روايه أحفاد البارون كامله بقلم ايمان جمال عبر مدونة كوكب الروايات
روايه أحفاد البارون الفصل الخامس عشر
ليل طلعت تلبس وتجهز عشان فهد هياخدها يتغدوا بارة
شريف خرج من المستشفى وكلم أمل وطلب منها تجهز عشان هيروح ياخدها ويخرجوا
بعد شوية شريف وصل تحت بيتها وهي نزلت واخدها ومشي
امل: احنا راحين فين؟
شريف: عاوز اقضي معاكي اليوم كله النهاردة
امل بفرحة: طب هنقضيه فين؟
شريف: إنتي عاوزة تروحي فين؟
امل بتفكير: ماتيجي نروح نقعد معاهم في القصر
شريف بصلها بإستغراب: بقى انا بقولك عاوز اقضي اليوم كله معاكي تقوليلي نقعد معاهم
امل ضحكت: وفيها ايه؟
شريف بغضب: بس يا امل بدل ما اتخانق معاكي والله
فهد وصل القصر وطلع اخد دش وغير هدومه واخد ليل وخرجوا
اكمل بغضب: واشمعنا هو يخرج واحنا لا
ملك ضحكت: عشان مراته
اكمل قرب عليها: يعني نتجوز عشان يخرجنا سوا؟
ملك اتكسفت من قربه: ابعد يا أكمل
اكمل: تؤ مش هبعد
جاسر جه من وراه: وحياة امك لهتبعد أحسنلك
اكمل بصله بغضب: خليك في حالك
جاسر اخد ملك في حضنه: ماهي حالي يارخم
اكمل بصلهم بغضب ومشي وملك بتضحك عليه
جاسر باس دماغها: ايه رأيك لما اعمل فرحي يوم فرحكم
ملك بفرحة: بجد؟
جاسر: أيوا انا ناوي اكلم عمي علي لما يجي بكرة واطلب منه ايد نور بس مش لازم خطوبة هعمل ذي ليل وفهد كدا
ملك: بس انت كدا هتتجوز بدري؟
جاسر: وايه يعني انا عارف ان فهد مش موافق انكم تتجوزوا دلوقتي بس انا هقنعه وبعدين تتلموا بدل ما انتوا مفضوحين كدا
ملك ضحكت: شكرا يا اخويا
نيجي لفهد وليل قاعدين سوا بيتغدوا
ليل: انا عاوزة اسألك سؤال
فهد بصلها: اسألي
ليل: هو انت ليه مش بتحب عماد ابن عمي
فهد حكالها على يوم ماسمعها وهي بتتكلم معاه
ليل بإستغراب: وليه معرفتنيش؟!
فهد بهدوء: واعرفك ليه؟
ليل بغضب: هو ايه اللي تعرفني ليه على الاقل افهمك
فهد: تفهميني ايه وانا سامعك وانتي بتقوليله بحبك
ليل بغضب وبصوت عالي: عشان حضرتك لو كنت تكرمت وكملت بقية المكالمة وسمعت الباقي كنت عرفت انا قولت ايه بعد الكلمة دي لكن ازاي انت اول ماسمعت كلمة بحبك قفلت
فهد بعصبية: ليل انا مابحبش الطريقة دي ولا بحب حد يتعصب ويعلي صوته عليا
ليل بهدوء: انا مش بعلي صوتي عليك يافهد انا بعرفك انت اتصرفت ازاي
فهد ببرود: تمام
ليل حست ان فهد اضايق من طريقتها بس هو عصبها
فهد: يلا نمشي
ليل مسكت ايديه: انا اسفه
فهد بهدوء: على إيه؟
ليل: عشان اتعصبت
فهد ببرود: عادي
فهد قام وحاسب عالغدا وخرج هو وليل للعربية وركبوا من غير اي كلام خالص بس ليل مضايقة من كدا وكل شوية بتكتشف حاجة جديدة في شخصية فهد، شوية ووصلوا القصر وباردوا مافيش اي كلام بينهم
فاطمة قابلت فهد عالباب: انت كنت فين؟
فهد: كنت بتغدى انا وليل في ايه؟
فاطمة: عاوزة اتكلم معاك شوية
فهد حاوطها بدراعه واخدها وخرجوا الجنينة وليل اضايقت اوي ان فاطمة قريبة من فهد بالشكل دا
فاطمة: عرفتها؟
فهد: بإيه؟
فاطمة: انك بتحبها
فهد بغضب: هو انا قولت اني بحبها؟
فاطمة بعصبية: ايوا يافهد بتحبها وبطل تداري حبك
فهد قام من جمبها: بطلي تتكلمي في الموضوع دا يافاطمة عشان مايكونش سبب خناقنا وانتي عارفة انا زعلي عامل ازاي
فاطمة دموعها نزلت: ايوا للأسف عارفة
فهد مسحلها دموعها: بتعيطي ليه دلوقتي؟
فاطمة: عشان زعلك وحش فاكر اخر مرة اتخانقنا فضلت مخاصمني اد ايه
فهد ضحك: ما انتي اللي رخمة وانتي عارفة اني مش بحب حد يعلي صوته عليا او يتعصب عليا
فاطمة: براحتي يارخم
فهد حضنها: ماشي يارخمة ويلا امسحي دموعك وبطلي تعيطي عشان الفهد مش بيحب يشوف اخته بتعيط
فاطمة: ماشي ياعم الفهد
ليل واقفة فوق وشافت فهد وهو بيحضن فاطمة واضايقت أكتر، فهد طلع الجناح واخد دش ونام عالسرير وادهم دخل
ادهم: انت نايم هنا ليه؟
فهد بإستغراب: هو ايه اللي ليه؟!
