رواية ابن عمي الفصل الثالث 3 بقلم ناهد خالد

 رواية ابن عمي الفصل الثالث 3 بقلم ناهد خالد

رواية ابن عمي الفصل الثالث 3 بقلم ناهد خالد

ابن عمي الجزء الثالث 

_ مش عيب اننا نحب بس العيب اننا نتزل للحب ده، وانا معملتش كده ولا عمري كنت هعمل، الحب مش ب ايدينا اه بس افعالنا بايدينا، زيك كده حقدك اللي جايبك لحد هنا مخصوص عشان تعرفيني انك عارفه سري الخطير مش بايدك بس الافعال اللي بتنتج عنه بايدك، كنتي فاكره اي؟ اني هعيط وانهار وتشوفيني مكسوره لاني مش طايله حاجه بقت في ايدك انتي! لا ياحبيبتي العنوان غلط، انا ادوس علي اي حاجه بجزمتي لو كانت هتقل مني، اما بقي بالنسبه ل علي فهو من وقت ما كلمني عليكي وانا رميته من بالي تماماً، ومبقاش فارقلي، لان مادام بص ليكي او لغيرك عمري ما هقبل في يوم اني اكون دور ثانوي في حياه حد، يبقي البطله يا مبقاش، فهمتي يا... يا خطيبه ابن عمي.

كانت جايه تقهرها وتشوف انهيارها فعلاً زي ما هي قالت بس اللي حصل ان السحر انقلب ع الساحر وبقيت هي اللي قاعده بتو'لع من كلام ساره وهي مش عارفه ترد عليها بايه ومش لاقيه كلام تقوله أصلا.... اتفتح الباب ودخلت ام ساره وابوها وعلي...

_صحيح مبروك ياعلي... معلش مقدرتش اجي معاكم رغم اني كان نفسي احضر مناسبه سعيده زي دي بس حظك وحش عرفت ان واحده صحبتي من زمان وعزيزه عليا عملت حادثه وماتت.

كانت بتتكلم بمنتهي الهدوء والبرود... فضل باصص لها شويه بيحاول يوصل لأي حاجه ورا كلامها ده زي حزن او و'جع اي مشاعر من اللي طبيعي تكون موجوده دلوقتي... بس ملقاش... ابتسامه هاديه وعيون واثقه وبرود غير طبيعي!....

_الله يبارك فيكي..

قالها بتوتر وهو مستغرب نفسه هو اللي متوتر! مش المفروض العكس! هو اي اللي بيحصل؟!

اتفتح الباب ودخل شخص جديد هتشفوه لأول مره "يوسف" ابن خالة "ساره" اللي رجع من السفر من يومين بعد غياب اكتر من ٥ سنين.. وعلاقته هو وساره متقلش عن علاقة ساره ب علي "زمان"...

_يوسف..

قالتها ساره بلهفه، فقرب يوسف منها وهو بيقول:

_اي يا ساره الف سلامه عليكي، انا اول ما عرفت جيت جري.

رفع "علي" حاجبه بغيظ وهو عارف كويس من ده بس عمره ما حب "يوسف" ببساطه لانه دايماً كان بيشاركه اهتمامات ساره قبل ما يسافر وكان دايماً بيلفت انتباها وواخد معظم اهتمامها وعلي ارتاح كتير بعد ما سافر... اي اللي رجعه ده! سؤال قاله علي في باله وهو بيتابع اللي بيحصل قدامه.

_تسلم انا كنت عارفه وكنت لسه هقولهم ميقولش لك عشان متجيش بليل كده.

_ده كلام ياهبله انتي... طب والله كنت ملصت ودانك زي زمان فاكره؟

ضحكت وهي بتقول:

_طبعاً فاكره ده انت كنت شر'ير خالص.

_انا! ده انا طول عمري ملاك وبحبك.

_ما اي بقي مش يلا الدكتور كتب ع الخروج مفيش داعي القاعده ولا اي ياعمي!؟

قالها علي وهو بيقطع كلامهم بغيظ اكبر بس بيحاول يبان انه عادي...

_ااه يلا بقي عشان منتأخرش...

قالت ساره ببرود :

_علي خد انت نهي وصلها واحنا يوسف هيوصلنا...

بصلها بضيق وقال :

_وده لي يعني مانا اللي جايبكوا!

_ايوه ومين هيوصل نهي؟

_خلاص ياعلي وصل...هي مين دي؟

قالها يوسف باستغراب باين لكنه في الحقيقه استهبال...

ردت عليه ساره بابتسامه :

_دي نهي يا جو خطيبة علي...

_بجد مبروك ياعلي أخيراً خدت الخطوه دي... 

_اي أخيراً دي! انتي شايفني عجزت! 

_لا مقصدش طبعاً عموما مبروك. 

_شكراً. 

قالها علي من غير نفس وهو مش طايقه.. 

_طب يلا ياساره.. 

_يلا يابابا.. 

حاولت تقوم فقال يوسف باهتمام:

_هتقدري تقفي؟ 

هزت راسها بهدوء وسندت علي مامتها وفعلا خرجوا من المستشفي... 

