رواية قانون آيتن كاملة بقلم داليا أحمد عبر مدونة كوكب الروايات
رواية قانون آيتن الفصل الثامن و العشرون 28
تمسكت بقميص حمزة بخوف، بينما هو كان رأى والد سيف من قبل فأستأذن منه معتذرا، سحبها للخارج مهدئا إياها ببعض الكلمات
-مينفعش يا ايتن اللي أنتِ فيه ده..لازم تواجهي خوفك..هروبك منه مش حل…لازم تكسري خوفك ضده
أغمضت عيناها بقلق :
-مقدرتش يا حمزة..مقدرتش..خوفت..
قاطعها بنبرة قوية :
-خوفتي؟؟ انا مش عايزك تقولي الكلمة دي وانتي معايا…فااااهمة!!
اومأت رأسها بإيجاب
أردف حمزة بجدية:
-طول ما أنتِ جنبي مش عايزك تخافي من أي حاجة أبداً..انا هفضل سندك وضهرك
اقتربت منه، لاحظت ابتعاده، فتأكدت انه مازال غاضب من تصرفها يوم اكتشافه ان سيف أصبح اخوها، سألته برقة:
-انت لسة زعلان مني؟
هتف بنبرة ساخرة:
-أنتِ شايفة ايه؟
زفرت بضيق :
-حمزة…خلاص بقى الحوار عدى..و بعدين محصلش حاجة لكل ده؟
رمقها بضيق:
-وكمان مش معترفة بغلطك
صمتت هي كي لا يزيد شجارهم أكثر من ذلك فهو من بعض أيام من يوم عزومة سيف..وهو يتجنب التحدث معها
_______________
في اليوم التالي
في مكتب حمزة
كان منشغل على أوراق مهمة بالعمل..لتهاتفه سكرتيرته تخبره بوجود زوجته بالخارج، سمح لها بالدخول
شعر بدخولها ليهتف دون أن يرفع راسه، قائلا بانزعاج:
-خير يا ايتن؟؟
رمقته بنظرات حادة:
-انت مبتكلمنيش.. وحتى مش مقتنع بوجهة نظري
رفع رأسه قائلا بغضب:
-مش اتكلمنا في الحوار ده..وكمان أقتنع بإيه؟ واحدة بتقولي اصل كنت عايزة اعملهالك مفاجأة..وعشان كرامتي ماتقلش لو سيف عاملني وحش قدامك..
اقتربت منه لتجلس على مكتبه ، تميل نحوه بإغراء ، تهمس متذمرًة:
-ده انت ماعتذرتش ليّ، ولا صالحتني بعد اللي عملته معايا
اتسعت عيناه بدهشة:
-لا معلش ممكن تعيدي اللي قولتيه كده؟؟! استوعب بس
جزت على أسنانها بغيظ.. باستخفافه بكلامها، قائلة بتبرير:
-أيوة انت زعلتني..اولا غلط وشكيت فيا يوم لما عرفت ان سيف اخويا..ثانيا بقى لما قطعتلي الفستان بتاعي يوم خطوبة سيف ومنة و ده كان اول مرة البسه فيها
رفع حاجبه بدهشة :
– ما انا اشتريت لك واحد غيره؟
زمت شفتيها بضيق:
-لا انا كنت عايزة فستاني اللي اتقطع
غمز لها قائلا بنبرة عابثة:
-خلاص هجيبلك واحد زيه بس تلبسيه قدامي انا بس في البيت
– الطريقة نفسها يا حمزة مش صح… مينفعش انك تقطع فستاني.. ده مش اسلوب لحل مشكلة !
حمزة بغضب طفيف:
-هو أنتِ مينفعش تعترفي بغلطك؟! كمان انا اللي طلعت غلطان والمطلوب مني اصالحك
– انا عارفة اني غلطت بس انت كمان…
هتف بنبرة حادة:
-لا انا ماغلطش من البداية، ولو انا فعلا غلطت بعد كده ده بسبب تصرفاتك وعنادك
ردت معتذرة:
– عندك حق … أيوة انا غلطت… آسفة
قطب حاجبيه بحيرة:
-يعني عارفة انك غلطي؟؟وغلطك ده كان هيخسرني صاحبي وانتي
ايتن بندم:
-بس انا ماكنتش أقصد يحصل كل ده او ازعلك.. غصب عني لقيتني فكرت بالطريقة دي..وخوفت سيف يحرجني قدامك..انا بحبك ومابحبش اشوفك مضايق و زعلان مني
قال حمزة باتزان:
-وانا كمان بحبك بس لازم تحطي نفسك مكاني قبل اي تصرف..وبعدين بالنسبة للفستان..انتي عِنادك بيوصلني لكده وانا غصب عني اتعصبت..لو كنتي سمعتي كلامي وغيرتيه من سكات ماكنش كل ده حصل..بلاش عناد..وبلاش علاقة توم وچيري دي تكون هي اساس علاقتنا..ممكن؟
مددت كفيها لتلمس خديه ، لتلمس ذقنه الخشنة ، ثم قالت بحب:
– ممكن طبعا…انا نفسي علاقتنا تبقى احسن وميبقاش في مشاكل، مقدرتش اسيبك زعلان مني, المهم أن انت كويس دلوقتي، وانا هسيبك تكمل شغلك
داعب ارنبة أنفها الصغير قائلا برقة:
– انا بحبك اوى والله
ضحكت قائلة برقة وهي تحيط ذراعها بعنقه:
-وانا بقيت بعشقك أصلاً
– ربنا ما يحرمني منك أبداً
حركت يديها بسرعة بعيدًا عنه وكانت على وشك النهوض من المكتب .. لكن ذراعيه أمسكت بخصرها مما منعها من التحرك للنظر إليه, شهقت في مفاجأة:
-حمزة…
– وحشتيني يا آيني
– وأنت اكتر يا حبيبي
لتردف وهي تسأله:
– هو سيف قالك على الدلع ده ؟
قهقه بضحكة صغيرة :
– آه عجبني اوي
أمسكها من خصرها ، وانتزعها من المكتب ، وجعلها تجلس على قدميه..
لكزته بكتفه لتهتف:
-حمزة مينفعش احنا في المكتب…
شدها إليه … وقبلها بحرارة وشغف … لم يستطع أي منهما ترك الآخر …كان يقبل شفتيها بحماس وشوق يساوي شوقه لها …
حتى همست له بصوت متقطع:
-حمزة احنا في الشغل مينفعش كده
رد عليها وهو يدفن وجهه في عنقها:
-اسكتي شوية..