ادهم: انت مش خلاص بتنام هناك؟
فهد: لا
ادهم بقلق: ايه اللي حصل؟
فهد بهدوء: مافيش
ادهم قعد جمبه: ايه اللي حصل يافهد؟
فهد: محصلش حاجة يا ادهم
ادهم: لا حصل هو انا يعني مش عارفك انت امبارح نايم في حضن مراتك ودلوقتي جاي هنا ليه
فهد بعصبية: قولتلك مافيش حاجة حصلت ليه مصمم تعصبني كل شوية
ادهم بهدوء: انا مش بعصبك يافهد بس قلقان عليك
فهد بحزن: انا كويس يا ادهم
ادهم: طب ليه صوتك الحزين دا
فهد بصله وسكت وكأنه مش عارف يرد ولا حتى عارف إيه سبب زعله
ادهم بيرخم عليه: وبعدين انا اتعودت انام لوحدي يلا قوم روح عند مراتك
فهد بصله واتكلم بحزن: والنبي يا ادهم بلاش كدا
ادهم بقلق: لا ماهو انا مش هقعد ساكت وشايفك حزين كدا
فهد لسة هيرد بس حد خبط عالباب وادهم قام يفتح وكانت ليل
ادهم بص لفهد: انا نازل تحت
ادهم سابهم ونزل وفهد ما اتحركش خالص من مكانه وليل وقفت ادامه
ليل: ممكن اعرف انت زعلان ليه؟
فهد: مش زعلان
ليل: امال جيت هنا ليه؟
فهد ببرود: عادي ماليش مزاج
ليل فهمت كلامه غلط او يمكن هو يقصد حاجة اصلا وهي فهمت صح واتكلمت بغضب: هو انت ازاي كدا ايه البرود والاستفزاز اللي انت فيه دا
فهد ببرود: حاجة ماتخصكيش
ليل بصتله بدموع وسابته ومشت وهو وقف في البلكونة مخنوق ومضايق وبيفكر يروحلها بس منع نفسه وشوية وادهم طلع وكان فاكر ان فهد راح مع ليل بس اتفاجئ بيه لسة موجود
ادهم: انت مارحتش معاها؟
فهد بهدوء: واروح معاها ليه؟
أدهم: هو إيه اللي ليه؟
فهد ببرود: انا مش شايف سبب اني اروح هناك ليها
ادهم بعصبية: في ايه يافهد هو ليه كل دا
فهد بعصبية: محدش له دعوة بيا انا حر في حياتي
فهد خرج وساب ادهم ونزل قعد لوحده
تاني يوم الصبح اهل ليل وصلوا والكل رحب بيهم جداً وليل كانت لسة نايمة وفهد نزل سلم عليهم
آمال: امال فين ليل؟
فهد قام: لسة نايمة انا هطلع اصحيها
فهد طلع لأوضة ليل عشان يصحيها ودخل الأوضة شافها نايمة ذي الملاك، قعد جمبها وشال شعرها اللي جاي على وشها وهي فاقت من حركة إيده
فهد: اهلك تحت وبيسألوا عليكي
ليل قامت بهدوء بس كان باين عليها إنها تعبانة وسخنة
فهد بقلق: انتي كويسة؟
ليل بتعب: أيوا
فهد بيشوف هي سخنة ولا لا وكانت فعلاً سخنة جداً: كويسة ازاي دا انتي مولعة
ليل بتعب واضح: لا انا كويسة
فهد شالها ودخل الحمام ووقفها تحت الدش وفتح الماية الساقعة عشان درجة حرارتها عالية
ليل بتعب: الماية ساقعة اوي
فهد: معلش عشان انتي سخنة فحاسة انها ساقعة
فهد خرج يجيبلها هدوم من الدولاب ودخلها تاني
فهد بيساعدها عشان تغير وهي مكسوفة
ليل: خلاص انا هعرف البس لوحدي
فهد محبش يضايقها وخرج وسابها تلبس وبعد شوية خرجت وهو سندها
فهد: خليكي هنا وانا هخليهم يطلعوا ليكي
ليل بتعب: لا هنزلهم
فهد بعصبية: بطلي عناد واقعدي
ليل قعدت وفهد نزل وطلب منهم يطلعوا يشفوها فوق
امال بحزن: الف سلامة عليكي ياقلبي
ليل ابتسمت: الله يسلمك ياماما
فهد دخل ومعاه كمادات تلج وراح قعد جمب ليل وبيعملها كمادات
علي ابتسم: ربنا يخليكوا لبعض ياحبايبي
ليل بصت لفهد وهو بعد عنيه عنها وشوية وكل اللي في القصر اتجمعوا في اوضة ليل
