف جنبيها وقال بصوت عالي..
يوسف
انتي ياللي بيقولو عليكي ماما..
شهد بصتله بأنتباه وقالت
سلام قول من رب رحيم انت قومت امتي؟..
يوسف
عايز اشرب..
شهد
ما تطلع تشرب ما انت قومت اهو وجيت لحد عندي..
يوسف بصوت واطي
لا مش هينفع اطلع لوحدي عشان العفريت مستنيني...
ابتسمت غصب عنها وقالت
ااه يا ابن الهبله طيب استني هجيبلك مايه وجايه..
يوسف
وجعان...
شهد بنفاذ صبر
حاضر يا يوسف..
يوسف
وعايز اعمل بيبي..
شهد بغيظ
هو انت حرام تشوفني قاعده ساكته هتعمل التلاته مع بعض ازاي..
يوسف
خلاص خلاص هاتيلي اشرب واي حاجه اكلها وبعدين اعمل بيبي..
اتنهدت بحده وقالت
حاضر يا ابن يونس حاااضر...
_ وراحت شهد عملتله سندوتشات وجابتله مايه وعصير واول ما دخلت الاوضه لقيته قاعد مكانها وبيشخبط في الرسومات بتاعتها..
شهد بخوف
انت عملت ايه يا اهبل يا ابن الاهبل..
قام يوسف بسرعه وقال
هو انا لقيتك راسمه البنات المزز دول من غير شعر فركبتلهم شعر..
شهد بدموع
يا ربي بقي ده انا شغاله فيهم من بدري..
يوسف بحزن
انا عملت كده عشان ما تروحيش الشغل الوحش تاني..
قعدت شهد قدامه علي الارض وسألته
ليه مش عايزني اروح الشغل تاني هو انت مش عايز ماما تبقي شاطره وناجحه وتجيبلك كل اللي نفسك فيه..
يوسف بحزن
لا بابا هيجيبلي وانا عايزك تصالحي بابا ونرجع بيتنا..
_ اتصدمت شهد من كلامه وهي اللي كانت فاكره ان ولادهم مش فاهمين حاجه من اللي بينهم، بس للاسف طلعو فاهمين كل حاجه ويمكن كمان بيعانو من البعد ده اكتر منهم هما الاتنين..
_ اخدته في حضنها وبعدين قعدت علي الكرسي بتاعها وقعدته في حضنها وفضلت قاعده معاه لحد ما نام وراحت نيمته جنب اخوه وبصتلهم بحزن..
_ وقبل ما تفكر في اي حاجه من ناحية رجوعها ليونس عشان ولادها، موبيلها رن فراحت مسكته من علي الترابيزه ولقيت ان اللي بيكلمها هو زيد...
_استغربت الوقت اللي بيكلمها فيه، بس طلعت البلكونه وردت عليه...
شهد
الوو....
زيد
لقيتك اونلان فقولت اكيد صاحيه وكنت بشوف الشغل بتاع المتدربين ولفت نظري شغلك من اول يوم ليكي وقدرتي تعجبيني..
شهد بحماس
بجد اا انا مشيت علي كل التعليمات بالظبط والله..
زيد
برافو جداً عليكي، انا عايزك كده علي طول عشان لو فضلتي في نفس المستوي انتي اللي هتشتغلي معايا علي العرض الجديد بتاع شركتنا..
شهد بفرحه كبيره
ان شاء الله اكون عند حسن ظن حضرتك يا زيد بيه..
زيد
ان شاء الله مع السلامه...
جات تقفل شهد بس هو قال بسرعه
شااهي استني..
شهد بهدوء
ايوه مع حضرتك..
زيد
انا مش حضرتك ومش بيه انا زيد وبس مع الكل مش انتي بس مش بحب جو الرسميات ده..
شهد بهدوء
حاضر..
زيد
بااي..
_ قفل معاها زيد وهي نسيت موضوع رجوعها ليونس اللي كانت هتفكر فيه، وراحت عملت شغلها اللي بوظو يوسف من الاول ولما خلصت نامت جنب ولادها وجواها حماس كبير انها تنجح في الشغل اللي ظهرت فيه موهبتها..
ــــــــــ بقلم_الكاتبه_رحاب_القاضي ــــــــ
_ وبعد فتره كبيره خلصت فيها ايتن ومروان امتحاناتهم، وكانو مش بيتكلمو مع لعض كتير بحجة المذاكره وضغط الامتحانات....
_ وعمار وجميله عكسهم اللي في الفتره دي قربو اكتر من بعض وكانو كل يوم بيتقابلو وبيتكلمو كل يوم...
_ ويونس الفتره دي كلها بعد عن شهد ومخلهاش تشوفه خالص، وكان بيشوف ولاده لما يبعتلهم السواق يجيبهم ليه، وشهد ما كانتش بتهتم بغيابه وكانت بتمنع نفسها في التفكير فيه بالانشغال في عملها الجديد اللي اثبتت للكل موهبتها وشطارتها فيه..
_اما جهاد فكان اكبر هم عندها هي نورا اللي كانت لسه في غيبوبه وكانت برضو جهاد كل يوم بتروحلها وتطمن عليها، وكان زكريا هو اللي بيصولها بس كانو ما بيتكلموش مع بعض خالص غير للضروره وبرضو هي اتعودت علي قعدتها مع المنشاوي اللي كان طيب وحنين اووي معاها،وزكريا اللي كان بيحاول يبعد عنها وعن احساسه بيها وبيحاول يفضل في الوضع اللي هو فيه وما يتغيريش...
«ولكن هل للقدر رأياً اخر؟»
_ وكانت جهاد قاعده عند نورا في المستشفي، وبتقرأ قرآن زي كل يوم، وقفلت المصحف بتاعها لما موبيلها رن برقم زكريا...
