رواية غرام صعيدي الجزء الثاني 2 الفصل الاول 1 بقلم اسراء ابراهيم
رواية غرام صعيدي الجزء الثاني 2 الفصل الاول 1 بقلم اسراء ابراهيم
عودة الفرحة من جديد لعائلة الغرباوي فاليوم هو زفاف فاطمة علي أنس او دكتور انس بعد خطبة دامت سنة في بيت الحج عرفة تحديدا في الثانية عشرة ظهرا كان الجميع علي قدم وساق فمنهم من يهتم بالدبائح ومنهم بالانوار والنساء مقسمين لتحضير الطعام الخاص بالمعزومين والاخريات بتنضيف البيت ونذهب ايضا لبيت الحج عتمان تحديدا في محيط المنزل حيث يجلس عتمان وبجانبه عزيزة
-عتمان وهو يشرب الشاي بعتي بدور لام كامل يا عزيزة
-ايوة يا حج بعتها من صباحة ربنا عشان تساعدهم وانا عالعصرية اكده هروح اشوف لو محتاجين حاچة اعملها دي فاطمة دي بتي اللي مخلفتهاش زيها زي غرام وصفية عندي
-عتمان وهو يترك كوب الشاي من يده بت اصول يا عزيزة طول عمرك ربنا يخليكي ليا
-ويخليك ليا يا عتمان ودايما حسك بالدنيا يا راچلي
- تسلميلي يا ام العيال هو صقر لساته نايم ولا ايه
-لع صقر صحي من بدري و راح لبيت عمه يشوف لو محتاج حاچة وخد غرام مرته معاه وجمال شيعتله دلوجتي وجال انه بيلبس ونازل عشان يروح برضه لعمه
-عتمان وهو يحرك رأسه بأيجاب وادهم طبعا مراحش مش اكده
-عزيزة بحزن لع ادهم في اوضته منزلش منها من امبارح والله حاله يصعب عليك يا عتمان بقاله گتير بعيد عنينا بحسه عايش لحاله بيسافر ويرچع يفضل حابس نفسه في اوضته جلبي بيتجطع عليه وهو اكده
-ربنا يهديه يا عزيزة هو اللي عامل في حاله اكده الدنيا موجفتش وهو لساته صغير يفوج لنفسه بجي
- ربنا يعطره في بنت الحلال اللي تستاهله وتخرجه من اللي هو فيه ده
............................. استغفر الله العظيم
خرج جمال من الحمام بعد ما ارتدي ملابسه وذهب تجاه السرير ونظر لصفية وابتسم بحب فهي اصبحت تعشقه ويري هذا في عينيها وتصرفتها عكس ما كان يحدث من قبل وهذا جعله يعشقها أضعافاً فاقترب ووضع قبله علي جبهتها واخذ ينظر لها بحب ويحمد الله لجمعهم ثانياً وفتحت صفية عينيها ووجدته بقربها ينظر لها بابتسامة عاشق فنظرته لها كفيلة بأن يجعل قلبها يتراقص عشقا فتحدثت بصوت ناعس
-صباح الخير يا حبيبي
-جمال وهو يطبع قبله علي انفها صباح الفل عليكي يا جمري اكده كل ده نايمة وفيتاني لحالي جاعد وحدي
-صفية وهي تملس علي دقنه بحنان حجك عليا انا مدريتش بحالي خالص معرفش كيف نمت كل ده
-جمال بعشق ولا يهمك نامي براحتك انا رايح لعمي عشان اشوف لو محتاجين حاجة واجف مع الرچالة
-صفية بزعر يا مري ده فاطمة وامي زمانهم زعلانين مني جوي انا هجوم اچي معاك المفروض كنت بت معاهم من امبارح بس جولتلهم لع هجيلكو بدري ودلوجتي زمانهم شايطين مني
--جمال بمكر وايه بجي اللي خلاكي متبيتيش مع اني مكنتش هجولك لع انتي خابرة ده فرح خيتك يعني
-وه عايزني اسيبك تنام لحالك لع انا ميجليش نوم غير وانا في حضنك
-جمال وهو يضمها لاحضانه يخليكي ليا يا صفية
--ويخليك ليا يا واد عمي بص بجي انا هسيب اسر وجميلة مع مرت عمي واروح انا معاك وبعدين هبجي اشيع اجبهم والبسهم هناك عشان اعرف اعمل معاهم حاچة ده الضهر اذن يعني زمانهم عملو كل حاجة ربنا يستر
-طب يلا بينا البسي بسرعة خلينا نلحج
......................
