رواية ملائكة بالف وجه كاملة بقلم طاهر المسلاتي عبر مدونة كوكب الروايات
رواية ملائكة بالف وجه الفصل التاسع 9
نصر:خش للغرفه لوح تالفونه على السرير بملل بدل ملابسه
واستبدل لبسته الانيقه بي توتة مريحة ❤️
ريحانه:خشت وراه وهيا ترمي في كعبها بتعب
نصر:يكلم فيها وعاطيها بي الضهر …….غضوا بنطلع الشباب مدايرين سهرة
ريحانه:تعطي فيا في علم انت ولا تستأذن
نصر:تلفت وكان بيتكلم لكن الصدمه سكتاته …….شن هادا ؟
ريحانه:وقفت وهيا ناسيه ………شنو ؟
نصر:شن يلي في يدك ؟
ريحانه:شافت بين يديها وكان ولدها راقد زي الملاك قامت عيونها وهيا تتهرب من السؤال
امك مسكينه تعبانه قلت يرقد فوق اليوم
نصر:وعلامات الاستهزاء على وجها …….يا سلام من امتى الحب لي امي فجأه الكدب
ريحانه :حطت البيبي بهدوء على السرير ……مش ناقصه دوتك الفاضيه
انت بكرا طالع وانا بنمشي لي رباب
نصر:متمشيش بروحك
ريحانه:والله ؟
ومنو بنرفع ان شاء الله امك ولا انت ؟!
نصر:دبري منعرفش ارفعي اختي ولا امي
ريحانه:مستحححيل هادا ما ناقص ……حطت يدها في نصها
وبعدين تعالا جاي علاش منمشيش بروحي ؟!
نصر:ابتسم بي استفزاز……لاني مش واثق فيك😏
ريحانه:لا والله؟ع اساس انا يلي الثقه ماليتني من جيهتك !
نصر:انا هادا يلي عندي بتمشي ارفعي حد معاك بتبيش ترفعي حد مفيش مشي
ريحانه ضحكت بهزوه…….هه لالالا الباين انت صدقت روحك خلاص منو انت باش تأمرني ولا نسيت ان……..
نصر:قاطعها….انتي يلي نسيتي الباين انك مرتي توا والحكم في يدي انا توا
ريحانه:قامت حاجبها …..اخر كلام هادا؟!
نصر:اي دبري من يمشي معاك ولا قعمزي
ريحانه:تعصبت و رمت عليه المخده وطلعت من الغرفه
نصر:بصوت عالي يسمع فيها ………اي انتي هادا حد جهدك لوحي المخاد بس
ريحانه:بصوت متعصب من بعيد …..ضم عليا فمممممممممك
نصر:ضحك لان كان جدا مستمتع بي حرق دمها
___________________________________
نذير:جيت بناخد حوايج بايت برا اليوم …..وخش يطلع في حوايجه بدون اهتمام ليها
ندى:وانا؟
يعني بنقعد بروحي
نذير:يجاوب فيها بدون نفس ……. مش رحيصيرلك شي
ومش رح تحتاجي ولا حاجه الحوش فيه كل شي
ندى:عادي لو قعدت مع امك؟
نذير:باب الحوش بيتسكر بي المفتاح متعبيش روحك
ندى:ليش باهي شن فيها لو قعدت مع امك واختك ع الاقل مش بروحي
نذير:ضحك وهوا عاطيها بي الضهر …….انتي متخيله ان يلي بعد يلي درتيه مزال بنشوفلك اصلا!
لازم تتعودي ان مجرد ما نطلع من الباب هادا رح يتسكر بي المفتاح 6 ولا7 مرات
ورح يقعد قلبي مش مرتاح ولا بالي رح يهدا انك مديريش شي يوطي راسي بين الناس
ندى:رفعت صوتها ….انت شنوووو
الاعصاب ركبوها ……معش تعاملني هكي ندير نطلع لي حوش بابا حتى من توا ره !!
نذير:لوح الملابس يلي كانت في يده وقرب عليها ……والله؟!