إسلام: انتي جايا تتعبي قبل الفرح بيوم لا ابوس ايدك
ليل ضحكت بتعب: ماتقلقش هنعمل اللي اتفقنا عليه
فهد: اتفقتوا على إيه؟
آسر ضحك: لا ماتشغلش بالك
فهد بغضب: اتكلم كويس
آسر بهدوء: مش قصدي يافهد بس كل الحكاية ان دا فرح وليل اتفقت معانا ان ذي ماعملنا في حنتها هنعمل في فرح شريف
علي ضحك وبص لفهد: انا بقول يا فهد انك تشوفلك مكان تروح فيه يوم الفرح
ادهم ضحك: ليه ياعمي ماهو يوم الحنة عندكم فاجئنا كلنا
فهد بص لأدهم بغضب ومش عاجبه التصرفات اللي بتحصل حواليه
نور: هي هتكون كويسة ان شاء الله
جاسر: طب بما إن الكل هنا فأنا حابب اطلب طلب من عمي علي
علي بصله: اتفضل ياحبيبي
جاسر بس لنور وابتسم: عاوز اطلب ايد نور من حضرتك
علي بص لبنته اللي اتكسفت: طب نشوف رأيها إيه الأول
ملك وقفت جمب نور: ها ياعروسة قولي رأيك
نور بكسوف: اللي بابا يشوفه
علي حس ان بنته موافقة وبص لجاسر: انا موافق ياجاسر
جاسر حضنه اوي: حبيبي ياعمو والله
فهد: مبروك ياجاسر
جاسر حضنه: الله يبارك فيك ياحبيبي
ليل باركت لأختها وكانت قلقانة أوي من اللي جاي وخايفة على أختها بس جاسر مش ذي فهد، شوية وشريف صحي بس اتفاجئ ان محدش فيهم تحت
شريف لعمتو: امال هما فين؟
فريدة: في اوضة ليل
شريف بقلق: ليه؟
فريدة: تعبت شوية فطلعوا يطمنوا عليها
شريف طلع لاوضة ليل واتفاجئ بأهلها وسلم عليهم واطمن على ليل
علي قام: احنا هننزل وانتي ارتاحي شوية
ليل: يابابا خليكم قاعدين معايا
امال: ياحبيبتي احنا معاكي اهو بس هننزل تحت وانتي نامي وارتاحي
كلهم نزلوا وفهد فضل قاعد جمبها
ليل بصتله: تقدر تنزل ماهما خلاص مشيوا يعني مش محتاج تمثل
فهد بغضب: بلاش كلامك دا
ليل بعصبية: لا
ليل لما اتعصبت فضلت تكح وفهد قرب منها وقلقان عليها بجد
فهد: ممكن تهدي
ليل بصتله بدموع: ابعد عني وانا ههدى
فهد اتفاجئ من كلامها وبصلها بحزن: حاضر ياليل
فهد خرج بارة الاوضة وهي قعدت تأنب نفسها انها قالتله كدا
ادهم اخد جاسر واكمل وراحوا الشركة اما مراد وعبدالعزيز فقعدوا مع علي والبارون في اوضته وشوية ونزل تحت مع آسر، اما البنات فقاعدين كلهم في الجنينة وفهد قاعد عند ماكس وليل نزلت رغم انها تعبانة ودايخة بس نزلت تحت للبنات
ملك قامت تسندها تقعدها: نزلتي ليه طلاما تعبانة
ليل: مش بحب اقعد في السرير
نور ضحكت: هي كدا طول ماهي تعبانة مش بتحب تقعد في السرير
فهد قاعد عند ماكس وشوية اخده يمشيه شوية في الجنينة وماكس اول ماشاف ليل جري عليها وبيلعب معاها وليل فرحانة وفهد اضايق انها نزلت وهي تعبانة بس قال انه مش هيتكلم
ليل واقفة دايخة اصلا وماكس ماسك في هدومها وفهد شافها دايخة وكانت هتقع بس جري عليها سندها والبنات اتخضوا
ملك: شفتي تعبتي ازاي
فهد ساندها وهي كأنها عاوزة تقوله انا اسفة بس خايفة
فهد: باردوا مابتسمعيش الكلام
ليل بصتله: زهقت من الأوضة
فهد بص لملك: تعالي اسنديها
ليل مسكت ايديه اوي: لا اسندني انت
فهد قرب منها واتكلم بصوت واطي: مش لازم يعني نرسم الدور ادام البنات
ليل بحزن: وانا مقصدش كدا انا بجد عاوزاك انت
فهد: حيرتيني معاكي