ثم اجري اتصال علي سكرتيرته، قائلا بجدية:
-ايوة يا ندى..بقولك ايه..إلغيلي اي مواعيد دلوقتي..عندي Meeting مهم مع ايتن
جحظت عيناها بذهول، ثم لكزته بكتفه بعنف لتهتف بغضب:
-انت بتهزر؟؟ Meeting ايه اللي معايا
ضحك حمزة قائلا بخبث:
– Meeting Private
زفرت بضيق وهي تحاول إبعاده عنها:
-حمزة..متهزرش احنا مش في البيت بجد
سمعت أنفاسه الخشنة على عنقها وهو يتمتم بحدة:
-انا بقول كفاية كده..عشان كمان شوية وهنسى نفسي
ضحكت ايتن:
-بالظبط كده
اتاه مكالمة من سكرتيرته لتخبره بأن هناك اجتماع مفاجئ مع شركة الطيران
حمزة بقهر:
-بتضحكي ؟
قهقت ايتن باستمتاع:
-عشان تسمع كلامي بعد كده
نهضت لتجلس علي المكتب مرة أخرى..وهي تهندم ملابسها وشعرها
رسم ابتسامة عابثة على شفتيه، قال:
-هتروحي مني فين يعني؟ هو انا ورايا غيرك؟ خليكي بقى هنا عشان نروح سوا..مش هتأخر
احمر وجهها عندما قبل خدها الناعم قبلة أخيرة، ابتسمت بحب لتجده ينهض فجأة من الكرسي ملتقطا سترته، ساعدته يرتديها ليخرج هو ويتركها في مكتبه
__________________
قرر هاني بالمرور على منزل خديجة ليذهب معها إلى زيارتها لأختها “حنان” فهي أرملة وابنها طفل صغير لديه خمس سنوات، و أمه مريضة لذلك فهي تذهب إليها باستمرار وتساعدها في مصاريف علاجها وبعض طلباتها, وما أن فتحت له الباب وأخذت الطلبات بيدها، ساعدها هاني هو والسائق خاصته بتناولها في سيارته.. فركبت هي و خطيبها في المقعد الخلفي وبعد مرور وقت قصير..توقفت السيارة أمام إحدى المستشفيات.. لتركب معهم في المقعد الامامي فتاة في منتصف العشرينات من عمرها.
رمقتها خديجة بنظرات متعجبة فهي اول مرة تراها…
رمقته خديجة بغيظ هامسة :
– مين دي يا هاني ؟؟؟ انطق تعرفها منين؟؟؟
أشار لها بالصمت قليلا من تسرعها، فهمس بالقرب من أذنها:
– دي ممرضة والله…طلبت من مدير المستشفى ممرضة خاصة لأختك بدل اللي مشيت اللي كنتي بتجيبيها لها…
هدأ غضبها قليلا، لتنظر إلى الفتاة مرة أخرى وتحاول أن تراها…وبعد مرور وقت توقفت السيارة أمام العمارة التي تسكن بها شقيقتها… ليساعدهم السائق والبواب بحمل الاشياء التي احضرتها خديجة وهاني أيضاً
وما أن وصلوا إلى الشقة حتى فتح لهم ابن شقيقتها الصغير ورحب بهم…
قال هاني بتنبيه :
– ادخلي أنتِ لأختك علشان هي متعرفش اني جاي معاكي…لو مش لابسة طرحتها أو حاجة
– حاضر
ومن ثم سلمت خديجة على شقيقتها التي كانت نائمة في غرفتها وساعدتها بارتداء حجابها، ومن ثم بدأت الممرضة بالتعامل معها، دخل هاني يسلم عليها باحترام، هتفت خديجة قائلة :
– هاني جابلك البنوتة دي بدل الممرضة بتاعتك اللي اتجوزت و ملحقتش اشوف واحدة مكانها
– ربنا يباركلك والله
اردفت حنان إلى الممرضة قائلة:
– بنوتة زي القمر وشاطرة ماشاء الله
همس هاني بصوت منخفض سمعته خديجة فقط :
– شايفة اهي عجبت اختك
لكزته من ذراعه بغيظ، فكتم ضحكته، لتطلب منها اختها بإحضار مشروبات إليهم
خرجت خديجة من الغرفة ومعها ابن اختها الصغير وطلبت من هاني الذهاب معهم
سألته بصوت غاضب :
– ملقتش غير دي ؟؟
– مالها مش فاهم؟
كتفت ذراعيها بغيرة :
– زي القمر
– بجد ؟ يعني اختك كلامها صح بقى ؟
كانت تضع المشروب في الاكواب الزجاجية وهي تنظر إليه بغيظ :
– هاااني انا مبهزرش
هتف الطفل قائلا بتنبيه:
– خالتو حاسبي .. الكوباية اتملت للاخر
زفرت بضيق وهي تحاول تهدئة غضبها وهي تعيد تحضير الاكواب مرة أخرى ليذهب بها الطفل إلى الضيفة بينما هي ناولت هاني المشروب خاصته .. وبدأت بتجهيز الطعام لأختها ومن حين لآخر يدخل الطفل يساعدها لو طلبت شيء، فالمطبخ مفتوح على الصالة الخارجية
قال هاني وهو يجلس على المقعد العالي:
– في اكل جاهز في الاكياس اللي عندك..هيتسخن بس لأنه زمانه برد شوية
– تعبت نفسك بجد..
– انا مش حابب اتعبك يا حبيبتي..عارف انك بتعملي اكل بنفسك, بس عموما انا وصيت اوردر مخصوص من المطعم ميحطش الحاجات اللي ممكن تتعب اختك… يعني حبيت الاكل بتاعها يكون صحي شوية
ابتسمت قائلة برقة:
– هاني بجد انت مفيش منك
– كنتي من شوية مش واثقة فيا؟
– لا طبعا واثقة فيك ..بس بغير عادي زي اي بنت… وبعدين انت فاجئتني.. تخيل ركبت معاك العربية الاقي بنت حلوة ركبت معانا
رد قائلا بتبرير :
– هو انا اللي مختارها؟ انا شوفتها اول مرة في العربية زيي زيك والله
– بجد ؟
غمز لها قائلا:
– انا محدش يعجبني غيرك يا عسل أنتِ
– بس هي الصراحة قمر
سألها بذهول :
– مين دي ؟
– الممرضة
– قمر لنفسها، لا طبعاً أنتِ احلى
ارتسمت على شفتيها ابتسامة واسعة قائلة:
– شاطر في التثبيت… عشان كده هتجوزك
– يا مسهل يارب…
________________
في اليوم التالي
في الفندق
دلفت افنان إلى مكتب رهف، لتسألها عن التقرير فهي اصبحت معهم تلك الفترة في ذلك الفرع عندما طلبت نقلها من فرع الغردقة، وبعد مدة من الحديث سألتها بغموض:
-واضح ان انتي بتحبي ايتن زيي؟ لاحظت كده من طريقتكم مع بعض
ابتسمت رهف بسخرية:
-طبعا دي حبيبتي اوي
غمزت افنان وهي تلتفت لها:
-حلو اوي كده..المهم عايزاكي تبقي معايا
رهف بتحذير عندما تذكرت ما فعله بها حمزة من قبل بسبب ما فعلته بآيتن:
-بس خلي بالك..حمزة بيفرم اللي بيقرب منها.. ده ذكي اوي ومش سهل
أفنان بغرور:
-وانا برضو مش سهلة
رهف بشرود:
-بس تعرفي انا لاحظت حاجة غريبة
-ايه هي؟
-ايتن ستايل لبسها اتغير تماما من وقت ما اتجوزته
انتبهت حواس أفنان لحديث رهف:
-ازاي؟
-يعني كانت بتلبس چيب قصيرة وضيقة..وفساتين قصيرة شوية..دلوقتي لبسها طويل و مقفول كدا
افنان بتفهم:
-تقصدي أن حمزة..