مزال ليك عين حتى تهددي انتي ؟
اطلعي تفضلي الباب قدامك اطلعي
ندى:ساكته وتشوفله
نذير:عيط عليها اكتر …..اطللللعي اقلبي وجهك
بري روحي وقولي لي بوك وخوتك يلي صار ……امشي خلي نحكي الكلام يلي سمعته والوعود والحب وخطط العشاق يلي سمعتها من حضرتك وانتي على ذمة راجل تاني يا محترمه
لكن هادا وجهي كان مربيتكش من اول وجديد
ندى:بصوت عالي …..ربي نفسك الاول انت كان فيك ذرة رجوله متاخدش وحده حبيبها كلمك تسيبها وعرفك ان نحبو بعض ورفضت وكملت وخربت حياتهم الاثنين
نذير:فقد اعصابه…..سكرررررري فمك
ندى:مش مسكراااته لازم تفهم وتخش دماغك مش مرتك انا باش نصووونك افهمممم
نذير:دفها بقوته لين طاحت على السرير …..وكان بيكمل عليها وبيمد يده بس قاطعهم صوت الباب
نذير:اياني وياك تطلعي من هنايا ……وطلع من الغرفه بيفتح الباب
ندى:حطت يدها ع فمها وهيا تبكي عشان مطلعش صوت 💔
ريحانه:اهلين كيف الحال ❤️
نذير:بي استغراب ….كويس الحمد الله
ريحانه:امم نبي ندى هيا داخل صح ؟
نذير:توتر ومعرفش يجاوبها ……زعلاش في شي لسمح الله ؟
ريحانه:ضحكت بي احراج….اسفه جيتكم في وقت متأخر بس ضروري شوي
بكرا طالعه لي صاحبتي ونصر مش راضي نمشي بروحي فــ قلت نشوف ندى لو تخليها تمشي معاي
نذير:والله شن بنقولك بكرا …..
ريحانه:بكرا طالع انت ونصر ساهرين مع الشباب نعرف
يعني ندى قاعده الله يخليك خليها تمشي معاي
نذير:ارتبك وتحشم يردها …….تمام لكن بشرط انا نوصلكم ونروح بيكم
ريحانه:عادي مفيش مشكله
نذير:تمام تو نقلها تكون جاهزه بكرا على الساعه كم ؟
ريحانه:الساعه4 العشيه
نذير:تمام بي اذن الله
ريحانه:فهمت ان نذير ميبيهاش تخش لي سبب معين سحبت نفسها بلطف ورجعت شقتها
رجع نذير لي غرفة النوم خدي كل شي يحتاجه ولما وصل للباب تكلم بدون ما يتلفت غضوا كوني جاهزه الساعه 4 بكرا
ندى:لي شنو؟ بنجهز روحي لي شنو بزبط؟
نذير:متفرحيش مش مروح بيك مش معديهالك هكي
في مشوار غضوا بتطلعيه مع مرت خوي ورح يكون اخر مشوار ليك غير تحشمت نردها بس
ندى:مردتش عليه واكتفت انها تشوفله بنضرات حقدددد
_________________________________
طق الباب بعنف والصوت كان عالي كأن حد جاي عشان يتهجم علي اصحاب البيت
ناديه:ابتسمت بي استفزاز…..اهو جي يجري باش يرجعك زي الكلب
الرجاله ميجوش الا بي الطريقه هادي
شيخه:قرنت حواجبها بي استغراب …..انتي شن قصدك ؟
شن قلتيله
ناديه:مش مهم شن قلتله نوضي لمي حوايج ولدك وروحي مع راجلك بلا هبال زايد
شيخه:بكت وهيا معصببببه……من قاااالك ان نبي نرجعله من قالك
انتي كيف تدخلي في حياتي هكي
ناديه:وقفت….هادا بدل ما تشكريني ان خليته هوا يجي يرجعك مش انتي تروحي بروحك بدون كرامه هادا جزاتي ؟
شيخه:تعصبتتتت بي هستيريا …..شن تحححححكي انتي من قالك ان رح نرجعله ولا نبيه
فهميني انتي علاش تتصرفي معاي هي في شنو ضايقتك انا حتى زياراتي ليك مكانتش هلبا علاش قاعده تتصرفي معاي هكي حرام عليك
ناديه :كملتي ؟؟
بري افتحي لي راجلك يالله
شيخه:مش فاتحه ولا راجعه معاه اصلا …..وخشت لي غرفتها جنب ولدها
الهادي:خلي البنت في حالها وعطيها حرية التصرف هادي حياتها وقراراتها هيا المسؤوله عليهم
ناديه:بالله برا افتح الباب لي الراجل واطلع منه الموضوع هادا خليني نحكي معاه انا انت متدخلش
الهادي:كان مستسلم تماما لي قراراتها وشخصيتها القويه وبكلمه منها ينفذ طلباتها حتى لو كان مش مقتنع بيهم…..
