رواية نرجس الفصل الثاني 2 - بقلم منى محمود

 رواية نرجس الفصل الثاني 2 - بقلم منى محمود 

الفصل الثاني

نرجس 

بخطي ثقيلة و نظرات مهزوزة دخلت هبه الزوجة الثانيه ل محمود ، امرأة في منتصف عقدها الثاني تقريبا ملامح جذابة ولكنها مرتبكة  و تبذل جهدا كبيرا لاخفاء ذلك الارتباك 

مؤمن بتفحص ... أقعدي يا هبه 

هبه ... هو احم هو محمود محبوس ليه سعادتك محدش برة راضي يفهمنا اي حاجة و أبوة كل دقيقه بيتصل عايز يتطمن عليه 

مؤمن ... محمود محبوس لأن نرجس مراتة بتتهمة أنه من كام ساعه ضربها و قتل ابنهم و خد جثة وخفاها 

شهقت هبه بقوة ... يالهوي اي الكلام دا محمود مين اللي يقتل جوزي ؟ اكيد محصلش محمود مرحش عندها بقالو شهر تقريبا وانهاردة من بعد ما رجع من الشغل متحركش من البيت ازاي بقا قتل و قتل مين ابنة حتة العيل الصغير اللي لسه منطقش حتي لا لا اكيد في حاجة غلط 

مؤمن ... مممم تعرفي ايه عن علاقة محمود ب نرجس وابنه ؟ 

هبه ... انا معرفش حاجة غير أنه مبيحبش يروح هناك إلا للضرورة عشان خاطر على ابنة 

مؤمن ... أيوة ليه بقا يعني لما اتقدملك قالك أنه مش مرتاح مع مراتة مثلا في بينهم مشاكل ؟ 

هبه ... محمود كان بيحبني من قبلها وجوازهم كان تقليدي جدا ولما عرف اني اتطلقت اتقدم تاني و ابويا وافق 

مؤمن ... وانتي مسالتهوش عن مراتة ابدا؟ ولا كان ليكي اكيد يد ف عدم مرواحة هناك ؟

هبه ... هه لا لا وانا مالي بيهم انا مطلبتش منه ميرحش هناك هو من نفسه مش بيرتاح غير وهو بايت معايا وزي ما قلت ل حضرتك مرواحة هناك للضرورة عشان ابنه وبس لكن السبب انا معرفوش 

مؤمن .... تمام يا مدام هبه 

ساعات مرت و مؤمن يتابع التحقيق و التحريات      الأولية التي أكدت صدق كلام نرجس فالجميع أجمع علي أنها لا تخرج من باب شقتها إلا مرات قليلة كانت فيهم مع زوجها وأن محمود قليل الظهور أيضا 

الصيدلي أكد كذلك ما قالتة نرجس بشأن أتصالها به لطلب الدواء 

مع بدايه يوم جديد كان الإرهاق قد وصل ب مؤمن إلي ذروتة ، أخر ما فعله هو الاطمئنان علي نرجس والتأكد من أنها تحسنت وذهبت مع أخيها الي منزلها ، ذهب إلي شقته لينال قسطا من الراحة قبل المتابعه ، فهو بحسه الامني يدرك تماما أن محمود سوف يحصل علي إخلاء سبيل اليوم لعدم كفاية الأدلة ضدة ، تنهد بثقل وهو يشعر بالأسي على تلك المسكينة حين تعلم بأمر إطلاق سراحة من المؤكد أنها سوف تنهار ولكن ليس بيده حيلة فهذا هو القانون 

وبعد ساعتين ونصف كان متجة مرة أخري إلي قسم الشرطة وجد رجل يقف علي باب مكتبه من هيئتة أيقن أنة محامي وبالفعل خلال ساعة أخري كان محمود قد أطلق سراحة و بدأ مؤمن بمتابعة التحريات والتحقيقات حتي يصل اللي الحقيقة 

عند نرجس وبعد رجوعها من المشفي دار بينها وبين أخيها هذا الحوار 

اسماعيل بصوت عالي ... يعني اية لاء دي ؟ انا بقولك قومي ارجعي معايا البلد لحد ما نشوف ابنك فين واية اللي هيتم يبقي تسمعي الكلام وانتي ساكتة خالص 

