رواية موضوع عائلي الفصل السابع 7 - بقلم رحاب القاضي

 

 رواية موضوع عائلي الفصل السابع 7

  كانت هاجر قاعده في اوضتها مدايقه من طريقة هناء معاها وبعد شويه جه محمد وقال..

محمد

هاحر انتي ليه ما طلعتيش تسلمي علي خالتي وساره بنتها، دول جايين يباركولك..

هاجر ببرود

انت بجد من كل عقلك عايزني اطلع لجحر التعابين اللي بره ده..

محمد

احترمي نفسك وانتي بتتكلمي علي امي وخالتي يا هاجر..

هاجر بغيظ

امك وخالتك وبس، نسيت تقول وبنت خالتي، ساره خطيبتك القديمه ممكن اعرف ليه ما قولتليش حاجه زي دي؟..

محمد بهدوء

وفيها ايه ما انتي كنتي مخطوبه قبل كده وسابك في الكوشه هااا وما تكلمتش..

هاجر بحده

بس انت تعرف اهو انا بقي ما اعرفش ليه انك كنت خاطب قبل كده..

محمد

اديكي عرفتي ممكن بقي تطلعي تسلمي عليهم، انا شكلي بقي وحش مش كفايه اتجوزت من غير ما اعزمهم..

هاجر بسخريه

وكنت هتعزمهم تقولهم ايه بقي، تعالو معايا رايح كتب كتاب العريس فيه مش هيجي وانا اللي هتجوز العروسه صدقه لله عشان استر عليها زي ما امك بتقول..

محمد بهدوء

خلصتي بقي كلامك اللي مالوش لازمه زيك، اتفضلي بره قدامي..

_ قامت هاجر وطلعت واول ما شافتها ناهد خالته قالت…

ناهد

بقي هي دي يا هناء عروسة ابنك ومالها اوزعه اووي كده ليه؟.

هاجر بغيظ

ايه ده يا ميدو انا طول عمري اسمع عن الساحره المستديره اول مره اشوفها لا وكمان تطلع خالتك..

ضحك مازن وقال

هههههههه لا جامده دي يا جوجو..

ناهد بغيظ

وتطلع ايه بقي الساحره المستديره دي يا اختي؟..

هاجر بخبث

كورة القدم الكوره يا طنط اللي بتشوتها لعيبة الكوره في المتشات..

ناهد وقفت وقالت

جرا ايه يا هناء يا اختي هو انا جايه ابارك ولا جايه اتهزأ..

هناء

حقك عليا يا ناهد، يرضيك كده يا محمد عمايل مراتك..

محمد

معلش يا خالتي بس هاجر والله ما تقصدش تهزأك… قصدي تزعلك..

هاجر بضيق

ما تزعليش يا طنط ده انا بهزر معاكي، اتفضلي اقعدي يا ام صرصاره..

ساره بعصبيه

مين صرصاره دي يا بتاعه انتي..

هاجر

هي ايه العيله اللي عاوزه تتهزأ دي كلها، مين دي اللي بتاعه يا ابو الصراصير انتي..

ساره بحزن

يرضيك كده يا حماده مراتك تقول عليا صرصاره..

هاجر بغيظ

ايه ده مين هنا اسمه حماده ، هو انت اسمك حماده ده من امتي هو مش انت اسمك محمد..

ناهد بخبث

اصل ساره يا حبيبتي من وهي اد كده بتحب تدلع محمد وتقوله يا حماده صح يا حماده؟..

قبل ما يرد محمد قالت هاجر بصوت واطي

لو خلف فيك ابووك رد، لو عايز تاخد شهر نايم علي الكنبه رد يا محمد..

سكت محمد وقالت هناء

ما ترد علي خالتك يا حبيبي سكت ليه، ولا انت خايف منها..

محمد بضيق

هو انتي بتقولي فيها يا ماما انا فعلا خايف منها..

ناهد

مش هتجهزيلنا الاكل ولا ايه يا عروسه عايزين نشوف اكلك حلو ولا لا؟..

هاجر

من عينيا يا طنط هجهز حالا اهوو..

وجات تدخل المطبخ سمعت ناهد بتقول

تعالي بقي يا محمد، ده ساره طول الطريق بتقول محمد واحشني ووحشتي الكلام معاه..

ساره

خلاص بقي يا ماما ما تكسفنيش..

