رواية عشق بغير حسبان كاملة بقلم ندى الشريف عبر مدونة كوكب الروايات
رواية عشق بغير حسبان الفصل السابع 7
كان سالم أخويا باعتله مسدچ علىٰ الواتساب مكتوب فيها:_
أنا هاجي متأخر…. فرصتك النهارده عشان المعاد قرب.
مفهمتش حاجه من الجمله، بس أتأكدت من جوايا ان الإتنين دول وراهم سر..
قفلت الموبايل وحطيته جنبي لما لاقيت مستر تميم جه…كان لابس شورت وتيشرت من بتوع الكوره، شكله كان مختلف تمامًا، لأني متعوده عليه دايمًا بالبدله، أول مره أشوفه بالهيئه دي.
قالي وهو بيحط الشنطه اللي خدها معاه جنبي:_
أيه رأيك؟!
قولتله وانا بسقف:_
كريستيانو في نفسك يا مستر تميم.
قالي بتساؤل:_ انا ملاحظ إن شعرك طول جدا عن أول مره شوفتك فيها، كان قصير وقتها، عملتي ايه؟!
جاوبت بتلقائيه:_ زيت روزماري وزيت جرجير، بيطولوا الشعر بسرعه.
قالي وهو بيمسك موبايله:_
في الحالتين شكلك حلو.
أداني الموبايل وقالي:_
عايزك تصوريني وانا بلعب…ممكن.
خدته منه وقولتله:_ اه طبعـا..يا مستر تميم.
:_ احنا دلوقتي برا إطار الشغل، تقدري تشيلي الألقاب، قوليلي يا تميم.
قولتله بكسوف:_ لا مقدرش أنده حضرتك من غير لقب، مش متعوده وبعدين لازم أديك أحترامك.
قالي وهو بيمشي بعيد:_ نتكلم في الموضوع دا بعدين.
كان سايبلي الفون مفتوح، كنت هدخل أشوف الشات بينه وبين سالم بس افتكرت..التجسس حرام، فتحت الكاميرا وبدأت أصوره، كان بيتعامل معاهم كأنه طفل صغير، ويتقمص لو جه في الفريق بتاعه جون.
تعبت من التصوير فقفلت الموبايل وقعدت أتفرج، لازم أعترف المرادي…انا بحبه…وحاسه انه بيحبني، بس مينفعش أتعشم.
بعد فتره كبيره جه وهو غرقان عرق من اللعب ، وقف علىٰ مسافه مني وقالي:_
كنت بلعب حلو.
سقفتله تاني وقولتله وانا بضحك:_
ميسي في أرض الملعب.
قالي وهو بياخد الشنطه من جنبي:_
بكاشه اوي انتي.
خد الشنطه ومشي، إستنيته نص ساعه وبعدها مشينا، كان خد حمام سريع ولبس طقم كاچول عادي!! مش البدله اللي جه بيها.
قولتله واحنا خارجين:_
سالم قال انه هيجي مش المفروض نستناه؟
“_سالم مش هيجي النادي…هنقابله في حته تانيه.
:_فين يعني؟
” _هنقابله عند الكوبري الجديد علىٰ النيل.
:_طيب مش يلا بينا نروحله.
“_هو هيتأخر مش هيجي دلوقتي، ايه رأيك لو نتعشىٰ سوا.
:_ لأ شكرًا مش عايزه.
” _طب عايزه ايه ونعمله؟!
سكت شويه وانا بفكر بعدها قولت بترقب:_
بما انه جاي متأخر، وحضرتك شكلك فاضي، ايه رأيك لو نركب عجل؟!
ضحك وقالي:_
انتي الوحيده اللي راكبه مرسيدس وعايزه تركب عجل!!
قولتله بإحراج:_
بتبسط أكتر بالبساطه.
قالي وهو بيدور الدريكسيون:_
سيبك بقا من مستر تميم ومن شركته، خلينا نتبسط علىٰ طريقتك.
مستر تميم عمل مكالمه واحنا ماشيين كانت لحد من رجالته..