_________________________________
كفاح:احكيلي خيرك مضايقه؟
طه مقصر معاك في شي مزعلك ؟
نغم:ميعاملش فيا كويس ابدا محسسني كأن جايبني من الشارع
مسحت دموعها …..انا خلاص رح نرجع بيت اهلي الوضع هادا مستحيل نعيش فيه ولا نطيقه مستحيل
كفاح:جاوبتها بصدمه……لا حبيبتي الله يهديك مش هكي ….ديمه المتزوجين جديد هكي بداية حياتهم لازم من المشاكل العراكات لين ياخدو على بعض ويفهمو بعض كويس ومع طولة البال والمسايره اكيد الحياة بتتحسن وبعدين شن بيقولو عليك الناس لو روحتي بيت اهلك وانتي عروسه شهرين بس صدقيني مستحيل يرحموك بي كلامهم
نغم:انتي مش فاهمه يلي نحكي عليه طه سلفك اكبر حقير شفته في حياتي انتي متخيله كادب عليكم كلكم مفهمكم ان سافرنا تركيا شهر عسل وهوا رفعني معاه تونس
ملوحني في الشقه ويسهر للفجر ومخليني بروحي
من غير الشرب والبنات يلي مينعدوش من كثرتهم والسب فيا وفي اهلي بدون اي سبب
تبيني نتحمل هادا كله ونسكت عشان كلام ناس فارغ ؟
ويصرف علي بنات ومعيشهم في رزقه انتم ما تعلمو بي شي كفاح كل شي شفته بعيني وسمعته بوذاني
كفاح:تشوفلها بصدمه ومش عارفه حتى شنو ترد عليها بعد الكوارث يلي سمعتها
قاطع حديثهم دخول طه وانور لي الصاله وهما يضحكو ويهدرزو
واول ما شاف طه مرته تمسح في دموعها وكفاح وجها ميتفسرش عرف ان نغم حكت شي لي كفاح وفضحاته !!
طه:تغيرت ملامح وجها من ضحك لي توتر …….هيا ليل ره نوضي بنروحو
نغم:مسكت اعصابها ……. ان شاء الله
انور :كان الشقه ناقصتها حاجات خليكم باتو اليوم هنايا وغضوا ساهل
طه:لالا الامور كلها لوز الحمد الله
نغم:رتبت وشاحها وناضت .زمدت يدها بتسلم على كفاح بس كفاح حضنتها وهمست في وذنها بصوت واطي
كفاح:متتصرفيش لين شيخه تروح هيا رح تعطيك الحل دماغها يوزن بلاد
مديريش حاجه تندمي عليها مرات يطلعك بي فضيحه وتطلعي انتي الخاسره
وبعدت عليها
نغم:اشرتلها بي عيونها بمعنى تمام
كفاح:حاولت تبدل تعابير وجها وخلت نفسها طبيعيه ……الله يبارك عليها ياطه طلعت عاقله وقنينه ربي يخليكم لي بعض ويهنيكم
طه :الله يسلمك سامحونا كان تعبناكم
انور:اياه شنو يلي درناه زايد تعبكم راحه
وطلعت نغم مع طه بعد ما تمنو لي انور ومرته ليله سعيده❤️
طه:همسلها بهدوء……علاش كنتي تبكي عند كفاح شنو يلي كنتي تحكيلها فيه
نغم:ولا شي هدرزنا وجابت سيرة اهلي وقتلها قداش استاحشتهم
وصلو الاثنين عند السياره ووقفت نغم قدامه
نغم:امتى بترفعني حوش اهلي ؟
طه:يمضغ في الستكه بي استفزاز ……والله انتي وشطارتك
نغم:عقدت حواجبها بي استغراب .شطارت شنو ؟
طه:نشوفو كيف تحافضي على اسرار راجلك وحوشك قبل بعدين ساهل
نغم:مزادتش معاه كلمه
فتحت باب السياره وركبت والوضع كان صمتتتت
___________________________
على باب الشقه كانت نجمه بتروح بسوقفت شوي لان رباب اذكرت شي بتحكيه زي عادت اي بنت متحلاش الهدرزه الا على الباب ❤️
رباب:المهم بعتتلي ريحانه رساله بكرا بتجي تهدرز
نجمة:تبصري انتي …..تي عروسه البنت قاعده اكيد توا عزايم من اهل راجلها وطلوع هيا وياه
قبل
رباب:اضحكككي ……حبيبتي ريحانه واماليها معندهمش العادات والتقاليد هادم ياقلبي
لان اغلبية عيشتهم كانت برا
نجمة:تنهدت بوجع ……استاحشت اهلي تعرفي 💔
حوش جدي وعمامي واعراسهم وبابا
اففف يا رباب كل يوم يفوت عليا وانا وحيده وضايعه نموت الف موته بدات بابا معش قادره نتحمل اكتر من هكي
رباب:لمعو عيونها كأنه الاحساس وصلها بزايد ……اففففف عاد خيرك انتي شن جاب السيره هادي علاش توجعيلي في قلبي توا
نجمه:معش قدرت تمسك دموعها اكتر وبدت تبكي
تبكي بشهقه كأن طووول الوقت يلي مر عليها كانت كامده وسط قلبها 💔
رباب:حضنتها وتحاول تهديها ………خلاص خشي باتي عندي اليوم مفيش داعي تروحي
نجمه:بعدت شويه ومسحت دموعها ……لالا انا كويسه لازم نروح عندي كدا حاجه بنديرها
رباب:اووك خلاص بكرا متنسيش تجي بكري تساعديني
نجمه:ان شاء الله❤️
سكرت رباب الباب ووقفت نجمه على باب شقتها تحاول تفتح الباب بس الدموع يلي في عيونها كانو مشوشين النضر عندها
وقفها صوت يحاول انه يكون حنون
ادهم:ممكن دقايق .؟
نجمه:تلفتت….. ولا ثانيه ادهم
خلاص امشي في طريقك الباين انك فهمتني غلط وراح فكرك لي بعيد هلبا
ادهم :صدقيني انتي يلي فاهمتيني غلط عطيني فرصه نتكلم ع الاقل
نجمه:تمام احكي نسمع فيك
ادهم:هنايا بنتكلمو جديات انتي ؟!