ردت عليه وقالت بهدوء
دقيقه ونازله..
زكريا
بسرعه..
_ نفس رده عليها زي كل يوم يقولها بسرعه ويقفل في وشها، قربت من نورا ومسكت ايدها وباستها بهدوء وقالت..
جهاد
نفسي اجي المره الجايه الاقيكي قااعده ومستنياني، انا عمري ما هسامح نفسي علي اللي حصلك ده بسببي، همشي دلوقتي واجيلك بكره تاني...
_ وأخدت شنطتها ونزلت تحت لقيت زكريا واقف قدام عربيته وبيقلب في موبيله، وقفت قدامه وقالت..
جهاد
انا جيت اهوو..
زكريا
بقالك اد ايه ما روحتيش للدكتور؟..
جهاد بهدوء
ما روحتش غير مره واحده بس اصلا من فتره كبيره..
زكريا بضيق
والمفروض تتابعي؟..
جهاد
عادي مش مشكله انا مش تعبانه وماشيه علي العلاج اللي كتبهولي الدكتور لما روحتلو.
زكريا
عارفه مكانه فين الدكتور ده؟..
جهاد
لا مش فاكره بصراحه عشان طنط نورا هي اللي اخدتني ليه، بس معايا الروشته بتاعته وفيها العنوان..
زكريا
طيب اركبي يلا هنروحله..
_ ركبت جهاد وكانت مستغربه اهتمامه بأنها تروح للدكتور، وفعلاً اخدها وراحو للدكتور ووصلو بعد شويه ولما دخلو العياده كانت زحمه شويه..
جهاد
احنا ممكن نمشي ونحجز بكره قبل ما نيجي..
شاورلها علي كرسي فاضي وقالها
اقعدي هناك وانا هتصرف...
_ راحت جهاد قعدت وكانت متبعااه وهو بيتكلم مع البنت اللي قاعده بتحجز الكشوفات، وكان زكريا بيتكلم معاها وهو مبتسم بهدوء، وطلع فلوس وادهالها وجه قعد جنبيها وقال..
زكريا
هندخل بعد اللي جوا..
استغربت وقالت
ازاي ده العدد كبير واحنا مش حاجزين اصلا؟..
زكريا
شكلك ما تعرفيش مين هو زكريا المنشاوي جوزك يا مدام..
جهاد بسخريه
امم ادينا بنتعرف..
_ قالت كلامها وبصت قدامها وهي ساكته، وهو بصلها بطرف عينه وابتسم ابتسامه خفيفه علي ردها عليه، وبعد شويه طلعت المريضه اللي عند الدكتور ودخلوو هما الاتنين وكان الدكتور شاب صغير ومعاه الممرضه اللي بتساعده...
واول ما شاف جهاد ابتسم وقال
اهلا وسهلا ازيك يا جهاد عامله ايه؟..
سلمت عليه جهاد وقالت
الحمد لله، هو حضرتك لسه فاكرني يا دكتور سليم؟..
سليم
طبعا كنتي جايه متوتره وخايفه بس كنت متفهمك جداً لان سنك صغير جداً وانك هتبقي مامي موضوع مش ساهل...
ضحكت بهدوء وردت عليه
هو فعلا الموضوع مش ساهل بالمره، بس بدأت اتعود عليه وحبيته اووي كمان..
سليم
طيب كويس جداً قوليلي بقي اخبارك ايه وبتحسي بأيه الفتره دي؟..
_ بدأت جهاد تقول للدكتور علي الحاجات اللي بتتعبها واللي بتحس بيها في بداية الحمل، وما كانتش واخده بالها من اللي قاعد قدامها واحتدت ملامحه بغضب من كلامها اللطيف هي والدكتور مع بعض، واللي زاد غضبه اكتر لما الدكتور قالها..
الدكتور سليم
طيب اتفضلي ارتاحي عشان نطمن علي البيبي...
_ قامت جهاد مع الممرضه وما كانتش مديه اي اهتمام لوجوده بالعكس كانت مرتاحه جدا في كلامها مع الدكتور، واول ما قام الدكتور عشان يكشف عليها قام هو كمان وراح وقف جنبيه وبصله الدكتور بهدوء وقال.
سليم
نسيت اسألك هو ده جوزك؟..
_اتوترت هي واتكسفت من وجوده وقبل ما ترد علي الدكتور رد عليه زكريا وقال بجمود...
زكريا
ايوه وياريت تشوف شغلك وتخلصنا...
سليم بهدوء
طيب ممكن حضرتك تستني هناك وو.
قاطعه بحده
لا واخلص....
_ ابتسم سليم بتفهم لغيرته الواضحه جداً، وبدأ بالكشف عليها من غير حتي ما يبصلها، وقالت جهاد بفضول..
جهاد
هو ولد ولا هي بنت؟ .
سليم
طيب انتي نفسك يكون ايه؟..
قبل ما ترد جهاد قال زكريا ببعض حده
اللي يجيبه ربنا كله كويس، ولا ايه؟..
_ كان سؤاله ليها هي ونظراته كلها غضب، وهي ادايقت من طريقته والدكتور ابتسم وقالها.
سليم
يا ستي حامل في ولد، اختاريلو بقي في اسم من دلوقتي قدامك ست شهور..
_قال كلامه وخلص الكشف بتاعه وراح قعد علي مكتبه راح ورااه زكريا بعد ما بص لجهاد بغضب.
الممرضه بأبتسامه هادئه
علي فكره جوز حضرتك بيغير عليكي اوووي..
جهاد بتوتر
اا لا يعني عادي هو بس عصبي شويه..
الممرضه
بس انتو الاتنين حلوين ولايقين علي بعض..
