رواية زوج للايجار الفصل السابع عشر 17 - بقلم أميرة محمد

   رواية زوج للايجار كاملة  بقلم أميرة محمد   عبر مدونة كوكب الروايات 

رواية زوج للايجار الفصل السابع  عشر 17

 
روجينا بتوتر : الياس لا كده بدري اوي احنا اتفقنا علي خطوبه بس
ليقترب حسام بهدوء وهو ينظر لها بثبات ليقول بأبتسامه: خطوبه من كتب كتاب مش فارقه بعدين انا مش هعرف اتعامل براحتي طول منتي مش حلالي بعدين انتي عارفاني من زمان مش الخطوبه اللي هتعرفك
الياس بابتسامه : حسام معاه حق يا روجينا الحلال حلال وكتب كتاب ممكن يطول مش هتقوموا تتجوزوا بكره ولا اي
ليومئ له حسام بأبتسامه وهو ينظر لروجينا بغموض ليقول : يلا يا شيخ ابدا لتشعر الاخري انها تكاد تبكي لم تشعر بشئ حتي اتي الياس بالدفتر لتوقيعها لتمضي بأيد مرتعشه وهي تتمني ان يوقفها احدهم
شادي بسعاده : مبروك يا حسام الف مبروك وانتي كمان يا روجي مبروك لينظر له حسام بسعاده وهو يقول بمزاح : الله يبارك فيك يا استاذ شادي عقبالك بقي يعم وبعدين اسمها مدام روجينا مش روجي انا بغير امال
ليضحك الجميع عليه لتنظر نايا لروجينا بتركيز وهي تحتضنها لتقول بهمس : الف مبروك حذرتك من اللي جاي بس مسمعتيش كلامي اللي حصل حصل بلاش تستغلي حسام وشوفي حياتك وانسي اديكي شايفه شادي فرحان ازاي ده كافي ينهي كل امل ليكي اظن ولا
لتبتعد وهي تبتسم لها تحت نظرات روجينا الكارهه ليقول مؤمن بصراخ : يجدعان خلصنا الف مبروك وربنا يتمم علي خير فين بقي صنيه الكنافه يحماتنا
حسام بأستغراب : حماه مين يحبيبي حماتي انا بس لينظر له مؤمن ببراءه وهو يرمش : الله يا حسام يا حبيبي محنا كلنا واحد يبقي اسمها حماتنا حياتنا
ليقترب منه حسام بغيظ ليركض الاخر خلف الياس ويقول بخوف : بقولك اي خطوه كده خطوه كده انا مستخبي ورا الحكومه المأذون لسه ممشاش
حسام بضيق: وحياه امك يا مؤمن لعرفك لا انت ولا حكومتك يخويا تلزموني خلاص بقت بتاعتي ليقترب من روجينا وهو ينظر لها بتركيز لتتقابل نظراتها المتوتره مع نظراته ليقول بهدوء: مبروك يا روحي اخيرا بقيتي ملكي ومش هضطر اخترع اسباب عشان اجيلك
لتبتلع الاخري ريقها بتوتر وهي تحاول الابتسام ليقول الاخر بهمس وهو يضغط علي كل حرف : وشك يتفرد كله بدا يشك فيكي ولا اي يا مراتي العزيزه مش فرحانه بوجود جوزك برده لينهي حديثه بسخريه لتنظر له الاخري سريعا
تالي بسعاده : مبروك يا جماعه شكل وشنا حلو عليكوا صح ليقترب مؤمن وهو ينظر لها بهيام ليقول : ده يا اجمل وش في الدنيا امتي بس الدنيا تحن عليا وابقي زي الواد حسام لينظر لحسام وهو يقول : لا مؤاخذه يا حس انا مش بحسد مجرد بنق
حسام وهو ينظر لروجينا بثبات : اذنك معاك يا مؤمن عن اذنك يا الياس هاخد روجينا ونتكلم شويه ليقول الاخر بصرامه: انت بتقول اي يا حسام لا طبعا