نجمه:والله؟ناوي ندخلك الشقه ولا كيف ؟!
ادهم:انا مش م……
نجمه:ادهم الله يخليك خلاص ….انت فاهمني غلط او انا مش مهم
خليني بعيده على اي شي يجيبلي الكلام الزايد بس…….
ادهم:سكر باب شقتها ومسك فمها عشان متصرخش وركبها غصب عنها لي السطح
_______________________________
الهادي:كيف مفهمتش !
نجم الدين:ماسك اعصابه …..كلامي واضح ياعمي
كلم بنت تجيب ولدها وتطلع
ناديه :ان شاء الله انت عندك بنات الناس لعبه امتى ما تبي اطلق وامتى ما تبي ترجع
خلاص البنت عطيتها كلمتها ولا ؟!
توكل ع ربي خلي تكمل عدتها وتتزوج حجزوها من توا
الهادي:شافلها بي صدمه…..شنو؟!
ناديه:شبحتله بسم …..زي ما سمعت
نجم الدين:ماسك اعصابه ……كلم مرتك يا عمي تشد لسانها مش جاي نتكلم مع نساوين انا
ناديه:علاش لما طلقتها بدون علم حد من اهلها كنت حاسب لي التريس انت ؟
نجم الدين:فقد اعصابه وبدي ينادي على مرته …….شيييييييخه شيييييخه
الهادي:يا ولدي كيف تبيها تروح معاك وانت توا مش محرم عليها ؟
نجم الدين:الشيخ في الحوش يستنى فيا كلمها تطلع توااااا هيا وولدها احسن ما اقسم بالله خش نجبدها من شعرها
ناديه:تجبد منو يابابا شنو الكبار يلي في الحوش مش معبيين عينك ولا كيف
نجم الدين :بيتفجر من الاعصاب ……استغفرررررر الله
وطلع قعمز في السياره
الهادي:تلفت لي ناديه وهوا معصب …..شنو انا معنديش كلمه في الحوش ولا شنو ؟!
ناديه:انت اسكت من عليا من يوم خديتك وانا في مشاكلك انت وبنتك
برا شوفها الهانم قلها تروح لي راجلها قبل ما يغير رايه
الهادي:ربع يديه وهوا يشوفلها ……..فهميني بس
شنو التناقد يلي انتي فيه
تعلي في صوتك على الراجل وانتي وياه كلمه بكلمه متبيهاش تروحله
بمجرد ما يطلع تبيها تروح وخايفتيه يغير رايه
ناديه :حطت يديها في نصها وقالت …….والله انتم الرجاله زي بعض
لما الحاجه تبدا ساهل عندكم تلوحوها وتاخدوها امتى ما تبو خلاص تضمنوها وتستغنو عليها
لكن لما تنقرصو وتعرفو ان الحاجه هادي احتمال لو ضيعتوها معش ترجعلكم تبدو قريب تهبلو عليها زي ما صاير لي نسيب العازه والقهره يلي مقعمز برا
سكت الهادي وهوا مذهول بي ذكاء وكيد مرته والحكمه يلي قالتها فعلا صح 100%
قاطه نقاشهم وكلامهم شيخه وهيا لابسه عبايتها وولدها في يدها
الهادي :شنو يابنتي على وين
شيخه:تشوف لي مرت بوها …..عارفه يابوي لا انت ولا مرتك رح تكونو مرتاحين في وجودي هنايا
ولو مطلعتش توا نجم الدين بيدخلكم في مشاكل ليها اول وملهاش اخر
خلي نقطع ونختصر الطريق عليكم وعليا …..وطلعت
طلعت شيخه وسط نضرات بوها يلي كان تايه ومش فاهم يلي صاير
ومرت بوها يلي خطتها نجحت في اقل من 3 ساعات وفاضلها الحوش من جديد❤️
شيخه رغم شخصيتها القويه وعقلها الذكي استسلمت المره هادي ليش؟
لان ببساطه مكانش عندها اهل يساندوها على استرجاع حقها وكرامتها يلي ضاعت
واختارت انها ترجع لي ضعها الطبيعي ع الاقل مش رح تكون عبئ ثقيل على حد وولدها رح يتربى في حضن بوه❤️
___________________________________
نغم:بعد دوش بي مياه شبه مغليه وقفت مقابل المرايا بهدوء تتفرج على نفسها بي روب الحمام والمنشفه البيضا يلي كانت مغطيه شعرها
وقفت وهيا تفكر في كلام كفاح هل تصبر وتشوف حل ؟
ولا اول زياره لي حوش اهلها معش تروحله ؟!