_ ابتسمتلها جهاد بمجامله وظبطت هدومها وراحت قعدت قدام زكريا اللي كان متعصب جداً، ادايقت وبصت للناحيه التانيه وهي بتحاول تنكر كلام الممرضه...
سليم
اطمني يا جهاد اا..
قاطعه زكريا بحده
مدام جهاد ولا ما بتعرفش تتكلم بذوق..
سليم اتنهد بضيق وقال
البيبي كويس وحالته كويسه، وكويس انك انتي كمان واخده بالك من صحتك ، هنمشي علي الفيتامينات زي ما احنا وفي نوع جديد هيضاف واحده منه بس كل اسبوع بعد الاكل،واشوفك ان شاء الله بعد اسبوعين..
جهاد
تمام وشكراً جداً لحضرتك...
_ واخدت منه الروشته وطلعو بره وكانت مدايقه جداً، وهو كمان كان متعصب واول ما ما نزلو تحت اخد منها الروشته بص لاسم الدوا وبعدين قطعها...
جهاد بحده
هو انت ايه اللي بتعمله ده، وليه بتعمل كده؟..
زكريا بحده
صوتك ما يعلاش عليا، واعمل اللي عايزه..
جهاد اتنهدت بنفاذ صبر وقالت
طيب تقدر تقولي انت قطعتها ليه،وليه بتتعامل كده مع الدكتور مع انه لطيف وكويس؟..
زكريا بحده
لا هو لا لطيف ولا زفت،ومش هنيجي عنده تاني نشوف دكتوره....
_اتأكدت من كلام الدكتوره انه غيران عليها،بس علي عكس اي واحده جوزها بيغير عليها هي كانت مدايقه من غيرته جداً...
زكريا بحده
مالك قلبتي وشك ليه، عايزه تكملي عنده..
جهاد بجمود
لا عادي اللي يريحك بس في علاج كان مكتوب فيها تقدر تقولي هتجيبه ازاي...
زكريا
شوفته قبل ما اقطعها وهجيبهولك..
جهاد بسخريه
وانت عرفت تفهم اللي مكتوب الدكتور خطه مشبك ومش مفهوم..
زكريا بثقه
عيب تقولي كده لواحد خريج ادارة اعمال جامعة نيويورك...
جهاد بصدمه
احلف انت متعلم بره مصر؟!..
زكريا بهدوء
استني هنا هجيبلك العلاج وجاي..
_ وقفت مستنيااه وبعد ما جه اخدها ورجعو البيت، واول ما نزلت من العربيه شافت عماد اخوها خارج من المطعم وقال..
عماد
ازيك يا جهاد عامله ايه؟..
_ بصتله بضيق وسابته وطلعت فوق من غير ما ترد عليه، وزكريا نزل من عربيته وقال لعماد..
زكريا
في ايه جاي هنا ليه يا عماد؟..
عماد بضيق
ما انت خلاص كده اتجوزتها والموضوع اتحل خليها تكلمني بقي..
زكريا بحده
كبر دماغك من ناحية جهاد يا عماد، وانطق جاي هنا ليه؟..
عماد بحزن
عزيز بيدور عليك بيقول لازم تروحله في شغل مهم وهو مش عارف يوصلك..
اتنهد بضيق ورد عليه
قوله هيفضي ويجيلك، انا داخل اتعشي هتيجي معايا..
عماد
لا بس هو انت عملت ايه في موضوع الورث؟..
زكريا
المحامي جاي بكره هيقعد مع جهاد وهتعملو توكيل وابقي اخليك تقابله في وقت تاني..
عماد
تمام، انا اتعشيت جوه وما حاسبتش وابوك قلب خلقته عليا فحاسب انت يا ابو نسب..
_ سابه زكريا ودخل المطعم وعماد مشي، ووقف تاكسي وقبل ما يركب بص للبيت اللي فيه اخته بدموع، وبعدين ركب التاكسي ومشي..
ــــــــــ بقلم_الكاتبه_رحاب_القاضي ــــــــ
_في بيت جميله كانت قاعده مع شهد اللي كانت متوتره وقلقانه جداً وهي عماله تدور في الاوضه عندها..
شهد
انا هكلمه واعتذر انا ما اعرفش اروح حفالات زي دي ابداً...
جميله بهدوء
اتعودي يا شهد انتي بتقولي الراجل اختارك انك تبقي المصممه معاه في العرض الجاي لشركته وانك تروحي معاه الحفله ده نوع من الدعايا، والا لو كان ينفع ياخد غيرك كان اخد البنت التانيه اللي هتبقي معاكم دي..
شهد بقلق
طيب صبري اقولو ايه، بلاش صبري انا ممكن اروح من ورااه وهقول لزهره، الولاد دول فتانين لابوهم بيقولو كل حاجه افرض قالولو..
جميله
وانتي تخافي منه ليه، المفروض خلاص كل واحد فيكم راح لحاله خلي موضوع طليقك ده علي جنب وانتي اتعودي علي انك تغامري وتشوفي حاجات جديده ده لو عايزه تنجحي..
شهد ضحكت وقالت
هههههه وانتي من امتي العقل ده كله، لا بجد طلع بيحي منك اهوو..
جميله بدموع
مش عارفه بقي قلبي مقبوض اووي يا شهد وحاسه بمصيبه جيالي ويا لطيف يا لطيف...
شهد بقلق
تصدقي نفس احساسي، علي العموم انا هروح ويحصل اللي يحصل، وصبري بايت في الشغل بكره عشان زيد هيعدي عليا بنفسه ياخدني..
جميله
هو يعرف انك مطلقه؟..
شهد
ما اعرفش بصراحه، حتي ما اعرفش اذا كان يعرف اني كنت متجوزه او لا، المهم هبعتلك صورة كام فستان وقوليلي هلبس انهي واحد...
جميله
لا لا انا مش هفيدك ايتن هتعرف اكتر مني..