في القاهرة في شقة انس خرج من غرفته وهو يرتدي بدلة سوداء وكان وسيم للغاية ظل ينظر في ساعته وتحدث بصوت عالي
-يلا يا ماما هنتأخر كدة بقي كل ده بتعملو ايه
- خرجت فاتن والدته وهي تعدل حجابها اللامع وتحدثت بسخرية في ايه يا انس مالك مسروع كدة ليه ده احنا لسه الضهر وجلست علي المقعد ببرود
-يا ماما انتي ناسية اننا مسافرين الصعيد يعني وقت طويل جدا يدوب علي معاد الفرح وانتي عارفة ان افراحهم بتبقي بدري لو سمحتي يلا ورفع صوته يا نورهااااااان اخلصي
- خرجت نورهان وهي ترتدي فستان سواريه رقيق مع حجاب من نفس اللون ولكن درجه اغمق مع ميكب خفيف وكانت قمر وتحدثت والله يا قاسم انا جاهزة من بدري بس ماما اللي كانت مجهزتش
-فاتن وهي تلوي فهما يعني ياخويا رايح للسفيرة عزيزة معرفش مالهم البنات اللي هنا خلصو يعني مفيش غير الصعيد ورايح تجيبلي منها
-انس بغضب يوووووه احنا مش هنخلص بقي من الموضوع ده يا امي انا تعبت امتي بقي هتفهي انها خلاص بقت مراتي يعني تخصني واللي بتعمليه ده يمسها قبل ما يمسني ثم اقترب منها وجلس تحت قدميها وامسك يدها واكمل حديثه امي فاطمة بنت كويسة جدا صدقيني اما تعاشريها هتعرفي وكفاية انك تعرفي ان دي اللي قلبي اختارها مش يهمك ان ابنك يكون مبسوط اهي هيا دي بقي اللي هتسعدني .
-فاتن وهي تربط علي كتفه خلاص يابني ربنا يسعدك يلا عشان منتأخرش عالناس كل هذا ونورهان تقف وتنظر لامها وتحرك رأسها بالسلب فهي تعرفها حق المعرفة وتعرف انه لن يؤثر بها ما قاله انس ودعت ان يعدي هذه الليلة علي خير
.......................
هبطت صفية وجمال لاسفل ورأو عزيزة وعتمان فتحدثت عزيزة بصدمة
-يخيبك يا صفية ده انا جولت انتي روحتي لامك من بدري ايه اللي اخرك اكده دلوجتي يجولو اني اللي مرضيتش ابعتك يا منيلة
-صفية تحدثت بخجل وهيا تنظر لجمال ابدا يا مرت عمي ماهو انا يعني عشان ااا
-قاطعها جمال وهو يضحك علي كسوفها فهي لا تعلم ماذا تقؤل اتقول بسبب جمال وانها لا تريد ان تنام بعيدة عنه ،انا اللي جولتلها ياما متبيتش امبارح عشان العيال برضك وانا اللي اخرتها عشان كانت بتكويلي الهدوم وتشوف طلباتي
-عزيزة دققت النظر لوجههما وقد فهمت الآن كل شئ فردت بضحك ههههه اااه فهمت يا ابن بطني ماشي ربنا يهدي سركو يلا روحو عشان متتأخروش زمانهم واخدين علي خاطرهم
-قبل جمال يد ابوه وامه وتركهم واخذ صفية وذهب وصفية همست لجمال وهما في طريقهم للخارج ،هيا مرت عمي فهمت ايه خلاها تضحك اكده يا چمال
-جمال بضحكة عالية وهمس لها فهمت انك عاشجاني يا جلب چمال
-صفية بكسوف وهي تضع يدها علي وجهها بجد يا لهوي وامسك جمال يدها وهو يضحك علي كسوفها وخرجو مع دعوات عتمان وعزيزة لهم بصلاح الحال
.......................
في غرفة ادهم كان ممددا علي سريره ينظر لاعلي بلا مبالاه ولكن عقله يحاول ان يخرجه مما هو فيه بالتحدث معه ولكنه يلا يبالي بما يدور في ذهنه فهو يريد فقط ان يظل هكذا مر عام واكثر ولكنه لا يكترث لأي شئ فقلبه فقد حاسة الشعور اصبح خالي من اي شئ وكل شئ يعلم انه عليه التخطي والتقدم للامام ولكن لا يقدر فهو لم يتخطي عقبة حبه لفاطمة بعد وكل يوم يلع*ن نفسه الف مرة لأنه انجرف وراء سراب ووهم حبه لاخري نفخ بضيق ثم قام من مكانه واخذ حماما دافئا ثم ارتدي بدلته واخذ مفاتيحه وموبايله ونزل لاسفل فوجد امه وابيه يجلسان سويا فتحدث بهدوء
-صباح الخير ياما وقبل يدها وقبل يد ابيه ايضا صباح الخير يابا
-عتمان وعزيزة في صوت واحد صباح النور يا ولدي ثم تحدثت عزيزة بفرحة كويس انك نزلت يا ولدي بدل الحبسة اللي حابسها لحالك دي وبعدين لازمن تجف في فرح بت عمك احسن الناس تاكل وشنا
-نظر ادهم لامه بتردد وتحدث بصوت هادئ انا مش رايح الفرح ياما انا هعاود مصر تاني في شغل ولازمن اخلصه بسرعة
-نظرت عزيزة لعتمان بخيبة امل ولكنه حرك رأسه بأيجاب ووجه حديثه لها همليه لحاله يا عزيزة روح يا ولدي الله يعينك ويوفجك
-قبل ادهم يد والده بحنان وتحدث ربنا يبارك في عمرك يا بوي واردف وهو يخرج من باب المنزل السلام عليكم وتركهم وذهب
-ورفعت عزيزة يدها وهي تدعي له ربنا يسترها عليك يا ادهم ويريح جلبك يا ولدي يااارب
.....................