هاجر بغيظ

يا عين امك انتي مكسوفه طيب ابقي علمي امك شويه بقي من الكسوف ده..

هناء

انتي بتقولي ايه يا بت انتي؟.

هاجر اتنهدت وقالت

ما بقولش بس انا جوزي هيجي معايا دلوقتي عشان يجهز معايا العشا ..

محمد

ايوه انا لازم اقوم اجهز معاها العشا دلوقتي..

_دخل محمد مع هاجر المطبخ، وقالت ناهد وهي متغاظه من اهتمام محمد بهاجر وقالت..

ناهد

انتو وقعتو عليها منين دي بس، ومال محمد االي كان عامل تقيل علي بنتي ماسك فيها اووي كده ليه؟..

هناء

انا عارفه بقي يا ناهد، بس لو جيتي للحق البنت كويسه وبتسمع كلامه بس لو تلم لسانها الطويل ده شويه…

مازن

تلم لسانها وهي عايشه معاكي يا هناء عشان تبلعيها عايشه..

هناء

انت ايه اللي مقعدك هنا يا واد انت قوم فز من هنا يلاا..

مازن

اروحلك فين بس يا ماما، انا مستني الغدا..

هناء بعصبيه.

انت هتقوم يا واد انت ولا انا اللي اقوملك..

مازن

لا وعلي ايه تتعبي نفسك يا ست الكل انا قايم لوحدي اهو بكرامتي..

دخل مازن المطبخ وقال

بت يا هاجر دول ناتفين فروتك بره، مش عارف ليه كمية الصفاار ده مش عارف..

هاجر بصت لمحمد وقالت

شايف امك وفي الاخر يا محمد تزعل وتقولي احترمي نفسك معاها..

محمد بضيق

معلش يا هاجر هي ست كبيره وانتي تستحمليها..

هاجر

استحمل ايه امك دي اللي يعاشرها عامل زي اللي بيدخل قسم الشرطه بيدخل برئ وبيطلع مجرم..

مازن

ههههههههه لا ضحكتيني انتي بتجيبي الامثال دي منين؟..

هاجر

من الهم اللي انا عايشه فيه واللي شوفته..

محمد بحده

بقي عيشتك معايا هم يا هانم..

هاجر

اهو بدأنا اتلكك بقي..

محمد بحده

بلا اتلكك بلا غيره انا سيبهالك ونازل.. وانت يا عم مازن تتغدي وتنزل عشان هنروح نجيب بضاعه..

مازن

ما بلاش انا معاك..

محمد بجديه

هتيجي وانا هكون معاك، ولا انت مش عايز الموتسيكل..

مازن

لا والله هتغدي واجيلك علي طول…

نزل محمد وهاجر قالت

هو ايه اللي بيحصل هناك مخوفك كده..

مازن

انا مش خايف من حد يا ماما، بس كل الحكايه ان في مشاكل بينا وبين مازن اخويا وهو علي طول موجود في المنطقه اللي بنجيب منها وو..

هاجر

استني استني هو انتو عندكم اخ تالت؟!..

مازن

ايوه اصغر من محمد بسنه بس من ام تانيه وعيل صايع مالوش لازمه اصلا…

هاجر بغيظ

واللن انا ما عارفه قاعده عندكم بعمل ايه، بس انا ليا كلام تاني مع اخوك…

مازن بسخريه

صنف بيموت في النكد جاتكم القرف، المهم قوليلي هي اختك اللي مش فاكى اسمها ايه دي مش بتجيلك هنا ليه..

هاجر بسخريه

عايزني اجيب اختي في وش امك والنبي اسكت..

مازن بصوت واطي

معاكي حق دول ممكن ياكلو بعض واختك بتفلت منها اصلا..

هاجر

بتقول حاجه يا مازن؟..

مازن

بقول هروح احط الاطباق دي علي السفره..

ـــــ #بقلم_الكاتبه_رحاب_القاضي ـــــ

_ في عيادة الدكتوره النفسيه اللي بتتعالج عندها ولاء كانت قاعده وبتتكلم عن مازن وهي مبسوطه وقالتلها..

ولاء

من الاخر كده يا دكتوره سلوي انا لقيت صديق واخ حتي اني ما حستش اوي بغياب هاجر، وبرغم اننا نعرف بعض من كام شهر الا اني اتعلقت بيه اووي هو… هو ده طبيعي..