شهد
ايتن دماغها مترقعه في اللبس وانا عايزه حاجه رايقه زيك يا كبير، الا هي فين صح؟..
جميله
النهارده كان اخر يوم في امتحاناتها وسهرانه هي وصحابها بره..
شهد
ومامتك وافقت كده عادي انها تخرج وتسهر كمان..
جميله
لا طبعاً هي المفروض نص ساعه وهتيجي وطلعا ده مش هيحصل وهتسمعي صوت الصويت النهارده لما ايتن تيجي متأخره..
شهد ابتسمت وقالت
والله ربنا يعين طنط فريده عليكم، همشي انا بقي عشان اشوف الولاد..
_ طلعت شهد من عندها، وجميله فضلت قاعده مدايقه وطلعت صورتها هي وباباها اللي حطاها علي موقع الفيس بوك، ونزلت دموعها وقالت بحزن..
جميله
ده اكتر وقت انا محتجالك فيه يا بابا، هما هيردو علي عمار بكره وانا خايفه عمي بعمل حاجه تبعده عني، هو مش هيخاف علي مشاعري وماما بتمشي وراه من غير ما تشوف اي حاجه هي كمان، بس لو انت هنا كنت هتغير كل حاجه..
_ وكأن عمار عرف بحالتها ورن عليها، ابتسمت هي من بين دموعها اللي مسحتهم بسرعه وردت عليه وقالت..
جميله
مسا مسا يا كبير..
عمار
انزلي انا تحت..
جميله بقلق
ما بلاااش ده احنا بنزق في الموضوع زق مش ناقصين ماما تشوفنا وتقلب علينا..
عمار
بطلي خوف بقي وانزلي مش هتاخد بالها بس انا لازم اشوفك..
جميله
هو في حاجه ولا ايه؟..
عمار بجديه
يلا مستنيكي..
_ قامت جميله ومسكت شال خفيف وحطته علي كتافها وطلعت من اوضتها بهدوء عشان مامتها ما تاخدش بالها منها ونزلت عشان تشوف عمار، بس للاسف فريده كانت طالعه من اوضتها وشافتها وراحت وراها، واول ما شافتها واقفه مع عمار اتحولت ملامحها للغضب وطلعت تاني فوق من غير ما تعمل حاجه..
_وعند عمار وجميله..
جميله
اديني اهو نزلت يا عمار في ايه؟..
عمار بجديه
انتي عارفه اني بحبك مش كده؟..
جميله
طبعا عارفه، بس هو في ايه انت خوفتني.
عمار بهدوء
لا لا ما تخافيش، بس انا عايزك مهما كان ردهم بكره علينا ما تزعليش وانا مش هسيبك مدام انتي كمان عايزاني.
جميله بدموع
عمي مش هيخلي الموضوع يعدي كده علي خير..
عمار
هيعمل ايه يعني هيرفض بسيطه هنقنعه ونقنع مامتك، المهم اوعي تقلقي ولا تزعلي ولا تخلي احلي عيون في الدنيا تعيط تمام...
ابتسمت جميله وردت عليه
تمام يا عموري، جاي ايدك فاضيه بقي ولا معاك حاجه..
ضحك عمار وقال
ههههههه لا جايب طبعاً، بس غمضي عينيكي الاول....
جميله بحماس
دي شكلها حاجه كبيره كمان.....
_ وغمضت عينيها وهو طلع علبه صغيره من جيبه وفتحها وطلع منها خاتم الماظ بسيط ومسك ايدها بكل هدوء ولبسهولها وباسها بكل هدوء وهي في الوقت ده فتحت عينيها واتصدمت وقالت..
جميله
وانا اللي فكرتك وانت بتلبسهولي انه دهب، ده طلع الماظ لا يا عمار ده كتير اووي وما ينفعش اخده وو..
قاطعه وهو بيحضن وشها بأيديه وقال
ما فيش حاجه اسمها كتير عليكي، انا لو اقدر اجيبلك كل اللي بتتمنيه هعمل كده وهحس نفسي مقصر معاكي لانك انتي اللي كتير علي اي حد يا جميله ومش اي حد يستهالك...
جميله بدموع
ما فيش حد رجعلي ثقتي في نفسي غيرك، انا ما حبتش نفسي غير لما انت حبيتني...
ابتسم عمار وفتح ايديه وقالها
نختم الكلام الحلو ده بحضن كبير لعمووووري..
جميله بكسوف وتوتر
ايه هو ده لم ايدك يا عم انت عيب كده احنا في الشارع، وبعدين اجل الحاجات دي لبعدين..
عمار بخبث
قال وعايزين يبعدوني عنك ده انا اروح فيهم في داهيه..
ضحكت جميله بهدوء وقالت
هطلع طيب انا فوق قبل ما ماما تاخد بالها، وصخ نسيت اقولك براحه علي مروان انا قابلته النهارده وشكله زعلان جدا حرام عليك بجد..
اتنهد عمار بضيق ورد عليها
مروان لازم يعرف اني ابوه يا جميله مش واحد صاحبه، لازم يحترمني ويحافظ علي كلامه معايا حتي لو انا غلطان في اسلوب محترم يتكلم معايا بيه، وانا عارف انا بعمل ايه...
جميله بضيق
بتعمل ايه يا عمار بتعقده وخلاص وهو في مرحله صعبه دلوقتي..
عمار بهدوء
يتعود يواجه مشاكله مش يهرب منها، انا لو بشد عليه يا جميله في بعض الحاجات فعشان عايزه يتحمل المسؤليه ويبقي راجل وفي ضهري مش هيفضل طول عمره عيل..
جميله بجديه
طيب بالراحه عليه برضو، شويه كده وشويه كده هو مالوش غيرك افتكر دي..