خدت نفس عميييق وطلعت من الحمام واول ما طلعت طاحت عينها على طه واقف متعصب وماسك التالفون
وقفت ورا الحيط كأنها قاصده تتخبى وراه عشان تسمع
والواضح ان طه كان يحاول يتصل بي شخص والشخص هادا ميردش عليه
تعصب وفتح مسج صوتي وسجل كلامه
طه:اقسم بالله مترديش عليا وهادي اخر مكالمه رح تلقيني عندك في الشقه وربي نقتلك سامعتيني ؟
نقتتتتتتتلك ونرميك للكلاب مش انا يلي نتعامل هكي يابنت الكلب
نغم:كانت تسمع في الكلام ويدها ع فمها تخاف ادير اي ردة فعل ويسمعها
استمر طه يتصل ويتصل بس مفيش رد والشي هادا خلاه يزيد يعصب بطريقه هستيريه
نغم:تعمدت انها تكح اكتر من مره وطلعت
طه:لوح التالفون ع السرير وو قف ع الروشن يحاول يهدي نفسه ويشم هواء
نغم:ترتب في نفسها ع المرايا ….خيرك معصب فيك شي ؟
طه:مفي شي
نغم:لو ت…….
طه:قاطعها قتلك مفيش شي غصصصصب تبي تدوي وخلاص ؟
نغم:تمالت نفسها وسكتت
__________________________________
فتحي:معصببب………لانك ناقص عقللللل عندك ولدك هكي كبره والبنت كويس وطلقها ؟
صاحي انت ولا شنو تعلم من خوك انور كيف يعامل في مرته
تشوف فيها حلوه في حقنا نجيبو في الشيوخ عقاب ها الليل ؟!
نجم الدين:منزل عيونه …..غلطه ومعش تتكرر يا بوي خليني نروح توا
فتحي:اقسم بالله مزال تعاودها معاد راجعتلك ولما نجوزها انا بيدي لي الشخص يلي يصونها
نجم الدين :يعض في فمه من الغل …….تم يابوي قتلك خلاص
فتحي :امشي تحرك راضيها بكلمتين
نجم الدين :طلع واللهفه سابقاته والسؤال يلي في راسه لازم يلقى الاجابه متعه لو مهما كلفه الامر
شيخه:سكرت باب غرفة ولدها بهدوء
واول ما سمعت صوت باب الشقه انفتح وتسكر التوتر ركبها
نجم الدين :اول ماشافها سألها بدون مقدمات …….انتي كنتي موافقه عليه ؟!
شيخه:شنو يلي بنوافق عليه؟
نجم الدين :العريس يلي جايبتهولك مرت بوك
شيخه:لا الباين انك برسمي معش عندك عقل وخر من عليا
نجم الدين :مسكها من يدها …..جاوبيني ندوي معاااااااك
شيخه:والله لو ولد حلال علاش لا !؟
نجم الدين:قابلها بي كف زي العاده
شيخه:رجعت شعرها يلي تناثر للخلف ….مستحيل تتغير قاعد زي ما انت
نجم الدين :كانو يديه يرجفو والاعصاب راكبينه بطريقه هستيريه ……
حط يديها على خدودها بهدوء……احكيلي الحق شيخه
تعرفيه من قبل ؟
بجديات كنتي رح تتزوجي بعدي
شيخه:نزلت يديه من عليها …….لا نعرفه ولا نبيه لا هوا ولا غيره تعرف علاش؟
لانك كرهتني في جنس ادم يا نجم الدين
كرهتني في كل شي …..ارتحت هكي ؟!
وسيباته وخشت لي غرفة الضيوف
______________________________
ثاني يوم 🌤
كل شخص في حكايتنا كان ليه شعور مختلف اليوم ❤️
ناضت ريحانه بعد سهر ليله كامله مع طفلها بس كانت سعيده
والشعور هادا حاولت تخبيه على كل شخص يعرفها بس كانت عيونها فاضحتها ❤️
نبيله:طلع نصر؟
ريحانه:اي من الصبح ماشي مع صحابه عازمينه اليوم
تفضلي هي ….هادي شيشته جهزتها انا مش معطله نروح تقريبا بعد المغرب على طول
نبيله:ماسكه البيبي …..تمام خودي راحتك بنتي ولا يهمك
ريحانه :رشت عطرها ك لمسة اخيره ورتبت وشاحها وطلعت
ندى: بي استغراب ……شنو؟
نذير:كلامي اوضح منه مفيش ….قتلك البسي نقاب قبل ما تطلعي
ندى:بس انا مش دايره شي في وجهي
نذير:مسألتكش شن دايره قتلك البسي نقاب انا
ندى:خشت بهدوء خدت نقاب وطلعت
مودة:كيف يعني خربت كل شي ؟
نجم الدين :مديت يدي عليها امس من جديد
حاس بي الكره ليا في عيونه
مودة:ليش مديت يدك رغم انك تعرف كويس انها مش موافقه ولا حتى في بالها الموضوع !