الدكتوره سلوي

عيبك يا ولاء انك ديما بتبني علاجك علي اشخاص، لا انتي ممكن تتعالجي بنفسك وعشان نفسك، يعني الاول كنتي بتقوليلي ايه انا عايزه يبقي عندي صحاب انا لما هلاقي صحاب هبقي كويسه حصل ايه صحابك دول اذوكي اكتر ووصلنا لمرحله اسوأ..

ولاء بقلق

بس مازن مش وحش اووي زيهم هو اا..

الدكتور سلوي بهدوء

افهميني يا ولاء اللي انا عايزاكي تعمليه، انك تحاولي تواجهي لوحدك بقرار منك مش عشان مازن قالك ما تستنيش منه هو يفرحك او هو يفكر معاكي فكري مع نفسك بصوت عالي اتكلمي مع نفسك بصوت عالي، انتي بتروحي الجيم زي ما اتفقنا ولا لا؟..

ولاء بدموع

ايوه روحت وفي واحده هناك عصبتني وو….

ضحكت الدكتوره سلوي وقالت

يعني انا بقولك تروحي الجيم عشان تطلعي الطاقه السلبيه اللي جواكي دي في التمرينات بدل العصبيه تقومي تتخانقي.

ولاء بقلق

معلش اتحمليني والله انا حاسه اني بقيت احسن..

الدكتوره سلوي.

ازاي بقيتي احسن؟..

ولاء بسرعه قالت

بمازن.. يعني… يعني قصدي هو ساعدني..

الدكتوره سلوي

لو مازن جه وقالك تبعدو او قالك انا مش عايزك انا تعبت منك هتعملي ايه؟..

سكتت ولاء بحزن وقالت سلوي

لازم نحط احتمال ان مازن ممكن يختفي واحنا مش عايزين نرجع للاسوء، عايزين ديما نفضل في تقدم..

ولاء بضيق

يعني انا اعمل ايه دلوقتي، ابعد عن مازن..

قامت سلوي وقعدت قصادها وقالت

لا يا ولاء ما تبعديش خليكي ديما بس عارفه ان ممكن الحد ده يبعد وتكوني حاطه خططك انك هتكملي من غيره عادي، ولو ما بعدش وكمل يبقي الف خير وبركه بس نكون عاملين حسابنا لكل حاجه، انسي انك مريضة اتعاملي عادي ولما نتعصب نعمل ايه..

ولاء

هاخد نفس عميق واخرجه علي عشر مرات، وهروح الجيم تاني وهواجه اللي بيعصبني بهدوء واحاول اضبط نفسي وتفكيري وهطبق كلامك ده..

سلوي

برافو عليكي وان شاء الله كل حاجه هتعدي وتبقي كويسه…

_ وبعد شويه قامت ولاء مشيت “انتظروني يا جماعه قريب اووي في سلسلة قصص للدكتوره سلوي من العياده النفسيه وهنشوف حكايات كتير نتعلم ونستفاد منها ان شاء الله ♥”

ـــــ #بقلم_الكاتبه_رحاب_القاضي ـــــ

_وفي الحاره كان مازن واقف عند تاجر جمله وبيتخانق معاه وقاله..

مازن

يا باشا هو انت مش واخد فلوسك يبقي ناخد بضاعتنا كامله..

الراجل

بس انا واخد اوامر الكل هياخد النص المره دي وفلوسك خد بيها الشهر الجاي..

مازن بحده

واخسر انا بقي فلوس وبضاعه عشان الاوامر دي ومين بقي اللي اداك الاوامر دي؟..

وقف يونس جنبيه وقال

انا، وصوتك ميعلاش هنا يالاااا..

مازن اتنهد بضيق وقال

انا يا اخد فلوسي وامشي يا اخد بضاعتي كامله دلوقتي..

يونس بجمود

خلف هات علبة سجاير من عندك وفهم الواد ده ان الكلمه اللي بيقولها يونس الصاوي ما بيرجعش فيها..

ذقه مازن في كتفه وقال

ايه الواد ده ما تتكلم كويس يا عم انت..

مسكه يونس من هدومه وقال

انت بتمد ايدك علي مين يااااه..