لينظر حسام له وهو يرفع احدي حاجبيه ليقول الاخر بأبتسامه بلهاء : الله يجدع بهزر مينفعش اهزر معاك غور يلا ومتتاخرش ليبتسم حسام وهو يسحبها خلفه
الياس بهدوء : بالمناسبه دي يجماعه انا قررت اخد نايا ونقعد يومين عند عمي لازم فعلا الكل يعرف اننا اتجوزنا حتي عشان لو حصل حاجه بعدين نكون متوقعينها
نونيا بتركيز : معاك حق سواء اهلك او أهلها لازم يعرفوا بعد اذنك يا الياس عايزه نايا فكلمه لوحدها ليومئ لها الاخر لتسحب نايا بهدوء وهي تصعد للاعلي
__________________
حسام بهدوء وهو يجلس : مبروك لتنظر له روجينا بتوتر وهي تقول : الله يبارك فيك ممكن افهم ليه عملت كده
حسام ببرود: عشان واثق كنتي هتفسخي الخطوبه لتنظر له روجينا بأستغراب وهي تجلس : وواثق اوي كده ليه
لينظر لها حسام بتركيز وهو يقول : وانتي مفكراني غبي ومعرفش انك كنتي هترفضي لا اطمني انا مش اهبل
روجينا بتوتر : قصدك اي يعني ولو مش عايزه هوافق ليه ليقول الاخر وهو ينظر لها بثبات: ميهمنيش الاسباب المهم اللي هيحصل بعدين منكرش اني مبسوط انك بقيتي مراتي وكنت بحلم كتير باليوم ده بس كنت هفرح اكتر لو عيزاني من قلبك
روجينا بضيق : حسام انا حاسه اننا اتسرعنا مكنتش عارفه انك هتعمل كده علي الاقل الخطوبه كانت هتديني وقت افكر واعرفك اكتر وانت قريب مني
لينظر لها حسام بأبتسامه وهو يقول : بسيطه احنا فيها ليكي كل وقتك اعتبرينا مخطوبين بس علي حلال علي الاقل لما امسك ايدك ميكونش حرام
روجينا بحزن : ليه انا قدامك كتير مخترتش غيري وانت عارف اني مش بحس تجاهك بحاجه ليه لينظر حسام لها بتركيز وهو يقول بهدوء: عشان بحبك
لتنظر له روجينا بصدمه وهي تقول : بتحبني ازاي ليبتسم الاخر وهو يقول بتسليه : هكون بحبك ازاي يعني اكيد مش اخوات واتجوزك افهمي متبقيش غبيه
روجينا بتوتر : قصدي يعني من امتي انت عمرك مبينت ليرفع الاخر كتفيه بملل : عادي زي مقولتلك لو مش واثق انك حلالي عمري مهتكلم ودلوقتي بقيتي حلالي اتكلم براحتي واحسسك قدامنا الوقت اللي تحتاجيه عشان تتعودي
لتومئ الاخري بشرود وهي تزفر بشده
_______________
نونيا بهدوء: وبعدين لتنظر لها نايا بتركيز وهي تقول : وبعدين اي
تالي بضيق : انتي عارفه يا نايا متستعبطيش علينا اول خطوه عملتيها انتو الاتنين كنتوا عارفين محدش قالنا ليه انا وتمارا
نايا بهدوء: عشان محدش يعرف والكلام يطلع الحاجه لازم تحصل بهدوء خاصا تمارا كان لازم يحصل كده عشان متقولش ليزن بالغلط انتي عرفاها
نونيا : وبعدين دلوقتي خلاص اول خطوه اتاخدت اي اللي بعد كده لتنظر لها نايا بتفكير : عاصم مفكرني بره وبكده لازم نستغل الوقت ده كويس عايزاكي تعرفيلي كل اللي بيتعامل معاهم عايزه ضربه تيجي المرادي متقوموش