ليل: انت باردوا اللي محتار
البنات سابوهم ودخلوا جوا
فهد: طب يلا عشان تطلعي فوق
ليل: بس تطلع معايا
فهد بهدوء: هطلعك وانزل
ليل بعناد: يبقى مش هطلع
وهما واقفين يتكلموا عماد ابن عمها جه وشافهم واقفين وفهد ساند ليل
عماد بقلق: في ايه مالك
ليل بتعب: عندي برد
عماد: اكيد نمتي بهدوم خفيفة ماهي عادتك
ليل بصت لفهد بخوف وهو واقف على اخره وعماد حس انه بوظ الدنيا
عماد بتوتر: اذيك يافهد
فهد بهدوء: تمام
عماد لليل: امال عمي فين؟
ليل: كلهم جوا
عماد: طب انا هدخلهم
عماد سابهم ودخل وفهد واقف بيولع وليل بتبصله بخوف وعاوزة تتكلم
ليل: فهد
فهد مش بيرد ولا حتى بيبصلها
ليل عشان قصيرة عن فهد فرفعت نفسها وحضنت رقبته بإيديها: بصلي
فهد بهدوء: عاوزة إيه؟
ليل: ماتزعلش
فهد ببرود: ومين قالك اني زعلان أو هزعل من إيه
ليل بحزن: يعني انت مازعلتش من كلام عماد؟
فهد بصلها: وهو قال حاجة يزعل؟
ليل بعدت ايديها عنه: اعتبرني مسألتكش حاجة
ليل زعلت جداً ان فهد بيتعامل كدا بس فهد من جواه بيغلي ولسة هتدخل بس هو وقفها
فهد: راحة فين؟
ليل من غير ماتبصله: هدخل جوا
فهد بإستفزاز: إيه راحة تقعدي معاه
ليل بصتله بحزن وعيون كلها دموع: لا يافهد انا تعبانة ومش قادرة اقف وهطلع اوضتي
ليل فعلاً كان باين عليها تعبها وطلعت اوضتها وفهد واقف مضايق من كل دا وقلقان عليها وأخد ماكس وطلع ليها فوق بس وهو داخل نور كانت خارجة وصرخت اول ماشافت ماكس
فهد ضحك: يابنتي طول ماهو شايفك خايفة هيهجم عليكي
نور بخوف: لا ياعم ابعدوا انا مش ناقصة
فهد شاف جاسر جاي عليهم: تعالى شوف نور خايفة ازاي
جاسر ضحك أوي: انا كدا عرفت لما تزعلني اعاقبها بإيه
نور بغضب: نعم بتقول ايه انت
فهد بيضحك لدرجة ان عنيه دمعت: لا بقولكم ايه انا طالع
جاسر بإستغراب: وواخد ماكس معاك ليه؟!
فهد: هاخده لليل
نور ضحكت: ماهي باقت صاحبته
جاسر: عقبالك
نور: لا لا
فهد اخد ماكس وطلع بس ليل كانت في الحمام بتاخد دش تاني وماكس قعد في أرضية الأوضة وهي خرجت ومكانتش تعرف طبعاً ان فهد بارة وهي كانت لابسة طقم برمودا لعند الركبة وبلوزتها بحمالات
ليل اتخضت: طب مش تعرفني انك طلعت
فهد بهدوء: معلش اني خضيتك
ليل وقفت ادام المرايا بتنشف شعرها بالفوطة وبتسرحه، فهد من غير تفكير قام من عالسرير وحضنها من ضهرها وهي اتفاجأت بكدا
ليل بتبصله في المرايا: في ايه؟
فهد بهدوء: مافيش
ليل دورت وشها وبصتله وهو باردوا حاضنها: حيرتني معاك
فهد قرب منها وخطف بوسة: ليه؟
ليل بكسوف: عشان كل شوية بتكون بعيد وبتكون قريب
فهد: طب عاوزاني اكون بعيد ولا قريب
ليل لسة هترد بس الباب خبط وفهد اللي رد
فهد: مين؟
ادهم: عاوزك يافهد
فهد: ماشي
فهد بص لليل: انا نازل ومافيش نزول تحت
ليل: ليه؟
فهد بغضب: طول ما الاستاذ دا تحت مافيش نزول
ليل: دا على اساس انه مش قاعد لبكرة عشان الفرح
فهد: اسمعي الكلام وبس
ليل: ماشي
فهد سابها وخرج لأدهم يشوف في ايه
فهد وادهم نزلوا تحت وباين على ادهم انه قلقان
فهد: في ايه؟
ادهم: سالم الصياد
فهد: ماله
ادهم: باعت رسالة تهديد لجدك
فهد بصدمة: نعم؟!