مسك فيه مازن وقال

عليك وعلي اللي يتشددلك…

يونس بحده

ما هو اللي يتشددلي ده لو كان قدر يربيك ما كنتش هتقول كده يا ابن هناء..

_ خلص كلامه وكان هيضربه في وشه بس جه محمد ومسك ايد يونس بسرعه وقال بحده..

محمد

نزل ايدك من علي اخويا..

يونس سحب ايده منه وقال

طيب ابقي علمه الادب يا شيخ محمد عشان ما تزعلوش مني انت وهو..

محمد بجمود

الادب ده ما عدااش عليك، عشان تستقوي علي اخوك الصغير ولو اسم امي جه علي لسانك تاني وقتها ممكن انزل لمستواك عادي ومش هيفرق معايا حاجه عشان امي واخويا خط احمر..

طلع يونس سجاره وولعها وقال

خلف اللي قولته يتنفذ واللي مش عاجبه ما ياخدش من عندنا وما فيش بضاعه من بىه تدخل المنطقه والا هيشوف حاجه مش هتعجبه..

قال كلامه ومشي ومازن قال بغيظ

والله التظيم قاصد يخليك تتخانق معاه، عايز يقول للناس الشيخ اهو بيتخانق متغاظ منك البلطجي ده..

محمد بضيق

خلصنا يا مازن ويلا بينا ناخد حاجتنا ونمشي..

مازن

النص بس احنا كده هنخسر كتير الكام شهر الجايين..

محمد بضيق

يا عم الرزق ده بتاع ربنا، يلا بينا..

ـ وفعلا اخدو البضاعه بتاعتهم ومشيو…

ـــــ #بقلم_الكاتبه_رحاب_القاضي ـــــ

_ وبالليل كان مازن طالع من بيتهم وكان نازل بس شاف ريهام طالعه وكانت زعلانه جدا..

مازن

لا والله ده من امتي الكلام ده…

ريهام

واقول ايه اصلا لواحد مش بيكلمني ولا بيهتم بيا، قولي اللي شغلتك دي حلوه؟…

مازن ضحك وقال

ههههه ايوه زي القمر ومستحيل اكون مع واحده غيرها، وفكيها بقي قبل ما حد يشوفنا…

قربت منه وقالت بخبث

طيب لو عايز تصالحني تجيلي النهارده..

مازن

بس كده من عينيا يا حبيبتي، بس هنزل دلوقتي اشوف صحابي..

ريهام

تمام يا حبيبي اتفقنا…

_طلعت في الوقت ده هاجر ولما شافتهم بعدو عن بعض بسرعه، ومازن قال بتوتر..

مازن

اا هاجر انتي رايحه فين؟..

هاجر بضيق

رايحه عند واحده صاحبتي، انت واقف هنا ليه؟..

ريهام بصت لمازن وقالت

كنت عايزه شوية طلبات وهو هيجيبهم ليا…

هاجر

بجد طيب تعالي بقي يا مازن وصلني في طريقك، تعرف انت منطقة اسمها حارة الساهر..

مازن بهدوء

ايوه اعرفها يلا بينا…

_ ووصلها فعلاً مازن لبيت شهد، وبعدين هو راح كافي علي النيل وقعد شويه وبعدين جات ولاء وقعدت قصاده وكانت مدايقه جدا…

مازن

هو انتي جايه تقعدي مع يهودي قولي ازيك حتي…

ولاء بضيق

انا مش عارفه ازاي اصلا سمعت كلامك وقبلت نتقابل بره الجامعه..

مازن بغيظ

هو انا مقابلك في كباريه ما اهو مكان عام وبعدين احنا زمايل واخوات ولا انتي خايفه من حاجه تانيه..

ولاء بسرعه قالت

لا طبعا ولو في حاحه تانيه عمري ما كنت هقبل اجيلك، انا بس مبسوطه ان في حد معتبرني صديقته وياريتك بجد كنت بنت و…

مازن بحده

بس يا ماما بس يا عسل خلاص ياريتك ما جيتي قال ياريتك كنت بنت..

ضحكت ولاء وقالت

مش قصدي والله بس كل الحكايه اني كنت نفسي تكون عندي واحده صاحبتي زي شهد صاحبة هاجر اختي اهم هما الاتنين صحاب من الطفوله ده يمكن هاجر بتحبها اكتر مني…

ابتسملها مازن وقال

خلاص يا ستي اعتبريني صاحبتك، اهو بضحي اهووو..

