رواية العروسة حامل الفصل الرابع 4 - بقلم الكاتب ليث
الجزء الرابع " العروسة حامل " الأخير
_ انا رحمه صاحبة نوران مراتك
: اهلاً بيكي اتفضلي
_ كنت جاية عشان أقول لـحضرتك حاجة، هـي تحذير
_ اه
: من أي!
_ من اللي حواليك
: لا مش فاهم ممكن توضحيلي؟
لقيتها بتطلع تليفونها وبتديهولـي ..
_ بـص على المحادثة دي كده
مسكت التليفون لقيته مفتوح على شات بأسم " شلة العروسة " ببـص على المسدجات لقيت أول مسدج فـي وشـي من نوران بتقول " أنا خايفة يكون شاف عمر معايا فـي الفرح انتو إزاي تعزموه أصلًا " بس محستش براحة روحت جبت الشات من أول خالص، وقبل ما أعمل كده قولت لـ زينب كفاية لحد كده انهاردة أنا مش هشتغل تاني وأقفلي العيادة وأمشي أنتي خلاص .
_ مالك دماغه مش ساهلة على فكرة
: أهدي يـا نوران بس وهنلاقي حل أكيد
_ لا يا منى مش ههدى هو لو كان شافني مكنش هيجي يقولي مرة واحدة هو بيشيل جواه
: مش لدرجة بردو أنه يشوف مراته واقفة مع واحد وبترقص معاه
_ ماهو ده اللي مجنني بردو
: طيب أهدي
_ بقولك أي أنا مش هقدر أستنى أكتر من كده، أنا هاخد المادة من حفصة انهاردة وهروح بكره الشقة احطهاله فـي الأكل وأخلص
: مستعجلة لـي!
_ مش هقدر أعيش فـي الرعب ده كتير وبعدين عمر التاني كمان مستعجل
: أنا حاسة أن عمر ده هو اللـي هيخرب الدنيا والله
_ سيبك دلوقتي أنا همشي
: طيب ياستي مع السلامة
كنت قلقانة بشكل يخض اللـي هو خايفة مالك يعمل فيا حاجة لو عرف باللـي بيحصل من وراه، فـمكنش عندي حل تاني غير أني أحطله الدواء واخلص عشان مش هقدر أعيش قلقانة طول الوقت منه .
_ أنا فـي حاجة مش فاهمها من وسط العك ده كله
: هي أي؟
_ نوران هـي بجد دي نوران اللـي أعرفها ؟، يعني أحنا فـي دوامة كبيرة بسبب نتيجة حملها، والدنيا بايظة حرفيًا، ودماغي كانت هتفرقع من كتر التفكير وفي الآخر تطلع متفقة مع منى اللـي هـي أصلًا فاكرة أنها كده بتاخد حقها مني، لا والحلو فـي الحوار ده محمد اللـي كنت فاكره صاحبي واللـي اتسندت عليه طلع هو كمان معاهم، وصفاء وحفصة مش فاهم هما هيستفادوا أي أصلًا من كل ده
: أنت عملت أي لـ منى أصلًا عشان تبقى عايزة تعمل كده فيك؟
_ منى بأختصار واحدة مزاجية، بتتعامل بمزاجها، لما تكون رايقة بتعاملني حلو، لما بتكون مش في المود بتتعامل بطريقة زفت، وشكاكة جدًا، رغم أن أكونتاتي كانت معاها بس بردو كانت شكاكة، وعندها حتة التملك، حاسة أن الحاجة دي بتاعتها لوحدها وهي بس اللـي تتحكم فيها، فـ زهقت من الحوار ده، وطلعت السيء فـي الرواية
: طب ونوران مراتك اتعرفت عليها إزاي!
_ خطوبة تقليدية جدًا، وقلبت لـحب، بس كان في أحساس بيراودني طول الوقت أنه كان في حد في حياتها غيري، ده كان بسبب تصرفاتها الغريبة واللامنطقية، واللـي زاد المر يوم ما تعبت والدكتور قالي مراتك حامل، كنا متجوزين من أسبوع أصلًا وهـي حامل فـي التالت، اللـي هو إزاي معرفش، وروحنا لـدكتور تاني اللـي هو محمد صاحبي قال نفس الكلام
: التحاليل معاك!