بعد شويه كنا وصلنا علىٰ اول كورنيش النيل، كانت ناس كتير واقفه هناك، صحاب واخوات وعائلات ومتجوزوين، وكابلز جداد.
نزلت من العربيه ولاقيت مستر تميم إداها لواحد كان مستنينا، تقريبًا دا اللي رن عليه واحنا جايين.
الراجل شاور لمستر تميم علىٰ حته بعيده وبعدها ركب العربيه ومشي بيها..
مستر تميم قالي وهو بينحني زي الكرتون:_
ممكن تسمحيلي وتشرفيني وتركبي عجل معايا؟!
ضحكت وقولتله بنفس طريقته:_
طبعًا يا مولاي.
مشينا عند الحته اللي شاور عليها الراجل، كان راكن فيها عجالتين..
ركبت واحده ومستر تميم واحده…قالي وهو بيركبها:_
الناس متعرفش ان اللي بيركب عجل دا مليونير!!!
قولتله بضحك:_ كدا احنا كلنا شبه بعض…
إتحركنا بالعجل ومشينا في الطريق العمومي بتاع العربيات..
حقيقي إحساس مختلف، وعلىٰ رأي أم كلثوم!!
الليل وسماه، ونجومه وقمره، قمره وسهره، وانت وانا!! يا حبيبي انا.
سوقنا وسط العربيات واحنا بنضحك، ضحكنا تعبيرًا عن احساسنا اللي جوانا…مستر تميم كان فرحان بدرجه غريبه، كنت أول مره اشوفه شاب عادي زي باقي الشباب.
محسيناش بالوقت نهائيًا، أشترينا شاورما وقعدنا علىٰ صخر كان بيبص علىٰ النيل، جرينا ورا بعض في الشارع، غنينا، إشترينا بخاخ التلج بتاع الأفراح وغرقنا بعض بيه.
كانت الساعه 1 بليل لما سالم جه، اللي قالي لمستر تميم أول ما شافو:_
شكلك سعادتك اتغير خالص، بس لسا وسيم محدش ينكر!!
مستر تميم قعد يضحك علىٰ كلامه، سالم سلم عليه وقالي وهو بيبعد:_
يلا يا تماره عشان نروح..
ومشي ناحيه العربيه، بصيت علىٰ مستر تميم اللي كان بيبصلي بطريقه هادية ورومانسيه، قولتله بإبتسامه:_
مرسي علىٰ الخروجه الحلوه دي.
“_منكرش اني اتبسط، إتبسط أكتر ما بدخل أماكن الباشوات.
:_عشان تعرف بس ان تماره الوقت معاها مختلف.
قالي بإبتسامه:_ أكيد يا تماره.
سكتنا احنا الإتنين وفضلنا باصين لبعض، مفوقتش غير لما سمعت كلاكس سالم اللي وقف بالعربيه قريب مننا.
:_طب أستأذن انا يا مستر تميم…سلام
ميل جنب ودني بهدوء:_ بحبك.
قولتله بصدمه:_ ايه؟!
قالي بضحك:_ مالك وشك احمر ليه زي الفرواله كدَا.
قولتله وانا بتهرب:_انا….انا معرفش…انا همشي.
ضحك وقالي:_
اتفضلي.
جريت علىٰ عربيه سالم وركبت جنبه، مسكته من خده وبوسته وقولتله:_
انا بحبك اوي يا سالم.
قالي وهو بيفك ايدي من حوالين بقه:_ اوعي كدا ايه الحب المقرف دا.
شيلت ايدي وانا بضحك بهبل وبقوله:_ سالم….احنا مبنخبيش حاجه على بعض صح….مستر تميم قالي بحبك.
قالي وهو بيدور العربيه:_ ما انا عارف.
” _عارف ايه؟
:_عارف انه بيحبك.
قولتله بصدمه:_ عرفت ازاي…
قالي بفخر وهو بيعدل ياقه القميص:_
يبنتي انا سالم بعون الله أعرف كل حاجه.