ادهم: أيوا بس جدك مقاليش انا سمعته بيتكلم مع بابا
فهد بعصبية: ولا يقدر يعمل حاجة
أدهم: فهد فيه حاجة مش مظبوطة خوف جدك عليك دا لوحده يأكد ان في حاجة وكبيرة كمان
فهد: وانا عاوز اعرف في ايه لازم اعرف يا ادهم
ادهم: اتكلم مع جدك
فهد: انت عارف ان مش هتكلم
ادهم: كفاية يافهد انت بتحبه والدليل على كدا
انك كنت خايف عليه لما تعب
فهد ماردش ولا حتى قال اي حاجة
ادهم بهدوء: اطلع اتكلم معاه وانا واثق انه هيفهمك
فهد: مش وقته المهم دلوقتي بكرة يعدي حلو
ادهم: ان شاء الله
شريف جه قعد معاهم: بقولكم ايه
فهد: ها؟
شريف: انا عاوز بكرة يكون يوم مش عادي
ادهم ضحك: ماتقلقش ماتنساش ان فرحك يوم عيد ميلاد سارة فهيبقى يوم مش عادي فعلاً
شريف ضحك اوي: ايوا مش ناسي دا البنات قاعدين بيتفقوا هيعملوا ايه
فهد: هما أصلا اللي هيغيروا شكل الفرح
شريف: وليل كمان متفقة معاهم لا وايه عماد كمان
فهد: عماد؟!
شريف: ايوا قاعدين يتفقوا كلهم جوا هيعملوا ايه بكرة
فهد: هي ليل نزلت؟
شريف: اه لسة سايبها جوا
فهد اضايق اوي ان ليل نزلت ودخل وشافها قاعدة وعماد قاعد يتكلم معاها وبيضحكوا وليل اول ماشافت فهد خافت اوي عشان هو قالها ماتنزلش وراح قعد جمبها بهدوء من غير اي كلام
ملك: ها يافهد هتعمل ايه بكرة؟
فهد بهدوء: مش هعمل حاجة
هاجر: ازاي دا ليل هترقص معانا
فهد بص لليل: والله؟
ليل خايفة تتكلم او ترد
آيه بصت لهاجر وضحكت: انا بقول تتنيلي تسكتي احسن عشان خربتي الدنيا
عماد تليفونه رن وخرج يرد وليل عاوزة تتكلم
فهد بهدوء: الاحسن تفضلي ساكتة
ليل: والله ملك اللي نزلتني
فهد بيحاول يتماسك اعصابه: هو انا مش قولت مافيش نزول
ليل: ايوا بس هي اللي نزلتني
فهد لعصبية: وهي لما تقولك ترمي نفسك في البحر هتسمعي كلامها
ليل بدموع: اسفة
فهد بصلها واتكلم بغضب: مش كل شوية هتقولي اسفة واعديها كدا بالساهل
ليل دموعها نزلت: عشان خاطري ماتزعلش مني
فهد: اتفضلي اطلعي فوق
ليل طلعت بهدوء من غير اي كلام عشان فهد متعصب
علي ومراد وعبدالعزيز قاعدين مع البارون بيتكلموا
البارون لمراد: اطلب من فهد يبعد عن المناقصة
مراد: بحاول يابابا والله
علي: لو فيها خطر عليه يبقى بلاش
عبدالعزيز: للأسف مش راضي يسمع لرأي حد ومصمم يدخلها وواخد الموضوع تحدي
علي: طب اتكلم معاه انا؟
البارون: ياريت ويارب يوافق
علي: تمام انا هتكلم معاه
ليل قاعدة في اوضتها والبنات طلعوا يقعدوا معاها
ملك: هنرقص بكرة
ليل ضحكت: ابقي قابليني
سارة: فهد شكله مش عاجبه الكلام
هاجر: ايوا انا لاحظت كدا
آيه قاعدة ماسكة تليفونها ومبتسمة ونور بترخم عليها: ايه يا ايوي مشغولة مع مين
ملك ضحكت: اكيد مع ادهم
آيه ابتسمت: بيكلمني
ليل: ياعم ياعم
فهد دخل وهما قاعدين واتفاجئ بالبنات قاعدين
ملك وقفت: يلا يابنات فركش
هاجر ضحكت: حلوة فركش دي
فهد بيضحك عليهم والبنات نزلوا كلهم، وليل وقفت ادام فهد
ليل: لسة زعلان
فهد ببرود: وهزعل ليه
ليل بعصبية: ماتبطل برودك دا بقى
فهد قعد عالسرير وهي مضايقة من بروده وراحت فتحت الشاشة وقعدت تتفرج على كارتون وفهد هيموت ويضحك وهي اخدت بالها
ليل: ماتتريقش
فهد ضحك اوي: والله انا متجوز طفلة
ليل قعدت عالسرير جمبه وقربت دماغها من دماغه: عاجبك ولا مش عاجبك
فهد قربها منه اكتر: امممم مش عارف
ليل بتوتر: طب ابعد
فهد: لا مش هبعد
ليل بكسوف: ابعد يافهد
فهد: لأ