_ أها جبتها معايا وقولت أعرضها على دكتور تاني
: ممكن أشوفها؟
_ أكيد
مسكت ورق التحاليل القديمة والجديدة مع بعض، ببص على الإتنين لقيت فيهم أختلاف واحد وهي فصيلة الدم بتاعت نوران، فـي التحاليل القديمة كانت O، الجديدة A موجب، بس دي مش المشكلة، المشكلة أن الورقتين أصلًا مطبوعين من على نفس الجهاز، ولو سألتني عرفت إزاي، أي جهاز أو طبعة بتطبع ورقة بيكون أسم الجهاز اللـي طبعها تحت على اليمين، ودي أول حاجة أن التحاليل الاولاني والتاني مزورين ..
_ أنت ملاحظتش حاجة!
: حاجة أي؟
_ أن الورقتين مطبوعين من نفس الجهاز أصلًا!
: وريني
_ ده حتى اللوجو بتاع الإتنين مش موجود وده عكس العادي، المفروض أي دكتور بيكون إسمه موجود أو لوجو خاص بيه على الأقل
: والاتنين مش موجود عليهم لا أسم ولا لوجو لحد فيهم
_ والاتنين مطبوعين من نفس الجهاز
: مأخدتش بالـي من النقطة دي خالص
_ عشان دماغك كانت مشوشة فـ طبيعي متلاحظش الحاجات دي
: طب والحل؟
_ مش عارفة، بس هو مفيش حل غير أنك تـ ...
كنا قاعدين بنتكلم ولقيت نوران دخلت علينا فجاة ..
نوران : مساء الخير
مالك : مساء النور
نوران : رحمه أنتي هنا؟
رحمه : اه كنت جاية عشان ..
مالك : كانت بتسأل على حاجة بخصوص سنانها
وبعدين رحمه سلمت على نوران ومشيت، ببـص عليها لقيتها بتبصلي بغيرة، حتى النظرة القادرة بتعرف تمثلها كويس عشان تتصدق .
جتلـي بغرض أنها تاخدني عشان نروح البيت، بس أنا رفضت أصلًا أنها ترجع لحد مأنا أروح اخدها من بيت اهلها بأسلوب لطيف طبعًا، ولكن حاولت تتعامل معايا بـحنية ووحشتني وبتاع بس للأسف مكنش كفاية أني أصدقها أصلًا، مشيت وقولتلها بالكتير بكره هاجيلك عشان أخدك، بس أنا بصراحة كان في نيتي حاجة تانية خالص .
مشيت من عنده وأنا متعصبة أصلًا وشكله كده متضايق مني، كنت عايزة أخلص منه ومن القلق اللـي معيشني فيه، بس شكله كده الموضوع هيتأجل شوية، لقيت عمر بيكلمني حكيتله اللـي حصل، وقالي تعاليلي نقعد مع بعض شوية فـي الشقة، روحت أشتريت شوية طلبات وروحتله على طول .
_ منى أفتحي الباب
: مش فاضية أفتح أنت يـا محمد
_ ماهو مفيش غيري هيفتح الباب كل شوية، طب ما أشتغل بواب أحسن
روحت أفتح الباب لقيته دليفري بيتزا، جه فـي وقته تلاقي منى كانت طلباه، اديت الراجل الفلوس واخدت البيتزا ودخلت على طول، ريحتها كانت فظيعة حرفيًا، مقدرتش أستنى منى تخرج من الحمام روحت أكلت منها على طول وسبتلها نصها، ثواني ولقيت الباب بيخبط، شكلها شغلانة مش هتخلص أصلًا، كانت صفاء وحفصة جايين لـ منى، سلمت عليهم ودخلوا، لقيوا البيتزا على السفرة اكلوا منها وخرجت منى تصرخ لهم من جوا، بس كانت البيتزايا التانية محدش فتحها، راحوا فتحوها مع بعض وأكلوها، وأنا سبتهم ودخلت على طول عشان أنام .