نجم الدين :الموضوع يتعبني
يتعبني مجرد ما نتخيل بس ان في حد تاني ممكن انه يفكر فيها ولو تفكير
نهبل انا ولو ملقيتش سبب او شي ثابت غير تفكيري نولي عليها هيا
يا اما نجرحها بي الكلام او نمد يدي
مودة:سرحت فيه …..كل هادا غيره ؟
نجم الدين :ساند نفسه وهوا يشوف لي السقف ……..واكتر من هكي
مودة:يا بختها ❤️
نجم الدين :شاف لي موده وهوا عاقد حواجبه مستغرب من الكلمه يلي قالتها !
مودة:توترت وغيرت الموضوع
ابتسمت …..شوف يا نجم
اول شي رح نخدمو على موضوع كيف تحسن علاقتك مع زوجتك بعدين نحكو ونعالجو شخصيتك تمام ؟
نجم الدين :تمام
مودة :اول شي
وبدت مودة جلستها النفسيه ❤️
____________________________________
رباب:شنوووووو
نجمه:رباب اهدي 🥹
والله كويس تعرفي كل كلامه امس يجنن
رباب:حطت صونية الشربه على الطاوله ……..احكيلي شن صار ؟!!!
نجمه:بعدت عليه بفزع …….بععدددد كيف تجيبني هنايا هكي
ادهم:نجمه الله يخليك اسمعيني بس
نجمه:كانت تتنفس بفزع وخوف …..شنو بتقول نسمع
ادهم:انا نيتي معاك والله عمرها ماكانت خاطيه نجمه انتي عجبتيني من اول مره شفتك فيها
نجمه:بلعت ريقها ……..شن قصدك؟
ادهم:قصدي انك يابنيه خشيتي القلب❤️
ومنبيش نخليك تمشي لي غيري ولا راضي على قعدتك بروحك في الشقه هكي !
نجمه:اءءء يي يعني شنو !؟
ادهم:يعني نبي نجيبك عندي شن رايك!
رباب :تبصري انتي !؟
نجمه:لا وربي نحكي بجديات
رباب :مصدقتيه انتي ؟!
نجمه:اي الحق لطيف هلبا وقالي انتي الوحيده يلي عرضت عليها الزواج
رباب:مش مطمنه منعرفش
نجمه:علاش 🥹
رباب:مش عارف ……..هادا يلي صار ؟!
نجمه:توترت ..زاي طبعا
رباب :مفي شي تاني ؟
نجمه :لا لا مفيش شي
رباب:اءءء صوت الباب اكيد وصلت ريحانه ديري بالك ع الشاهي مابين فتحت
نجمه:سكتت وهيا متردده
ياترى !
تحكي لي رباب شن صار بعد 3 سعات من الكلام الرومنسي ؟
او لا ؟
تحكيلها ان خش لي شقتها وضعفت وصار كم شي غلط ولحقت نفسها ع اخر لحضه ولا تسكت وتتجنب الكلام في الجزء هادا !؟
رباب:فتحت الباب وهيا مبتسمه ……اهلين اهلين ب….
تغيرت ملامحها لما ندى نحت نقابها وشافتها
ريحانه:حست بي الوضع وحضنت رباب ع طول عشان ندى متركزش
وهمستلها بصوت واطي …..بالله عليك عديهالي ها المره نبوس يديك
رباب :ابتسمت وسلمت ع ندى وخشو مع بعض ورباب مش عارفه كيف تتصرف
نجمه:اهلين اهلين بي …..نصدمت
وشافت لي رباب مش فاهمه شي ؟!
كيف رباب يوم العرس هربت من عرس تام عشان ندى وتوا جتها للحوش ؟!
كملت سلامها وحست ندى ان في شي
بس رباب قامت بي الواجب ورحبت بيهم الاثنين احلى ترحيب
خشت رباب المطبخ ووراها نجمه
اما ريحانه وندى نحو عبايتهم وقعمزو في الصاله …….