في غرفة فاطمة كانت غرام ترقص مع فاطمة علي الاغاني ودخلت عليهم صفية وهي خائفة من رد فعل اختها الصغيره فرأتها غرام فضحكت علي شكلها هكذا وذهبت تجاه الراديو واغلقته فجرت صفية تجاه فاطمة اللي فور ان رأت اختها كشرت واعطتها ظهرت فجرت عليها صفية واحتضنتها وهي تقول
-حجك عليا يا خايتي والله ما دريت بحالي غير وانا جايمة والضهر بيأذن ولم ترد عليها فاطمة فاكملت صفية عشان خاطري بجي ميبجاش جلبك اسود وبعدين ده كنت تعبانة امبارح جدا اه حتي اسألي جمال
-نظرت فاطمة هي وغرام لبعضهما وانفج*را الاثنان بالضحك علي كذب صفية الواضح وضوح الشمس ولم يتوقفا عن الضحك حتي اغتاظت صفية فنظرت لهم بغيظ وتحدثت
- وه بتضحكي علي ايه انتي وهيا ما تتحدتو
-غرام ردت بصعوبة من كثرة الضحك علي كدبك اللي باين اوي احنا بصراحة كنا عارفين انك مش هتيجي بدري وفاطمة قالت تعمل فيكي مقلب
-صفية بغيظ ممزوج بخجل بجي اكده مااشي يا فاطمة بتضحكي علي خايتك حبيبتك ماشي يا خيتي
-فاطمة قامت وهي تحضن صفية مع اني المفروض انا اللي ازعل عشان غرام تچيلي بدري وانتي اللي خيتي وبنت ابوي وامي تجيلي الضهرية بس ماشي لولا اني عذراكي وعارفة انك بتعشجي يا خيتي وواجعة لشوشتك مكنتش سكت
-احتضنتها صفية ايضا بحب وهي تتحدث ببعض البكاء مش مصدجة انك خلاص هتتجوزي وهتبجي عروسة جمر لع وهتهملينا وتجعدي في مصر
- بكت فاطمة ايضا وتحدثت بفرحة ولا انا يا خيتي مصدجة
-غرام وهي تمسح دمعة هربت من عينيها ما خلاص بقي هتقلبوها نكد ولا ايه وقاطعها دخول ام فاطمة سيدة وهي تتحدث صفية خدي غرام واطلعو دلوجتي عايزة فاطمة في كلمتين
-غرام اخذت صفية وهي تضحك بمرح يلا عشان ده وقت الام مع بنتها يا متطفله
-سيدة بضحك الله يعطيك ويراضيكي يا غرام يا بتي يارب
-غرام بوجع يارب يا ماما سيدة يسمع منك يلا يا صفية واخذتها وخرجت بهدوء
-امسكت سيدة يد فاطمة وجلسو مقابل بعض فتحدثت سيدة برزانة اسمعيني زين يا بتي والكلمتين دول حطيهم حلجة في ودنك واشتري مني انا امك وعمري ما هغشك واصل
-قبلت فاطمة يد امها بحب وتحدثت ربنا يخليكي ليا ياما
-تحدثت سيدة برزانة اسمعيني حماتك تبجي امك وجوزك بجي اهلك وناسك لو سمعتي كلامه هيشيلك علي دماغه العمر كله كلمة حاضر ونعم بتريح ومهما حوصل اوعي تحكي مشاكلك بينك وبين چوزك لحد مشاكلكو تتحل وسطيكو واوعي يا فاطمة في يوم تعلي صوتك عليه ولا تزعجي انتي متربية والبنتة الزين يا بتي هيا اللي تحافظ على بيتها وچوزها انتي هتجعدي في مصر يعني هتبجي لحالك عايزاكي تبجي بت بميت راچل وتشيلي چوزك وبيتك ومتجصريش معاه وفي حاچة كمان مهمة حماتك يا فاطمة مش سهلة انا عارفة انها صعبة من يوم كتب الكتاب لما جاتلك اهنه وشوفت معاملتها معاكي كيف ونظراتها عرفت انها مش سهلة وكويس انك هتجعدي لحالك مش معاها في الشجة اينعم فوجيها بدور بس ميجراش حاچة المهم تكوني بعيدة عنها واللي مطمني ان انس بيحبك وهيصونك يا بتي بس اوعاكي يا فاطمة تشتكي كل شوية الراچل يا بتي ملوش طولة بال خليكي صبورة وخليها تحبك بأخلاجك وطيبتك انا متوكدة انها هتحبك .