فهد بيقرب الباب خبط وليل ضحكت بصوتها كله وفهد بيبصلها بغضب
فهد بغصب: مين؟
سارة: انا يافهد ممكن تخلي ليل تكلمني
ليل: حاضر ياسارة
ليل قامت خرجت لسارة وكانت بتعيط
ليل: في ايه مالك؟
سارة: ناجي مخاصمني
ليل ضحكت: ياشيخة خضتيني
سارة بعياط: صالحينا
ليل ضحكت اوي: طب عملتي ايه
سارة: مضايق اني كنت قاعدة مع عماد في الجنينة بس والله ماكنت لوحدي كانت هاجر معايا
ليل ابتسمت: يعني غيران عليكي منه؟
سارة: ايوا
ليل بإبتسامة جميلة: تقريباً مش ناجي لوحده اللي غيران من عماد، خلاص انا هتصرف وامسحي دموعك وروقي
سارة: حاضر
ليل دخلت لفهد تاني وقعدت من غير كلام
فهد: في ايه؟
ليل بصتله اوي: اصل ناجي مخاصمها عشان قاعدة مع عماد
فهد بهدوء: ليه؟
ليل: اصله غيران عليها ومضايق من عماد اوي
فهد حاسس ان ليل كشفت غيرته فبيحاول يحور: وايه يعني عادي هو حقه يضايق بس ماتسميهاش غيرة
ليل: يعني دي مش غيرة؟
فهد: لا وبلاش هي تفكر في حاجة مش صح عشان ماترجعش تزعل
ليل بشك: هي مين يافهد؟
فهد ببرود: سارة
ليل بحزن: حاضر هقولها
ليل قامت من جمبه وطلعت البلكونة وهو قاعد مكانه ببرود او بيمثل انه مش فارق معاه بس من جواه مضايق أصلا من اللي هو بيعمله مع ليل، ليل واقفة في البلكونة بتبص عالجنينة من فوق وسابت الاوضة وخرجت وبدور على نور أختها وعرفت انها في اوضة سارة وراحتلهم واتفاجئوا بيها
سارة: في ايه؟
ليل قعدت عالسرير: مافيش هنام هنا الليلادي
نور بقلق: ليه في ايه؟
ليل بهدوء: مافيش يانور وياريت ماما ماتعرفش حاجة
ليل فضلت قاعدة في اوضة سارة وفهد فضل قاعد مستنيها ترجع هو فاكر انها ممكن تكون نزلت تحت فنزل يشوفها وراح عند ماكس ومكانتش هناك وطلع تاني فوق وقابل آمال ام ليل عالسلم
امال: ايه ياحبيبي مالك؟
فهد: أبداً مافيش كنت بشوف ليل فين
آمال: كانت قاعدة مع سارة ونور
فهد: ماشي ياطنط
آمال: يلا ياحبيبي تصبح على خير
فهد ابتسم: تلاقي الخير يارب
فهد طلع عند اوضة سارة وخبط ونور اللي فتحت
فهد: ليل فين؟
نور: واقفة في البلكونة
سارة من جوا: ادخل يافهد
فهد دخل وطلع البلكونة لليل اللي واقفة سرحانة واتفاجأت بيه ادامها
فهد بهدوء: بتعملي ايه هنا؟
ليل: مافيش قاعدة مع البنات
فهد: طب يلا ارجعي اوضتك
ليل: لا هفضل معاهم الليلادي
فهد زعل انها كانت ناوية تنام هنا: عالعموم براحتك انا كدا كدا هنام في الجناح
فهد سابها وخرج وهي زعلت اوي من كلامه وراحت تطمن على البارون ورجعت اوضتها وكان نفسها يكون هناك بس ليل شافت تليفون فهد عالسرير واخدته وراحت عشان تديهوله بس مكانش في الجناح بس عرفت من ادهم انه في اوضة التمرين، ليل دخلت بهدوء وهو بيتمرن بعنف
ليل وقفت وراه: فهد
فهد اتفاجئ بوجودها وبصلها: انتي ايه اللي جابك هنا
ليل: جيت عشان أجيبلك تليفونك
فهد اخده منها بعنف: اتفضلي امشي من هنا
ليل: ليه؟
فهد بغضب: من غير ليه اتفضلي اطلعي بارة
ليل بحزن: طب أنا عاوزة افضل
فهد بعصبية: امشي اطلعي بارة
ليل خرجت بسرعة عشان خافت منه ومن عصبيته وقابلت ادهم وهي طالعة وكانت بتعيط
ادهم: في ايه؟
ليل بدموع: مافيش
ادهم: في ايه ياليل؟
ليل بإنهيار: انا اصلا معرفش في ايه ساعات الاقيه كويس وساعات لا انا بجد مابقتش قادرة استحمل اللي بيحصل دا
ليل سابت ادهم وطلعت وهو راح لفهد
ادهم بعصبية: انت قولتلها ايه عشان تكون منهارة بالشكل دا
فهد بصله واتكلم بإستفزاز: ايه يهمك زعلها اوي؟