قرب منها وباسها علي راسها ورد عليها
حاضر يا جميله من عينيا ما تشغليش بالك انتي بحاجه، واطلعي يلا وكلميني قبل ما تنامي..
جميله
حاضر.. سلام..
_ طلعت جميله وهو فضل متابعها لحد ما دخلت العماره، وبعدين هو اخد عربيته ومشيت..
_ دخلت جميله شقاهم وهي مبسوطه من عمار وتصرفاته معاها، وقفت مكانها اول ما شافت فريدت واقفه قدامها وفي قمة غضبها.. جميله خبت ايدها اللي فيها الخاتم وقالت بقلق..
جميله
في ايه يا ماما واقفه ليه كده؟.
فريده بحده
كنتي فين؟..
جميله بخوف
كك كنت عند شه...
زعقت فيها فريده وقالت
اياااكي تكدبي عليا عشان ما اجيبكيش من شعرك، انطقي كنتي فين؟..
_ سكتت جميله وبصت للارض بأحراج وخوف، فقربت منهة فريده ومسكت ايدها اللي فيها الخاتم وقالت..
فريده بغضب
الله الله خاتم الماظ مره واحده، وياتارا بقي اخد ايه مكانه؟..
بصتلها جميله بصدمه وقالت
ايه اللي انتي بتقوليه ده يا ماما؟..
مسكتها فريده من دراعها جامد وقالت
اومال راجل زي ده يجيبلك هديه غاليه زي دي وانتو لسه ما بقاش في بينكم حاجه ليه، نازله تقابليه من ورايا بالليل كده وانتي بالبجامه ليه؟..
_زقتها فريده خلتها قعدت علي الكنبه وقالت بعصبيه وصوت عالي..
فريده
هو انا عرفت اربي والله ما عرفت، انا ضيعت عمري عليكي وعلي الجزمه الصغيره علي الفاضي، انا صبرت عليها بس تخلص امتحانات ورحمة ابوكي لاكسر رقبتها تقولي مروان زميلي واخويا وهي ليل نهار بتحب فيه وبتخرج وبتتصرمح معاه من ورايا، انا اللي غلطانه وقولت اسيبكم براحتكم يا كلاب بس انتو ما تستاهلوش ثقتي فيكم..
جميله ببكاء
انا اسفه يا ماما حقك عليا، بس والله العظيم عمار محترم جداً وبيحبني بجد انا مبسوطه معاه وعايزااه هو..
فريده بحده
وانا مش عايزاااه يا جميله ولا هقبل ان واحد زيه يتجوزك، تحبي اقولك كان علي علاقه بكام واحده قبلك في الحرام، عمك اللي انتي فاكرااه بيضرنا جابلي كل حاجه عنه..
جميله بخوف
لا هو بيكدب انا عمار قالي كل حاجه وهو عمل كده زمان انما دلوقتي هو اتغير وانا مصدقااه وواثقه فيه..
فريده بحده
ده عشان انتي عبيطه، وانا خلاص اخدت قراري جواز من عمار ما فيش والخميس الجاي كتب كتابك علي حسين ابن عمك هو اولي بيكي من الغريب..
جميله بصدمه ودموع
انتي بتقولي ايه يا ماما مستحيل انتي كده بتدمريني مستحيل اوافق..
فريده بتحدي وغضب
لا هيتم يا جميله وبرضااكي كمان..
ــــــــــ بقلم_الكاتبه_رحاب_القاضي ــــــــ
_ في الوقت ده قدام كافي شبابي...
كانت ايتن طالعه هي ومروان من هناك وهما بيضحكو، بس فجأه ضحكتها اختفت لما لقيت عمها واقف بعربيته مستنيها ولما شافها نزل من عربيته وقرب منهم..
ايتن
مروان عمي احمد هنا..
مروان بص لعمها اللي جاي نحيتهم وقالها
طيب ما تخافيش اهدي انا معاكي..
وقف احمد قدامهم وقال
جوز عصافير يا ناس، ايه يا كتاكيت كنتو بتعملو ايه هنا، انا معدي بالصدفه وشوفتكم..
رد عليه مروان وقال
النهارده اخر في الامتحانات حضرتك، واحنا وصحابنا كنا بنتعشي سوا هنا..
احمد
اااه عقبال الشهاده الكبيره، انت ابن عمار بيه المنشاوي مش كده؟..
مروان بثبات
ايوه انا في حاجه ولا ايه..
حط احمد ايده علي كتفه وقال
لا لا يا حبيبي ما فيش حاجه انا بسأل بس ابوك ده غالي اوي عليا..
نفض مروان ايده بقوه من علي كتفه وقال
امم واضح علي العموم فرصه سعيده يلا بينا يا ايتن..
مسك احمد ايد ايتن اووي وقالها
لا لا ايتن بنت اخويا هتيجي معايا اروحها انا بقالي كتير ما اتكلمتش معاها وعايزين نتكلم مش كده يا ايتن؟..
بصت لمروان بقلق وهو قال
طيب اا انا طلبتلها اوبر ممكن حضرتك تتفضل وهي هتيجي وراك..
احمد بجمود
خلاص يا ولد هو انا هاخد اذنك عشان اوصل بنت اخويا ولا ايه..
وبص لايتن وقال بحده
يلا يا ايتن...
ـ واخدها ومشي ومروان وقف مدايق انه مش عارف يعملها حاجه، ومش عارف ولا فاهم اين سبب خوفها من عمها بالشكل ده...
_ وفي عربية احمد كانت ايتن قاعده خايفه جداً، ومخنوقه من وجودها مع اللي قتل ابوها في مكان لوحدهم..
احمد بخبث
حلو ابن عمار المنشاوي ده، ابن مليونير وشكله كده روش وباد بوي زي ما انتو بتقولو، مش بتقولو كده برضو؟..