نرجس غاضبة ... لا مش هسمع حاجة ومش هتحرك من هنا قبل ما اعرف علي فين وحصلة اية بالظبط  لازم اكون في شقتي عايز تسافر انت سافر انا كدة كدة عايشة لوحدي مفيش حاجة جدت يعني 

اسماعيل  .... اسافر ازاي يا مخبلة انتي وهو محمود واهله هيسمو عليكي وانتي متهمة ابنهم انة قتل ابنة ما تفوقي وتشوفي المصيبة اللي انتي فيها وجودك هنا لوحدك خطر عليكي 

نرجس بتعب ... مش هسافر يا اسماعيل مش هتحرك من هنا الله يخليك سبني ف حالي انا لازم اكون هنا اعرف اية حصل ل علي ابوس ايديك سبني هنا 

جاءت ل تمسك يدة لتقبلها أبعد يدة عنها سريعا ونظر إليها بحزن ولكنة اخفي نظرتة سريعا ...        خلاص خلاص يا نرجس انا هفضل معاكي وهكلم وابوكي وستك يجو بكرة ان شاء الله من البلد متقلقيش مش هنسيبك لوحدك لحد ما نطمن علي علي

كادت أن تجيبة شاكرة لكنه تركها وأتجة إلي الغرفة دون أى حديث ابتسمت بسخرية فهذة عادتة دائما يقول ما يريد ولا يهتم بأي شيء أخر 

فاقت علي  رنين هاتفها برقم غريب جعلها تعقد حاجبيها بغرابة فهي غير معتادة علي محادثة أحد حتي رقمها لا يعرفه أحد غير زوجها فقط ... أنقطع الرنين و عاد مرة اخري و هذة المرة حسمت أمرها وقامت بالرد

نرجس بصوت مهزوز ... ا الو ؟

الطرف الأخر ... السلام عليكم مدام نرجس عبد الهادي معايا ؟

نرجس بحيرة ...وعليكم السلام  ايوة اانا نرجس مين معايا ؟

الطرف الأخر ...  معاكي اسلام محفوظ معد في برنامج الحقيقة الغائبة اللي بيتزاع علي قناة DNB 

نرجس بعد فهم ... ايوة يعني عايز اية مش فاهمة ؟ 

اسلام ... احنا عرفنا انك متهمة زوج حضرتك بانة قتل ابنكم و كنا حبين انك تطلعي معانا في حلقة انهاردة علي الهوا بالليل تحكي حكايتك لو معندكيش مانع 

صدمة أصابت نرجس جعلتها تصمت ل دقيقة كاملة دون كلام و حين طال صمتها تحدث اسلام مرة أخري 

اسلام ... مدام نرجس حضرتك لسه معايا ؟ الو ؟

نرجس بتردد ... هو هو انا هطلع صوت و صورة يعني ولا هتسجلو صوتي بس ؟

اسلام ... لا يا فندم صوت وصورة البرنامج بيكون علي الهوا 

نرجس بثقة وحسم ... طيب انا موافقه 

اسلام ... بالنسبة للمقابل المادي ف

قاطعتة نرجس ... لا لا مش عايزة فلوس انا بس عايزة كلامي يوصل زي ماهو من غير ما تقاطعوني ممكن 

اسلام ... اكيد يا مدام نرجس احنا متواصلين معاكي مخصوص عشان نوصل صوتك للناس وقضية علي تكون قضية رأي عام و حقة ميرحش 

نرجس بصوت باكي ... شكرا بس انا معرفش اتحرك لوحدي لاي مكان هيجلكم ازاي ؟

اسلام ... ولا يهمك احنا كدة كدة محتاجين حضرتك قبل الهوا بتلت ساعات عشان تطلعي علي الأسئلة و نتناقش فيها لو حضرتك تحبي عربيه القناة ممكن تجيلك توصلك نسجل وترجعك تاني 

نرجس ... أيوة بس انا مش عارفة بردو عنواني عشان العربيه تجيلي

اسلام ... متقلقيش حضرتك احنا معانا عنوانك العربيه تعدي علي حضرتك الساعه اربعه العصر كويس ؟

نرجس متسائلة ... استني هنا عرفت عنوان بيتي منين و تلفوني كمان ؟ وقبل ما تتكلم انا مش هطلع في برامج ولا اقول حرف الا لما افهم عرفت رقمي و عنواني منين ؟

اسلام مترددا ..  مينفعش تعفيني من إجابة السؤال دا يا مدام ؟

نرجس رافضة ... لا مينفعش يا استاذ زي ما قلت ل حضرتك مش هطلع في برامج الا اما افهم 