أومأت بإيجاب :
-بالظبط..حمزة أعتقد أنه خلاها تغير لبسها
___________
– يا منة … باشا قلبك وباشا مصر بيتصل على تليفونك
هتف عمر شقيقها الصغير وهو ممسك بهاتفها، وضعت منة يدها على خدها تتأمل مظهرها :
– تلاقي سيف وصل… انا هنزل بقى علشان خارجين
ركبت منة بجانب سيف بسيارته، لتسأله بجدية:
– هتخرجني فين ؟
– في مطعم ايطالي في محطة الرمل جميل اوي هيعجبك
– لا لا فوكك … احنا نروح عند الفلاح
اتسعت عينا سيف بعدم تصديق :
– ايه ؟
– مطعم الفلاح بتاع الكبدة الاسكندراني… أنت ازاي متعرفوش ؟
قهقه ضاحكاً:
– اكيد أعرفه… بس ثواني..
اول خروجة لينا بعد الخطوبة هناكل كبدة ؟
همست ببراءة :
– ايوة بحبها اوي
– والمطعم الايطالي؟
– المرة الجاية بقى
تحرك سيف بالسيارة، لتسأله بعدها وهي تمسك هاتفه وتحاول توصيله بمسجل السيارة، قائلة:
– بقولك إيه.. هي اغنية انا عيني منك وروحي فيك وهموت عليك موجودة عندك على الـ Soundcloud ولا لأ؟
– مش عارف والله اصل انا موبايلي Iphone انت عارفة
عضت على شفتيها بحرج:
– نسيت خالص ..
نظر لها سيف برقة قائلا:
– تعرفي أن انا بحب تلقائيتك أوي .. ياريت الناس كلها تشوف الدنيا سهلة زيك كده، مكنش هيبقي في مشاكل
– بجد
– اه والله…بس طبعا بلاش تكوني تلقائية مع كل الناس..
– حاضر من عينيا
– شاطرة انا بس يعني
________________
دلفا كلا من ايتن وافنان إلى الحمام في ذات الوقت امام المرآة، لتهندم الأولي شعرها، والأخرى مكياجها
قطعت افنان ذاك الصمت، قائلة بنبرة ساخرة:
-هو لحق يتحكم فيكي؟
قطبت ايتن حاجبيها، قائلة بتساؤل:
-افندم..بتكلميني انا؟
قهقهت افنان بسخرية :
-اه..بقولك هو سي حمزة لحق يتحكم فيكي ويخليكي تلبسي علي مزاجه..حتي ستايلك اتغير تماما..عن لما شوفتك في الغردقة اول مرة
ضحكت ايتن، قائلة بغرور :
-لا طبعا يا حبيبتي..محدش بيتحكم فيا..انا بلبس بمزاجي انا
افنان بتحدي:
-خلاص اثبتيلي
ايتن بحنق:
-انتي مين عشان اثبتلك اصلا..صحيح قولتيلي بتشتغلي ايه؟
– الـ assistant لمستر هادي مسؤول ال HR
قهقهت ايتن بنبرة ساخطة:
– اول مرة اخد بالي منك
زمجرت افنان من بين أسنانها، قائلة باستفزاز:
-طب ايه هتخلعي من الرهان..لو هو فعلا مش متحكم في لبسك ابقي البسي حاجات زي قبل ما تتجوزيه واثبتيلي
رمقتها بتجاهل ثم غادرت الحمام
_______
في مطعم “الكبدة”
كانت تجلس وامامها سيف على المقعد الآخر، وامامهم على الطاولة صينية كبيرة تحتوي على عدة شطائر كثيرة مكونة من الكبدة، تناولت منى إحدى الشطائر وهي ممسكة بالليمون وتناوله لسيف :
– بص بقى كبدة اسكندراني يعني ليمون.. مش معنى انك من القاهرة ومش اسكندراني.. انك متاكلش الكبدة زينا
– مبحبش احط ليمون على الساندويتش
تناولت قرن الفلفل الحار وهي تأكله مع الساندويتش مندمجة بتلذذ:
– فايتك كتير بجد
قطب سيف حاجبيه قائلا:
– انا حسيت انك بتحبي الكبدة اكتر مني؟
هزت رأسها بنفي :
– لا لا لا مفيش حاجة في الدنيا بحبها اكتر من سيف “باشا مصر” بتاعي، بس الكبدة دي ليها غلاوة خاصة كده
ابتسم سيف وهو يقترب منها قائلا بإعجاب:
– عيونك بريئة أوي
سألته بنبرة خوف :
– هي كانت متهمة عندك قبل كده؟
قهقه بضحك عالياً :
-لأ طبعا .. بس معجب بجمال عيونك
بادلته منة الضحك، قلبت شفتيها قائلة بندم :
– يا خسارة ضيعت اول لحظة رومانسية بينا… ممكن نعيد المشهد من تاني ؟؟؟
_______
في صباح يوم جديد، كانت تقف أمامه بعد أن انتهت من تجهيز نفسها، فكانت ترتدي معطف خريفي طويل لاخر القدم
لتسأله ايتن :
-ايه رأيك؟
حمزة بإعجاب :
-تحفة طبعا..انتي اللي بتحلي اي حاجة اصلا
ثم أردف باستغراب:
-بس هو مش شتوي شوية ولا ايه؟ اصل احنا لسة في بداية الشتا
ايتن بتلعثم، أخفته بدقة:
-لا ده خفيف اصلا..خريفي..بس انا عجبني اوي الـ Coat ده طويل و مش ضيق..وحتي جبت نفس الاستايل بتاعه كذا حاجة منه..عشان البسهم
قرصها من وجنتيها بحب:
-ايوة كده شطورة يا حبيبتي..بحبك وانتي بتسمعي الكلام كده
ابتسمت ايتن قائلة :
-همشي انا بقي يا حبيبي عشان متأخرش على الشغل
_______
انتزعت ايتن المعطف الطويل ليظهر أسفله تنورة وردي يعلوها قميص ابيض، فحمزة جعلها تنوع في الوان ملابسها وترتدي الوان فاتحة
اقتربت ايتن من افنان، لتقول بانتصار:
-عرفتي بقي ان محدش بيمشي كلامه عليا يا حبيبتي
بينما الأخرى شعرت بأنها ستنفجر داخلها، فتركتها و انصرفت دون ان ترد عليها
سحبتها خديجة من يدها لتدلف إلى مكتبها، قائلة بعصبية :
-لا انتي اكيد اتجننتي..حمزة لو شافك بالمنظر ده مش عارفة ممكن يعمل فيكي ايه
ايتن بلامبالاة:
-هيعمل ايه يعني مش فاهمة..وبعدين انا اتخنقت يا خديجة..انا متعودتش علي كده في حياتي
صاحت خديجة بعصبية:
-وانتي قبل ما تتجوزيه وعارفة ان تفكيره كده
ايتن بتبرير:
-ايوة عارفة بس مكنتش اعرف انه في كل حاجة…وعموما يعني لما يكون عنده ميتنج عندنا هنا..هبقي البس الـcoat “معطف”
خديجة بشرود:
-طيب..افرضي جه فجأة!!