ادهم بغضب: انت غبي ومريض وهتفضل طول عمرك كدا، وبطريقتك دا هتخسر كل اللي حواليك واولهم انا
ادهم ساب فهد وخرج وفهد واقف عاوز يصرخ حاسس بخنقة اخد عربيته ومشي من القصر وراح يسهر ويسكر
البارون قاعد في اوضته لسة صاحي وتليفونه رن وكان واحد من الحراس الجداد اللي بيراقبوا فهد
الحارس: فهد باشا سهران في مكان وسكران جداً
البارون بصدمة: انت بتقول ايه؟
الحارس: دا اللي حصل ياباشا هو جوا دلوقتي انا خرجت بارة عشان اكلم حضرتك
البارون: اسمع يفضل تحت عينك وحاول على أد ماتقدر ماتخليهوش يسوق وانا هحاول اتصرف
البارون قفل معاه وقاعد يفكر يعمل ايه ورن على ناجي وطلب منه يطلعله فوق وفعلا بعد ثواني كان عنده في اوضته
ناجي: خير ياباشا
البارون: هديك رقم حارس بيحرس فهد بس من غير مايعرف واعرف منه عنوان المكان اللي سهران فيه فهد وماتخليهوش يسوق لان الاستاذ سكران
ناجي بإستغراب: هو مش كان بطل سهر وشرب بقاله سنين
البارون: مش وقت الكلام دا ياناجي المهم تروحله وانت اللي تسوق واياك يعرف ان في حد بيحرسه وابقى قوله اي حجة سبب وجودك هناك
ناجي: حاضر ياباشا
ناجي اخد رقم الحارس ونزل يكلمه وعرف منه المكان وراح بسرعة على هناك ولما وصل شاف فهد فعلاً قاعد سكران
ناجي قرب عليه بسرعة وأخد منه الكاس اللي بيرفعه: كفاية ياباشا
فهد بيتكلم وهو سكران: ناجي؟! انت ايه اللي جابك هنا وعرفت مكاني ازاي؟
ناجي: مش وقته ياباشا يلا عشان اروحك
فهد بياخد منه الكاس بعصبية: سبني وامشي
ناجي اخد منه الكاس تاني وقومه بالعافية: لا مش هسيبك واتفضل معايا
فهد بغضب: انت اتجننت
ناجي بيشده بالعافية وبصله: سامحني عاللي هعمله ياباشا
ناجي ضرب دماغ فهد بدماغه وفهد اغمى عليه وشاله وخرج
الحارس وقف بارة: انت عملت ايه؟
ناجي: مكانش هيقوم غير بكدا افتحلي العربية
الحارس فتح العربية وناجي نيم فيها فهد بهدوء ولف ركب واتحرك بالعربية ومشي وبعد شوية وصل القصر وادهم كان في البلكونة فوق واتفاجئ ان ناجي سايق العربية واتفاجئ اكتر لما شاف ناجي بيشيل فهد من العربية ونزل جري
ادهم بقلق: في ايه ياناجي فهد ماله؟
ناجي: ماتقلقش ياباشا هو كويس
ادهم: كويس ازاي بس وهو مغمى عليه كدا
ناجي نيم فهد على كنبة الصالون: كان سهران وسكران جداً ومكانش هيعرف يسوق
ادهم بصله: اوعى تكون عملت اللي في بالي
ناجي ضحك: للأسف اه ماهي دي الطريقة الوحيدة اللي كانت بتنفع معاه
ادهم ضحك: طب دا هنتصرف معاه ازاي لما يفوق
ناجي: انا بقول نطلعه لمدام ليل وهي حرة معاه
ادهم ضحك اوي: يخربيت دماغك هو انت مش عارف حالته بتكون عاملة ازاي
ناجي: ماهو انا مش مستغني عن روحي والله
ادهم بتفكير: طب شيل معايا
ادهم وناجي شالوا فهد وطلعوا ادام اوضة ليل وادهم كان متردد انه يخبط بس هيعمل ايه يعني المهم خبط وليل كانت لسة صاحية وفتحت وانصدمت اوي ماشافتهم شايلين فهد
ليل بقلق: في ايه ماله
ادهم بهدوء: ماتقلقيش هو كويس بس سكران
ليل بصدمة اكبر: ايه؟
ادهم وناجي دخلوه جوا وناجي خرج
ادهم بص لليل: ليل فهد سكران وعشان ناجي يعرف يرجعه القصر ضربه في دماغه واغمى عليه حاولي تفوقيه
ليل بخوف: انت بتهزر ياه أدهم هو انت شايفه طايقني اوي عشان يفوق ويلاقي نفسه هنا
ادهم ابتسم: اعملي اللي بقولك عليه وصدقيني مش هيحصل حاجة