اسلام مستسلما ... امري لله هقول ل حضرتك بس اتمني متحصلش مشاكل ارجوكي 

نرجس بترقب ... لا مش هتحصل مشاكل بس قول 

اسلام ... صالح أمين الشرطة اللي في القسم أنا علي تواصل معاه بحكم شغلي كنت موصية اي وقت توصل القسم عندة قضية ملفتة يتصل بيا انا عامل كدة في كزا قسم شرطة  وهو اللي اتصل بيا وقالي عنك و عن اتهامك ل زوجك  و اداني رقمك و عنوانك اللي مكتوبين في المحضر اتمني الكلام دا يفضل سر بينا أنا احترمت رغبتك وعرفتك انا جبت اي معلومات عن حضرتك ازاي عشان تكوني مطمنة معانا

نرجس بلا مبالاه ... تمام ماشي هستني العربيه في المعاد أن شاء الله

اسلام ... أن شاء الله يا فندم سلام عليكم 

نرجس ... وعليكم السلام 

جلست و دموعها تأبي أن تتوقف تعلقت انظارها بسرير غرفتها الذي كان يضمها هي و صغيرها وتذكرت 

فلاش باك 

كان علي يابي أن ينام يتطلع إلي نرجس بحب و ضحكة جميلة تزين وجهه الملائكي ونرجس تبادلة نظرات الحب وهي تحرك اصباعها علي وجهه صعودا و هبوطا 

- عارف يا واد يا حليوة انت جتلي هدية كدة من ربنا .. كنت خلاص يأست أن ممكن تحصل حاجة في الدنيا دي تفرحني لحد ما انت شرفت و خدتك كدة في حضني يالهوي علي اللي حسيتة يا واد يا على مش قادرة اوصفه .. انت عارف انا بحبك قد ايه ؟ انت هتبقي سندي يا ولا لما تكبر يا سلام امتي بقا اشوف اليوم دا وانت واقف كدة وتقول محدش يضايق ماما ابدا طول ما انا موجود يااا اكيد هكون مبسوطة اوي وقتها ... اوعي تقلق أننا هنكبر و نعيش لوحدنا ولا تفكر في يوم انك ممكن تحس بغياب ابوك عنك لا لا متقلقش انا هعوضك عن كل الناس زي ما انت معوضني عن كل الناس يا حبيبي هكونلك اب وام و صديقة واخت هكونلك العالم كلة هحبك حب مفيش طفل في الدنيا اتحبه قبل كدة ولما تكبر كدة وتبقي راجل ملو هدومك هتدافع عني وتعوضني عن كل اللي شوفتة انا واثقة ... واه بقا لما تبقي عريس كدة قدامي بالبدلة البيضا .. متبصيليش كدة انا مبحبش البدل السودا وانت هتلبس بدله بيضا يعني هتلبس بدله بيضا انا بعرفك من دلوقتي اهو .. المهم يومها انا مش هيبقي في حد في فرحتي و حبيبتك اللي أن شاء الله هتكون مراتك انا هحطها في عينيا وهعتبرها بنتي اللي مخلفتهاش صدقني يا حبيبي ربنا هيجبر بخاطرك وخاطري ديما متقلقش

باك 

و انهارت في بكاء شديد ثم استعادت السيطرة علي نفسها بصعوبه وبدأت تتجهز للمقابلة التلفزيونيه

مضت ساعات الظهيرة ببطء شديد أهل محمود و أهل نرجس في طريقهم للقاهرة 

اسماعيل خرج لمتابعه أعماله التي أتي من الدقهلية إلي القاهرة مخصوص لاتمامها 

محمود في منزلة صامت لا يتحدث مع أحد 

أما مؤمن حاول كثيرا العثور علي كاميرا مراقبه بجوار منزل نرجس لمعرفة هل أتي محمود كما قالت نرجس أم لا كما زعم هو ولكن للاسف المكان مهجور إلا من القليل بإمكانيات بدائية للغايه ، تابع التحقيقات و سؤال الجيران و أصحاب المحلات التجارية والكل أجمع علي صحة كلام نرجس عدا أن لا أحد منهم قد رأي محمود يوم الحادث 

وعند الساعه الرابعه كانت نرجس في طريقها للتسجيل دون معرفة أحد ، وصلت إلى الاستديو و طلب منها أحد الأفراد الإنتظار لحين قدوم مذيعة البرنامج للحديث معها