-لا انا عارفة هيجي امتي
خديجة بحذر:
-بلاش يا ايتن عشان خاطري..انا مش مطمنة..ده غير انك لابسة چيبة قصيرة اوي
صاحت ايتن بزهق:
-ده كان لبسي زمان وانتي عارفة كده
تنهدت خديجة بضيق تعلم أن صديقتها عنيدة ولن تستمع إلى حديثها :
-يوووه براحتك بقي..بس لو حمزة اكتشف ده مش هيعديها بالساهل خدي بالك واحنا ما صدقنا اتصالحتوا
______________
بعد مرور عدة أيام
كانت ترتدي معطفاً خريفي كالعادة في الأيام الماضية ، وتخلعه فور وصولها إلى الفندق.. لتظهر أسفله تيشرت باللون الابيض وتنورة بيضاء واسعة ولكن قصيرة فوق الركبة، فكرت لو اكتشف زوجها أنها ترتدي مثل تلك الملابس أسفل المعطف وتنتزعه حين وصولها إلى العمل.. هزت رأسها لتبتعد تلك الأفكار المُرعبة عن عقلها فهو يتحدث إليها عبر الهاتف قبل أن يأتي .. وتعلم أوقات اجتماعاتهم المشتركة.. حركت خصلات شعرها الناعمة وهي تفكر أن كل هذا بعيد جداً .. وعليها أن تعطي التركيز على العمل أكثر .. فهي في النهاية فعلت ما شاءت وبدون مشاجراتها اليومية مع حمزة بسبب ملابسها
بعد نصف ساعة ، كانت تقف أمام مكتب الاستقبال تملأ بعض الأوراق المهمة.
اتصل بها زوجها كثيرًا ليخبرها أنه قادم ، لكنها لم ترد على الهاتف ، لأنه من سوء حظها أنه كان في مكتبها تركته هناك.
وصل حمزة إلى الفندق ، وشاهد مظهرًا جعله يقف مهيبًا مذهولًا .. عندها رأى ايتن .. في تلك الملابس المُلفتة التي طالما حذرها منها .. صاح بغضب وهو يتقدم نحوها:
-ايتن
انتفض قلبها بنبضات قوية عندما سمعت صوته ، فغرت فمها في عدم تصديق ، لتلتفت له تري عينيه تشتعل غضبا، خاصةً عندما سمعته يقول بحدة:
-ايه دا ؟؟ فين الـcoat “المعطف” ؟ أنتِ ماكنتيش لابسة كده الصبح وأنتِ رايحة الشغل
ابتلعت ريقها بتوتر بالغ:
-اصل الجو كان حر شوية و…
قاطعها قائلا بسخرية:
-وبعد كده قلعتيه صح؟
ردت بتوتر:
– آه..
اقترب منها حتى توقف أمامها تماماً، بينما هي تخشى أن تنظر إليه:
-المفروض أصدق كده صح ؟؟
ثم صاح بحنق وغضب، فوصل إلى أقصى درجاته، وأمسك بذراعها بقوة:
-بتستغفليني وتقلعيه يا ايتن؟؟ وانا اقول مالك مصممة تلبسي ستايل الطقم ده شبهه كل يوم
اجابته بتحدي وهي تحاول ان تفلت قبضته منها:
-هو انا عيلة صغيرة هخاف منك كده يعني..ما ألبس اللي أنا عايزاه..طالما مابعملش حاجة غلط ولا تصرفاتي فيها حاجة ملفتة
تقلصت نظراته بغضب شديد ونفذ صبره من استهزاءها بكلامه لها، خلع سترته الزيتونية ووضعها على كتفيها ثم زمجر بحدة:
-اتعدلي كده في الكلام بدل ما اعدلك انا..و اطلعي هاتي شنطتك بسرعة وانزلي علشان نروح.. لأن حسابنا في البيت مش هنا
زفرت قائلة بضيق :
– انا لسه ورايا شغل…
امسك كتفيها قائلا بغضب هادر:
-تحبي أعيد كلامي تاني؟؟؟
هزت رأسها بنفي :
– حمزة بجد انا ورايا شغل…هخلصه ونبقى نتناقش بعدين
قال بنبرة حادة :
-اطلعي و دقيقتين والاقيكي قدامي يا ايتن..وتلبسي الـcoat بتاعك..
_______
قد نسامح مرة..إثنان..ثلاثة..لكن في كل مرة نفقد شيء ما، قد يكون..الثقة، الاهتمام، الحب
_نزار قباني
صاح حمزة بقسوة بعد ان صفع الباب خلفهم:
-بتحبي تمشي رأيك وخلاص..حتى لو على حساب حبي وثقتي ليكي
– عشان انت محاولتش تقنعني… أنت خليتني اعمل كده خوف منك…
– انا اللي دلعتك وكل ما تزعلي..وتحسي انك اتسرعتي..اصالحك واعديها..لكن المرة دي لا
همست بتبرير:
-انت اللي عملت فيا كده..لو كنت سيبتني البس اللي انا عايزاه مكنش كل ده حصل..بس انت وصلتني لدرجة اني اكدب عليك
قاطعها يهدر بها بقسوة وعنف:
-انتي إللى مش قادرة تقتنعي ان مهما حصل انا الراجل وعندي خبرة اكتر منك وفي حاجات لازم تسمعي فيها الكلام من غير نقاش ومقاوحة.. مش معناه اني بلغي شخصيتك، كان نفسي تفهمي دا وتعملي بيه..
ثم اردف بتوعد غاضب:
-لكن من هنا و رايح..هتشوفي مني وش تاني..ومعاملة مكنتش اتمني انك تجربيها
_____
في شقة سيف الجديدة للزواج..