“_انجز قول عرفت ازاي؟
:_بصي يا ستي…
من شهرين ونص تقريبًا لما اتوظفتي في الشركه، بعدها بأسبوع من تعيينك كان تميم بتاعك دا عندنا في الفرع، وسأل عليا مخصوص، لما روحت قعدت معاه قالي انه عايز يتجوزك، وحكالي انه اتكلم معاكي مره واحده، وبعدها كان بيراقبك تقريبًا..
” _بيراقبني!!!
:_متقاطعيش اخوكي وهو بيكلم….المهم…جه البيت وكلم أمك وعرفته ان أبونا متوفي، إتفقت انا وهو علىٰ خطه تخليكي تحبيه، بس الصراحه ان في أحداث حصلت برا اللي كنا مخططين عليه، وامبارح كنا بنتكلم وقالي انه مش هيقدر يخبي عليكي اكتر من كدَا وهيقولك النهارده.
قولتله بعصبيه:_ وايه بقا الخطه بتاعتكم.
أبتسم بسماجه وقال:_ الخطه ابتدت لما قطعتلك كوتشات عربيتك وخبطهالك من ورا وفضيت بنزين العربيه و…
قاطعته بصدمه وقولتله:_ هو انت اللي عملت فيها كدا؟
قال بنفس الإبتسامه:_ آه…والله هو اللي قالي، وبعدين هو قالي إنه متفق مع مديرك اللي اسمه معتز باين، اتفق معاه يزودلك شغل عشان تفضلي لوقت متأخر، وبعد ما بوظتلك العربيه ركبت عربيتي اللي كانت راكنه جنبك بشويه، بس انتي ما شاء الله عاميه ومشوفتنيش، وبعدها مستر تميم اتدخل عشان يعرف يكلمك…
“_كمل وبعدين..
:_ بس اللي بعدها مكناش متفقين عليه، قالي انك اتخانقتي مع السكرتير بتاعه وجابلك حقك، دي كانت برا الموضوع، وقالي انه كان بيعرف أخبارك من صاحبتك الهبله دي اللي اسمها…
قاطعته وقولتله بصدمه:_ بسنت!!
“_ايوا هيا البت الهبله اللي كانت بتشقطني في الحفله، المهم يعني انه كان بيجي عندنا البيت كتير، وفي يوم خد امك وراحوا عشان تختارلك البيت اللي هتعيشي فيه، اختارتلك حته ڤيلا يا بت لا ڤيلا ايه؟ دا قصر…
قولتله وانا بجمع اللي حصل في دماغي:_ عشان كدا مزعقتليش اني رقصت معاه في الحفله، وسبتني أخرج معاه النهارده!!
هز راسه بمعنىٰ اه، قولتله:_
طب وحازم دا تبعكم برضه…!
قالي وهو بيبص في المرايات بتاعه العربيه:_
احنا كنا متفقين علىٰ الرقصه بس في الحفله، بس للأسف نسيت الملف وسيبتك معاه عشان عارف انه هياخد باله منك، ولما روحت لاقيتك روحتي وروحت معاه المستشفىٰ…
قولتله وانا بسند ضهري علىٰ الكرسي:_
يااااه يعني معتز وبسنت وانت وتميم متفقين عليا! انا اتغفلت!!
قالي بهدوء:_ علىٰ فكره تميم بيحبك اوي، وصدقيني لو محستش انه مش هيحافظ عليك مكنتش سمحتله يبصلك أصلًا….انا حكيتلك اللي اعرفه…إبقي أسئليه انتي بقا…اه صح هو عارف إني هقولك كل حاجه لما تركبي.
” _انت بعتله رساله النهارده وقولتله انك هتيجي متأخر وفرصته النهارده عشان المعاد قرب….معاد ايه؟!
قالي بتلقائيه:_معاد فرحكم..!
- يتبع الفصل التالي اضغط على ( رواية عشق بغير حسبان ) اسم الرواية
تعليقات
إرسال تعليق