.... مش دي الست اللي جوزها خنق ابنهم قدامها و خفاه بعد كدة ؟

.... اه هي هتطلع هوا انهاردة ما انتي عارفه  ايمان مبتفوتش فرصه الا وتستغلها ناوية تخلي الحلقة انهاردة تريند علي كل المواقع لما حست أن مشاهدات البرنامج بدأت تقل 

... اهااا قولتلي بس الست قاعدة هادية يعني ولا باين عليها أن ابنها اتقتل 

... انا اعرف بقا تعالي نكمل ال كنا بنعمله ملناش دعوة

كانا يتبادلان الكلام و كأنهما يتبادلان التحيه كل ما يهمها هو الثرثره فقط دون أن يدركا أن تلك الكلمات التي تبادلاها كانت كل عالمها فالأبن الذي مات لم يكن مجرد أبن بل كان كل عائلتها فهي لم تفقد ابن فقط بل فقدت السند و الصديق فقدت الحياة

بعد قليل اتجهت امرأة يبدو أنها في منتصف عقدها الثالث نحو نرجس و علي شفتيها ابتسامة 

ايمان ... مدام نرجس مش كدة 

نرجس .. أيوة انا 

ايمان ... انا ايمان وصفي مذيعة البرنامج اتفضلي معايا في الاوضة عندي نراجع الأسئلة سوا ونتكلم مع بعض شوية قبل الهوا

ذهبت معها نرجس في صمت لكنها كانت تشعر        بالخوف الشديد من هذة الخطوة  ... فهي لم تري أحد طوال حياتها سوي أهلها و زوجها ، لم تتحدث مع أحد سوي صغيرها كيف سوف تتحدث أمام هذة الكاميرات ، كيف تتحدث والاهم  ماذا تقول ؟ ، تنبهت من شرودها حين تحدثت إليها ايمان بصوت  عالي

ايمان بصوت عالي ... نررررجس  روحتي فين عماله اكلمك من بدري وانتي مش معايا خالص

نرجس ... هه ابدا مع حضرتك معلش متوترة شوية و مش عارفه اقول ايه 

ايمان ... من غير توتر ولا حاجة كل اللي مطلوب منك انك تحكي اللي حصل بالظبط واللي قولتيه في المحضر و متقلقيش محدش هيقاطعك ولا يسكتك

نرجس بتردد ... هو هو ينفع احكي حكايتي كلها مش بس اللي حصل ل علي 

ايمان ببتسامة ... طيب ممكن تحكيلي باختصار دلوقتي عشان ننسق سوا و نشوف وقت البرنامج هيسمح ولا لا 

نرجس ... تمام هحكيلك

وباختصار قصت نرجس علي ايمان حكايتها ، تأثرت ايمان بشدة حتي أدمعت عيناها وفورا وافقت علي أن تحكي نرجس قصة حياتها كاملة بدون أي تدخل منها

ظلت نرجس في غرفه ايمان حتي يتم التحضير للحلقة ، تذكرت يوم أتي محمود ليتقدم إليها 

فلاش باك 

في أحدي المنازل الريفيه البسيطة تتواري فتاة ببدايه عقدها الثاني خلف باب حجرتها تبكي بصمت و قهر وهي تنظر لهؤلاء الذين يحددون مصيرها دون أن يسمحوا لها كعادتهم بإبداء رأيها وما الغريب فهما منذ طفولتها يعاملونها كخادمة تلبي فقط طلباتهم فهم الذكور وهي الانثي وليست اي أنثي انثي تعاقب علي ذنب ليس لها أي يد فيه ذنب ارتكبتة والدتها وتحملت هي فقط وحدها نتيجتة ليس لها الحق في أي شيء عليها دائما الطاعه وإلا كان عقابها الضرب المبرح زاد نحيبها و كادت أن تواجههم بقوة و تخبرهم برفضها الحاسم لتلك الزيجة بتلك الطريقة المهينة لها ولكن نظرات جدتها الصارمة وأعتيادها علي الخضوع لهم دائما حول تلك النية إلي صمت فقط دموعها التي تسيل تحكي عنها الكثير ، بعد قليل انصرف محمود و أهله و خرجت نرجس من غرفتها تتحدث بضعف وخوف 