تالي بريبه : مش شايفه ان كده كتير عاصم بيشتغل فشركه العيله يعني اي حاجه هتطوله هتطول الشركه معاهم
نايا بخبث : تؤ عيب عليكي كل اللي هيحصل هيكون بأسم عاصم وكل مصيبه مرتبطه بأسمه بتضعف مكانته رساله صغننه لعمي بكل المصايب اللي حصلت واسهمه اللي بقت في الأرض تخليه يتبري من عاصم حتي ويقعد ميلاقيش جنيه هو والسنيوره
نونيا بخبث : وغير كده الرهان فاكره قبل ما نوقعه عايزين تعويض علي اللي دفعتيه عشان تنتقمي منه الخمسه مليون لازم تدفع
نايا بأبتسامه واسعه : يبقي نجهز للحفله ولا اي عندنا حفله علي شرف عاصم بيه ونرمين هانم انما عايزاها تسمع البلد كلها بالبلاد المجاوره ولا اي
___________________
: طب ليه بيداري كده وبيداري كده وبيداري ده لولا لالا ليه يحيرني وليه يهجرني الله العب يا ملعب
عدي بصدمه : اي ده اي اللي بتهببيه ده لتنظر له الاخري بسعاده وهي تقول: دودي حبيب مامي تعالي بسرعه قلت بقي اي شكلي تخنت حبتين فحبيت اخس بقي
عدي بسخريه: حبتين اي يضنايا قولي الف حبه قولي طنين انما حبتين دول مش ملاحظه انك افورتي
لتزم الاخري شفتيها بضيق وهي تقول : سادد نفسي زي ابوك دايما قصره اي رايك فيا كده لينظر لها الاخر بتقزز وهو يقول : اي ده انتي مفكره نفسك روبي اي اللي عملاه فنفسك ده
لتنظر الاخري لنفسها باستغراب لتقول بضيق : مالي منا زي الفل بس معرفتش اطلع علي جهاز الجري قلت انا قادره اقف عشان اجري بعدين قلت اقعد علي جهاز اللي زي عجله روبي قعدت الاول معرفش اوصله بالكوره اللي فبطني بس الحمد لله ثانكس جود قلت اقعد علي كرسي منه اريح ضهري ومنه اتمرن
عدي بسخريه : اه وده ازاي لا مؤاخذه بالبنطلون والجاكيت ده اللي شويه وهيفرقع عليكي لتقول الاخري بغرور مصطنع : اسكت يجاهل ده ترنج التمرين عارف امك لما كانت بتلبسه قبل الجواز ده كان بيعمل اي في الشباب
عدي بضيق : اديكي قولتيها قبل اي ذنب عيني البريئه في التلوث اللي بتشوفه ده انتي بوظتي كل تخيلاتي عن المزز اللي بتعمل رياضه اتفرج عليهم عادي ازاي دلوقتي
تمارا بتقزز : قصره يا كذانوفا قلت اقعد بقي علي الكرسي وارفع ايدي كدهه وكدهه و اه بطني لا بلاش تعبت خلاص معدتش قادره
عدي وهو يرحل : انا ماشي مرارتي قربت تتفقع لسه محركتش ايديها وتعبت انا لازم اسرق بطاقتك اشوف السن كام لتكوني خدعتي المسكين ابويا وضربتي البطاقه ده سن اليأس مش سن شباب
تمارا بضيق : ماشي يا عدي وحياه امك لعرفك انا زهقت متتولد وتسكت بقي عاجبك التهزيق اللي باخده بسببك وياريتك هتبقي عدل انما لو طلعت زي اخوك الكبير كده يبقي اوفر
________________
منار بحزن : خلي بالك من نفسك يبني وخلي بالك من نايا واول متوصلوا طمنوني ليقترب الياس منها وهو يحتضنها ليقول بحب : متقلقيش يا ست الكل انا عرفتهم وهما هيستقبلونا وبعدين كلها يومين ونرجع باذن الله