-فاطمة بخوف داخلي من كلام والدتها حاضر ياما حاضر وبداخلها تعلم ان حماتها فاتن تكر*ها ولا تريدها ولكن هي قررت ان تجلعلها تحبها لاجل انس وحبه لها ستفعل ذلك وفاقت علي رنة فونها ورأت ان انس المتصل
-سيدة ردي علي چوزك يا بتي هسيبك انا واشوف اللي ورايا وتركتها وخرجت
-ردت فاطمة بفرحة الوو انس كيفك
-انس بهمس وحشتيني وضحك وتحدث بصوت عالي انا خلاص في السكة قولت اطمن علي عروستي عاملة ايه
-فاطمة ضحكت فهي تعلم ان والدته بجانبه لذلك تحدث بهمس حين قال لها وحشتيني فردت احم بخجل وانت كمان وانا زينة متجلجش
-ماشي يا حبيبتي لو في اي حاجة كلميني وانا لما اقرب هرن عليكي اقؤلك
-كانت امه فاتن تتابعه وهي تلوي فمها وتتحدث في نفسها كلت عقله بنت سيدة ماشي ان ما وريتك
- وكانت تنظر نورهان تنظر لامها فهي كانت تجلس في الخلف تتابع رد فعل امها مع اخيها وهو يتحدث في الهاتف وشردت في كامل فهي رفضته لهذا السبب فهي رغم انها تكن مشاعر له الا انها خائفة من الحياه في الصعيد وخائفة من ان تكون سيدة مثل امها فهي تري معاملة امها لفاطمة فأمها تتخيل ان فاطمة اخذت ابنها منها ومهما حاولت نورهان التحدث معها وتغيير تلك الفكرة لكنها لا تقبل غير ما في رأسها وتذكرت حين بلغت اخاها الرفض بحجة انها لا تحب الصعيد ولا تريد العيش بها وانها ايضا لا تحب كامل
..................
في بيت الحج عرفة كان صقر في طريقة للداخل ليبحث عن غرام فوجدها جالسة فى ركن بعيد عن احد فتقدم ناحيتها بلهفة وهو يجلس بجانبها غرام مالك فيكي ايه طمنيني
-غرام رفعت رأسها له والدموع بعينيها وابتسمت بحزن مفيش حاجة يا حبيبي انا كويسة متقلقش
-كويسة ايه بس والدموع دي چت منين خبريني مالك متهملنيش اكده
-صدقني يا صقر انا كويسة انا بس رجلي وجعتني شوية فقولت اريح
-طيب تعالي يلا نروحه الدار ترتاحي انتي اهنه من بدري
-لالا متقلقش انا كويسة يلا روح انت شوف اللي وراك وانا هطلع لفاطمة
-صقر وهو يمسك يدها غرام عشان خاطري لو تعبتي جوليلي ونمشي من اهنه ماشي
-حاضر يا حبيبي والله يلا بقي روح
-ماشي يا حبيبتي وتركها وذهب وهي مسحت عينيها بوجع ودعت ربنا ان يرزقها بطفل من صقر فهي تعشقه وتعلم انه لم يتحدث في الامر معها لكي لا يجرحها ولكن قلبها يؤلمها كلما نظرت في عينيه وتري الحزن بها وقامت وصعدت لفاطمة
.....................
كان ادهم في طريقه للقاهرة وكان عقله مشوش وبه الكثير من الافكار والاحاديث فضغط علي الفرامل ووقف بجانب الطريق وهو يأخذ نفسه بصعوبة وهبط من السيارة ووقف ينزع الجرافت بضيق وبعد قليل نظر مطولا لشئ ما ملقي علي الارض بعيد وعندما دقق نظره اتصدم وفتح عينيه باندهاش وذهب مسرعا تجاه الشئ الملقي علي الارض فوجد............
يتبع الفصل التالي اضغط هنا
الفهرس يحتوي على جميع فصول الرواية "رواية غرام صعيدي" اضغط على اسم الرواية
تعليقات
إرسال تعليق