نرجس ... ا ازاي حضرتك توافق علي اللي قاله دا يا ابويا ؟

عبد الهادي بصوت غليظ ... وانتي مالك انتي اوافق ولا ارفض ملكيش دعوة

نرجس ببكاء ... ا انا اللي هتجوز علي فكرة حضرتك تقريبا بعتني وافقت علي طلباتهم الغريبة مقابل المهر الكبير اللي هيدفعو ازاي يعني يكتب يوم قرايه الفاتحة عشان يقدم علي شقة ؟ وازاي يشرط أن محدش فيكم يعرف مكان الشقة وأن هو اللي يودي العفش كله بمعرفتة ازاي مخفتوش عليا بعد طلب الغريب دا 

ابراهيم الاخ الاكبر ... انتي وافقه تحسبينا ولا ايه ؟ بت ادخلي حضريلنا العشا وبلاش كلام كتير ( وأكمل بسخريه واستهزاء ) واحمدي ربنا يختي انك هتعيشي في مصر وهتتجوزي شاب طول بعرض متعلم و وظيفتة كويسه كل بنات البلد بتتمناة وهتحسدك عليه احنا مجوزنكيش اي جوازة والسلام عشان المناحة اللي انتي عملاها دي كلها 

رقية جدتها ... انتي لسه واقفة مكانك  ( تكلمت بغضب وصوت عالي ) يلاااا علي المطبخ حضري العشا لاخواتك الرجاله شقيانين طول اليوم غوري يلا قبر يلمك

تحركت نرجس بضعف إلي المطبخ كانت تعلم بداخلها أن محاولاتها البائسة لن تنجح ولكنها حاولت لم تستطع السكوت ولم تستطع أيضا الاعتراض أكثر من ذلك حتي لا تقضي ليلتها حبيسة بالغرفه الخلفيه للمنزل بعد ضربها بشدة اولا 

أنتزعها من ذكرياتها صوت اسلام معد البرنامج 

اسلام ... احنا جاهزين يا مدام نرجس اتفضلي معايا

ذهبت خلفة بدون اي حديث أفكارها مشتتة خائفة ، غاضبة ، بائسة أحاسيس كثيرة بداخلها تصارع بعضها البعض ، نظرت إليها ايمان بنظرات تشجيعيه قائلة 

_ متقلقيش من اي حاجة ، اتكلمي وطلعي كل اللي جواكي وانا معاكي و جمبك محدش هيقدر يأذيكي تاني بعد النهاردة

حركت نرجس رأسها ببطء نحو الكاميرا المسلطة عليها ، لحظات قليلة وبدأت ايمان الحديث 

  - 

مساء الخير عليكم زي ماعودناكم كل أسبوع نتكلم ونوضح حجات كتير ونكتشف مع بعض الحقيقه اللي دايما غايبه وسط سطور الحكايه

ديما الحقيقه ليها ثلاث وجوه.... حقيقه من وجهه نظر طرف وحقيقه من وجهه نظر الطرف الاخر وحقيقه من وجهه نظر المستمع 

ولكن!!

الحقيقه دايما بتبقي تايهه متبقاش عارف مين الصادق ومين الكداب مين الظالم ومين المظلوم اوقات كتير ببقي من جوايا حاسه بصدق طرف معين من اصحاب الحكايه لكن لازم اكون طرف محايد واسيب الحقيقه الغايبه انتوا اللي تلاقوها بنفسكم وانهارده الحكايه غريبه اوي اكيد هسيبكم تسمعوها من بطله حكايه الحلقه لكن قبل ما تسمعوها احب اني اعرفكم ان الطرف التاني هيكون اب متهم في قضيه قتل أبنه اللي عمره سنه..الاب اللي قرر يخلص من الام ومن مشاكلها اللي مسببهاله من وجهه نظره وقرر انه يطلقها ولكن انتهي بيه الحال انه خنق أبنها أدام عينها..