ذهبت منة و خالتها و والدتها مع سيف ليشاهدوا الشقة قبل البدأ في التشطيبات
– ايه رأيك يا طنط في الشقة ؟ يارب تكون عجبتكم
– حلوة اوي يا سيف ماشاء الله…
-ربنا يسعدكم يارب ويتمملكم على خير
ذهب سيف ليتحدث مع إحدى العاملين بالشقة، في بعض التفاصيل، وقفت منة أمامه بعد أن أبتعد عن الرجل، قائلة بسعادة :
– اوقات بفكر كده… عمري ما كنت اتصور ان انت هتبقى ليا ونبقى مع بعض واحنا مخطوبين وبنختار حاجات لشقتنا اللي هنتجوز فيها
– الحمدلله ترتيب ربنا والنصيب كان جميل اوي
-انا كنت بحبك من الاول..بحلم بكل حاجة معاك
كل حاجة كنت بتخيلها معاك انت، حتى وانت مش معايا
كنت برضو متخيلاك انت في كل حاجة
-فكرة ان انا اتخطبت لحبيبي اللي كنت بشوفه زي ابطال الروايات دي مخلياني اتنطط من الفرحة
-انت حققتلي احلى حلم في حياتي
-طب اعمل فيكي ايه بعد الكلام الحلو ده بقى
قاطعته بمرح :
-ماتعملش اتجوزني
قهقه سيف ضاحكاً:
– ده كده كده هيحصل
ليردف بعدها :
– أن شاء الله هانت كلها 6 شهور ولا بالكتير اوي 9 ونبقى في بيت واحد…انا مبحبش الخطوبة القصيرة اوي ولا الطويلة اوي علشان كده اتفقت مع باباكي على 6 شهور وهو قالي خليهم لحد 9 شهور
همست بخجل :
– يارب يتم كل حاجة على خير
– ربنا ما يحرمنى منك يا حبيبتي ويخليكي ليّ
تنهدت بسعادة، ليردف قائلا بابتسامة :
-عقبال ما تنورى بيتك وحياتي كلها اكتر ما أنتِ منوراها
ردت ببراءة :
-انا بحبك اصلا
-متخيله كده ارجع من الشغل الاقيكي قاعدة مستنياني
همست بخجل :
-يا نهار ابيض، هتبقى مبسوط ؟
أومأ بتأكيد :
-اكيد طبعا حد يبقا متجوز القمر ده وميبقاش مبسوط
______
في اليوم التالي بالفندق
كانت تتابعهم من بعيد وعيناها تشتعل بالنيران، عندما رأت افنان تجلس معه يتحدثوا بخصوص شيء في العمل
هتفت بغيظ لخديجة الواقفة بجانبها:
-ديجا..هي مالها البت دي لازقة في حمزة وبتتكلم معاه
خديجة بتبرير:
-عشان بتشرحله التقرير بتاع المشروع الجديد..وبعدين هي قاعدة قصاده مش جنبه يعني
زمجرت ايتن من بين أسنانها:
-وهو قاعد معاها ليه اصلا
-علي فكرة هو بيتعامل باحترام بجد..وبعدين انتي واثقة في حمزة
ايتن بغيظ:
-أيوة بس…انا متضايقة منها
هتفت بنبرة ساخطة:
-خلاص روحي جيبيها من شعرها حالاً
صاحت بغضب:
-ديچا انا مبهزرش
خديجة بزهق:
-اعملك ايه طيب
فكرت ايتن قليلا..لتسألها :
-بقولك ايه معاكي شنطة الميكب بتاعتك؟
اومات قائلة باستغراب:
-اه..ليه؟
ايتن بنبرة ماكرة:
-هقولك..بس عايزاكي تروحي تقعدي معاهم دلوقتي..وتشوفيلي البت دي بتنيل ايه
-طيب
________
تقدمت ايتن نحوهم..قائلة بصوت رقيق اوقف كل المحادثات بخصوص العمل:
– منورين
التفت كلا من حمزة وافنان وخديجة إليها..ثم جلست علي المقعد المقابل لحمزة وخديجة..و بجوار افنان
قطعت افنان الصمت، تنحنحت قائلة :
-اخبار امبارح ايه يا ايتن؟
ايتن بدهشة وهي لا تزال تتكلم بصوت رقيق:
-زي الفل..زي ما انتي شايفة كده
افنان بشفقة:
-اصل حمزة كان متعصب اوي امبارح
ايتن باستغراب:
-من ايه يا روحي ؟
هتفت افنان بخبث:
-عشان لبسك أعتقد..ما انا كنت شايفة الموقف
صاحت ايتن بثقة:
-لا يا حبيبتي..حمزة مبيتعصبش عشان لبسي..لأنه عارف انا بلبس ايه
هزت أفنان رأسها بخبث:
-لا بصراحة مصدقش ان حمزة كان عارف انك لابسة كده
تجاهلت ايتن بريق عينا حمزة علي تلك المحادثة المملة، قائلة باتزان:
-هو اتعصب عشان قلعت الـ coat..اصل هو بيغير وبيخاف عليا و ده حقه
ردت أفنان وهي ترمق حمزة بنظرة هيام:
-اه اصل انا عارفة حمزة
تنهدت ايتن مدعية الغباء:
-بجد؟
رفعت ايتن شعرها المغطي بالجانب الثاني من رقبتها بتلقائية مزيفة؛ ليسقط علي ظهرها، ليظهر آثار احمرار علي عنق ايتن
شهقت أفنان بصدمة وهي تلاحظ آثار الاحمرار علي عنق ايتن :
– ده بجد ؟؟؟ أنت ازاي عملت فيها كده ؟؟؟ هي حصلت يا استاذ … تضربها ؟؟ تمد ايدك على مراتك ؟
صاح حمزة مدافعا:
-ضربتها ازاي يعني؟؟
أفنان بغضب مبالغ:
-حرام عليك تبهدلها كده..دي مش غيرة يا استاذ ده مرض ..يا ترى عملت فيها ايه تاني؟؟
ثم أردفت بعصبية مزيفة :
– انتي اوعي تسكتي..لازم تبهدليه، وارفعي عليه قضية ومن بكرة تتطلقي منه ..عشان ميمدش ايده عليكي تاني..لا بجد ازاي يعمل كده !
شهقت خديجة بصدمة:
-انت ازاي تمد ايدك عليها يا حمزة؟ ده انا كنت بدافع عنك
صاح حمزة متأملا عنق زوجته:
-ايه الهبل ده..انا ما مديتش ايدي عليها ولا ممكن اضربها اصلا
قاطعته ايتن بابتسامة لون الخجل سيطر على وجهها:
-لأ حمزة ماضربنيش فعلا ولا دي أخلاقه أنه يعمل كده
كانت نظرات أفنان نارية تكاد تحرق ايتن وهي تسألها بحيرة:
-نعم؟؟..والكدمات اللي على رقبتك دي ايه ؟؟
حاول يخنقك يعني ؟؟ برضو اوعي تسكتي فاهمة… ده كان ممكن يأذيكي
ألقت ايتن نظرة ماكرة على حمزة الذي كان يراقب الموقف بذهول .. وتابعت بلهجة متظاهرة بالخجل:
– بس ماعتقدش ينفع ارفع قضية على جوزي علشان باسني، خصوصا أن انا معنديش مشكلة خالص..