_ ضحكت ولاء وهو بصلها ولملامحها البريئه بشكل كبير وابتسم وقرب منهم العامل بتاع الكافي وقال..

العامل

تحبو تشربو حاجه معينه ولا اجيبلكم المينيو يا افندم..

ولاء بسرعه قالت

انا عايزه موزن باللبن..

مازن

خليهم اتنين لو سمحت…

مشي العامل ومازن قال

الحفله اللي عملينها صحابك دي مش هتروحيها ليه بقي؟..

وولاء بحده

عشان روحت السنه اللي عدت واتريقو عليا وما حستش بنفسي غير وانا بخرب كل حاجه وو.

مازن بقلق

اهدي ليه بتعلي صوتك انا قاعد قدامك اهو ما روحتش بعيد..

ولاء بضيق

اسفه والله بس مش هروح خلاص…

مسك مازن ايدها وقال

طيب لو روحنا مع بعض هتوافقي، مش احنا اخوات خليكي واثقه فيا ووافقي..

ابتسمت ولاء وقالت

حاضر يا مازن هروح عشان انت هتيجي معايا…

_ ابتسم مازن بانتصار وما كانش واخد باله انه بيدمر طريقة علاجها مع الدكتوره بتاعتها، وكان كل همه في الوقت ده يخليها تتعلق بيه تفتكرو ايه السبب؟؟..

ـــــ #بقلم_الكاتبه_رحاب_القاضي ـــــ

_ وفي بيت شهد كانت قاعده معاها هاجر اللي قالتلها بملل..

هاجر

شهد مش هنفضل طول القعده نتكلم علي سواق الميكروباص اللي انتي حتي ما تعرفيش اسمه ايه؟..

شهد بسخريه

ما انتي ما شوفتيهوش يا هاجر كاريزما كده وتقيل، بصي تحسيه مش في مكانه في الموقف ده بصي هو شغلني شويه وخلاص عادي..

ضحكت هاجر وقالت

ههههههه كل ده وشغلك شويه بس، دي شكلها خلاص غمزت بس للاسف ما تعرفيش اسمه ايه..

شهد بدموع

وحتي لو اعرف هيفرق في ايه، ما انتي عارفه اللي فيها..

هاجر بحزن

والله مسيرك تلاقي حد يكون كويس ويقدر الموقف اللي انتي فيه ده، ويصدقك ويعرف ان دي حاجه مش بايدك وكانت غصب عنك من واحد حيوان..

شهد بضيق

بس والنبي يا هاجر وبلاش كلام في الموضوع ده انا ما بصدق انسي وياريتني قادره انسي ده انا حتي لما بنسي بيرجع الكابوس اياه يجيلي، النوم مش مهنيه بيه كمان..

حضنتها هاجر وقالت

انا حاسه والله ان كل حاجه هتكون كويسه، فكي كده مش جايه انكد. عليكي انا…

مسحت شهد دموعها وقالت

سيبك مني وقوليلي، عادل ما رجعش؟..

هاجر بضيق

لا ما رجعش ولو رجع ما اعرفش ما يفرقش معايا يا شهد انا خلاص بقيت مرات واحد تاني غيره، راجل تاني ما يستهلش اني افكر في غيره او اخونه حتي لو بمجرد التفكير..

شهد

هو شكله جوزك ده طيب..

هاجر بغيظ

طيب بس ابن امه اوووي بيحب امه بشكل غير طبيعي وهي عقربه بس يعني سعات بحسها كويسه..

شهد ضحكت وقالت

والله يا بنتي ربنا يعينك علي ما ابتلاكي…

ـــــ #بقلم_الكاتبه_رحاب_القاضي ـــــ

_ في بيت حامد الصاوي.. كان يونس متعصب جدا وقال لباباه…

يونس

انا حر منطقتي واللي اقوله يمشي فيها، واللي يقل ادبه يتربي وعيالك دول انا ما رضتش اعمل حاجه معاهم عشانك انت يا حج..

حامد بحده

عيالي دول اخواتك، لما حد يجيلي يقولي يونس واخواته بيتخانقو انا هكون مبسوط..

يونس

ابنك اللي قل ادبه الاول…

حامد بحده

مالكش دعوه باخواتك يا يونس، اللي تقوله يمشي علي اي حد الا محمد ومازن فاهم ولا لا..