خلونا نسمع مع بعض حكايه نرجس .. اتفضلي يا نرجس اتكلمي 

كانت تصارع الاصوات المتلاحقة داخل رأسها صوتٍ يحدثها بأن تهرب من هذا المكان في الحال ، صوتٍ أخر يشجعها علي الحديث ، صوت يخبرها بأن تفكر  بالامر مرة أخري    

لكنها أوقفت كل تلك الأصوات حين بدأت بالفعل في الحديث

نرجس بصوت مضطرب ... انا اسمي نرجس عبد الهادي معلش استحملوني حكايتي طويلة شوية حكايتي بدأت من يوم ما امي غلطت مع ابويا وهو رفض يتجوزها وقتها هي فضحتة وفضحت نفسها قبلة خصوصا لما اكتشفت انها حامل فيا جدي جبر ابويا يكتب علي امي عشان الفضحية و عشان العيل اللي في بطنها و بعد جوازهم جدي مات وعلي ما فاقو من موت جدي ومشاكل الميراث كانت امي ولدتني وهي في السابع وماتت ومن وقتها وانا بتحاسب علي غلطة مليش ذنب فيها بيخلصو فيا كل اللي كانو عايزين يعملوا فيها هيا ... من اول ما بدأت اوعي وافهم وانا بتعامل علي اني خدامة في البيت اشوف طلبات اخواتي الرجاله من مراتة الاولي و طلبات ستي ام ابويا و طلبات ابويا و مراتة كنت لسه عيلة عندي ست سنين افتح عيني من طلعة النهار اخبز و اكل الطيور وانضف و بعدها احضر الفطار وبعد ما ابويا واخواتي يخرجو للأرض ابدء اغسل وأحضر الغدا كل دا ومرات ابويا و ستي قاعدين ينقارو في بعض طول الوقت وكل واحدة فيهم تطلع غيظها من التانيه فيا انا من اقل حاجة اضرب واتشتم و اتهان ولو حاولت ادافع عن نفسي يتشكوني ل ابويا وهو يكمل عليا كان في اوضه في ضهر البيت ديما كنت بتعاقب بعد الضرب طبعا أن أبيت ليلة كاملة فيها في الضلمة وسط الفيران ديما كنت بتعاقب علي أقل حاجة و كل حاجة ...  هي ارتاحت و ماتت وانا اللي عيشت في عذاب  ولما بدأت اكبر و العرسان تيجي ابويا كان بيرفض عشان مش عايز يجهزني ولا يدفع فيا مليم واحد ... لحد ما كملت ٢٠ و دي عندنا في البلد معناها أن بدأت اعنس اتقدم محمود كان شغال محاسب في مصر ا اقصد القاهرة يعني محمود كانت كل بنات البلد عينها منه لما جه اتقدملي قال لابويا أنه هيدفع مهر كبير لشواري وهيجيب شبكة بفلوس كتير وهيكتب مؤخر عشر الالف جنية كل دا كان مقابل شرطين الأول أن يكتب الكتاب ع طول عشان يقدم ع شقة تبع الدولة بعقد الجواز والتاني أن محدش يعرف عنوان الشقة ولا اي حد من اهلي يقبالو علاقه بيا بعد الجواز حتي العفش هو اللي يبقي ينقلة بمعرفتة الغريب أن ابويا واخواتي طارو من الفرحة ولما حاولت اعترض خدت علقه موت .. وفضلت سنة مكتوب كتابي لا شفت فيهم محمود ولا عرفت عنة حاجة لدرجة أن كتير كنت بنسي اني مكتوب كتابي اساسا لحد ما جة هو وأهله و حددو معاد الفرح .. لاقيت نفسي اتجوزت محدش من اهلي ودعني ولا فهمني انا داخله ع ايه سافرت لوحدي مع محمود ... وانتقلت من خدامة في بيت اهلي ل خدامة في بيت محمود ، مكنش في أي حوار بينا دايما كان بيطلب وبس عمرة ما.   سالني عن أي حاجة تخصني عمرة ما اتكلم معايا في اي موضوع ، حتي لما قولتله اني حامل بصلي من فوق ل تحت وسبني ومشي كانت الحاجة الوحيدة المختلفة بين بيت ابويا وبيته أنه عمره ما ضربني ... ومرت الشهور ونور حياتي كلها علي ابني لاول مرة في حياتي كلها كنت أعرف يعني ايه فرحة يعني ايه ابتسم واضحك واحب كانت لما حضنت علي وضميتة حبيبي لصدري وبعد اسبوعين من ولادتي ل علي لاقيت محمود بيبلغني أنه هيتجوز ( لمعت الدموع في عينيها ) كنت مصدومة ومنتطقتش غير ب لية ؟ ( ابتسمت بوجع واكلمت ) قالي دي حبيبتي انا كنت بحبها من ايام الجامعه بس أهلها مكنوش موافقين قالو لاني فلاح و جوزوها لواحد تاني بهدلها كتير وفي الاخر طلقها لانها مش بتخلف وانا لما صدقت أنها أطلقت خدتلها شقة قريبة من شغلي بكل قرش حوشتة من شغلي وبعت كمان قيراطين من.    الأرض بعد ما أقنعت ابويا بالعافيه وكتبتها باسمها واخيرا أهلها وافقو واخيرا هتبقي مراتي ... كان بيتكلم وهو مبسوط اوي الفرحة كانت باينة في صوتة و عينيه ... قلتله وانا و علي رد بكل قسوة وقالي مالك انتي ! ما انتي قاعدة معززة مكرمة في شقة اهو ومصاريفك ومصاريف ابني مش هتاخر فيهم اظن يعني احنا العيشه بينا مش حلوة اوي انا اتجوزتك بعد زن من اهلي وعشان ارد كرامتي بعد اللي أهلها زمان عملوة فيا متقلقيش هسيبلك فلوس وارقام التليفونات لمحلات اكل وصيدلية و كل شهر هاجي ابص ع علي واجيب خزين للبيت و طلبات ليكم و اي وقت تحتاجيني ضروري هتتصلي بيا هيجيلك اظن كدة انا عملت ال عليا وزيادة 