منار بخوف : ربنا يستر يبني انت عارف اني بخاف منهم بس يومين وهيعدوا صح ليومئ لها الياس لتقول نايا بمرح : متقلقيش يماما اي حد يقرب منه هعضه سناني حاميه امال مش شايله ده كله علي بلاش
الياس بابتسامه : خلي بالك من روجينا وماما يحسام وانا هكلمك كل يوم اطمن عليهم لينظر حسام لروجينا بحب وهو يقول : متقلقش هما فعيني خلي بالك انت بس من نفسك ومن نايا
 لينظر الاخر لنايا وهو يقول : تمام يلا يا نايا عشان منتاخرش ليقترب مؤمن منه وهو يقول بدراما : انا مش عارف هقدر اعيش يومين من غيرك ازاي مع الأوغاد دول يضنايا ارجع بسرعه يا الياس
ليمسك به شادي سريعا وهو يقول : مش وقتك يا مؤمن يلا عشان متتاخروش ليذهب الياس سريعا مع نايا سريعا وهم يلوحون لهم
________________
مؤمن بضيق : برايكوا هيحصل اي هناك هيتقبلوا جوازهم افرضوا عايزين يقابلوا اهل نايا هنقول اي
شادي بتفكير : مش عارف بس لازم نستني وندعي ميطلبوش حاجه زي دي والا هتبقي مصيبه لو حد عرف اللي حصل
حسام بهدوء: بلاش نتخيل حاجه قبل ما تحصل خلونا نسيبها لوقتها ليقول مؤمن وهو يزفر بضيق : انا مش مرعوب غير يعرفوا ان علاقه نايا والياس مش حقيقيه
شادي بأستغراب : وهيعرفوا منين انت غبي ليقول مؤمن بسخريه : لا يا اذكي اخواتك بس طريقه تعامل الياس مع نايا اولا مبيقربش منها حتي لو تمثيل ثانيا مفيش مشاعر بينهم واضحه في الكلام ثالثا وفوق كده مش بيناموا فنفس الاوضه تخيلوا يكتشفوا كل ده
حسام وهو يومئ بهدوء: مؤمن معاه حق هما عايزينهم يروحوا عشان يعرفوا كل ده فتخيل كل حاجه تتكشف ويعرفوا ان الياس ونايا جوازهم مزيف وأنهم قاعدين مع بعض بأتفاق وقتها كل حاجه هتدمر
لتضع الاخري يديها علي فمها بصدمه وهي تستمع لذلك الحديث لتقول بفرحه لم تستطع مدارتها وهي تبتعد عن ذلك الحائط : يعني اي يعني الياس مش بيحب نايا وفوق كده جوازهم مزيف ومقربش منها
لتضحك وهي تدور حول نفسها بشده : ياااه هم وانزاح من علي قلبي كنت مفكراه بيحبها اتاريه مجرد اتفاق ايوه بقي يا شروق يا جامده كده الحظ بدا يلعب معاكي تاني
لتمسك بصوره كانت تضعها في كتاب لتتلمسها بحب وهي تقول : لسه في فرصه تكون ليا وهتكون يا الياس انت ليا وبس لشروق يروحي ترجعلي بالسلامه واول حاجه نعملها اخليك تبدأ تبصلي بنظره مختلفه وهيحصل
________________
نايا بذهول : هو ده بجد البيت بتهزر ده قصر لينظر لها الياس بهدوء وهو يقول بسخريه: سبحانه اهو القصر ده كله وسايبين عيال اخوهم مكانوش لاقيين ياكلوا يلا عشان ننزل
ليجد الجميع في انتظارهم ليستمع لصوت كبيرهم وهو يقول بهدوء: يا مرحب بأبن الغالي ازيك يا ابني مكنتش مصدق توفي بوعدك وتيجي بس الظاهر ان زي ابوك كلمته متنزلش الارض