نجمه:تبصري انتي ؟؟؟؟
رباب :اسكتي انا قلبي طاح لما جت وراها وربي لما نقتلها الكلبه ريحانه
نجمه:هيا تعرف شكلك؟
رباب:هادا يلي مصبرني تصرفي طبيعي وان شاء الله مش رح تزبطني
______________________________
شيخه:وهادا يلي صار
كفاح:ياعمري والله قريب نجنيت قريب هبلت بس انور قعد يهدي فيا قالي مستحيل نجم الدين يخليها اكيد رح يرجعها
شيخه:اي تعرفي بنموت على منرجعله انا بالله عليك فكيني
كفاح :لو مرت بوك نلقاها نعطيها بوستين شكر على الشي يلي دراته 😂
شيخه:مبردك انتي التانيه
نغم:تشوفلهم وساكته
شيخه:خدت نفس ……اي يانغم كملي القصه
نغم:بس هادا يلي صار من بعد ما شفته كيف معصب امس ع خاطر مكالمه حسيت بهلبا حاجات
نجمه:زي شنو حسيتي مثلا ؟انك ممكن تكملي معاه وتحبيه اكيد بعد العشره صح ؟
ندى:مستحيل رغم اني معمريش ريت حد بجماله وحنيته اليوم الاول لكن مش هادا الشخص يلي يخش قلبي💔
نغم:حاسه بخوف منه لان انسان قاطع يديه من ربي ميعرفش القبله وين تفتح ولا يعرف يحترم انسانه عايشه معاه💔
نبي نروح حوش اهلي ونطلق منقدرش ندير زي ما اغلبية النساوين يديرو منقدرش نتحمل ونساير وكل هداك الكلام
شيخه:تمام عندك حق خصوصا انه معندكش اطفال منه تطلقي وانتي بروحك وتشوفي نصيبك
لكن متخليش حقك يضيع هكي يا نغم
لازم تعرفي الشخص هادا شنو وراه بزبط منو يلي مداير على خاطره هادا كله وليش قاعديدير هكي ؟!
نغم:وانا كيف بنعرف هادا كله ؟!
شيخه:اول شي ………
ريحانه:دخل عليك ؟
ندى:لا قال ان اليوم وانا مش متقبلاته ولا راضيه على الشي هادا
نبي نروح لي حوشنا زي ما انا
اكيد تعرفو شعور البنت لما يبدا قلبها عند شخص تاني صح ؟
رباب:صح كلامك لكن !!!!
ندى:لكن شنو ؟
رباب:انا من رائي لازم تعطي لي جوازك فرصه خصوصا ان راجلك مفيشي عيب !
نجمه:صح حتى انا هكي نقول
ريحانه:انا لا ……انتي مش ملزمه ابدا تعيشي مع حد هكي
ندى:المشكله ان بعد هديك المكالمه كأن مخليني على ذمته عشان ينتقم مني بس 💔
نجمه:صعب موضوعك للامانه
رباب:بلعكس انا نقول حاولي تكسبي ثقته بس ❤️
ندى:منعرفش يصير خير
رباب:وانتي يا أبله شن صاير فيك
ريحانه:انا يلي صاير فيا مستحيل
رباب :شنو
ريحانه:بديت نتعلق بي البيبي تخيلي بديت نحبه وانا بوه طايقاته بسيف في الحوش
نجمه&ندى:مع بعض …….بيبي شنو ؟
رباب :ضحكت …….هادي قصه طوووووويله
____________________________
هديل:لو طلباته من جديد متعطيهولهاش
نبيله :تي كيف متاخداش راهو ولدها ولدهاااا افهمي
هديل:تبوس في البيبي ……….ياعمرس شوفي جماله وربي حرام يكون ولدها
كلمتني خالتي كريمه مبكري
العيله سمعو بيه خبر البيبي خوديلك تو اتصالات
نبيله:هادا ربي وانا تحته ما عندي ما نديرلهم
خليها حتى خالتك كريمه تلهى في يزن وادهم غير تاخدلهم رح تصبح كل يوم في قصه
هديل: اليوم لازم نطلعو ونذير ونصر مهناش
نبيله:تصب في القهوة ……وين بتمشي ؟
هديل:حجز القاعه لازم نأكدوه في الايام هادي يا امي بيضيع عليا
نبيله :تو نمشو بكرا ان شاء الله
هديل:استمرت تلعب في البيبي بكل حب ❤️
______________________________
الساعه 8 ونص في الليل:_
ريحانه:لابسه عبايتها …….يسلمو يديك حبيبتي كل شي يجنن ❤️
رباب:صحتين مرحبتين بيكم
ندى:لبست خمارها ……شكرا هلبا وسامحونا على تعبكم
رباب :مرحبتين بيك تفضلي
نجمه:تشرفنا ❤️
طلعو ندى وريحانه ونجمه وراهم عشان توصلهم
ركبت ندى وسلفتها لي السياره ونجمه جت راكبه للعماره شافت منذوب توصيل واقف واسك بوكي ورد
نجمه:تفضل ؟
واقف قدام شقتي حضرتك !