( هبطت دموعها ) مقدرتش ارد اصل هقولو ايه ؟ طلقني مثلا ! واروح فين بعدها ارجع للعذاب الي كنت عايشة فيه مع اهلي ؟ وافقت علي اصلا كان غنيني عن الدنيا كلها واتجوز محمود و قضيت حوالي ١١ شهر مش بتكلم مع حد غير مع علي بحكليه كل حاجة حسه بيها كانو حد كبير و فهمني ... كنت بلعب معاه و اضحك و اهتم بيه كان كل ديتني انا مكنش ليا حد غيرة والله هو النفس اللي كنت بتنفسه  ( ذاد نحيبها ) ا انا 

ايمان متعاضفةٍ... اهدي يا نرجس و كملي 

نرجس منكسرة ... انا مش قادرة استوعب لحد دلوقتي أن علي مش في حضني اليوم دا علي تعب وانا اتصلت بيه كتير اوي مكنش بيرد يا اما يكتسب عليا واتفاجات بيه علي ساعه ٢١جه فرحت وقلت هينجدني خلاص لكنة دخل من الباب وفضل يتخانق معايا جامد وقال إنه مبقاش لا عايزيني ولا عايز علي ولما اترجيتة أنه يلحق الواد الاول ويوديه مستشفي  قالي انا هريحك منه خالص و زقني جامد وقعت ع ترابيزة كانت ورايا و حسيت اني دايخة واخر حاجة شفتها كانت محمود وهو ماسك المخدة و بيخنق علي ابني 

كانت تتحدث وهي تبكي وتسمح دموعها بيديها 

نرجس .. خدة مني ليه ؟ كان سبهولي انا محلتيش غيرة ... اعمل ايه انا دلوقتي ؟ قوليلي حضرتك اعمل ايه أعيش ازاي من غير علي ؟ انا كدة اية لزمتي   اصلا في الدنيا ؟ 

علا صوت نحيبها و ظلت تبكي بشدة

ايمان بحزنٍ ... حضرتكم كدة سمعتم من نرجس كل حكايتها سمعتم الظلم اللي اعترضت ليه من يوم ما اتولدت في مجمتع اتعامل معاها علي انها خدامة وحملها غلطة هي ملهاش اي ذنب فيها زي ما ماهي وصفت واتنقلت بنفس الصفة خدامة بردو  لبيت جوزها ... نرجس اتظلمت كتير من اشباة رجال كانت نبتتهم فاسدة اتروت بانانية ودي كانت النتيجة ياريت حقها يرجع ياريت حق علي يرجع وفي اسرع وقت اقل حاجة تتقدم للست دي أنها تشوف حتي جثمان ابنها و تودعة وتدفنة بنفسها أرجو أن كلنا نقف جمبها هينزل مع الحلقة علي موقع البرنامج علي سوشيال ميديا هشتاج باسم حق نرجس و فين علي ياريت كلكم تعملو شير علي أوسع نطاق عشان الكل يسمع حكايتها و نقدر نساعدها ولو بشيء بسيط

يتبع ...

  •تابع الفصل التالي "رواية نرجس" اضغط على اسم الرواية