**********

بعد مارجعوا البيت قعد يوسف وساره لوحدهم في الصاله وامها بتحضر العشا وابوها بيصلي.. 

_يا واد يا متفاجئ أنت.. قال متعرفش ان علي خطب. 

_يابنتي مانا لازم اعمل كده عشان ميشكوش انك قايلالي حاجه... 

_ميشكوا فيها اي.. 

_اه فيعرفوا ان الموضوع قا'هرك لدرجه انك حكتيه لابن خالتك اللي بقالك خمس سنين مشفتهوش.. انتي عبيطه يابه؟ احنا عاوزين نبين ان الموضوع مش في دماغك أصلاً... 

_ماشي. 

_وانتي عامله اي دلوقت؟ 

_الحمد لله.. 

_ومين هون عليكي الوقت؟ 

_يوسف.. 

_مانا عارف انا أصلاً مهوناتي... 

_يوسف... 

_يابنتي خلاص عرفت ان اننا مش محتاجه تأكدي. 

_انت بايخ علي فكره... 

_بس عسل ودمي شربات.. 

_يابارد... 

_احترمي نفسك يابت ومتنسيش اني اكبر منك. 

وقفت وحطت ايديها في وسطها :

_اكبر مين يابو اكبر... مكنوش سنتين دول الي هتزلني بيهم... 

_ولو اكبر منك بيوم يعرف عنك بسنه.. ثم انتي هتردحيلي يابنت خالتي والله عال خالتي عرفت تربي بصحيح.. 

_متربيه غصب عنك احترم نفسك... 

***********

من دقيقه 

رن علي جرس الباب بس هم مسمعوش لانهم مشغولين بالخناق طبعاً.. فتحتله ام ساره ودخل سمع الدوشه وصوتهم العالي ومرات عمه بتقوله:

_ادخل سكت ولاد المجانين دول ولا كأنهم أطفال واستني اتعشي معانا... 

********

لما دخل وقف علي باب الاوضه وهو شايفهم بيتخانقوا.. غصب عنه ابتسم وهو بيفتكر انه من فتره قريبه كان ده حاله مع ساره... كانوا دايما بيتخانقوا وتيجي مامته او مرات عمه تفض بينهم... بس الحال مبقاش زي الاول.. حس انه فعلا اشتاق لخناقهم سوي حتي لو كان علي كيس شيبسي زي اللي حصل قبل كده.... 

فلاش.. 

_سيب الشيبسي بتاعي يلا.. 

_يلا! طب تصدقي مش هتاخديه.. وانا هاكله كله امشي اعملي شاي. 

_اكونش الخدامه اللي جبهالك عمي وانا معرفش! 

_واي لازمه عمي بقي! 

_ولو لازم احترمه.. 

_حوشي يابت وانتي محترمه اوي... 

_انا محترمه غصب عنك يا صفيق... 

_اي صفيق دي كمان! 

_معرفش بس هي شتيمه سلمي قالتها ل عمر.. 

_سلمي مين وعمر مين؟

_تامر حسني ومي عز الدين ياجاهل أنت.. 

_اللهم طولك ياروح.... طب امشي من قدامي. 

_يابجاحتك انا اللي دافعه فلوس الشيبسي ده هات فلوسه وانا اسيبه لك.. 

_وانا وانتي اي ياسو مش واحد اجري اعملي شاي. 

_لا مش واحد... والشاي ده تطفحه قبل ما تشربه ان شاء الله... 

_بتدعي عليا يابنت عمي! 

_اه وان شاء الله تطفح الشبسي كمان لو كلت حاجه تانيه منه... 

كان وقتها بياكل واحده فشرق وفضل يكح... 

_اي ده ولا يا علي... ولا انت هتموت ولا اي.. يخربيتك هو انا الشيخ الشعراوي ده انا اول مره دعوه ليا تستجاب... 

جريت عليه وهي عماله تخبط علي ضهره وهو بيكح جامد... بدأت عنيها تدمع وهي بتقول :

_انا اسفه والله مكنتش اقصد انك تطفحه فعلاً انا اسفه... علي مت''... موتش انا اسفه يلا والله... 

حس انه هدي وبقي كويس بصلها لاقها بتعيط.... فضل يضحك عليها وهي بتبصله بغيظ :

_الله يخربيت هبلك يعني مانتيش قد الدعا بتدعي لي... بعدين اي مت... موتش دي هو انتي شايفني عندي ذب... حه! 

_وسع يابايخ انا غلطانه اني خفت عليك... 

قالتها وهي بتبعد عنه وطلعت من الشقه... طلع وراها وهو بيقول :

_بت ياسو بت خدي بس هقولك... 

__________________

فاق علي صوت يوسف وهو بيجري وراها في اوضه الصالون وكله ده ولسه مشفهوش... او اعتقد كده.. 

كانت ساره بتصرخ وهي تلف حوالين الكراسي ويوسف وراها...سمعوا صوت علي بيقول بعصبيه:

_اي شغل العيال ده ماتبس انت وهي... 

_وانت مالك ياعلي ياويكا انت... 