عظيمه بحده

هو ايه الكلام ده يا حج، لا يونس كلمته تمشي علي الدخين والكل كمان هو مين اللي ماسك المنطقه ومخلي اسمك سابت في المنطقه وفي كل حته كمان مش هو وفي الاخر عايز تنصر عليه ولاد هناء..

حامد بحده

اخر مره تدخلي في الكلام يا عظيمه والا والله العظيم ما تعرفيش هعمل فيكي ايه..

سكتت عظيمه وقال يونس

وانت عايز ايه دلوقتي يا حج؟..

حامد

انا هتصرف بس اول واخر مره تقف قدام اخواتك في حاجه يا يونس…

_ سابه يونس ودخل اوضته، وحامد اخد بعضه وطلع وعظيمه قالت لنفسها بغيظ…

عظيمه

ربنا ياخدك يا هناء انتي وعيالك قادر يا كريم..

ـــــ #بقلم_الكاتبه_رحاب_القاضي ـــــ

_ وفي بيت نور كانت قاعده في اوضتها وبتتكلم في الموبيل مع احمد وبتقوله…

نور

بس انت ايه صوت الدوشه اللي جنبك دي..

احمد

هقولك بس عايزك تبقي هاديه وما تتعصبيش؟..

قلقت نور وقالت

اتكلم يا احمد في ايه، وانت فين؟..

احمد

انا في الحاره بتاعتكم تحت بيتك بالظبط. وعلي رأي المثل اللي يسأل ما يتوهش…

اتملت عيونها دموع وخافت جدا وقالت

لو بتحبني امشي يا احمد عشان خاطري انت ما ينفعش تكون موجود في الحاره دلوقتي..

احمد بحده

مش همشي وافتحي الباب انا جاي لوحدي اتكلم مع ابوكي واخد منه معاد عشان اجيب اهلي..

_ قال كلامه وقفل، وطلع بيت نور وكان في الوقت ده يوسف صاحب يونس شايفه..

يوسف

واد يا هيما هو البيه اللي دخل هنا من شويه طالع عند مين؟…

هيما

ما اعرفش يا يوسف، بس تقريبا طالع بيت الاسطي فايز لانه كان بيكلم نور في الموبيل سمعته بيقول اسمها..

_ اتصدم يوسف وحصل؟؟؟؟….

_ تفتكرو هيحصل ايه؟…..

ـــــ #بقلم_الكاتبه_رحاب_القاضي ـــــ

_ خلص محمد شغله وطلع بيتهم واول ما دخل اوضته لقي هاجر قاعده علي الكنبه بتقلب في موبيلها.. قرب منها وقال…

محمد

انا عارف انك زعلانه من اللي حصل النهارده، حقك عليا خلاص..

عيطت هاجر وقالت

لا لا انا مش مصدقه ازاي ده حصل بس؟..

محمد بضيق

يا هاجر خلاص بقي، وبعدين انتي اللي كل شويه تقولي عيشه هم وحاسك مدايقه برغم اني بحاول ما ازعلكيش وو..

هاجر بحده

ما تبطل رغي يالااا شغال لوك لوك في ودني وانا مش عارفه اتفرج علي المسلسل منك..

محمد

يعني انتي دلوقتي بتعيطي علي المسلسل؟..

هاجر

ايوه البطل راح خلاص، وبعدين هو انت فاكرني اني بعيط علي كلامك اللي مالوش لازمه ده انا نسيته اصلا..

محمد بغيظ

لا هو انا اللي غلطان وما تربتش اني جيت اصالحك، انتي ازعلي احسن..

هاجر

مين دي اللي تزعلها يا عسل ده انا زعلك انت واهلك واخليكم تجيبو ناس تزعل كمان..

_بصلها بغيظ ودخل الحمام وخبطت عليهم هناء وراحت هاجر فتحت وقالت..

هاجر

نعم يا طنط في حاجه..

هناء بضيق

قولي لجوزك ابوه بره وانتي اطلعي سلمي عليه العره ده..

_ تفتكرو بقي هيحصل ايه؟….

ــــــــــــــــــــــــــــــــــــــــــــ

• يتبع الفصل التالي اضغط على ( رواية موضوع عائلي ) اسم الرواية