حقيقي معاملتي الطيبة مع الناس خلتهم يشوفوني شخص ضعيف، عاجز مبيعرفش ياخد حقه، أنسان تقدر تتعامل معاه بكل بساطة وأنت مرتاح، توديه يمين يجي يمين، تقوله شمال يروحلك شمال، مش خوفًا منك، لا ده عشان يرضيك يـا غبي، بس الطرف التاني عمره ما شاف أنه بيعمل كده بحسن نية، عشان عمرهم ما قابلوا حد طيب، وأحياناً ميزة أنك طيب ممكن تبقى عيب فيك، ولكن بتختلف من شخص لتاني .
نزلت ورا نوران لقيتها رايحة السوبر ماركت، خرجت وركبت تاكسي نزلها قدام عمارة مش تبعها أصلًا، وهنا شكيت أنها ممكن تكون رايحة لشخص اللـي بتخوني معاه، ويخربيت الحظ بتاعها ببص عليها وهي خارجة من التاكسي لقيتها بتشاورله من تحت وهو بيشاورله من فوق، فضلت أنا أبص يمين وشمال على قرون ألبسها ملقتش، بس قولت أأجل موضوع القرون ده بعدين، بدون مقدمات كلمت البوليس طبعًا عشان أبلغ عنهم، وعن مراتي اللـي بتخون زوجها مع عشيقها، والله تنفع عنوان لـ جريدة اليوم السابع، ومفيش شوية ولقيت عربية الشرطة واقفة قدام العمارة، طلعت معاهم طبعًا مأنا شاهد على اللـي بيحصل .
وصلت لـشقة عند عمر، ودخلت عشان أغير هدومي، وقعدنا شوية فـي الصالة ولقيت الباب بيخبط، عمر كان في الحمام وأنا اللـي خرجت عشان أفتح الباب، ولقيت مالك وحواليه رجاله كتير دخلوا الشقة مرة واحدة ..
_ لا بس حلو الطقم ده، دا أنتِ عمرك ما لبستيه ليا
شفت نظرت عيونها والدموع اللـي قربت تنزل منها ومقالتش ولا كلمة واحدة حتى، أخدوهم ونزلوا بيهم على طول من غير دوشة، وأنا اخدت بعضـي ورجعت البيت، بس لقيت فـي مكالمة جتلـي من بتاع الدليفري ..
_ أي يا برنس عملت أي؟
: كله تمام واخدت الحساب كمان
_ حلال عليك، حطيت السكر عليهم زي ما قولتلك؟
: حطيت السكر طبعًا
_ يلا بالهنا على قلبهم جميعاً
السحر منقلبش على الساحر، لا، الساحر هو اللـي حط السحر لنفسه من غير ما يحس، ماهو لو كان يعرف اللـي هيحصله من ورا اللـي هيعمله مكنش عملوا، بس مكانتش هتبقى القصة ممتعة لو محصلش كده معاه، بعد الحوار ده بيومين سمعت خبر لذيذ، عنوانه " تناول طبيب إحدى المواد الكيميائيّة المتلفة لدماغ هو وزوجته وأثنان من أصدقائِها " حبيت اتأكد من الخبر وأعرف مين الإتنين دول، وطلعوا زي ما توقعت بالظبط، صفاء وحفصة طبعًا، وكده كلهم وقعوا فـي شر أعمالهم، حتى نوران الطيبة، الغلبانة، اللـي صدقت حبها وكلامها، طلعت برأس ثعبان، لا رأس أفعى، كانوا فاكرين أنهم كده ممكن يرجعوني مجنون تاني، بس المجنون فاق، وقال يتسلى معاكم شوية .
_ أي عملت أي طمني؟
: ولا حاجة يـا رحمه سبتهم لحد ما ربنا كشفهم كلهم
_ طب كويس انا كنت قلقانة عليك جامد
: أشمعنا
_ مش عارفة بس كنت خايفة عليك لا يعملوا فيك حاجة
: وده أسمه أي؟
_ حب مثلاً!
: وماله يبقى حب، قولتيلي أسمك؟
أنتهت .
- يتبع الفصل التالي اضغط على ( رواية العروسة حامل ) اسم الرواية
تعليقات
إرسال تعليق