المنذوب :الاستاد ادهم موجود؟
نجمه:ابتسمت اي هادي شقته
المندوب:تمام تفضلي وقعي هنايا
نجمه:وقفعت وخدت الباقه وخشت لي شقتها طول
قعمزت وفتحت الكرت يلي كان في الباقه قراته وكان مكتوب فيه
يوم كامل مسمعتش فيه صوتك ميهونش عليا يولو يومين ❤️
اسفه حبيبي ع الغلط يلي درته معش يتكرر يا عيون مسرة انت
من خطيبتك حبيبتك
نجمه :وقف عقلها دقايق مش مستوعبه يلي تقرا فيه !
ضحكت بصدمه كانت تسحابه انها قرت غلط !
عاودت قرت الكرت اكتر من مره …….خدت الباقه وركبت لي شقة ادهم بهستيريا …..
ريحانه:صحيت يا نذير تعبناك معانا
نذير:عادي ولا يهمك
ريحانه:مشاء الله بسرعه ما عرفت الطريق
نذير:العماره هادي تسكن فيها خالتي كريمه هنايا اكيد شفتوها في العرس
ريحانه:قاعدين متعرفناش على العيله بزبط تو مع الوقت نعرفوهم بي الاسم
نذير:ان شاء الله
ريحانه:تناشب…..ندى خيرك ساكته العفو مبطلتيش ضحك وهدرزه فوق
ندى:توترت ………..اءءء ش ش شن بنقول
ريحانه:ضحكت اي حاجه هدرزيها مع راجلك 😂
والله يانذير تشكر فيك مبكري لين خلاص الحق
نذير:شاف لي ندى ع جنب
ندى:في داخلها ………الله ياخدك يا ريحانه
_______________________________
ادهم:فتح الباب وهوا يرتب في شعره ….اياااه شنو جايبتيلي ورد؟
نجمة:لوحت الباقه على وجها …….طلعت خاطب ؟؟
خاطب يا ادهم !من امتى ؟
ادهم:خدي نفس …من سنه و3 شهور
نجمه:بصوت يرججججف …..والكلام يلي قلته امس ؟؟؟؟
ويلي صار امس شنووووووووو
ادهم:سكري فمك ومتعليش صوتك
انتي غبيه معندي ما نديرلك
نجمه:يا حقييييير يا حقير كيف صدقتك انا
ادهم :والله اسألي نفسك من يرضى ياخد وحده بلا اهل ومش معروف قصتها شنو
صدق يزن خوي لما قال زيها زي يلي ساكنه قدامها مفيش فرق
نجمه:هجمت عليه بهستيريا تضرب فيه من حرقت قلبها ووجعتها نفسها كيف قدر يلعب بي مشاعرها هكي 💔
ادهم:دفها بقوه لين طاحت ع الارض ……..احمدي ربك ان مفيش حد من العيله قاعد هنايا
كنهادا راهو تصرفت معاك بطريقه مش رح تعجبك ابدا
وتوا وجهك معش نبي نشوفه وردي بالك تقربي هنايا …….وسكر الباب عليها
________________________________
ندى:طلعت من الحمام وهيا لابسه بجامه زرقاء وقايمه شعرها
نذير:شافلها ……تعتقد ان هادا مش منضر عروسه تستقبل راجلها يوم دخلتها هكي
ندى:تحكي جد انت ؟
نذير :مواضيع زي هيا مفيهاش بصاره بنخش ندوش وجاي
ندى:نذير انا منبيش
نذير:وهادا حق شرعي اصلا حرام تعيشي معاي هكي
الا لو كنتي خايفه من شي
ندى:توسعو عيونها بصدمه………شن قصدك؟
نذير:تعرفيه مليح قصدي وتي روحك مابين جيت
_____________________________
رباب :فتحت الباب بي استغراب ….شن صاير؟
نجمه:تبكي ……توااااااااا تحكيلي شن صاير تواااااا
ليش يحكي عليك الكل هكي كدابه انتي مش جايه هنايا عشان قرااااااايا
توا تحكيلي شن قصتك !
ليش جابديني معاك بي العاطل !
ليش سمعتك مأذيتني هكي لييييش 💔
رباب:تشوف لي نجمه كيف منهاره ومصدومه
نجمه:ضربت رباب على كتافها ……شن درتلك انا
علاش مش مصارحتيني !علاش خليتيه يدير فيا هكي لان يحسابني زيك
زيني اي
زي ما انتي هاربه من اهلك حتى انا هاربه منهم
زي ما انتي رح يقتلوك لو شافوك حتى انا مستحيل يخلوني عايشه دقيقه
- يتبع الفصل التالي اضغط على ( رواية ملائكة بالف وجه) اسم الرواية
تعليقات
إرسال تعليق