_ما ردتش عليه ايتن واتملت عيونها دموع وهو كمل كلامه وقال بجمود..
احمد
بس لا لا انا ما حبتوش وما حبتش ابوه، بس خلاص احنا خلصنا من ابوه اصلا وجميله ابن عمها هيتجوزها..
ايتن بقلق
وو وعمو عمار؟..
احمد بسخريه
بح كان في وخلص اومال انا هضيع اللي عملتو في ابوكي عشان اختك تتجوز اللي بتحبه، يا حبها عزرائيل وياخدها ونخلص..
ايتن ببكاء
بعد الشر عليها..
احمد
حنينه زي ابوكي يا بت الك... بلاش اهو ميت وانا مش بحب اجيب سيرة حد ميت..
تابع كلامه وقال
عشان ما ازعلش منك الولد ده اخرك معاه يبقي زميلك، عشان انا يوم ما هجوزك هخليكي تتجوزي بدماغي انا، هجيبلك عريس علي مزاجي تكون ليا مصلحه معاه ما انا لازم اكسب من وراكم..
ايتن ببكاء وخوف
انا مش هتجوز دلوقتي اصلا..
احمد
انا اللي اقول امتي تتجوزي وامتي ما تتجوزيش، انا اللي اقول تعملو ايه وما تعملوش ايه..
_ سكتت ايتن واول ما وصلو البيت، نزلت بسرعه وطلعت فوق واحمد كان وراها واول ما دخلت قالت لجميله اللي قاعده بتعيط..
ايتن
هو ايه اللي حصل مالك يا جميله، مالها يا ماما؟..
ردت عليها فريده بحده
ايه خلصتي صرمحه خلاص ولا لسه في تاني يا ايتن هانم..
ايتن بقلق
ايه اللي بتقوليه ده يا ماما..
دخل احمد وقال
بتقول اللي بيحصل انتي دايره مع الصغير علي حل شعرك، واختك مع الكبير فينك يا اخويا تيجي تربي بناتك اللي امهم ما عرفتش تربيهم..
ايتن بعصبيه
بطل كدب بقي حرام عليك...
ضربتها فريده بالقلم وقالت
احترمي نفسك وكلمي عمك كويس..
_في اللحظه دي وقفت جميله قدام ايتن وقالت بنبره كلها الم لمامتها...
جميله
حرام عليكي بقي كفايه، طول عمرك بتزلينا وبتكسرينا قدامه، احنا لو بنعمل حاجه من وراكي عشان انتي عمرك ما كنتي خايفه علينا قد ما كنتي بتخافي منه، بس كفايه بجد احنا تعبنا اووي والله..
ـ قالت كلامها واخدت ايتن اللي كانت بتعيط ودخلو اوضتها، واخدتها في حضنها وقالت بجمود..
جميله
ما تعيطيش انا معاكي ومش هخليهم يعملولك حاجه...
ايتن بخوف
هي ماما رفضت عمو عمار؟..
جميله غمضت عيونها بحزن وقالت
انا اللي هرفضه يا ايتن..
بعدت عنها ايتن بسرعه وقالت
ايه انتي اللي هترفضيه، طيب ليه ده بيعشقك يا جميله وحرام بجد تسمعي كلامهم وتوجعي قلبك وقلبه..
جميله بهدوء
بصي انا هدخل اخد شاور كده واروق واجي انام جنبك بلاش نطلع من هنا النهارده بدل ما عمك وامك يقيمو علينا الحد..
_ قالت كلامها ومشيت بسرعه من قدام ايتن، كانت بتهرب منها ومن اسألتها وكالعاده اخفت حزنها بداخلها...
ــــــــــ بقلم_الكاتبه_رحاب_القاضي ــــــــ
_ وفي اليوم التاني.....
في شركة يونس الصاوي، كان يوسف قاعد في مكتبه ودخلت عنده دارين وقالت..
دارين
يوسف هو فين يونس؟..
رد عليها من غير ما يشيل عينيه من اللابتوب بتاعه
شويه وجاي في حاجه ولا ايه؟..
دارين
كان قايلي انه عايز يقابل مدير شركة اعلانات صفوت الخيام، فانا ظبطلكم دعوه لحفله كبيره النهارده وكلمته عنكم وهو مستنيكم..
يوسف بصلها وقال
هو انتي بتوصلي للناس دي ازاي، ده انتي الا ما في حد الا وعرفااه وعارفه كل حاجه عنه، انتي شغاله في المخابرات صح..
ابتسمت دارين وردت عليه
لا مش مخابرات بس كل الحكايه اني مش بحب اقعد علي مكتبي واعمل مديره، بحب اتحرك كتير واعرف ناس كتير واعمل معارف اكتر ده هو اللي هيساعدني اوصل للمكانه اللي انا عايزااها، وكلها ماشيه كده بالمعارف والوسايط..
يوسف
معاكي حق علي العموم انا مش فاضي النهارده اروح حفالات، هقدملك فرصه علي طبق من دهب عشان تروحي معاه اهوو..
دارين بغيظ
انا لو عايزه اروح كنت روحت، وعلي فكره والله العظيم انا عربيتي كانت بايظه فعلاً ما كنتش بكدب.
يوسف بخبث
امم اممم عارف، عارفه انتي بقي يونس فين؟..
دارين بفضول
فين؟..
يوسف
عند شهد كل كام يوم لما بيبقي عايز يشوفها بيروح وبيقف بعيد عن بيتها بشويه وبيشوفها وهي رايحه شغلها من غير ما تاخد بالها..
اتملت عيونها دموع وهو كتم ضحكته وقال
زعلتي صح احسن احسن..
_قامت دارين وهي متعصبه وقربت منه ومسكته من هدومه وقالت بحده..
دارين
انت عايز مني ايه ليه ديما بتعصبني وتسفزني..