كانت الإجابة والفكرة شيطانية بحق، اتسعت عينا افنان مو الصدمة وهي ترمق حمزة بكل غيظ، بينما ايتن تبتسم بكل انتصار فهي حرقت دمها بالفعل :
– نعم !!
– ما احنا متجوزين ولا أنتِ ناسية ؟
– عارفة بس فكرته ضربك ولا حاجة !
-لا يا حبيبتي..حمزة مبيمدش ايده عليا..اصله راجل ومش من تربيته يعمل كده..
لم تستطع افنان الرد، لتسألها ايتن بمكر:
-صحيح يا أفنان انتي عندك كام عين؟
-نعم؟
تمتمت ايتن من بين أسنانها:
-مش انتي بوتاجاز..اعتقد خمسة !
صاحت افنان باندفاع :
-ايه اللي بتقوليه ده..بوتاجاز ايه؟
ايتن وهي تضع قدما علي الأخرى :
– كنتي بتسخنيني عليه اوي
زفرت بضيق:
-لا طبعا مش كده..بس انا فكرته ضربك بجد..
قاطعتها ايتن بحدة :
-لا يا روحي مش من اخلاقه ابدا..يمد ايده علي بنت..واضح انك متعرفيش حمزة كويس زي ما قولتي في اول الكلام
ردت أفنان بغيظ من بين أسنانها :
-اه ممكن..عن اذنكم
وقفت ايتن قائلة باستئذان:
-انا كمان داخلة مكتبي أكمل شغلي..باي يا حبيبي
تنهد كلا من خديجة وحمزة ليقولا بالوقت ذاته وبنبرة خفيضة:
-إن كيدهن عظيم
________
دخل مكتبها بعد دخولها هي بدقيقة، ليغلق الباب خلفهما، فسألها بنبرة ساخرة وهو يشير علي عنقها:
– ده Fake طبعا !
تجاهلت سؤاله، لتجده يتناول مناديل مبللة من علي المكتب، مقتربا منها.. ليزيل المكياج من عنقها
حاولت ايتن الهروب منه ، لكنه كان يحيط بها ، ثم همست بارتباك بمجرد أن لاحظت نظرته معلقة على رقبتها ، ثم اشتعل وجهها بالحرج قائلة:
– انا كنت لسه همسحه
كتف حمزة ذراعيه، قائلا بجدية:
-لا..انا هعرف امسحهولك
لتجده يضع المنديل علي عنقها، يزيل آثار المكياج لاثار احمرار عنقها المزيفة
توقفت مكانها، ثم شهقت فجأة:
-عاوز ايه يا حمزة؟
نظر لها حمزة قائلا بمكر:
-قولت اجي اشيلك الـ Makeup ده بس..
حدقت به بعينين متسعتان بقلق، من كلماتها التهكمية، لتجده يتقدم نحوها أكثر، همست ايتن بارتباك:
– ممكن تبعد شوية
قال بتسلية:
– ابعد ليه ؟
نظر إليها بعيون تحمل كل المشاعر بداخلها ، ودون أن تنطق بحرف واحد ، دفعها إلى الخلف حتى التصق جسدها بالجدار الخلفي ليدفن وجهه في رقبتها ، ويقبلها بقوة، أزاحت رأسها بنعومة فطرية, لتعطيه كل المجال ليفعل ما يشاء.. شعرت بشفتيه تقبّل كل جزء من رقبتها ، حيث نزل إلى عظمة الترقوة وعاد بقبلة من الجانب الآخر من عنقها.. حتى تأكد أنه رسم علامة حقيقية
فصفق بكفيه امام وجهها وهو يبتسم بإعجاب:
-بس حقيقي برافو..لا عجبتني دماغك اوي
أوقفها أمام مرآة كانت في المكتب لترى ما فعله بعنقها, لتنظر له بغيظ:
-ايه إللى انت عملته ده؟
غمز لها قائلا بانتصار:
-اهو كده بجد..مش الـ Fake اللي انتي كنتي عاملاه
همست بضيق :
– بجح أوي
قهقه بضحكة عالية:
-اومال ايه الحكاية بقى اومال عاملالي فيها تقيلة .. ده أنتِ طلعتي بتغيري اهو…
ليردف قائلا بنبرة خشنة :
– وبعدين أنتِ اصلا قمر تغيري من مين .. ما اعتقدش حد ينفع ينافسك في الحلاوة
________
في المساء بمنزل حمزة
تنحنحت ايتن لتقطع ذاك الصمت، قائلة :
-انا خارجة مع خديجة ومنة النهاردة
سألها دون أن يرفع وجهه لها:
– رايحة فين؟
-رايحة البيوتي سنتر..
تأففت عندما وجدته نهض من مقعده ولم يعيرها اي اهتمام، وفي خلال دقيقة وجدته واقف أمامها، وأخرج لها رزمة من الأوراق النقدية…امسكتها بتعجب:
-إيه دا ؟؟
حمزة بجدية :
-مصروفك
ايتن باستغراب:
-نعم؟ مصروف ايه..ما انت سايبلي فلوس لمصاريف البيت ولما بحتاج حاجة بجيب منه وساعات انت بتجيب معظم الوقت
هز رأسه بنفي:
-ااه انتي قصدك على مصروف البيت..لا دا مالوش علاقة بالفلوس دي خالص..دا مصروف شخصي ليكي انتي تجيبي بيه حاجتك الشخصية Makeup، هدومك، بيوتي سنتر الحاجات دي يعني
اتسعت عيناها بذهول:
-نعم؟ لا طبعا..انا الحاجات دي بجيبها بنفسي..مش محتاجة انك تديلي وبعدين ما انا بشتغل ومرتبي بيكفيني وزيادة
حمزة بتبرير
-اولا الكلام ده قبل ما تبقي مراتي..لكن انتي دلوقتي مسؤولة مني..ثانيا شغلك دا لنفسك مش ليا..من يوم ما بقيتي على ذمتي ومرتبك دا خاص بيكي أنتِ حاجة كده على جنب بتاعتك..لكن أي مصاريف ليكي تاخديها مني بعد كده
ايتن بذهول :
-أيوة بس دول كتير..واكتر من اللي بصرفه
حمزة بشرود:
-انا معرفش احتياجاتك كانت هتكفي كام بس لو احتاجتي اكتر من كده يعني قوليلي..ولو اقل عادي خليهم معاكي مش هيخسروا..المهم انك هتاخدي زيهم كل شهر
ايتن باعتراض مبالغ:
-لا يا حمزة..معلش انا بشتغل..واقدر اكفي نفسي..مالوش لازمة خالص انك تصرف عليا..انت مش مجبر ولا ملزم تكفي مصاريفي الشخصية..مصاريف البيت تمام لكن غير كده لا
اخرج زفرة وهو يرمقها بسخرية :
-حتي في دي كمان فيها عناد..كنت عارف والله انك هتفتحي محاضرة في دا كمان
حاولت إعادتهم، قائلة بامتنان :
– انا فاهمة بس انا اتعودت ان انا بصرف على نفسي من وانا في الجامعة
أعطاها ظهره قائلا بنفاذ صبر :
– ايتن انتي حرة الكلام ده كان زمان .. احنا دلوقتي متجوزين..وعموما الفلوس معاكي عايزة تصرفيهم مش عايزة براحتك.. بس خليكي فاهمة كل شهر هتاخدي زيهم مني..ومش عايز كلام تاني في الحوار دا