ادهم خرج وسابها محتارة ومش عارفة تعمل ايه، اخدت البرفيوم وبدأت تفوق فهد اللي فضل كام دقيقة لحد مافاق وهي كانت مرعوبة، بس طبعاً كان لسة الشرب مأثر عليه وبيبصلها بتوهان وبدأ يقول كلام مش مفهوم بس بصلها أوي واتكلم: ليه انتي ذيها ليه اتفقتي عليا
ليل مش فاهمة أي حاجة من اللي بتتقال: انا مش فاهمة أي حاجة انت تقصد ايه؟
فهد بيقرب منها بدون وعي وهي رغم ان جوازهم بقى رسمي بس كانت مضايقة منه انه سكران وكمان الكلام اللي مش مفهوم اللي بيقوله
تاني يوم الصبح في الجناح عند ادهم قاعد بيكلم آيه في التليفون
آيه ضحكت: والله بجد مستغربة يعني مع بعض في نفس القصر ونتكلم في التليفون
ادهم ضحك: اعمل ايه مش عارف اكلمك عشان مشغولة مع البنات
ملك دخلت على آيه الأوضة: يلا ياست النحنوحة عشان نمشي
آيه: طيب
أدهم: هتمشوا دلوقتي؟
آيه: ايوا ياحبيبي ناجي مستنينا تحت وهيوصلنا البيوتي سنتر
أدهم: ماشي ياحبيبتي يلا وانا هنزل معاكم
البنات نزلت وأدهم نزل معاهم تحت
في أوضة ليل وفهد، كانوا لسة نايمين بس فهد بدأ يصحى بس دماغه مصدع جداً وبيبص جمبه شاف ليل نايمة في حضنه وقام بعصبية وهي صحيت من حركته، ليل عدلت نفسها وقعدت وفهد واقف ضهره ليها ومتعصب اوي ومش طايقها، فهد أخد التي شيرت بتاعه اللي مرمي عالأرض ومشي وساب الاوضة خرج من الممر اللي بينها وبين الجناح وليل دموعها نزلت وفضلت تعيط
تحت عند البنات، واقفين عشان هيمشوا
أدهم: مش ليل هتروح معاكم؟
ملك: أيوا بس تقريباً فهد نايم في الأوضة واحنا مش عارفين نعرفها وبرن عليها مش بترد
ادهم قلقان لأن فهد هيكون صاحي متعصب أوي وبيبص فوق شافه واقف في بلكونة الجناح
ادهم للبنات: فهد في الجناح اطلعوا شوفوا ليل الاول قبل ماتمشوا
هاجر: ماشي
البنات طلعوا لليل وأدهم طلع لفهد
ملك خبطت ودخلوا كلهم
نور لليل: بلا ياليل عشان نمشي
ليل بهدوء: ماليش مزاج أنا البس هنا
ملك: ازاي دا ياليل طبعاً ماينفعش
ليل: معلش ياملك روحوا انتوا وانا هلبس الفستان هنا وهعمل الميك اب لنفسي
سارة: ازاي بس ياليل يلا يابنتي قومي وبطلي كسل
ليل: معلش يابنات انا مش هخرج
البنات فضلوا يتحايلوا كتير عليها وباردوا مخرجتش، اما أدهم دخل الجناح وبهدوء وقف جمب فهد
أدهم: صحيت امتى؟
فهد بصله: من شوية
أدهم: يعني انت صحيت وجيت هنا على طول
فهد: أيوا
أدهم بهدوء: ايه اللي خلاك تشرب تاني يافهد
فهد ببرود: عادي
أدهم: عادي ازاي يافهد انت اكيد بتهزر
فهد بهدوء: وأنا من امتى بهزر يا أدهم
أدهم: كلامك مايتصدقش أصلا يعني ايه عادي انك تشرب انت فاكر آخر مرة شربت امتى وليه
فهد بعصبية: في ايه يا أدهم انت هتحقق معايا
ادهم بغضب: لا مش بحقق معاك اسمها قلقان عليك
فهد ببرود: مش عاوز حد يقلق عليا، وعلى فكرة انا مش هكمل معاها
أدهم بصدمة: انت بتقول ايه؟!
فهد بهدوء: اللي سمعته انا مش هكمل معاها
أدهم: ليه ليل عملت ايه؟
فهد بغضب: مش عاوز اسمع اسمها يا ادهم
ادهم مستغرب تصرفات فهد وانه ازاي كاره ليل بالشكل دا، يعني بعد ماكان بدأ يكون كويس معاها رجع يكون مش كويس تاني، ادهم نزل تحت عشان يشوف اكمل وجاسر قبل مايروحوا الشركة اما فهد فقعد لوحده وبيفتكر اللي حصل
فلاش_باك
ليل لما خرجت من عند البنات وراحت عند البارون تطمن عليه فضلت تتكلم معاه شوية اما فهد فكان نازل لأوضة التمرين وسمع حاجة صدمته
البارون لليل: لازم توقعي فهد ياليل
يتبع الفصل التالي اضغط على(روايه أحفاد البارون ) اضغط على أسم الرواية
تعليقات
إرسال تعليق