يوسف بقلق
بت بت اوعي الناس هتتلم علينا..
دارين بغضب
اتقي شري يا يوسف والا والله هخلي الشركه كلها تتريق عليك وعلي اللي هعمله فيك..
_مسك يوسف ايدها ووقف قدامها خلاها رجعت لورا بتلقائيه وقال بجمود...
يوسف
هتعملي ايه يعني؟..
دارين بتوتر
اا انت بطل ترخم عليا وتستفزني..
يوسف بهدوء
وايه اللي يستفزك في كلامي انا بقول الحقيقه..
دارين بحده
انت مالك خليك في حالك، هو انا كنت جيت اشتكيتلك...
_قالت كلامها وجات تمشي بس رجعت وقالتله بدموع....
دارين
انا بحاول اتعامل معاك كويس ونبقي اصدقاء بس انت ديما بتزعلني وبتخليني اندم اني اتعاملت معاك اصلا..
_ وسابته وطلعت وهو اتنهد بضيق ورجع لمكتبه عشان يكمل شغله، وفي الوقت ده رن موبيله برقم بطهز، ابتسم بهدوء ورد عليها وقال..
يوسف
ايوه يا حبيبتي معاكي....
بطه
مال صوتك في حاجه ولا ايه؟..
يوسف
لا بس اا كبري دماغك مش حاجه مهمه، انتي كنتي عايزه ايه؟..
بطه
معادنا الساعه 7 عند الدكتوره عشان هنحدد معاد العمليه..
_انقبض قلبه بخوف اول ما جابت سيرة العمله، ورد عليها وقال بنبره حزينه...
يوسف
طيب ما بلاش يا بطه وخلينا علي العلاج..
بطه بضيق
يوووه تاني يا يوسف، مش اتكلمنا في الموضوع ده قبل كده كتير ولا انت عايز تزعلني وخلاص.
يوسف بهدوء
هو انا اقدر ازعلك، نروح يا ستي وهنتعشي بره.
بطه بحماس
ومش هنرجع البيت غير وش الفجر وما فيش شغل بكره..
ضحك بهدوء وقالها
هههههه بس كده احنا خدامين الجزم..
بطه
طيب اقفل يا جزمه، عشان ماما بتنده عليا هشوفها عايزه ايه...
_ قالت كلامها وقفلت معاه وطلعت قعدت مع عظيمه اللي قالتلها بهدوء...
عظيمه
هو جوزك لسه متخانق مع امه؟..
بطه بحزن
للاسف ايوه هي كمان رجعت قعدت هنا في الحاره، وجالها كتير بس ما بترضااش تقابله..
عزيمه بغيظ
كله من بنتها اللي عايزه يوسف يتجوز اخت جوزها..
اتنهدت بطه بضيق وقالت
سيبك منهم يا ماما انا المهم عندي جوزي وبس، ولو بحاول اراضي امه فبعمل كده عشانه هو وعشان هو عمره ما قصر معايا في حاجه ولا عمره حتي زعلني بنص كلمه....
عظيمه
ربنا يريح قلبك يا بطه ويكرمك باللي نفسك فيه..
اتنهدت بحزن وقالت
يارب يا ماما يااارب..
ــــــــــ بقلم_الكاتبه_رحاب_القاضي ــــــــ
_وبالليل في بيت جميله..
كانت قاعده في اوضتها وماسكه موبيلها اللي بيرن برقم عمار اليوم كله وهس مش قادره ترد عليه، قامت وطلعت من اوضتها وراحت لمامتها اللي كانت في المطبخ بتعمل الاكل وقالتلها...
جميله
ماما..
فريده بحده
عايزه ايه؟.
جميله بدموع
مش انا هسمع كلامك وهعملك اللي انتي عايزااه، ممكن اشوفه اخر مره والله وبعد كده مش هتعامل معاه اصلا، ارجوكي..
فريده بجمود
خدي اختك معاكي ما تروحيش لوحدك...
جميله بحزن
حاضر...
_ ودخلت اوضتها وبعتت لعمار رساله صوتيه وقالتله فيها..
جميله
انا رايحه الكافي اللي كنا بتقابل فيه، نص ساعه وهكون هناك وعايزه اشوفك ضروري..
دخلت عندها ايتن وقالت
لو شوفتي شهد يا جميله شكلها حلو جداً، انا مش فاهمه ازاي دي تتخان اومال احنا يحصل فينا ايه علي كده..
جميله بجمود
اوعي تكوني قولتيلها حاجه من اللي حصلت هنا؟..
ايتن بضيق
لا ما هانش عليا ازعلها وانكد عليها وهي مبسوطه، وبعدين احنا هنروح من بعض فين يعني..
جميله
طيب يلا اجهزي عشان رايحه اشوف عمار وماما قالتلي اخدك.معايا...
ايتن بحماس
هي وافقت خلاص بيه ولا ايه؟..
جميله بدموع
لا بس انا لازم اخلص الموضوع ده خلاص..
ايتن بحزن
بجد كده كتير هي ليه بتعمل كده، حسين ايه اللي احسن من عمار، لا وكمان اخدت مني الفون بتاعس ومنعاني انزل الشارع...
جميله
يلا يا ايتن عشان ما نتأخرش..
ــــــــــ بقلم_الكاتبه_رحاب_القاضي ــــــــ
_ وقدام شركة عمار..
طلعت فيروز من الشركه وكان معاها عز الدين اللي علاقتهم بقيت كويسه شويه، واتفاهمو في الشغل كتير عن الاول..
عز الدين
تمام كملي بقي انتي الشغل ده زي ما اتفقنا ولو حاجه وقفت معاكي كلميني..
فيروز
تمام يا عز بيه اا..