همت بالرد، ولكنها تفاجأت به يغادر الغرفة وظلت هي متصلبة مكانها..شعرت أنها أخطأت بالفعل..فهو حتي في قمة غضبه منها، يهتم بها، كل موقف بينهم تكتشف أنه رجلها بالفعل..نظرت للباب بحسرة وندم علي اندفاعها
__________
في البيوتي السنتر
خديجة باندفاع:
-بجد حمزة ده ميستاهلكيش..بأمانة يعني
تنهدت ايتن بتعب:
-عارفة يا ديچا افتكرت موقف كده لما اداني الفلوس..افتكرت موقف لعميلة ليا كانت بتشتغل..حكيتلي انه شرط عليها عشان تشتغل ياخد نص المرتب لمصروف البيت..وهي وافقت عشان بتحبه..وبقي مرتبها كله للبيت..واي حاجة هي بتدفع فيها مع انه مستواه المادي كان كويس جدا..وفي غيرها كتير..يا اما جوزها بياخد فلوسها او بيخليها تدفع معظم مرتبها في البيت..حمزة مختلف تماما..بيعمل حاجات تخليني اتقهر ان كنت بعامله كده..انا بحبه بجد يا خديجة
زفرت خديجة بعصبية:
-ولما انتي بتتنيلي بتحبيه..بتعملي فيه كده ليه
زفرت ايتن بتنهيدة عميقة :
-غصب عني..مش عارفة..حمزة عصبي وشخصيته قوية اوي..ولو انا رفضت حاجة الكلام فيها منتهي مش بيديني الفرصة ارفض لا بيعمل حاجة تحطني قدام الأمر الواقع..بيخليني اوافق فجأة..وانا للأسف مبحبش كده..انا متعودتش علي كده في حياتي…انتي اكيد فاهماني
فكرت خديجة قليلا ثم ردت :
-عارفة يا حبيبتي..بس هو تصرفاته صح..متضيعيهوش من ايدك يا ايتن..الراجل اللي زي حمزة ده مش هتلاقيه تاني صدقيني
صاحت ايتن بزهق:
-طيب اعمل ايه..والله بحاول بس هو بيتعامل ببرود
خديجة باتزان:
-عشان هو لازم يحس انك معترفة بغلطك واتغيرتي بجد..
– بقولك هنروح لمنة البيت…اصل سيف قالها مينفعش تيجي لوحدها علشان متتأخرش وهو مشغول مش هيعرف يوصلها
– شايفة الناس اللي بتسمع الكلام
____________
بعد مرور ساعة..
كانوا يجلسون الثلاث فتيات معا وايتن تقص عليهم معاملة حمزة المتغيرة تماما معها
زفرت منة بضيق:
-علي فكرة بقي انتي غلطانة يا ايتن..بجد إللى عملتيه ده مكنش ينفع..انتي قللتي من حمزة
نظرت ايتن لمنة قائلة بسخرية :
-مش احسن ما ابقي زيك..اسمع كلام سيف في كل حاجة..وحاضر ونعم
منة مدافعة :
-وفيها ايه لما اسمع كلامه..مش احسن ما اعاند ونتخانق علي طول..رغم ان كلامه بيكون صح
صاحت خديجة باندفاع:
-جرا ايه انتي وهي..هو احنا جايين نحل مشكلة ولا نتخانق
زفرت منة هواءا حارا، قائلة بضيق:
-انتي مش سامعاها يا خديجة بتتريق ان انا بحب سيف وبسمع كلامه
ردت ايتن بنبرة ساخطة:
-لا وانتي الصادقة انا بفوقك..الراجل مينفعش معاه واحدة تقوله حاضر ونعم..انتي كده بتلغي شخصيتك تماما..وبتخليه يتنطط عليكي ومهما عمل هو واثق من وجودك
منة بشرود:
-علي فكرة سيف مبيعملش كده..وعلي الأقل لما بغلط بعترف بغلطي مش زيك بقاوح
قاطعتهم خديجة بعصبية:
-هو انا مش قولت خلاص..نهدي كده..اولا انتوا الاتنين غلط..انتي يا ايتن بجد خسارة فيكي واحد زي حمزة..عشان الراجل كويس معاكي وبيخاف عليكي..وغلطي جامد لما كسرتي ثقته فيكي واستغفلتيه
ردت ايتن باندفاع:
-انتوا ليه محسسيني ان انا خونته
خديجة باتزان:
-المفروض الست بتحترم الراجل في غيابه قبل وجوده..وانتي في وجوده استغفلتيه عليه..وفوق ده كله مش معترفة بغلطك
-للأسف دايما مشكلتنا مع الرجالة اننا بنشوف تعليقاتهم دي تحكمات مع انهم بيشوفوها غيرة وخوف ورجولة ، هما عارفين بصات بعض كويس حتى لو احنا ماخدناش بالنا فلما يقولك بيبصولك بخبث صدقيه والله..
-بصي للموضوع من وجهة نظره هو والله هتعذريه وهتعرفي انه مش قصده يتحكم فيكي
زفرت ايتن بغيظ:
-ما انا حاولت اصالحه مرضيش
-عشان دي مش مصالحة…انتى الغلطانة يعني أنتِ اللي تحاولي تصالحيه وتفضلي فوق رأسه لحد ما يتصالح… الاعتراف بالغلط قوة مش ضعف… ولا تقليل من كرامتك خالص .. بالعكس أنتِ كده بتثبتيله انك بتحبيه ومقدرة زعله
منة بمزاح:
– فليسوفة يا ناااس… أفلاطون بيتكلم معانا
اردفت منة قائلة :
-لا بجد بقى عندك حق الحياة خد وهات وطالما الراجل يستحق الاعتذار يبقى نعتذر طالما الغلط من عندنا
شعرت ايتن بالندم :
-عندكم حق..عشان كده هفضل وراه لحد ما يسامحني
ابتسمت خديجة، ثم وجهت كلامها لمنة:
-شطورة..اما انتي بقي يا ست منة..اتقلي شوية..سيف مش هيطير..ومش معني كده انك تتقلي جامد لدرجة انك تركنيه..خير الامور الوسط
همست منة بتلقائية:
-بصي انتي ممكن تستغربيني..بس انا فعلا مبعرفش امثل..بجد مبعرفش اكون على غير طبيعتي ولو حاولت بتقفش على طول
ضحكت خديجة:
-والله انتوا الاتنين مجانين
_________
– انا بقيت بخرج بلبس زي ما انت عايز
وقفت أمام حمزة، لتجده بعد صمت استمر لدقائق مما زاد من ضيقها..هتف حمزة ببرود:
-ااه..مبروك
وتحرك مغادرا غرفة نومهم بعد أخذ كنزة من ملابسه، متجاهلا اياها تماما
ظلت هي بمكانها، رمقته بصدمة وكأنها تخبره بشيء عادي..كأنه شيء لا يخصه ولا يسعده..رده البارد الذي اعتادته منه بالفترة الأخيرة نتيجة خصامهم..والسبب عنادها وكذبها عليه
تنهدت بحزن لتتبعه للخارج لتجده يجلس علي السرير يعمل علي الحاسوب الخاص به في الغرفة الثانية..تحركت لتشاركه جلسته..ظلت تنظر إليه..تفكر برد فعله البارد، تجاهله ولامبالاته تلك..