الياس بهدوء: متعودتش اوعد وموفيش ازيك يا عمي ليبدا الجميع في الترحيب بهم ليقول الاخر بهدوء: خد مرتك واطلع فوق يا الياس اوضتك جاهزه علي مترتاحوا يكون الغدا وصل
لتسحب نايا كم الياس سريعا وهي تقول بهمس : اي ده مرات مين اللي يطلع معاها احنا متفقناش علي كده ازاي هنام فأوضه واحده
الياس بهمس : اصبري نطلع ونتكلم عشان محدش يسمع ليصعد مع سيده لتريهم غرفتهم لتقول ببشاشه: اتفضل يا ابن الغالي ابوك كان عزيز عليا اوي ده انا اللي مربياه علي ايدي
الياس بأبتسامه : تسلمي تعبناكي معانا لتقول الاخري بحنان : طب ياريت كل التعب كده ده انت بتفكرني بأبوك كان امير بجد يلا يبني ارتاحوا شويه عن اذنكوا
لتغلق نايا الباب خلفها وهي تلتفت بقوه : هنعمل اي دلوقتي يعني اي انام معاك فاوضه واحده
 ليقول الياس بضيق: صوتك يا نايا متنسيش انك قدام الناس مراتي ولازم ننام فأوضه واحده جايين نشيل الشك فدماغهم مش نزوده عايزاني اقولهم هاتولي اوضه ولمراتي اوضه
نايا بتوتر : بس انا مكنتش متوقعه كده بعدين انا فكرت الموضوع سهل انا بجد بخاف اوي لما ببص لعمك بحس اني عايزه اعترف بكل حاجه عملتها واللي لسه معملتهاش
الياس بتعب : متقلقيش هو مش سهل ومحدش يقدر يضحك عليه ودلوقتي سبيني عشان تعبان اوي لتقول الاخري وهي تحرك يديها بضيق : انت كده بطمني يعني بعدين انت نايم علي السرير ليه
نايا بسخريه: تعبت من اي يخويا قصدك تعبت من الزحف بست سماح بتاعتك بعدين مش انت الراجل وكده المفروض تقولي هنام علي الكنبه وانتي السرير وتعمل فيها جنتل وكده
الياس بضيق : انا مش جركن ماشي ومش هعمل كده اسيبك تتهني وانا ضهري يتقطم لا يختي وبعدين مش بعض انا يا تتخمدي جمبي يا تشوفيلك اي حته نامي فيها
لتنظر له نايا بعصبيه وهي تقول : ماشي يا الياس وحياه امي لعرفك اتخمد يخويا نوم الظالم عباده
الياس ببرود : طب نامي عشان تطبقي المثل بقي مش هيكون بتقوليه وانتي مش بتنفذيه لتضرب الاخري الارض بغيظ وهي تخرج وتتركه
لتنظر حولها وهي لا تعلم أين تذهب ولكنها تشعر بالضيق والتوتر من وجودهما معا في غرفه مغلقه لتلمح اسطبل من النافذه لتركض بسعاده وهي تخرج لتذهب له
نايا بفرحه وهي تقترب من احد الخيول لفت انتباهها بشده : الله بجد علي جمالك مكنتش متخيله الاقي خيل هنا اتمني بجد لو اقدر اركبه بس افرض حسوا بيا هسكف اوي
لتستمع لصوت خلفها لشخص يقول بعصبيه : انتي مين وازاي تتجراي وتحطي ايدك علي الخيل بتاعي لتنظر له نايا بخوف وهي تقول : انا انا
ليقول الاخر بعصبيه: بقولك انتي مين انا اول مره اشوفك هنا بعدين ازاي تتجراي وتيجي الاسطبل وانا مانع كله ييجي هنا وخاصا تلمسي الخيل بتاعي
لتنظر نايا حولها بخوف وهي لا تعلم ماذا تقول لتهمس بخوف : الياس انت فين احيه
• يتبع الفصل التالي اضغط على (  رواية زوج للايجار ) اسم الرواية