_ قبل ما تكمل كلامها موبيلها رن برقم مامتها، فاستيذنت منه وردت عليها، وفجأه ملامحها اتغيرت من الهدوء للخوف وقالت لمامتها بقلق..
فيروز
ايييه ماله بابا طيب حد زعله، مستشفي ايه يا ماما انا جايه حالاً..
وقفلت مع مامتها وقالت لعز
انا لاوم امشي دلوقتي والشغل وكل حاجه والله هعملها بكره..
عزالدين
طيب اهدي ماله ابوكي في ايه؟..
فيروز بدموع
تعبان شويه في المستشفي وانا لازم اروحله دلوقتي..
عزالدين
طيب انتي مش هينفع تسوقي عربيتك وانتي بالحاله دي، تعالي انا هوصلك واطمن علي باباكي معاكي..
فيروز بقلق
انا مش عايزه اعطل حضرتك..
عزالدين
لا انا فاضي وعاطل اصلا طول الوقت يلا..
_ واخدها وراحو فعلا المستشفي واول ما وصلو راحو للاوضه اللي فيها باباها وكانت مامتها هناك قاعمه جنب ابوها..
فيروز
سلامتك يا بابا مالك يا حبيبي حصل ايه؟..
جمال
ما فيش حاجه يا بنتي ده الضغط واطي شويه وامك بتحب تكبر المواضيع...
مها وهو بتبص لعزالدين
مين الاستاذ ده اللي جيباه معاكي..
قبل ما ترد قال هو بأبتسامه واسعه
انا عز صاحب فيروز..
فيروز بصدمه
صاحر مين ده عزالدين بيه مديري في الشغل، ولما عرف ان حضرتك تعبان يا بابا جه معايا عشان يطمن عليك..
جمال
معلش يا استاذ عز الدين تعبنااك معانا..
عز
لا تعب ولا حاجه يا حج، والف سلامه عليك..
وبص لفيروز وقال
انا همشي ولو احتاجتي حاجه كلميني..
فيروز
ان شاء الله وشكراً جدا يا عز بيه..
_ ابتسملها عز الدين وطلع بره الاوضه، بس قبل ما يمشي سمت مامتها بتقولها بحده....
مها
ما انتي يا ست هانم لو كنتي سمعتي الكلام واديتي اخوكي الفلوس يسد ديونه مكنش ابوكي تعب كده..
جمال بحده
خلاص يا مها هي حره فلوسها وهي حره فيها..
فيروز
هو انا لحد امتي يا ماما هفضل اصرف عليه وعلي البيت، هي دي مسؤلية مين اصلا، بدل ما هو عاطل كده يروح يشوف شغل ويتحمل مصاريفه علي الاقل..
مها بعصبيه
انتي بتزلينا علي ايه، الله يرحم لما كنا بنصرف عليكي وكل اللي تطلبيه بنجيبه ليكي، بس انتي لما الدنيا اديتك شويه واشتغلتي في شركه كبيره شوفتي نفسك علينا..
جمال
سيبك من امك يا فيروز، ومعلش يا بنتي هتعبك بس تدفعي مصاريف المستشفي انا والله مش معايا فلوس اخوكي خد المرتب بتاعي كله من ورايا ومشي.
فيروز بدموع
حاضر يا بابا هنزل ادفعلك المصاريف، بس هروك للدكتور الاول اطمن عليك واعرف منه حالتك بالظبط..
_ مشي عز الدين بسرعه من قدام الاوضه، وهي راحت اطمنت علي حالة ابوها وبعدين نزلت عشان تدفع المصاريف بس ادايقت جداً لما الموظف قالها..
الموظف
الحساب اتدفع يا انسه..
فيروز
مين اللي دفعه؟..
الموظف
الاستاذ عز الدين اللي دخل مع حضرتك من شويه..
_ ادايقت فيروز جداً، وطلعت تاني عند اهلها وهي ناويه تدفعله الفلوس اللي دفعها للمستشفي..
ــــــــــ بقلم_الكاتبه_رحاب_القاضي ــــــــ
_وفي عربية زيد وصل الحفله اللي هتحضرها معاه شهد اللي كانت قاعده جنبيه..
زيد
يلا يا شاااهي..
شهد بقلق
بجد طلع الموضوع صعب جداً، هو انا كده طيب مناسبه اني احضر الحفله معاك؟..
ابتسم بهدوء وقالها
هو انا اول مره اختار واحده شبهك كده في التيم بتاعي بس انا حابب الاختلاف ده، وواثق انك هتبهري الكل زي ما ابهرتيني بجمالك النهارده كده..
_ ابتسمت شهد ونزلت معاه ودخلو الحفله، ومن اول ما دخلت لفتت نظر الكل، وبين الحضور كان قااعد يونس مع صفوت الخيام اللي اول ما شاف شهد قال..
صفوت
اوباا مين المزه اللي داخله مع زيد دي؟..
يونس بلا مبالاه
مين زيد ده؟..
صفوت
ده مصمم ازياء مشهور في مصر، كل موسم بيصاحب واحده وبياخدها يلف بيها في خفلاته قال ايه هتبقي مصممه معاه وسبحان الله كلهم بيبقو احلي من بعض، بس دي مختلفه نوع جديد...
_ بص يونس وراااه بفضول عشان يشوف مين البنت اللي وصفها الراجل النسوانجي اللي قدامه ده، واتصدم لما شاف شهد واقفه جنب زيد وبتسلم علي الناس ومبتسمه وكانت فعلا جميله وملفته للانظار، بس هي بتعمل ايه هنا ومع الولد ده، وافتكر كلام صفوت عن الولد ده والبنات اللي معاه وكور قبضة ايده بغضب، وكان هيقوم يكسر المكان كله علي د
•تابع الفصل التالي "رواية موضوع عائلي" اضغط على اسم الرواية
تعليقات
إرسال تعليق