قالها يوسف ب استفزاز... كالعاده كل ما يحب يضايق علي يقوله " علي ويكا"... رد علي بعصبيه:

_احترم نفسك وبطل سخافه احنا مش العيال بتوع زمان عشان نسخف علي بعض... 

_اتكلم عن نفسك انا عن نفسي لسه عيل... 

_ياختي احلي عيل ياناس... 

قالتها ساره بضحك.. فسمعت صوت علي بعصبيه اكبر:

_ماتحترمي نفسك انتي كمان اي العيله الهبله دي! 

_مانت من العيله ولا اي؟ 

_بس مش اهبل زيكوا... فكرت ان سفرك عقلك بس الظاهر لأ... 

_لي محسسنا اننا عجزنا! 

_اومال لو مكنتش اكبر مني! 

_شوف انا اكبر منك بس اللي يشوفنا يقول اني أصغر منك بكتير... صح ياسوسو... 

_سوسو! 

رددها علي باشمئزاز 

ردت ساره متجاهله علي تماماً :

_ حصل ياجو... 

_علي فكره انتوا الاتنين اسخف من بعض اتحر'قوا بجاز انا اللي غلطان.. 

قالها بعصبيه شديده وسابهم ومشي... سمعوا رزعه باب الشقه فانهاروا في الضحك... قال يوسف وهو بيضحك:

_لسه زي ماهو بيتقمص ويسيبنا ويمشي، وبيقول علينا احنا عيال... 

بطلت ساره ضحك وقالت:

_انت لي مصمم تضايقه وغرضك اي من انك تتعمد تتعامل كده معايا قدامه... 

_ملكيش دعوه جاريني انتي بس وانتي هتعرفي في الاخر... 

دخلت امها وهي بتقول :

_هو علي مشي لي قلتله يتعشي معانا؟ 

_سيبك من علي ياخالتي وقوليلي عامله عشا اي؟...

بعدوا عنها وهم بيتكلموا في الأكل... طلعت تليفونها وطلبت رقم نور. 

_ساره ازيك

_كويسه... عاوزه اشوفك بكره... 

_حاضر هجيلك.. 

_ماشي.. 

_ساره انتي كويسه بجد حاسه في حاجه؟ 

_هحكيلك بكره.. 

_ماشي... 

**************

تاني يوم *

_اي ياساره مالك! بقالك كتير بتبصيلي اي الي حصل؟

_قوليلي يانور احنا نعرف بعض من امتي؟ 

_من ابتدائي لي؟ 

- اصل بعيد عنك اكتشفت اني كل الفتره دي معرفكيش. 

_في اي ياساره اي الكلام ده؟ 

قالتها نور بتوتر فردت ساره وهي بتبص في عنيها.. 

_عمري ما شكيت ولو للحظه اني اقولك سر وتفشيه.. مش بس كده ده انتي كمان فضحتيني وسجلتيلي بالحرف اه احسن كلمه تقع منك كده ولا كده لو حكيتي... 

بصتلها نور بدموع :

_ساره انا هفهمك... 

وقفت ساره وهي بتصرخ فيها :

_تفهميني اي يا صاحبة عمري ها هتفهميني اي.. هتفهميني انك روحتي فضحتيني وقليتي مني قدامه روحتي فضحتي سري اللي أمنتك عليه، روحتي تتذلليله عشان يرضي يحب صاحبتك البايره اللي قلبها مكسور ياعيني... هتفهميني اي.. ده انا عمري ما توقعت الغد'ر منك... مكنتش قادره اروح انا اقوله.. مكنتش قادره اعملها ردي عليا... 

صرخت بآخر كلمه بعنف اكبر.. فوقفت نور قدامها وهي بتعيط وبترتجف :

_أنا... انا اسفه فكرت اني بساعدك.. 

_مين طلب منك مساعدتي.. مين سمحلك تقرري نيابه عني.. انتي عارفه انتي عملتي اي!.. انتي قللتي مني قدامه وهو راح قلل مني قدام خطيبته وبقيت مسخره بينهم هما الاتنين...اي مصدومه! اه ماهو الحلو راح قال لنهي علي اللي قولتيه له.. وهي جت تشمت فيا وتعرفني انها عارفه... بس ماعاش ولا كان اللي يشمت فيا ولا عمري هعطيه لحد الفرصه لكده... بس للاسف انتي اللي عطتيها لهم من الأول. 

_انا اسفه قصدي كان خير والله.. 

_وانا مش هعرف اثق فيكي تاني ولا هعرف اقبلك في حياتي تاني... انا كمان اسفه... 

لفت وشها وهي بتقول :

_اطلعي بر.... 

سكتت لما شافت علي واقف علي باب الاوضه وملامح الصدمه علي وشه وقال :

_نهي قالتلك اي؟ 

بصت له بسخريه وقالت:

_كويس انك جيت عشان تاخد نصيبك انت كمان..... 

يتبع الفصل التالي اضغط هنا

الفهرس يحتوي على جميع فصول الرواية " رواية ابن عمي" اضغط على اسم الرواية