تنحنحت لتهتف فجأة :
-كنت فاكراك هتفرح عشان بقيت ألبس طويل شوية..لقيتك بتقولي مبروك وخلاص
توقف عن العمل علي الحاسوب، ليغلق الشاشة..ثم حدق بها للحظات، قائلا بتنهيدة:
-عايزة ايه يا ايتن؟
ايتن بإندفاع :
-عايزة اعرف البرود اللي انت فيه ده هينتهي امتي
اجابها بجدية:
-لحد ما نهدي شوية..وياريت بلاش تعصبيني وتعاندي كتير
وبعدها تحرك تلقائيا إلى الخارج تاركا اياها تحترق بنار الغيظ ومرارة الخسارة فها هي قد خسرت النقاش سريعا حتي قبل البدء به
– حمزة…انا اتعودت على كده..اتعودت اقول لأ… اتعودت أن محدش بيتحكم في لبسي ولا حد بيحاول يغيرني…حتى لما اتخطبت مكنش بيغير عليا كده وماما كانت اه بتضايق من لبسي بس مكنتش بتغصبني على حاجة…
– اتعودتي تقولي لأ لأي حد بس مش لجوزك ! الوضع دلوقتي اختلف…
– انا مش عارفة اقولك ايه بس ياريت تفهم.. ان انت اتجوزتني وانا بلبس كده و شوفتني كده و حبتني كده و اتخطبنا وانا كده واتجوزنا، ليه بقى عايز تغير فيا حاجة
– تمام … بنتفق دلوقتي…انا مش بمنعك لا من شغل ولا بخنقك بلبس معين…انا كل الحكاية أن مبحبش اللبس القصير ده… في لبس كتير اوي شيك وأنيق جدا طويل
صاح قائلا بهدوء :
– انتي متعرفيش أن في نوع من الرجالة لما بيتجمعوا سوا في قعدة بيحكوا ايه ويوصفوا تفاصيل ازاي ويتكلموا اصلا ازاي !
ليردف قائلا بضيق:
– لو ركزتي كده وشوفتي من بعيد راجل شايف بنت لابسة هدوم ملفتة اوي هتلاقي نظرات بشعة و رمي كلام مقرف من بعيد.. انا أدرى بدماغ الشباب دي…
البنات اللي زيك بيتعاملوا بحسن نية في أوقات كتير وبيتفهموا غلط للأسف…انا لو بحكم عليكي من لبسك مكنتش اتجوزتك اصلا.. بس صدقيني
في نوع من الرجالة مقرف اوي و انا للأسف بشوف نظراتهم و انا راجل وأنت مراتي.. يعني تخصيني بتاعتي انا… فطبيعي هغير عليكي ..والله ما تحكم على قد ما هو غيرة عليكي وخوف.. مش عايز حد يبصلك بصة وحشة او تسمعي كلمة وحشة معاكسة من حد
– انا اسفة يا حمزة…حقيقي مكنتش متخيلة كل ده…كنت فاكرة ان طالما البنت تقدر توقف كل واحد عند حده خلاص
قبلها من يدها بنعومة قائلا:
– حبيبتي انتي بتشتغلي…يعني هتكوني عرضة اكتر للمضايقات..عارف ان كل الفكرة انك عايزة تلبسي احلى لبس وتشوفي نفسك حلوة..
ليردف بنبرة خشنة :
– بس حبيبتي ومراتي يعني خط احمر قدام الناس كلها
اومأت برأسها:
– أيوة واقتنعت مع أن كنت حاسة اللبس القصير احلى عليا بس مش مشكلة مش هلبسه طالما هيضايقك.
غمز لها قائلا:
– بصي مانكرش انه حلو…بس حلو ليا وفي عينيا انا بس
ابتسمت بخجل، قالت بشرود:
– تفتكر سبب مشاكلنا أن احنا ملحقناش نتخطب مدة طويلة…يدوب فترة قصيرة اوي.. شهر ونص
قهقه ضاحكًا:
– ممكن … كان المفروض نتفق على أساسيات حياتنا قبل الجواز … بس الحمدلله دلوقتي اتفاهمنا
ضحكت ايتن :
-انا ملحقتش اعمل خطوبة اتقدمت واتجوزنا علطول
لف ذراعه حول خصرها وهمس قائلا:
-من حقي بصراحة ما هو في حاجات كده لو ما اتلحقتش بتتخطف وأنتِ فيكي الطمع
سمعت رنين هاتفها لتبتعد عنه لترى من…
نظرت الى الرقم الذي تعرفه جيداً… وبالتأكيد لم تستطع الرد أمامه
_________________________________
في إحدى المطاعم..
وجد أفنان تجلس أمامه، ثم قال بلهجة جدية وهو يتفحصها:
-سألت كويس..وعرفت ان مصلحتنا واحدة
أفنان بتساؤل:
-مش فاهمة..حضرتك قولت إنك عاوزني بخصوص ايتن
لمعت عينا مهاب بخبث:
-بالظبط كده
اراح مهاب ظهره للخلف قائلا بثبات:
-في بيني وبينها حساب قديم..لازم يخلص..وانتي اكيد هتساعديني فيه
أفنان بفضول:
-حساب ايه دا
مهاب بحدة:
-ميخصكيش تسألي..انتي عاوزة حمزة..وانا عاوز ايتن
-طيب عينيا ليك..بس فهمني الأول انت ناوي علي ايه؟
مهاب بصوت يشبه فحيح الافعي:
-ناوي الأول اعلمهم الأدب..بحاجة صغيرة..وبعد كده حاجة اكبر…
-ازاي؟
هتف بنبرة شيطانية خطيرة :
– بس الفرق أن انتي عايزة توصلي لحمزة .. لكن انا بقى عايز امحي ايتن تماماً من الدنيا
- يتبع الفصل التالي اضغط على ( رواية قانون آيتن ) اسم الرواية
تعليقات
إرسال تعليق